Ostroh BibleПерша книга хронік, розділ 10
Шрифт:
Запис:
1
Филисти́ми же вое҆ва́ша проти́вꙋ і҆и҆л҃ю. и҆ бѣжа́ша мꙋжи і҆и҆л҃еви ѿ лица̀ и҆ноплеме́нническа, и҆ падо́ша ра́нени въ горѣ̀ гелвꙋ́и·
2
Єгда же приближи́шасѧ и҆ноплеме́нницы погонѧ́ющи саѹ́ла и҆ сн҃овъ е҆го. и҆ ѹ҆би́ша і҆ѻ҆а҆наѳа́на и҆ а҆минада́ва и҆ мельхисꙋ́е сн҃овъ саѹ́ловых̑·
3
И҆ ѻ҆тѧжасѧ бра́нь проти́вꙋ саѹ́ла. и҆ ѻ҆брѣто́ша̑ е҆го стрѣлцы и҆ ꙗ҆́зви́ша е҆го стрѣлами и҆ въскорбѣ ѿ стрѣленїѧ·
4
И҆ рече саѹ́лъ къ носѧ́щемꙋ ѻ҆рꙋжїе е҆го. и҆зъвлецы ме́чъ тво́и и҆ прободи́ мѧ и҆мъ. да не пото́м꙽ прїидꙋтъ неѻ҆брѣ́занїи сїи и҆ посмѣ́ютсѧ мн̂ѣ. и҆ не хотѣ же носѧ̀ ѻ҆рꙋ́жїе е҆го ꙗ҆́ко воз̑боѧ́сѧ ѕѣло. въсхити же саѹ́лъ ме́чъ и҆ нападѐ на́нь·
5
И҆ е҆гда̀ ви́дѣ носѧ́и ѻ҆рꙋжїе е҆го, ꙗ҆́ко мр҃твъ бы́сть саѹ́лъ. нападе же и҆ ѻ́нъ на меч̑҇ сво́и и҆ ѹ́мре·
6
И҆ ѹ́мре саѹ́лъ и҆ тр̂и сн҃ы е҆го въ дн҃ь ѻ́нъ, и҆ ве́сь домъ е҆го та́коже падѐ·
7
И҆ е҆гда ви́дѣша мꙋжи і҆и҆л҃еви и҆же бѣша въ полех̑. ꙗ҆́ко бѣ́жаша, и҆ саѹ́ла и҆ сн҃ы е҆го ѹ҆мерша. и҆ ѻ҆ста́виша гра́ды своѧ̀ и҆ побѣжа́ша. и҆ прїидо́ша же и҆ноплемен̑҇ницы и҆ всели́шасѧ в ни́хъ·
8
И҆ дн҃и ѹ҆́тренего прїидо́ша и҆ноплеме́н꙽ницы съвлачати пад̑ших̑ кори́сти и҆ ѻ҆брѣто́ша саѹ́ла и҆ сн҃овъ е҆го лежа́щихъ въ горѣ̀ гел꙽вꙋе. и҆ съвлеко́ша е҆го и҆ ѹ҆сѣкнꙋша главꙋ̀ е҆го. и҆ ѻ҆рꙋжїе е҆го взѧ́ша. и҆ посла́ша и҆ноплеме́нницы въ землю свою̀ да ѻ҆бно́сит꙽сѧ и҆ пока́жетсѧ и҆́доломъ цр҃квам꙽ и҆ лю́дем̑·
9
ѻ҆рꙋжїе же е҆го положи́ша въ цр҃кви б҃а свое҆го, и҆ главꙋ̀ пот꙽кнꙋша въ црк҃ви даго́на·
10
Тогда ѹ҆слы́шаша мꙋ́жи и҆а҆ве́са галаа́дъскаго вс̂ѧ. и҆же филисти́ми сътвори́ша саѹ́лꙋ и҆ сн҃ом꙽ е҆го і҆и҆л҃ю. воста́вше ѿ галаа́да вс̂и мꙋ́жи и҆ крѣпкїи. и҆ прїидо́ша и҆ взѧ́ша трꙋпъ саѹ́ловъ и҆ трꙋпы сн҃овъ е҆го. и҆ принесо́ша и҆хъ въ и҆а҆ви́съ, и҆ погребо́ша ко́сти их̑ под̑ дꙋбомъ и҆же б̂ѣ въ и҆а҆висъ. и҆ пости́шасѧ, з҃, дн҃їи·
11
И҆ та́ко ѹ́мре саѹ́лъ ради безако́нїи свои҆хъ. и҆́мже престꙋпѝ гв҃и по словесѝ гн҃ю е҆гоже не съхранѝ. и҆ къ семꙋ̀ въпросѝ саѹ́лъ во влъшве́нїи е҆же възыскати. и҆ ѿвѣща е҆мꙋ само́илъ про̑҇ркъ, и҆ не вопросѝ г҃а. и҆ сего ради ѹби е҆го. и҆ ѿдастъ црс̑҇тво е҆го дв҃дꙋ сн҃ꙋ і҆ѻ҆сїинꙋ·
Джерела
