Ostroh BibleПерша книга царів (Третя книга царств), розділ 15
Шрифт:
Запис:
1
Во ѻ́смоена́десѧте, лѣто црс̑҇тва і҆е҆ровоа́мова сн҃а нава́това. нача црс̑҇твова́ти а҆вїѧ сн҃ъ ровоа́мль, надъ і҆ѹ́дою·
2
И҆ тр̂и лѣта цр҃ьствова въ і҆ерс̑҇ли́мѣ. и҆́мѧ мт҃ри его маа́꙽ ха дщ̂и а҆весало́млѧ·
3
И҆ хожда́ше въ всѣхъ грѣсѣхъ ѿц҃а свое҆го ꙗ҆́же сътвори пред̑ нимъ. и҆ не бѣ̀ срд̑це е҆го съвръшено съ гм҃ъ бм҃ъ е҆го ꙗ҆́кож̑ б̂ѣ двд̑ꙋ срд̑це ѿц҃а е҆го·
4
Но двд̑а рад̑и̑ ѻ҆ста́ви и҆̀ г҃ь б҃ъ ѻ҆ста́нок̑҇ во і҆ерс̑҇лмѣ. да воставлѧ́ѧ поста́ви по нем̑ ча́да е҆го ѹ҆твер꙽ждаѧ і҆ерс̑҇ли́м꙽·
5
Ꙗ҆́коже сътворѝ дв҃дъ ѹ҆год̑ное пред̑ гм҃ъ. и҆ не ѹ҆клони́сѧ ѿ всего̀ е҆же заповѣ́да е҆мꙋ вс̂ѧ дн҃и живота̀ е҆го. кро́мѣ е҆ді́наго сло́ва ѹ҆́рїѧ хетѳе́искаго·
6
И҆ бра́нь б̂ѣ ме́ждꙋ ровоа́момъ, и҆ междꙋ і҆е҆ровоа́мом̑ въ вс̂ѧ дн҃и живота е҆го·
7
И прочаѧ словесъ а҆вїиных̑ и҆ вс̂ѧ ꙗ҆́же сътворѝ не се л̂и сїѧ напи́сана въ кни́гахъ слов̑҇ бы́тїѧ цр҃еи і҆ѹ́диныхъ. и҆ брань б̂ѣ ме́ждꙋ а҆вїемъ и҆ междꙋ і҆е҆ровоа́мом̑·
8
И ѹ́мре а҆вїи и҆ положе́нъ бысть съ ѿц҃ы свои́ми. въ к҃ е лѣто і҆е҆ровоа́ма, и҆ погребо́ша и҆̀ съ ѿц҃ы е҆го во́ градѣ двд҃вѣ. и҆ црс̑҇твова а҆са сн҃ъ е҆го въ мѣсто е҆го·
9
И҆ въ лѣто, к҃ е, і҆е҆ровоа́ма цр҃ѧ і҆и҆л҃ева, црс̑҇твова́ша а҆́са над̑ і҆ѹ́дою·
10
И҆ м҃ и҆ а҃, лѣто, црс̑҇твова въ і҆ерс̑҇ли́мѣ. и҆́мѧ же мт҃ри е҆го а҆́на дщ̂и а҆весало́млѧ·
11
И҆ сотворѝ а҆́са ѹ҆год̑ное пред̑ гм҃ъ ꙗ҆́коже и҆ дв҃дъ ѿц҃ъ е҆го·
12
И҆ ѿѧ́тъ сквернаѧ ѿ землѧ̀. і҆ и҆скорени вс̂ѧ и҆зваѧ́ннаѧ ꙗ҆́же сътвори́ша ѿц҃ы е҆го·
13
И҆ а́нꙋ мт҃рь свою ѻ҆ста́ви ꙗ҆́ко не владѣти е́й. ꙗ҆́ко сотвори соборъ ѻ҆ ка́пищꙋ еѧ̀ и҆ ѿсѣче а҆́са га́и е҆ѧ̀. и҆ сож꙽же ѻ҆гне́м꙽ в потоцѣ ке́дръстѣмъ·
14
Высоких̑ же не и҆скорени срд̑це же а҆сїино б̂ѣ съвръшенно пред̑ гм҃ъ во всѧ́ дн҃и е҆го·
15
И҆ вънесе сосꙋ́ды ст҃ыѧ ѿц҃а свое҆го и҆ ст҃аѧ своѧ̀ внесѐ въ храмъ гн҃ь, сре́брены и҆ зла́ты сосꙋ́ды·
16
И҆ бра́нь б̂ѣ межи а҆сїею. и҆ межи ваа́сом̑ цр҃емъ і҆и҆л҃евым̑ въ всѧ̀ дн҃и и҆хъ·
17
И҆ възы́де ваа́са цр҃ь і҆и҆л҃евъ на і҆ѹ́дꙋ. и҆ созда̀ ра́мꙋ ꙗ҆́ко не бы́ти на вохожде́нїе і҆ и҆схожде́нїе а҆́сѣ цр҃ю і҆ѹ́динꙋ·
18
И҆ взѧт̑ а́са вс̂е сребро̀ и҆ зла́то, и҆ ѻ҆брѣтъшее҆сѧ въ сокровищихъ до́мꙋ гн҃ѧ. и҆ в꙽ сокро́вищахъ до́мꙋ цр҃ева. и҆ дасть ѧ҆̀ въ рꙋцѣ ѻ҆́трокъ свои҆хъ. и҆ посла̀ и҆̀ цр҃ь а҆́са къ сн҃ꙋ а҆деровꙋ, тавїинꙋ въ рама́нъ, къ сн҃ꙋ а҆зеи́левꙋ, цр҃ѧ а҆сѷрїиска живꙋщаго въ дама́сцѣ гл҃ѧ·
19
