Ostroh BibleПерша книга хронік, розділ 22
Шрифт:
Запис:
1
Рече же дв҃дъ с̂е е҆сть до́мъ бж҃їи. и҆ с̂е ѻ҆лта́рь на всѐсож꙽же́нїѧ і҆и҆л҃ю·
2
И҆ заповѣда да соберꙋтсѧ вс̂и пришел̑҇цы ѿ землѧ̀ і҆и҆л҃евы. и҆ да поста́ви ѿ них̑ ка́менно сѣ́чецъ къ сѣченїю ка́менїѧ ѹ҆краше́нїѧ да соѕи́ждетсѧ до́мъ бж҃їи·
3
Желѣ́зо же мно́го на гво́зди две́ремъ и҆ вра́томъ на спое́нїе, ѹ҆гото́ва дв҃дъ. и҆ мѣ́ди та́коже мно́го без꙽ числа̀·
4
И҆ дре́вом̑ же ке́дровомъ не бѣ числа̀. ꙗ҆́ко сидо́ни и҆ тѷри принесо́ша дре́въ ке́дровыхъ мно́го дв҃дꙋ·
5
И҆ рече дв҃дъ. соломон̑҇ сн҃ъ мо́и ма́лъ. до́мъ же е҆же съзида́ти гв҃и въ вели́чество вы́соко, и҆ во и́мѧ, и҆ въ сла́вꙋ въ всю̀ зе́млю, ѹ҆гото́влю е҆мꙋ. и҆ вс̂е мно́жество ѹ҆гото́ва двд̑ъ прежде скон꙽ча́нїа свое҆го гв҃и·
6
Возва же соло́мона сн҃а свое҆го. и҆ заповѣ́да е҆мꙋ да соѕи́ждетъ до́мъ г҃ꙋ б҃ꙋ і҆и҆л҃евꙋ·
7
Рече же дв҃дъ къ соло́монꙋ, сн҃ꙋ мо́и. во́лѧ моа бы́сть да соѕи́ждꙋ дом̑ и҆́мени г҃а б҃а мое҆го·
8
Но бы́сть слово гн҃е къ мнѣ̀ гл҃ющи. мно́гы кро́ви пролїѧлъ е҆си. и҆ мно́ги бра́ни сътвори́лъ е҆си. не мо́жеши соѕида́ти до́мꙋ и҆́мени мое҆го. ꙗ҆́ко мно́ги пролїѧвъ кро́ви предо мно́ю·
9
Се сн҃ъ и҆же ро́дит̑сѧ тебѣ̀, се́и бꙋ́дет̑ мꙋ́жъ поко́инъ. и҆ ѹ҆поко́ю е҆го ѿ всх̑ѣ вра́гъ е҆го по ѻ҆́крс̑҇тъ. занѐ соло́монъ и҆́мѧ е҆го наречетсѧ. и҆ ми́ръ и҆ поко́и да́мъ е҆мꙋ въ і҆и҆л҃и вс̂ѧ дн҃и е҆го·
10
То́й соѕи́ждет̑ до́мъ и҆́мени мое҆мꙋ. и҆ то́й бꙋ́детъ мн̂ѣ въ сн҃а, и҆ а́зъ бꙋдꙋ е҆мꙋ въ ѿц҃а. і҆ и҆спра́влю прс̑҇тол̑҇ црс̑҇тва е҆го на і҆и҆л҃и въ вѣ́ки·
11
Нн҃ѣ ѹ҆бо сн҃ꙋ мо́и бꙋ́детъ г҃ь с тобою, и҆ преспѣва́и и҆ соѕиждѝ до́мъ г҃ꙋ б҃ꙋ твое҆мꙋ. ꙗ҆́ко гл҃алъ е҆сть ѻ҆ тебѣ̀·
12
дасть же тебѣ̀ ра́зꙋмъ и҆ ѹ҆мъ г҃ь, да ѹ҆пастѝ мо́жеши і҆и҆л҃ѧ. и҆ съхрани твори́ти зако́нъ г҃а б҃а твое҆го·
13
Тогда̀ б̂о пред̑спѣва́ти мо́жеши. а҆́ще съхрани́ши за́повѣди и҆ сꙋдбы и҆́хже повелѣ г҃ь моѷсїѻ́ви да ѹ҆чи́тъ і҆и҆л҃ь. ѹ҆крѣпи́сѧ и҆ мꙋжественѣ сътворѝ. не ѹ҆бо́исѧ ни страши́сѧ·
14
Се аз̑ въ ѹ҆бо́жествѣ мое҆мъ ѹ҆гото́вах̑ до́мꙋ гн҃ю. зла́та, талан̑҇тъ. ҂р҃. и҆ сребра̀ ты́сѧща ти́сѧщъ талан꙽тъ. мѣ́ди же и҆ желѣзꙋ нѣсть възвѣше́нїѧ, побѣди́ша б̂о число̀ вели́чествомъ. и҆ древа и҆ ка́менїѧ ѹ҆гото́вах̑ и҆ к си́мъ да приложи́ши·
15
И с тобо́ю г҃ь. и҆ приложиши къ мно́жествꙋ творѧ́щихъ дѣ́ла, хꙋдо́жъницы, на всѣ̀ расходы. ѹ҆модѣ́лницы. ка́мен꙽носѣчецъ, и҆ рꙋкодѣлницы дре́вомъ, и҆ всѣхъ ѹ҆мѣ́лыхъ, к сотворе́нїю дѣ́ла, разꙋмнѣ́иших̑·
16
Въ зла́тѣ и҆ сребрѣ̀. въ мѣ́ди и҆ желѣзѣ. и҆м꙽же нѣ́сть числа̀.
17
Въста́ни б̂о и҆ сътворѝ. и҆ бꙋ́детъ г҃ь с тобо́ю·
18
И҆ повелѣ же дв҃дъ всѣмъ начал꙽ни́комъ і҆и҆л҃евымъ, да помагают̑ соло́монꙋ сн҃ꙋ е҆го·
19
Ви́дите гл҃юще да е҆сть г҃ь б҃ъ ва́шъ с ва́ми, и҆ дасть вамъ поко́и по ѻ́крс̑҇тъ. занѐ да́сть вс̂ѧ врагы̀ ваша въ рꙋ́ки ва́ша. и҆ пови́н꙽на бꙋ́детъ землѧ̀ пред̑ гм҃ъ. и҆ пред̑ люд̑ми е҆го·
20
Нн҃ѣ ѹ҆бо да́ите срд̑ца ва́ша и҆ дш҃а ва́ша. да възы́щете г҃а б҃а ва́шего. и҆ воста́ните и҆ соѕида́ите ст҃ительство г҃ꙋ б҃ꙋ ва́шемꙋ да въведет̑сѧ кїѻ́тъ завѣта гн҃ѧ·
21
и҆ сосꙋ́ды ѻ҆сщ҃ен꙽ны домꙋ̀ бж҃їѧ и҆же соѕи́ждетсѧ и҆́мени гн҃ю·
Джерела
