Ostroh Bible❧Перша книга царів (Третя книга царств), розділ 22

1

И прїиде в꙽ самарїю и҆ сѣде, г҃, лѣта. и҆ не бѣ̀ бра́ни ме́жд̑ꙋ сѷрїе҆ю, и҆ ме́ждꙋ і҆и҆л҃емъ·

2

И бысть въ лѣто тре́тїе, и҆ сниде и҆ѻ҆сафа́тъ цр҃ь і҆ѹ́динъ къ цр҃ю і҆и҆л҃евꙋ·

3

И҆ реч̑҇ цр҃ь і҆и҃лев̑҇ къ ѻ́трокомъ свои҆мъ. вѣсте л̂и ꙗ҆́ко моѧ̀ е҆сть рема́ѳа галад̑ска, и҆ м̂ы молчи́мъ прїѧ́ти ю҆̀ ѿ рꙋки цр҃ѧ сѷрїиска·

4

И҆ рече цр҃ь і҆ил҃евъ къ і҆ѻ҆сафа́тꙋ а҆́ще възы́идеши с на́ми на́ брань въ рама́ѳꙋ галад̑скꙋю, и҆ рече і҆ѻ҆сафа́т꙽ ꙗ҆́коже и҆ а́зъ та́коже и т̂ы, ꙗ҆коже лю́ди моѝ та́коже и҆ лю́дїе твоѝ, ꙗ҆́коже ко́ни моѝ та́кож̑ и҆ ко́ни твоѝ·

5

И҆ рече и҆ѻ҆сафат̑ цр҃ь і҆ѹ́динъ къ цр҃ю і҆и҆л҃евꙋ. въпро́симъ ѹ҆бо днс̑҇ь г҃а·

6

И҆ собра̀ цр҃ь і҆и҆л҃евъ вс̂ѧ про̑҇рки. ꙗ҆́ко у҃, мꙋжъ. и҆ рече цр҃ь и҆мъ а́ще и҆дꙋ̀ в рема́ѳъ галад̑скїи, и҆л̂и ѻ҆ста́влю. и҆ рѣша взы́иди и҆ даѧ̀ пода́сть т̂и г҃ь в рꙋ́цѣ твоѝ цр҃ѧ·

7

И҆ рече і҆ѻ҆сафат̑ къ цр҃ю і҆и҆л҃евꙋ. нѣ́сть л̂и здѣ про̑҇рка гн҃ѧ, и҆ въпроси́ли бы́хом̑ г҃а и҆мъ·

8

И҆ рече цр҃ь і҆и҆л҃евъ къ і҆ѻ҆сафа́тꙋ а҆́ще е҆сть е҆ді́нъ мꙋжъ на вопрошенїе г҃а и҆ а́зъ възненави́дх̑ѣ и҆̀. ꙗ҆́ко не гл҃етъ ѻ҆ мнѣ̀ до́брѣ н̂о ѕлѣ̀. михїѧ сн҃ъ и҆е҆м꙽влаа́нь. и҆ рече цр҃ь і҆ѻ҆сафа́тъ і҆ѹ́динъ не гл҃и цр҃ю тако·

9

И҆ призва̀ цр҃ь і҆и҆л҃евъ скопца̀ е҆ді́ного, и҆ реч̑҇ ско́ро и҆дѝ по михїѧ сн҃а е҆м꙽влаи́на·

10

И҆ цр҃ь і҆и҆л҃евъ і҆ѻсафа́тъ цр҃ь і҆ѹ́динъ. сѣдѧ́ше ко́ждо на прс̑҇тлѣ свое҆мъ во ѻ҆рꙋ́жїи при вра́техъ самарїѧ и҆ вс̂и про̑҇рцы прорицахꙋ пред̑ ними·

11

И҆ сътворѝ себѣ̀ седекїа сн҃ъ ханаа́нь ро́га желѣз́на и҆ реч̑҇, та́ко гл҃етъ г҃ь си́ма ро́гома сѷрїю сконча́еши. до́ндеже сконча́ют̑сѧ·

12

И҆ вс̂и про̑҇рцы прорица́хꙋ та́ко гл҃юще. възы́иди в рема́ѳъ галад̑скїи. и҆ наста́вит̑ т̂ѧ и҆ да́сть т̂и г҃ь в рꙋц́ѣ цр҃ѧ а҆сѷрїиска·

