Ostroh Bible❧Перша книга хронік, розділ 28

1

Собра же дв҃дъ вс̂ѧ нача́лницы і҆и҆л҃евы. нача́лниковъ сꙋдїи и҆ колѣнъ. и҆ всѣхъ пред̑ста́телїи по́л꙽ковъ, и҆же слꙋжа́хꙋ по всѧ̀ д҃ни стрегꙋще цр҃ѧ и҆ начал̑҇никовъ ты́сѧщеи, и҆ со́тников̑҇ и҆ постелниковъ. і҆ и҆же над̑ сꙋщимъ е҆го и҆ над̑ всѣмъ въздръжа́нїемъ цр҃евымъ. и҆ сн҃овъ свои҆хъ со е҆внꙋ́хами и҆ си́лныхъ, и҆ храбрѣиших̑, въ во́инов̑҇ въ і҆ерс̑҇лимъ·

2

Воста́ же дв҃дъ цр҃ь и҆ рече. слы́шите м̂ѧ бра́тїа моѧ̀, и҆ лю́дїе моѝ. помы́слихъ на срд̑цꙋ моем̑ да съзи́ждꙋ до́мъ. въ не́мже поко́и҆тсѧ кїѻ́тъ завѣта гн҃ѧ, и҆ под̑но́жїе нога́мъ г҃а б҃а нашего. и҆ къ съзиданїю вс̂ѧ ѹ҆готовахъ потре́бнаѧ·

3

Бг҃ъ же речѐ мнѣ. не сози́ждеши до́мꙋ и҆меновати и҆́мени мое҆го в не́мъ. зане е҆си мꙋжъ бра́н꙽никъ, и҆ кро́ви пролїѧлъ е҆си·

4

Но и҆збра̀ г҃ь б҃ъ і҆и҃лев̑҇ менѐ ѿ всего̀ до́мꙋ ѿц҃а мое҆го. да бꙋ́дꙋ цр҃ь над̑ і҆и҆л҃емъ во вѣ́ки. и҆ ѿ і҆ѹ́ды и҆збра̀ нача́лника дом̑ ѿц҃а мое҆го. и҆ ѿ сн҃овъ ѿц҃а мое҆го ѹ҆годѝ е҆мꙋ да м̂ѧ и҆збере цр҃ѧ надо всѣмъ і҆и҆л҃ем꙽·

5

ѿ сн҃овъ же мои҆хъ всѣхъ. сн҃ы б̂о мн̂ѣ мно́ги да́сть г҃ь. и҆збра̀ соло́мона сн҃а мое҆го. да сѣдѣтъ на престолѣ црс̑҇тва гн҃ѧ над̑ і҆и҆л҃емъ·

6

Реч̑҇ же мнѣ б҃ъ. соло́монъ сн҃ъ тво́и соѕи́ждетъ домъ мо́и, и҆ дво́ръ мо́и. занѐ того и҆збрах̑ мн̂ѣ въ сн҃а бы́ти, и҆ а́зъ бꙋдꙋ е҆мꙋ въ ѿц҃а·

7

И҆ ѹ҆крѣплю̀ црс̑҇тво е҆го даже до́ вѣка. а́ще ѹ҆крѣпит̑сѧ съхрани́ти за́повѣди моа и҆ сꙋдбы̀ моѧ. ꙗ҆́ко и҆ днес̑҇·

8

И҆ нн҃ѣ ѹ҆бо пред̑ лицемъ всего̀ събра́нїѧ гн҃ѧ, въ ѹ́ши б҃а нашего. съхра́ните и҆ в꙽зыщите вс̂ѧ за́повѣди г҃а б҃а на́шего. да наслѣди́те зе́млю бл҃гꙋ, и҆ ѻ҆ста́вите ѧ҆̀ сн҃омъ ва́шимъ по вас̑҇ даже до́ вѣка·

9

И҆ нн҃ѣ соло́моне сн҃е мо́и. да зна́еши б҃а ѿц҃ъ твои҆хъ, и҆ слꙋжи е҆мꙋ срд̑цемъ съвръше́нымъ, и҆ дш҃евною во́лею. всѣхъ б̂о срд̑цъ възыска́тель г҃ь. и҆ всѣхъ ѹ҆мне́нїи помышле́нїѧ разꙋмѣе҆тъ·

