Ostroh BibleПерша книга хронік, розділ 9
Шрифт:
Запис:
1
И весь же і҆и҆л҃ь сочте́нъ е҆сть по пле́менемъ и҆хъ, и҆ с̂е сꙋть пи́саны в꙽ъ кни́ѕѣ цр҃еи і҆и҆л҃евыхъ, і҆ и҆ѹ́диныхъ. по преселе́нїи въ вавѷло́нъ ради безако́нїѧ и҆хъ·
2
И҆́мже безаконова́ша. і҆ и҆же ѻ҆бита́ша первѣ́и въ ѻ҆держа́нїихъ, и҆ въ градѣхъ своих̑ і҆и҆л҃ь, и҆ сщ҃енницы и҆ левѷты, и҆ прида́нїи·
3
И҆же ѻ҆ста́ша въ і҆ерс̑҇ли́мѣ съ сн҃ъми і҆ѹ́диными ѿ сн҃овъ вениа҆ми́нь, и҆ ѿ сн҃овъ е҆фрѣмль и҆ манасїинъ·
4
ѻ҆ѳи́и сн҃ъ а҆миѹ́довъ сн҃а е҆мврїи҆на. сн҃ове ѿ сн҃овъ фаре́съ сн҃въ і҆ѹ́да·
5
И҆ ѿ сило́ма а҆са́иѧ прьвенец꙽ е҆го и҆ сн҃ове е҆го. ѿ сн҃овъ же за́ра, и҆е҆и́ль и҆ бра́тїѧ и҆хъ, и҆́хже бы́сть, х҃, и҆ ч҃·
6
И҆ ѿ сн҃овъ венїа҆ми́нь сахом̑ сн҃ъ въсол꙽ламовъ. сн҃а ѻ҆дꙋи́ева сн҃а санꙋ́ѻва·
7
И҆ е҆вна́а сн҃ъ і҆е҆ровоа́мовъ и҆ е҆ла́въ, и҆ сїи сн҃ы и҆ѻ҆зи́ю, и҆ сн҃ове махе́ровы, и҆ мосол꙽ла́мовы сн҃а сафатїева, сн҃а рагꙋи́лева. сн҃а и҆а҆ва́ни братїѧ же и҆хъ по роже́їѧ҆мъ и҆хъ ѳ҃ со́тъ, и҆ н҃ и҆ ѕ҃, вс̂и сїи мꙋжи кнѧ́ѕи племе́немъ по домо́мъ ѿц҃ъ свои҆хъ·
8
ѿ сщ҃енникъ же и҆ѻ҆да́їѧ и҆ ѻ҆а҆ри́мъ, и҆ ѻ҆а҆ки́мъ·
9
И҆ а҆за́рїѧ сн҃ъ хелкїевъ сн҃а мосол꙽ла́мова. сн҃а садꙋкова. сн҃а марарїѻ́ѳъ, сн҃а а҆хи́това а҆рхїе҆ре́ѧ до́мꙋ бж҃їѧ·
10
И҆ а҆дїамъ сн҃ъ е҆роа́мль сн҃а ѳазо́ръ сн҃а мелхїа́ева и҆ маа҆сїѧ, сн҃ъ а҆дии́ль, сн҃а а҆зе́ра, сн҃а мосола́млѧ. сн҃а самелимо́ѳова сн҃а е҆м꙽ма́рова·
11
Бра́тїѧ же и҆хъ кнѧ́ѕи по домо́мъ ѿч҃ествъ свои҆хъ, ҂а҃, и҆ з҃ со́тъ, и҆ ѯ҃, силнѣ́иши крѣпостїю къ сотворе́нїю дѣла слꙋже́нїѧ в꙽ домꙋ̀ бж҃їи·
12
ѿ левѷтъ же саме́їѧ сн҃ъ а҆сꙋвовъ сн҃а а҆зрика́мова, сн҃а савїева, сн҃а въ мерарїи́нѣ·
13
Вак꙽вака́р же, и҆ а҆рис̑҇ и҆ гаре́ѧ, и҆ меѳанїа҆съ сн҃ъ михаев̑҇·
