Ostroh Bible❧Перша книга хронік, розділ 29

1

Гл҃алъ же е҆сть двд̑ъ цр҃ь къ все́и цр҃кви. соло́монъ сн҃ъ мо́и е҆го́же и҆збра̀ г҃ь е҆ще ѻ҆троча́темъ мла́дымъ. и҆ дѣ́ло вели́ко е҆сть занѐ не бо̀ чл҃кꙋ ѹ҆гото́витсѧ ѻ҆бита́нїе. но г҃ꙋ. аз̑ б̂о в꙽сѣми си́лами мои́ми. ѹ҆го́товахъ росход̑. ра́ди до́мꙋ г҃а б҃а мое҆го. зла́то, и҆ сребро̀. мѣ́дь, желѣ́зо. древа̀, ка́менїе, мармо́ръ, и҆ мно́жество ка́менїи мно́гоцѣнныхъ и҆ разли́чныхъ, и҆ в꙽сѣ́хъ чс̑҇тныхъ ка́менїи, и҆ каменїи париѹ҆совых̑ мно́го, и҆ е҆ще въ е҆́же бл҃говоли́хъ въ до́мъ гн҃ь, е҆сть ѹ҆ менѐ е҆же пригото́вахъ, зла́то, и҆ сребро̀, и҆ с̂е да́хъ въ до́мъ б҃а мое҆го въ высотꙋ̀, развѣ ѻ҆́ныхъ и҆же ѹ҆гото́вахꙋ въ хра́мъ гн҃ь, ҂г҃, тала́нтъ злата ѿ зла́та е҆сꙋфирска. и҆ ҂з҃, тала́н꙽тъ сребра̀ и҆скꙋшенѣ́иша къ позлаще́нїю стѣнъ цр҃кви, и҆ гд̂ѣ ко́гда же дѣ́ло е҆сть зла́то ѿ зла́та, и҆ гдѣ̀ е҆гда же дѣ́ло е҆сть сребро̀ ѿ сребра̀, и҆ въ всѧ̀ дѣ́ла и҆же бꙋ́дꙋтъ под̑ рꙋ́кꙋ ѹ҆модѣ́лникомъ, и҆ а́ще кт̂о бл҃гово́ленъ, и҆спо́лнити рꙋ́кꙋ свою, дне́сь, и҆ да́сть чт̂о хо́щетъ г҃ꙋ, и҆ ѻ҆бѣща́ша нача́лницы ѻ҆би́телем̑, и҆ кн҃ѕи колѣнъ і҆и҆л҃евъ, и҆ ты́сѧщники, и҆ со́тники, и҆ нача́лницы дл̑҇ѣ, і҆ и҆коно́мы цр҃евы, да́ша же на дѣ́ла до́мꙋ гн҃ѧ зла́та тала́н꙽тъ пѧ́ть ты́сѧщъ, и҆ зла́тыхъ де́сѧтъ ты́сѧщъ, и҆ сребра̀ талантъ, і҃, ты́сѧщъ·

2

И҆ мѣ́ди тала́нтъ, и҃і, тысѧщъ, желѣза же р҃, ты́сѧщ꙽ тала́нтъ, и҆ населницы и҆же ѻ҆брѣтоша ка́менїе, възда́ша въ положе́нїе до́мꙋ гн҃ѧ, под̑ рꙋкꙋ і҆и҆лѧ, геѳо́нїина, възвесели́ша же сѧ лю́дїе е҆гда̀ мл҃твы во́лею ѻ҆бѣща́ша, срд̑цем̑ б̂о всѣмъ приноша́хꙋ та̀ г҃ꙋ, но и҆ дв҃дъ цр҃ь възвеселисѧ ра́достїю вели́кою, и҆ блс̑҇ви дв҃дъ цр҃ь г҃а пред̑ всѣ́мъ мно́жествомъ, и҆ рече, блс̑҇венъ е҆си г҃и б҃е і҆и҆л҃евъ ѿц҃ъ на́шъ ѿ вѣка въ вѣ́ки, твоѐ е҆сть г҃и вели́чество и҆ си́ла, и҆ сла́ва, и҆ ѻ҆долѣнїе, и҆сповѣда́нїе и҆ крѣ́пость ꙗ҆́ко т̂ы всѣмъ и҆же на́ нб҃си, и҆ на землѝ владѣ́еши, ѿ лица̀ твое҆го г҃и и҆справитсѧ в꙽сѧ́ко црс̑҇тво и҆ всѧ́къ ꙗ҆зы́къ, тебѣ̀ г҃и богат꙽ство, и҆ тебѣ црс̑҇тво, и҆ вели́чество въ всѧ̀, и҆ въ всѧ́ко начало, ѿ тебѐ богат꙽ство и҆ слава·

