Ostroh Bible❧Перша книга царів (Третя книга царств), розділ 14

1

Въ вре́мѧ ѻ҆́но раз̑болѣ́сѧ а҆вїѧ сн҃ъ і҆е҆ровоа́мль·

2

И҆ реч̑҇ і҆еровоам̑ женѣ̀ свое́и, востани. і҆ из̑мѣни ри́зы своа да не познают̑ т̂ѧ ꙗ҆́ко ты жена і҆е҆ровоа́мова і҆ и҆дѝ в силом̑, се б̂о та́мо а҆хїѧ про̑҇ркъ то́й гл҃а ѻ҆ мнѣ̀, е҆же црс̑҇твовати над̑ люд̑ми си́ми·

3

И҆ возми в꙽ рꙋцѣ твоѝ чл҃кꙋ бж҃їю хлѣбы и҆ ѻ҆прѣсноки и҆ гро́здїе, и҆ сосꙋ́дъ ме́дꙋ. і҆ и҆дѝ к не́мꙋ, и҆ то́й возвѣсти́т꙽ т̂и чт̂о бꙋ́детъ съ ѻ҆троча́темъ си́мъ·

4

И҆ сътворѝ та́ко жена̀ і҆е҆ровоа́млѧ. и҆ воста́въ и҆́де в сило́мъ, и҆ вони́де в дом̑ а҆хїи́нъ, а҆хїѧ же старъ бы́сть и҆ ѻ́чи е҆го ѻ҆мрачи́стасѧ не ви́дѣти·

5

И҆ рече г҃ь къ а҆хїи, с̂е в꙽ходит꙽ к тебѣ̀ жена̀ і҆е҆ровоа́мова вопраша́ти т̂ѧ ѻ҆ сн҃ꙋ е҆ѧ̀ ꙗ҆́ко болѣзнꙋ́ет꙽, и҆ по семꙋ да гл҃еши к ней внегда̀ бо в꙽ходи́ти и́мать ꙗ҆ви́тсѧ и҆́ною·

6

И҆ бысть е҆гда ѹ҆слы́ша а҆хїа стꙋпа́нїе но́гъ е҆ѧ̀, въходѧ́щи е́й ко вра́том̑. и҆ реч̑҇ вни́ди же́но і҆е҆ровомова, почт̂о кры́ешисѧ, а҆́зъ б̂о е҆смь посла́н꙽никъ к тебѣ̀ лю́тъ·

7

Возврати́сѧ и҆ возвѣстѝ і҆е҆ровоа́мꙋ. та́ко гл҃етъ г҃ь б҃ъ і҆и҆л҃евъ, поне́же вознесо́хъ т̂ѧ ѿ сре́ди людїи, и҆ дахъ т̂ѧ во́жда лю́демъ моим̑ і҆и҆л҃ю. и҆ ѿѧ́хъ црс̑҇тво ѿ домꙋ двд҃ва. и҆ дахъ е҆̀ тебѣ ты́ же не бы́сть ꙗ҆́ко ра́бъ мо́и дв҃дъ ѻ҆́нже сохранѝ за́повѣди моа̀. и҆ ходѝ въ слд̑ѣ мене всѣмъ срд̑цемъ творѧ́ще сїѧ е҆же ѹ҆год̑но бы́сть предо мно́ю·

8

Ты́ же ѕолъ и҆ ѕла́ѧ творѧ̀ па́че всх̑ѣ и҆же пред̑ тобо́ю бы́ша, ꙗ҆́ко по́иде и҆ сотворѝ себѣ бо́ги чю́жды солїа́нны. въ прогнѣва́нїе мн̂ѣ, и҆ ѿвръже м̂ѧ соза́ди себѐ·