13

И҆ посол̑҇ шед̑ призва́ти михїѧ. и҆ рече е҆мꙋ гл҃ѧ, с̂е всѝ про̑҇рцы ѹ҆сты е҆ді́ными нн҃ѣ гл҃ютъ до́брѣ ѻ҆ цр҃и, бꙋ́ди и҆ т̂ы въ словесѣхъ си́хъ. и҆ по словесем̑ сим̑ и҆ гл҃и до́брѣ·

14

И҆ реч̑҇ михїѧ жи́въ г҃ь. ꙗ҆ко а҆́ще чт̂о речетъ г҃ь мнѣ̀ с̂и гл҃ю·

15

И҆ прїиде къ цр҃ю и҆ реч̑҇ е҆мꙋ цр҃ь, михїѧ взы́дꙋ л̂и в рема́ѳꙋ галад̑скꙋю на́ брань и҆л̂и ѻ҆ста́влю. и҆ рече сїи взы́иди и҆ наста́витъ т̂ѧ г҃ь и҆ вда́сть т̂и в рꙋ́цѣ цр҃ѧ·

16

И҆ реч̑҇ е҆мꙋ цр҃ь е҆щѐ два́жды а҆́зъ кленꙋ т̂ѧ ꙗ҆́ко да гл҃еши и҆́стиннꙋ пред̑ гм҃ъ·

17

И҆ рече михїѧ ви́дѣхъ весь і҆и҆л҃ь раз꙽сѣѧ́нъ въ гора́хъ ꙗ҆́ко ста́да и҆́мже нѣсть па́стыра. и҆ рече г҃ь, не г҃ь си́мъ въ б҃а. да возврати́тсѧ ко́ждо в до́мъ сво́и с ми́ромъ·

18

И҆ рече цр҃ь і҆и҆л҃евъ ко і҆ѻ҆сафа́тꙋ цр҃ю і҆ѹдинꙋ не рѣхъ л̂и тебѣ̀ ꙗ҆ко не прори́чет꙽ м̂и се́й до́брѣ, н̂о ѕлѣ̀·

19

И҆ рече михїѧ не та́ко б̂о и҆ а́зъ слы́шꙋ гл҃ъ гн҃ь не та́ко. ви́дх̑ѣ г҃а б҃а і҆и҆л҃ева сѣдѧ́ща на прс̑҇тлѣ своем̑. и҆ вс̂е во́ин꙽ство нбс̑҇ное предъстоѧ́ше е҆мꙋ, ѻ҆де́снꙋю е҆го и҆ ѻ҆шꙋю́ю е҆го·

20

И҆ рече г҃ь кт̂о прельстит̑ а҆ха́ва цр҃ѧ і҆и҆л҃ева. и҆ взы́дет̑ и҆ паде́т꙽ в рама́ѳѣ галад̑стѣи, и҆ реч̑҇ се́й та́ко и҆ се́й рече та́ко·

21

І҆ и҆зы́де дх҃ъ и҆ ста̀ пред̑ гм҃ъ. и҆ рече а́зъ прельщꙋ и҆̀. и҆ реч̑҇ к не́мꙋ г҃ь ка́ко. и҆ реч̑҇ и҆зы́идꙋ и҆ бꙋдꙋ дꙋхъ ло́жъ во ѹ҆стѣхъ всѣхъ про̑҇ркъ е҆го, и҆ реч̑҇ прельстиши и҆̀. и҆ ѹ҆бо мо́жеши и҆зы́иди, и҆ сътворѝ та́ко·

22

И҆ с̂е нн҃ѣ да́сть г҃ь дꙋхъ лож̑ во ѹ҆ста всѣхъ про̑҇ркъ твои҆хъ си́хъ. и҆ г҃ь гл҃а на́ тѧ ѕла́ѧ·

23

И҆ прїиде седекїѧ сн҃ъ ханаа́нь, и҆ поразѝ михїѧ въ лицѐ. и реч̑҇ кїи дх҃ъ е҆сть гн҃ь гл҃авыи к тебѣ и҆ рече михїѧ с̂е т̂ы ѹ҆́зриши въ дн҃ь ѻ҆́нъ е҆гда̀ вни́деши въ сокро́вище съкро́вища свое҆го скры́тисѧ т̂ꙋ·