Положѝ завѣтъ межи мно́ю и҆ тобо́ю и҆ межи ѿц҃ем꙽ моим̑ и҆ ѿцм҃ъ твоим̑. с̂е послах̑ т̂и дары сребро̀ и҆ зла́то. прїиди и҆ раз̑дрꙋши завт̑ѣ твои и҆же съ ваа́сою цр҃емъ і҆и҆л҃евымъ. да и҆зы́детъ ѿ менѐ·
20
И҆ послꙋша сн҃ъ а҆да́ровъ цр҃ѧ а҆́сы. и посла̀ вое҆водъ си́лных̑ е҆го на гра́ды і҆и҆л҃евы. и҆ побѣдѝ а҆и́на, и҆ а҆да́нъ. и҆ а҆ве́лѧ домꙋ махїи́на, и҆ весь хенере́ѳъ до всеѧ̀ землѧ̀ неѳали́млѧ·
21
И҆ бысть ꙗ҆́ко ѹ҆слы́шавъ ваа́са. и҆ ѻ҆ста́ви ѕи́жда ра́мꙋ, и҆ возврати́сѧ въ ѳе́рсꙋ·
22
И цр҃ь а҆́са заповѣ́да всемꙋ̀ і҆ѹ́дѣ въ е҆наки́мѣ. и҆ взѧ́ста ка́менїе ѿ ра́мы и҆ дре́во е҆ѧ̀, и҆́мже б̂ѣ ѻ҆снова́лъ ваа́са. и҆ созда̀ в них̑ цр҃ь а҆́са всѧ́къ хл́ъмъ венїа҆ми́нь и҆ стра́жища·
23
И҆ прочаа словеса̀ а҆́сина и҆ вс̂ю си́лꙋ е҆го и҆ всѧ ꙗ҆́же сътвори, и҆ грады ꙗ҆́же созда̀. и҆ с̂е сꙋть писана въ кни́зѣ слове́съ дн҃їи цр҃ь і҆ѹ́диных̑, въ вре́мѧ же ста́рости свое́ѧ нача́тъ болѣти но́ги е҆го·
24
И҆ ѹ́мре а҆́са, и҆ погребо́ша и҆̀ съ ѿц҃ы е҆го во́ градѣ давы́довѣ. и҆ црс̑҇твова и҆ѻ҆сафат̑ сн҃ъ е҆го въ е҆го мѣсто·
25
Нада́волъ же сн҃ъ і҆е҆ровоа́мль нача̀ црс̑҇твова́ти над̑ і҆и҃лем̑ въ второ́е лѣто а҆́сы цр҃ѧ і҆ѹ́дина и҆ црс̑҇твова над̑ і҆ерс̑҇ли́момъ дв̂ѣ лѣтѣ·
26
И сътвори лꙋка́вное пред̑ гм҃ъ. и҆ хожда́ше пꙋтемъ ѿц҃а свое҆го. и҆ по грѣхо́мъ е҆го и҆́миже съгрѣшѝ въ і҆и҆л҃и·
27
И ѻ҆б꙽сѣ́де и҆̀ ваа́са сн҃ъ а҆хїинъ в домꙋ̀ веланїи сн҃а а҆хїина. и҆ ѹ҆би́ша е҆го в꙽ гаваѻ́нѣ и҆ноплеме́нникъ. и҆ надав̑҇ б̂о и҆ весь і҆и҆л҃ь ѻ҆бъсѣдо́ша а҆гаваѳон̑҇·
28
І҆ и҆збѝ ѧ҆̀ ваа́са въ лѣто, г҃ е, а҆́сы цр҃ѧ і҆ѹ́дина. и҆ црс̑҇твова̀ в него мѣсто·
29
И҆ бысть ꙗ҆ко црс̑҇твова. и҆ побѝ весь до́мъ і҆е҆ровоа́мль, и҆ не ѻ҆ста́ви ничтоже ѿ всего дыха́нїѧ і҆е҆ровоам̑лѧ до́н꙽деже и҆скоренѝ и҆хъ по гл҃ꙋ гн҃ю. и҆же гл҃а рꙋкою раба̀ свое҆го а҆хїѧ силонит̑скаго·
30
Грѣхъ ради і҆е҆ровоа́млих̑ и҆́миже съгрѣши, и҆́миже і҆и҆л҃ѧ въ грѣхъ въведѐ. и҆ въ прогнѣ́ванїи е҆го и҆́мже прогнѣ́ва г҃а б҃а і҆и҆л҃ева·
31
И҆ про́чаѧ словеса̀ нада́ва. и҆ вс̂е ꙗ҆́же сътворѝ. не с̂е ли сꙋть вс̂ѧ пи́сана въ кни́зѣ словъ дн҃їи цр҃ь і҆и҆л҃евъ·
32
И҆ быс̑҇ бра́нь междꙋ а҆́сою цр҃емъ і҆ѹ́диным꙽ и҆ ваа́сою цр҃емъ і҆и҆л҃евым̑ во всѧ̀ дн҃и их̑·
33
И҆ въ тре́тїе лѣто а҆́сы цр҃ѧ і҆ѹ́дина. црс̑҇твова ваа́са сн҃ъ а҆хїи́нъ надо всм̑ѣ црс̑҇твомъ і҆и҆л҃евымъ въ ѳе́рсѣ. к҃, и҆ д҃ лѣта·
34
И҆ сътворѝ лꙋка́вное пред̑ гм҃ъ, і҆ и҆́де пꙋтемъ і҆е҆ровоа́млимъ сн҃а нава́това. и҆ во грѣсѣхъ е҆го им̑же въ согрѣше́нїе приведѐ і҆и҆л҃ѧ·
Джерела