3

Ты всѣ́хъ нача́ло, г҃и, начало всѧ́кого нача́ла, и҆ вла́сть, и҆ в рꙋ́кꙋ твое҆ю вели́чество, и҆ црс̑҇тво всѣ́хъ, и҆ въ рꙋ́кꙋ твою млс̑҇ть, и҆ вседръжи́тельство възвели́чити, и҆ възрасти́ти вс̂ѧ, нн҃ѣ ѹ҆бо г҃и нашъ, и҆сповѣдае҆мсѧ тебѣ̀, и҆ хва́лимъ и҆мѧ твоѐ пресла́вное, кто а҆́зъ е҆смь, и҆ кт̂о лю́дїе твои, ꙗ҆́ко възмого́хомъ сїѧ тебѣ вс̂ѧ бл҃гово́лне ѻ҆бѣщати, твоѧ̀ б̂о сꙋть вс̂ѧ, і҆ и́же ѿ рꙋ́кꙋ твое́ю прїѧ́хомъ, дахомъ тебѣ, пꙋтницы бо е҆смы̀ пред̑ тобо́ю, и҆ прише́л꙽цы, ꙗ҆́ко вс̂и ѿцы наши, дн҃їе наши ꙗ҆́ко сѣнь на землѝ, и҆ нѣ́сть тръпѣнїѧ, г҃и б҃е нашъ, къ всемꙋ̀ мно́жествꙋ семꙋ̀ и҆́же ѹ҆гото́вахомъ да съзи́ждетсѧ до́мъ и҆́мени ст҃омꙋ твое҆мꙋ, ѿ рꙋ́кꙋ твое́ю е҆сть, и҆ твоѧ̀ сꙋть вс̂ѧ, вѣ́мъ б̂о г҃и мо́и, ꙗ҆́ко т̂ы е҆си и҆спытꙋа срд̑ца и҆ прав꙽дꙋ лю́биши. въ правости б̂о срд̑ца мое҆го прои҆зво́лих̑ сїа всѧ̀, и҆ нн҃ѣ и҆ людїе твои и҆же зд̂ѣ, ѻ҆брѣто́шасѧ ви́дѣхъ съ вели́кою радостїю тебѣ̀ прои҆зво́лиша въздати да́ры. г҃и б҃е а҆враа́мов̑҇, і҆саа́ковъ, і҆и҆л҃ѧ ѿц҃ъ на́шихъ съхранѝ въ вѣ́ки сею̀ во́лею срд̑ца и҆хъ. і҆ и҆спра́ви срд̑ца их̑ к тебѣ̀, соло́монꙋ же сн҃ꙋ мое҆мꙋ да́и срд̑це съвръше́но да храни́тъ за́повд̑и̑ѣ твоѧ̀, и҆ свѣдѣ́нїѧ твоѧ̀, и҆ повеле́нїѧ твоѧ̀, и҆ къ съвръше́нїю привестѝ зда́нїе до́мꙋ твое҆го. и҆ повелѣ же дв҃дъ всемꙋ̀ собо́рꙋ людїи·

4

Блс̑҇вите г҃ꙋ б҃ꙋ на́шемꙋ. и҆ блс̑҇вите ве́сь собо́ръ г҃ꙋ б҃ꙋ ѿц҃ъ свои҆хъ. и҆ преклони́ша колѣ́на и҆ поклони́шасѧ г҃ꙋ, и҆ па́ки цр҃ю. и҆ пожрѐ дв҃дъ жрътвꙋ г҃҃ꙋ. и҆ възнесѐ вс̂есъж꙽женїѧ б҃ꙋ на ѹ́трїи пръваго дн҃и теле́цъ, ты́сѧщꙋ, ѻ҆́вновъ ты́сѧщꙋ·

5

А҆гнецъ ты́сѧща. и҆ възлїанїѧ и҆хъ. и҆ жр́ътвы мно́жества в꙽сего і҆и҆л҃ева. и҆ ꙗ҆до́ша и҆ пи́ша пред̑ гм҃ъ въ дн҃ь то́и, съ вели́кимъ весе́лїемъ·

6

И҆ поста́виша цр҃емъ, в꙽торо́е соло́мона сн҃а двд̑ва. и҆ пома́заша е҆го г҃ꙋ въ цр҃ѧ. и҆ садо́ка въ а҆рхїере́ѧ. сѣ́де же соло́монъ на прс̑҇тлѣ гн҃и въ цр҃ѧ в꙽ мѣ́сто дв҃да ѿц҃а свое҆го, и҆ ѹ҆годи́сѧ и҆ покори́сѧ е҆мꙋ ве́сь і҆и҆л҃ь. кн҃ѕи и҆ си́лнїи, и҆ вс̂и сн҃ове цр҃ѧ двд̑а ѿц҃а е҆го, послꙋшаша е҆го·

7

И възвели́чи ѹ҆бо г҃ь соло́мона над̑ всм̑ѣ і҆и҆л҃емъ. и҆ да́сть е҆мꙋ сла́вꙋ црс̑҇тва, е҆ѧ́же ни е҆ді́нъ и҆мѣ̀ пре́же е҆го. того ра́ди и҆ дв҃дъ сн҃ъ и҆ѻ҆сїевъ црс̑҇твова̀ над̑ всѣмъ і҆и҆л҃емъ, м҃, лѣтъ. въ хевро́нѣ црс̑҇твова̀, з҃, лѣтъ. и҆ въ і҆ерс̑҇ли́мѣ, лѣтъ, л҃г·

8

И҆ ѹ́мре въ ста́рости бла́ѕѣ. и҆спо́лнь дн҃їи въ бога́т꙽ствѣ и҆ сла́вѣ. и҆ црс̑҇твова̀ соло́монъ сн҃ъ е҆го в него мѣ́сто. про́чїи же словеса̀ цр҃ѧ дв҃да, пе́рвїи и҆ послд̑ѣнїи, напи́саны сꙋть. въ словеса́хъ самои́ла ви́дѧщаго. и҆ въ кни́зѣ наѳа́на прро̑҇ка. и҆ въ словесе́хъ да видѧщаго. ѻ҆ все́мъ црс̑҇твѣ е҆го. крѣпости е҆го, и҆ вре́мена и҆же проидо́ша под ни́мъ, и҆ли въ і҆и҆л҃и. и҆л̂и въ всѣхъ црс̑҇твахъ зе́мных̑·

9

Коне́цъ пе́рвыхъ кни́гъ паралипоме́нонъ. и҆́мать в себѣ, глв̑҇а, к҃ѳ·