14
сн҃а зе́хри сн҃а а҆са́фова·
15
И҆ а҆вдїѧ сн҃ъ саме́ѧ. сн҃а го́лила, сн҃а и҆диѳꙋнѧ, и҆ варахїѧ сн҃ъ а҆́сы, сн҃а е҆а҆лка́нова и҆же ѻ҆бита̀ въ дво́рѣхъ нетофа́ѳовыхъ·
16
две́рницы же сел꙽лꙋмъ и҆ а҆кꙋмъ, и҆ тел꙽мо́нъ, и҆ е҆м꙽ма́нъ и҆ бра́тъ и҆хъ, сел꙽лꙋмъ же бы́сть кнѧ́ѕь, даже того вре́мени въ вра́тѣхъ црс̑҇ких̑ къ восто́кꙋ въздержа́хꙋ по силахъ своих̑ въ сн҃ѣхъ левѵи҆ных̑·
17
И҆ сел꙽лꙋмъ сн҃ъ къре́ѻвъ сн҃а а҆вїа҆сафо́вова сн҃а коре́ѻва. и҆ бра́тїѧ е҆го по домо́мъ ѿц҃ъ и҆хъ. сїи сꙋть зри́тели над̑ дѣлы слꙋже́нїѧ стрегꙋще стражбы̀, скѵ́нїи, и҆ ѿц҃ъ и҆хъ над̑ пол꙽комъ гн҃имъ.
18
Стрегꙋще въхо́да·
19
Ѳинее҆съ же сн҃ъ е҆леаза́ровъ бысть во́ждъ и҆хъ пред̑ гм҃ъ·
20
И҆ посем̑ зак꙽ха́рїѧ сн҃ъ мосолла́мїевъ дверник̑҇ вра́тъ скѷнїи свѣдѣнїѧ·
21
Сїи вс̂и и҆збра́ннїи въ дверницѣхъ и҆же въ чи́слѣ, с҃, и҆ в҃і, сїи в селѣхъ и҆хъ по племе́немъ и҆хъ сочте́но, и҆ си́хъ поста́ви дв҃дъ и҆ само́илъ ви́дѧщїи въ вѣрѣ свое́и·
22
И҆ та́ко тїи и҆ сн҃ове и҆хъ быша въ две́рехъ до́мꙋ гн҃ѧ. в꙽ домꙋ скѷнїѧ стрещи, по всѧ̀ дн҃и·
23
По четы́ремъ вѣтром꙽ бѣша две́рницы стрегꙋщеи. и҆же къ восто́кꙋ и҆ къ западꙋ, и҆ къ сѣ́верꙋ, и҆ къ ю́гꙋ·
24
Бра́тїѧ же их̑ и҆же живѧ́хꙋ въ селах̑ своих̑, и҆ прихожда́хꙋ въ сꙋбо́тах̑ своих̑ ѿ вре́мени даже до вре́мени на премѣнꙋ тм̑ѣ·
25
Четы́рем̑ б̂о две́рником̑ старѣишим̑ върꙋче́но бысть левѷтов̑҇. и҆ бѣхꙋ стрегꙋще собо́ровъ и҆ скровищъ до́мꙋ гн҃ѧ·
26
По ѻ҆́крс̑҇тъ же цр҃кви гн҃ѧ живѧхꙋ въ стра́жбахъ своих̑. да е҆гда̀ времѧ бы́сть тїи и҆ ѹ҆трѣ ѿтворѧют̑ две́ри цр҃кви·
27
ѿ того же ро́да бѧ́хꙋ и҆ над̑ сосꙋды слꙋже́нїа. по чи́слꙋ б̂о вноша́хꙋ сосꙋ́ды, і҆ и҆зноша́хꙋ. ѿ тх̑ѣ же і҆ и҆же врꙋче́н꙽на и҆мѣѧ́хꙋ рꙋ́хла ст҃ительствомъ. та́коже и҆ надъ мꙋко́ю пшени́чною и҆ виномъ и҆ е҆леѻм̑ и҆ ѳимїамом̑ и҆ а҆рома́ты·