10

А҆́ще възы́щеши е҆го ѻ҆брѧ́щетъ ти сѧ·

11

а҆́ще же ѻ҆ста̂виши е҆го, ѻ҆ста́витъ т̂ѧ въ вѣ́ки·

12

Нн҃ѣ ѹ҆бо ви́ждь, и҆же и҆збра̀ т̂ѧ г҃ь, да соѕи́ждеши е҆мꙋ дом̑ ст҃ител̑҇ства. крѣпи́сѧ и҆ съвръши·

13

дасть же дв҃дъ соло́монꙋ сн҃ꙋ свое҆мꙋ. ѻ҆писа́нїѧ притворов̑҇ и҆ цр҃кве и҆ кама́ръ и҆ го́рницъ, и҆ полага́лищъ в꙽нꙋтрънихъ, и҆ до́мꙋ ѻ҆чище́нїѧ·

14

Є҆щѐ и҆ вс̂ѧ подо́бїѧ и҆же помы́сли дх҃омъ е҆го дворо́мъ до́мꙋ гн҃ѧ и҆ комарам̑ по ѻ҆́крс̑҇тъ въ сокро́вищи до́мꙋ гн҃ѧ, и҆ въ волага́лища ст҃ыхъ·

15

Раздѣле́нїѧ же по всѧ дн҃и сщ҃енъствомъ. и҆ левѷтом̑, въ всѧ̀ дѣла слꙋже́нїѧ до́мꙋ гн҃ѧ. и҆ всѣхъ кадил̑҇ницъ, и҆ сосꙋдовъ слꙋже́бныхъ цр҃кви гн҃ѧ. и҆ мѣрꙋ тѧ́гости златыхъ, и҆ сре́бреныхъ на вс̂ѧ сосꙋды сщ҃енныа даде е҆мꙋ, и҆ на всѧ сосꙋды сщ҃енныѧ даде е҆мꙋ подо́бнꙋ вагꙋ̀ трапе́зы пред̑ложе́нїѧ. ко́ждо трапе́за зла́та да е҆сть·

16

На ѹ́дицы сре́брены, и҆ на възлїѧ́л꙽ницы. и҆ на фїѧ́лы зла́тые и҆ важе́нїе зла́тыхъ, и҆ сре́бреныхъ. и҆ кади́лницъ, и҆ подо́бїе ко́ждо подъ вагꙋ̀·

17

И жръто́вникъ ѳимїѧм̑ныи ѿ зла́та пречи́ста вагꙋ̀ ѻ҆казꙋ́ емꙋ и҆ подо́бїе въѻ҆рꙋже́нїѧ. херꙋви́момъ простира́ющимъ кри́лѣ, и҆ ѻ҆сѣнѧ́юще къ кїѻ́тꙋ завѣта гн҃ѧ·

18

Вс̂ѧ писан꙽наѧ рꙋко́ю гн҃ею да́сть дв҃дъ соло́монꙋ по бы́в꙽шемꙋ къ немꙋ ра́зꙋмꙋ по дѣлꙋ ѻ҆браже́нїѧ·

19

И҆ рече двд̑ъ соло́монꙋ сн҃ꙋ свое҆мꙋ.

20

Мꙋжествен̑҇нѣ творѝ, и҆ ѹ҆крѣпи́сѧ и҆ сътворѝ. не бойсѧ и҆ не страши́сѧ. г҃ь б̂о б҃ъ мои с тобо́ю бꙋдетъ. и҆ не ѿстꙋпит̑ ѿ тебе. н̂и ѻ҆ста́витъ тебѐ. до́нъдеже съврърши́ши т̂ы всѐ дѣло слꙋже́нїѧ до́мꙋ гн҃ѧ, с̂е подобїе цр҃кви и҆ до́мꙋ е҆го, и҆ кама́ръ е҆го, и҆ го́рницъ и҆ положе́нїи внꙋтрънихъ, и҆ до́мꙋ ѻ҆цѣще́нїѧ, и҆ подо́бїе домꙋ гн҃ѧ. с̂е раздѣле́нїе по всѧ̀ дн҃и сщ҃ен꙽ником, и҆ левѷтомъ въ всѐ слꙋже́нїе до́мꙋ гн҃ѧ·

21

И҆ да пред̑стои҆тъ тебѣ̀. и҆ всѧ́кїи любѧ́и мꙋдрость, по всѧк̑҇ хꙋдожъствꙋѧ́и, и҆ кнѧ́зи и҆ вс̂и лю́дїе въ всѧ̀ словеса̀ твоѧ̀·