24

И҆ реч̑҇ цр҃ь і҆и҆л҃евъ пои҆мѣте михе́ѧ и҆ въз꙽врати́те и҆̀ къ а҆монѣ кнѧ́ѕю гра́да, и҆ къ і҆ѻ҆а́сꙋ сн҃ꙋ цр҃евꙋ да и҆̀ поса́дѧтъ в꙽ темни́цы. и҆ да и҆̀ ко́рмѧтъ хлѣбом̑ печа́лным̑, и҆ водо́ю печа́лною до́ндеже возвра́щꙋсѧ в ми́рѣ·

25

И҆ рече михїѧ а҆́ще возвраща́ѧ возврати́шисѧ въ ми́рѣ. т̂о да вѣ́си ꙗ҆́ко нѣ́сть гл҃алъ г҃ь мно́ю. и҆ рече слы́шите лю́дїе вс̂и. и҆ взы́де цр҃ь і҆и҆л҃евъ і҆ѻ҆сафат̑ цр҃ь і҆ѹ́дин̑҇ с ни́мъ, и҆ во рема́ѳꙋ галад̑скꙋю·

26

И҆ реч̑҇ цр҃ь і҆и҆л҃въ къ і҆ѻ҆сафа́тꙋ цр҃ю і҆ѹ́динꙋ прикры́и м̂ѧ и҆ въни́дꙋ в сѣчъ. и҆ т̂ы ѻ҆блеци́сѧ въ ризꙋ мою̀. и҆ прикры́сѧ цр҃ь і҆и҆л҃евъ, и҆ вни́де в сѣчъ·

27

Цр҃ь б̂о сѷрскїи заповѣ́да кнѧ́ѕем̑ и҆ ѻ҆рꙋжником̑ свои҆мъ, л҃, и҆ двѣма гл҃ѧ. не побѣди́тесѧ н̂и с вели́кимъ н̂и съ малым̑. н̂о ток̑҇мо и҆щѣте цр҃ѧ і҆и҆л҃ва е҆ді́ного·

28

И҆ бы́сть ꙗ҆́ко ѹ҆зрѣша вое҆во́ды и҆ ѻ҆рꙋжникы і҆ѻ҆сафа́та цр҃ѧ і҆ѹ́дина. и҆ рѣша с̂е е҆сть цр҃ь і҆и҆л҃евъ, и҆ ѻ҆бъстꙋпи́ша и҆ побѣди́шасѧ с ни́ми. и҆ возопи і҆ѻ҆сафат̑·

29

И҆ бы́сть ꙗ҆́ко ѹ҆зрѣша вое҆во́ды ѻ҆рꙋж́ныѧ ꙗ҆́ко нѣсть цр҃ь і҆и҆л҃евъ то́й, и҆ воз̑врати́шасѧ ѿ не́го. и҆ ѻ҆тѧзав̑҇ лꙋ́къ е҆ді́нъ мꙋжъ е҆мꙋже и҆́мѧ е҆восто́гъ ѹ҆стрѣлѝ цр҃ѧ і҆и҆л҃ва ме́ждꙋ воздꙋ́ховъ подлѣ щит̑. и҆ рече цр҃ь скопцꙋ̀ свое҆мꙋ возвратисѧ і҆ и҆звед̑и̑ мѧ ѿ бра́ни се́ѧ ꙗ҆́ко ꙗ҆́звенъ е҆смь·

30

И҆ ѹ҆мно́жисѧ бра́нь в то́й дн҃ь. и҆ цр҃ь б̂ѣ стоѧ̀ со колесни́цею проти́вꙋ сѷрѧн̑҇ ѿ ѹ҆́тра до́ вечера. и҆ натеко́ста кро́ви по́лни нѧ́дра е҆го и҆з꙽ ꙗ҆́звы и҆ ѹ́мре до́ вечера. и҆схожа́ше кровь ꙗ҆́звенаѧ ѿ нѧ́дръ по́ колесни́цы·

31

И҆ вопїѧ̀ проповѣ́дникъ ѻ҆ западѣ сл҃нца гл҃ѧ. ко́ждо васъ да и҆́детъ въ сво́и град̑, и҆ въ свою̀ зем̑лю ꙗ҆́ко ѹ҆́мре цр҃ь·