28
Сн҃ове же сщ҃ен꙽никовъ ма́сти ѿ рама́тъ съдѣлахꙋ·
29
И҆ мат꙽таѳїасъ левѷтъ. се́й прьвенецъ сел꙽лꙋмъ крылошани́н꙽ прьвыи бы́сть, е҆мꙋже ѹ҆вѣ́рени жер̑҇твы. і҆ и҆же на сковрадѣ прѧжахꙋсѧ вели́кого жерца̀·
30
Паки ѿ сн҃овъ каа́ѳовых̑ бра́тїа их̑ бѧхꙋ над̑ хлѣбы пред̑ложе́нїѧ въ сꙋбо́ты и҆ сꙋбо́ты ꙗ҆́же ѹ҆гото́вати·
31
И҆ сїи быша кнѧѕи пѣвцем̑ по семъꙗ҆́хъ левѷтъскихъ и҆же въ събра́нїю поста́влени, повседн҃евное, ꙗ҆́ко да дн҃ь и҆ но́щъ все́гда своѐ слꙋженїе ѿслꙋжива́ютъ·
32
Сїи главы̀ ѿч҃ествомъ левѷтомъ по племе́немъ их̑, нача́лницы же сїи вс̂и пребыва́хꙋ въ і҆ерс̑҇ли́мѣ·
33
И҆ въ гаваѻ́нѣ же ѻ҆ста̀ ѿц҃ъ гаваѻ́нь і҆е҆и҆е҆левъ. и҆́мѧ женѣ̀ е҆го маа́ха·
34
И҆ сн҃ъ прьвенецъ е҆го а҆вдо́нъ, и҆ а҆сꙋръ, и҆ ки́съ, и҆ ва́ель, и҆ ни́ръ, и҆ нада́въ, и҆ гедо́ръ. и҆ бра́тїѧ и҆хъ. и҆ а҆гїѹ́нъ, и҆ зе́хрїѧ·
35
И҆ макеллодъ и҆же родѝ сем̑маѧ. и҆ сїи всели́шасѧ среди бра́тїи свои҆хъ въ і҆ерс̑҇ли́мѣ со бра́тїами свои́ми·
36
Нир же родѝ ки́са. и҆ ки́съ родѝ саѹ́ла. и҆ саѹ́лъ родѝ і҆а́ѻ҆наѳа. и҆ мелхисꙋ́ѧ. и҆ а҆минада́ва, и҆ сва́е҆лѧ·
37
Сн҃ы же і҆ѻ҆а҆наѳа́ни мем꙽фиваа́лъ. и҆ мемъфиваа́лъ род̑и̑ ми́хꙋ·
38
Сн҃ове же ми́ха фило́ѳъ, и҆ мелхїилъ, и҆ ѳара́ѧ, и҆ а҆за́еръ·
39
И҆ хаза́зъ же родѝ и҆ѻ҆дꙋ, і҆ и҆ѻ́да родѝ а҆лефа, и҆ а҆змо́ѳа, и҆ зам̑врїѧ, зам꙽врїи же родѝ маса́ѧ·
40
И҆ ма́са же родѝ ваа́на, е҆гоже сн҃ъ рафаїѧ е҆ласа сн҃ъ е҆го, а҆саи́ль сн҃ъ е҆го·
41
Ѹ҆ а҆саи́лѧ же б̂ѣ, ѕ҃, сн҃овъ, и҆ сїѧ и҆мена̀ и҆хъ. и҆ е҆зри́ка прьве́нецъ е҆го і҆ и҆смаи́ль, и҆ а҆зарїѧ, и҆ а҆вдїѧ, и҆ а҆на́нъ, сїи сн҃ове а҆саи́левы·
Джерела