9

Сего ради с̂е а́зъ навождꙋ ѕла́ѧ на до́мъ і҆е҆ровоа́мовъ, и҆ потреблю̀ і҆е҆ровоа́ма мочащаго ко стѣнѣ. ѿве́ржена бесче́стна въ і҆и҆л҃и, і҆ соберꙋ і҆е҆ровоа́ма ꙗ҆ко̑ собирает̑сѧ гно́и до́ндеже соверши́ти. і҆ и҆стощꙋ ѻ҆ста́н꙽ки і҆е҆ровоа́мовы·

10

Ѹ҆мершаг̑҇ і҆е҆ровоа́мова и҆ во граде и҆зъꙗдѧ́тъ ѱи. и҆ ѹ҆мръшаго на селѣ̀ и҆зъꙗ҆дѧт̑ пти́цы нбс̑҇ныѧ, си́це гл҃а г҃ь б҃ъ·

11

Ты́ же воста́въ и҆дѝ в до́мъ тво́и. и внегда̀ входи́ти нога́ма твои́ма во́ град̑. ѹ҆́мретъ дѣтищъ·

12

И҆ въспла́четсѧ по не́мъ весь і҆и҆л҃ь и҆ погребꙋтъ и҆̀. то́й б̂о толи́ко е҆ді́нъ погребе́нъ бꙋ́детъ ѿ ро́дꙋ і҆е҆ровоа́млѧ, ꙗ҆́ко ѻ҆брѣтесѧ в немъ гл҃ъ бл҃гъ ѻ҆ г҃ѣ бѕ҃ѣ і҆и҆л҃евѣ въ домꙋ і҆е҆ровоа́мли·

13

И҆ воста́вит̑ себѣ г҃ь цр҃ѧ над̑ і҆и҆л҃емъ, и҆же и҆скорени́тъ домъ і҆е҆ровоа́мовъ в то́и дн҃ь·

14

И҆ нака́жет̑ г҃ь б҃ъ і҆и҆л҃ѧ, и҆ поколѣблет̑ и́ми, ꙗ҆́коже колѣблет̑сѧ тро́сть вѣтром̑ на водѣ̀·

15

І҆ и҆зоръвет̑ і҆и҆л҃ѧ ѿ высоты̀ землѝ бл҃гїѧ сїѧ, ю҆́же дал̑҇ е҆сть ѿц҃емъ их̑, и҆ проженет̑ ѧ҆̀ ѿ ѻ҆бо́нꙋ странꙋ̀. понеже сотвори́ша̑ себѣ̀ ка́пищи прогнѣва́юще г҃а·

16

Сего ради преда́сть г҃ь і҆и҆л҃ѧ грѣха̀ ради і҆е҆ровоам̑лѧ им̑же согрѣши, і҆ и҆мже грѣшити приведѐ і҆и҆л҃ѧ·

17

И҆ воста̀ жена̀ і҆е҆ровоа́млѧ. і҆ и҆дѐ, и прїиде въ сари́рꙋ, и҆ бы́сть е҆гда̀ вни́де во пред̑дверїе до́мꙋ, и҆ дѣтищъ ѹ҆́мре·

18

И҆ погребо́ша и҆̀, и҆ пла́касѧ по нем̑ ве́сь і҆и҆л҃ь по слевесѝ гн҃ю е҆же гл҃а рꙋко́ю раба̀ свое҆го а҆хїѧ про̑҇рка·

19

ѻ҆ста́нок꙽ же сло́въ і҆е҆ровоа́мовыхъ е҆ли́ко сътворѝ, и҆ е҆ли́ко црс̑҇твова с̂е сїѧ напи́сана въ кни́ѕе гл҃ъ дн҃їи цр҃еи і҆и҆л҃евыхъ·

20

И҆ дн҃їе в ни́хже црс̑҇твова̀ і҆е҆ровоамъ, быша лѣтъ, к҃в. и҆ ѹ҆спѐ съ ѿц҃ы свои́ми. и҆ въцр҃исѧ а҆да́нъ сн҃ъ е҆го внего̀ мѣсто·