32

И҆ прїидо́ша в самарїю. и҆ погребо́ша въ самарїѝ цр҃ѧ·

33

И҆ раздѣли́сѧ кро́вь по всемꙋ̀ цвѣтꙋ самарѣ́искꙋ. и҆ полизаша̑ сви́ни и҆ ѱѝ кро́вь е҆го. и҆ блд̑ꙋница и҆з꙽мы́шасѧ въ кро́ви е҆го по гл҃ꙋ гн҃ю и҆же гл҃а·

34

И҆ про́чаѧ словес̑҇ а҆ха́вовъ и҆ вс̂ѧ ꙗ҆́же сътворѝ. и҆ храм̑ слоно́выи и҆же сътворѝ и҆ вс̂ѧ града ꙗ҆́же сътворѝ. не с̂е ли бы́ша пи́сана въ кни́гах̑ словес̑҇ во́ дн҃и цр҃ь і҆и҆л҃евъ·

35

И҆ ѹ́мре а҆ха́въ и҆ положенъ бы́сть съ ѿц҃ы своими. и҆ црс̑҇твова ѻ҆хозїѧ сн҃ъ е҆го в него̀ мѣсто·

36

І҆ѻ҆сафат̑ сн҃ъ а҆сїинъ црс̑҇твова над̑ і҆ѹ́дою, в лѣто, д҃ е, а҆ха́ва цр҃ѧ і҆и҆л҃ева·

37

Црс̑҇твова же і҆ѻ҆сафа́тъ сн҃ъ а҆сі́инъ. въ і҆ерс̑҇ли́мѣ лѣтъ, л҃е. внегда̀ нача̀ црс̑҇твова́ти. к҃е, лт̑ѣ црс̑҇твова въ і҆ерс̑҇ли́мѣ. и҆́мѧ мт҃ри е҆го б̂ѣ а҆зꙋ́ва дщ̂и салаи́лѧ·

38

И҆ хожда́ше по всѣмъ пꙋте́мъ а҆сїиномъ ѿц҃а свое҆го. и҆ не ѹ҆клони́сѧ ѿ не́го, е҆же твори́ти ѹ҆год̑но пред̑ ѻ҆чи́ма гн҃има·

39

То́кмо высо́кых̑ не разорѝ е҆щѐ лю́дїе закалахꙋ и҆ жрѧ́хꙋ на высоких̑·

40

И҆ ѹ҆мири́сѧ і҆ѻ҆сафат̑ съ цр҃емъ і҆и҆л҃вым̑·

41

И҆ про́чаѧ словес̑҇ і҆ѻ́сафа́тов꙽ и҆ си́лы е҆го ꙗ҆́же сътворѝ. не с̂е ли пи́сана сꙋть в꙽ кни́зѣ словесъ въ дн҃е цр҃еи і҆ѹ́дин̑҇·

42

И҆ ѹ́мре і҆ѻ҆сафат̑ съ ѿц҃ы свои́ми. и҆ погребе́нъ бы́сть ѹ҆ ѿц҃ъ своих̑ во́ градѣ двд҃вѣ ѿц҃а свое҆го. и҆ црс̑҇твова и҆ѻ҆рам̑ сн҃ъ е҆го в него̀ мѣ́сто·

43

И҆ ѻ҆хозїѧ сн҃ъ а҆ха́вов̑҇ црс̑҇твова над̑ і҆и҃лемъ в꙽ самарїѝ в лѣто, з҃і, і҆ѻ҆сафата цр҃ѧ і҆ѹ҆дина. и҆ црс̑҇твова над̑ і҆и҃лем̑ в самарїи, лт̑ѣ в҃·

44

И҆ сотворѝ лꙋка́вное пред̑ гм҃ъ. и҆ нача̀ ходи́ти по пꙋтем̑ ѿц҃а свое҆го а҆ха́ва. и҆ по пꙋтѝ е҆заве́лиными мт҃ри свое́ѧ и҆ во грѣсх̑ѣ до́мꙋ і҆е҆ровоа́млѧ сн҃а наватова. и҆же согрѣши во і҆и҆л҃и·

45

И҆ порабо́та ваа́лꙋ и҆ поклони́сѧ е҆мꙋ. и҆ раз̑гнѣва г҃а б҃а і҆и҆л҃ева па́че всѣхъ бы́вших̑ прежде е҆го·