21

Ровоа́м же сн҃ъ соло́монь црс̑҇твова над̑ і҆ѹ́дою и҆ бысть е҆мꙋ м҃, и҆ е҆ді́но лѣто. е҆гда нача̀ црс̑҇твова́ти. и҆ з҃і, лт̑ѣ црс̑҇твова въ і҆ерс̑҇ли́мѣ гра́дѣ е҆же и҆збра̀ г҃ь в нем̑ положи́ти и҆́мѧ свое т̂ꙋ ѿ всѧ́кого колѣ́на і҆и҆л҃ева. и҆́мѧ б̂ѣ мт҃ри е҆го наа́на амані́тѧныни·

22

И҆ сътвори ровоам̑ лꙋка́вое пред̑ гм҃ъ, и҆ раз̑дражи и҆̀ ѻ҆ всх̑ѣ ꙗ҆́же сътвори́ша ѿц҃ы их̑. ѻ҆ грѣсѣхъ и҆хъ и҆́миже съгрѣши́ша·

23

И҆ съгради́ша сїѝ себѣ̀ высо́каѧ. и҆ стол̑҇пы̀ и҆ ка́пища на всѧ́ком̑ хл́ъмѣ высо́цѣмъ и҆ под̑ всѧ́цм̑ѣ древом̑ смоко́вничнымъ·

24

И҆ сплетенїе б̂ѣ ѕл̂о въ землѝ и҆хъ. и сътвори́ша ѿ всѣхъ ме́рских̑ ꙗ҆зык̑҇, ꙗ҆́же и҆спровръже г҃ь ѿ лица̀ сн҃овъ і҆и҆л҃ев꙽·

25

И҆ бысть в꙽ лѣто, е҃ е, црс̑҇твꙋю҆щи ровоа́мꙋ. в꙽зы́де сꙋсаким̑ цр҃ь е҆гѷпет̑скїи на і҆ерс̑҇лим̑·

26

И҆ взѧ̀ вс̂ѧ сокро́вища до́мꙋ гн҃ѧ и҆ сокро́вища в домѣ цр҃евѣ. и҆ ѻ҆рꙋжїа зла́таа ꙗ҆́же б̂ѣ взѧл꙽ двд̑ъ и҆з рꙋкѝ ѻ҆́трок̑҇ а҆драза́ра цр҃ѧ сꙋв꙽скаго и҆ вне́слъ ѧ҆̀ б̂ѣ въ і҆ерс̑҇лимъ вс̂ѧ взѧ же и҆ щита зла́таѧ, ꙗ҆́же б̂ѣ сътвори́лъ соло́монъ и҆ внесе ѧ҆̀ въ е҆гѷпетъ·

27

И҆ сътворѝ цр҃ь ровоам̑ ѻ҆рꙋжїѧ мѣденаѧ в꙽ того̀ мѣсто. и҆ поста́ви над̑ ни́мъ вла́стелѧ. ѿ пред̑ри́щꙋщих̑ пред̑ ни́мъ и҆же хранѧ́хꙋ вра́тъ домꙋ цр҃ева·

28

И҆ бысть внегда̀ въходи́ти нача цр҃ь в до́мъ гн҃ь носѧ́хꙋ ѧ҆̀ пред̑ри́щꙋщїи. и҆ па́ки возвращахꙋ во сокро́вище·

29

Прочїи же гл҃ъ ровоамль и҆ вс̂ѧ ꙗ҆́же сотвори. не с̂е ли сꙋть пи́сана въ кни́ѕѣ слов̑҇ дн҃и црс̑҇тва і҆ѹ́дина·

30

И҆ бра́нь б̂ѣ ме́ждꙋ ровоа́мом̑. и҆ междꙋ і҆е҆ровоа́момъ въ всѧ дн҃и ты̀·

31

И҆ ѹ́мре ровоа́мъ, и҆ погребе́нъ бы́сть съ ѿц҃ы свои́ми, во́ градѣ двд҃вѣ. и҆ цр҃ьствова̀ а҆вїѧ сн҃ъ е҆го въ е҆го мѣсто.