Ostroh Bible❧Перша книга царів (Третя книга царств), розділ 21

1

И бы́сть по гл҃ѣхъ си́хъ.

2

виноград̑ б̂ѣ навꙋѳее҆въ і҆и҆л҃ьтѧни́на при гꙋмнѣ̀ а҆ха́вли, цр҃и самарѣ́истѣ·

3

И҆ рече а҆ха́въ къ навꙋѳѣю гл҃ѧ. да́ждь м̂и виноград̑ твои. и҆ бꙋ́детъ м̂и ѻ҆град̑ ѕе́лїю, ꙗ҆́ко близ̑ е҆сть до́мꙋ мое҆го, и҆ да́мъ т̂и виноград̑ и҆́нъ па́че сего̀. и҆ а́ще ли бꙋ́детъ не ѹ҆год̑но пред̑ тобо́ю. т̂о дам̑ т̂и сре́бро и҆змѣ́нꙋ виногра́дꙋ твое҆мꙋ, и҆ бꙋ́детъ м̂и виноград̑ ѕе́лїю·

4

И҆ рече навꙋѳѣ́и къ а҆ха́вꙋ. да не бꙋ́детъ м̂и с̂е ѿ г҃а б҃а мое҆го да́ти наслѣ́дїе ѿц҃ъ мои҆хъ тебѣ̀·

5

И҆ прїиде а҆ха́въ в до́мъ свои засмꙋще́нъ и҆ ѻ҆скръбленъ ѻ҆ словесѝ е҆же гл҃а к не́мꙋ навꙋѳе́и і҆и҆л҃ьтѧнин̑҇. и҆ е҆же рече не дам̑ наслѣдїѧ ѿц҃ъ моих̑ тебѣ̀. и҆ бы́сть дх҃ъ а҆ха́вль смꙋщен̑҇ и҆ ѹ҆спѐ на ѻ́дрѣ своем̑, и҆ покры̀ лице своѐ, и҆ не ꙗ҆́сть хлѣба·

6

И҆ вни́де и҆е҆завель жена̀ е҆го к не́мꙋ, и҆ реч̑҇ к не́мꙋ что̀ с̂е дх҃ъ тво́и е҆сть смꙋще́нъ, и҆ не ꙗ҆сѝ ты хлѣ́ба·

7

И҆ рече к неи и҆ а҆хав̑҇ ꙗ҆ко гл҃ах̑ навꙋѳе́ю і҆и҆л҃ьтѧнинꙋ гл҃ѧ. да́ждь м̂и виноград̑ тво́и на сре́брѣ, и҆ а́ще хо́щеши да́м꙽ т̂и виноград̑ и҆́нъ в него мѣ́сто, и҆ рече м̂и не да́мъ наслѣ́дїѧ ѿц҃ъ мои҆хъ·

8

И҆ рече к не́мꙋ и҆е҆заве́ль жена̀ е҆го. т̂ы ли нн҃ѣ тво́риши та́ко цр҃ю і҆и҆л҃евъ. н̂о воста́въ ꙗ҆жъ хлѣбъ и҆ молча бꙋ́ди, а́зъ дам̑ т̂и виноград̑ навꙋѳеев̑҇ і҆и҆л҃ьтѧнина·

9

И҆ напи́савши кни́гꙋ на и́мѧ а҆ха́вле и҆ запечатлѣ ѧ҆̀ печа́тїю е҆го. и посла̀ кни́гꙋ къ ста́рцемъ и҆ свобод̑нымъ, живꙋщимъ с навꙋѳе́емъ·

10

И҆ пи́сано бѣ же въ кни́ѕѣ та́ко. пости́тесѧ постомъ, и҆ посади́те навꙋѳе́ѧ вы́ше всѣхъ людїи·

11

И҆ приведѣте пред онь дв̂а мꙋж́а сн҃а зако́нопрестꙋпныхъ. и҆ т̂а свѣдѣтельствꙋ́ета на́нь гл҃юще. ꙗ҆́ко не блс̑҇ви б҃а и҆ цр҃ѧ. і҆ и҆звед̑ше е҆го и҆ побїите и҆̀ ка́менїемъ. и҆ да ѹ́мретъ·

12

И҆ сътвори́ша та́ко мꙋж́и гра́да е҆го старѣ́иши. и҆ свобод̑ницы живꙋщїѝ въ гра́дѣ е҆го. ꙗ҆́коже посла̀ к ни́мъ и҆е҆заве́ль, ꙗ҆́кож̑ пи́сано бѧ́ше въ кни́гах̑, и҆же пꙋсти к ним̑·

13

И҆ нареко́ша по́стъ и҆ посади́ша навꙋѳе́ѧ на челѣ̀ лю́дїи·

14

И҆ прїидо́ста дв̂а мꙋж́а сн҃а зако́нопрестꙋпных̑. и҆ сѣдоста подлѣ е҆го, и҆ свѣдѣтельва́ста на́нь мꙋж́и воста́вшаѧ на навꙋѳе́ѧ пред̑ всѣми люд̑ми гл҃ще. се́й не блс̑҇ви б҃а и҆ цр҃ѧ. і҆ и҆зведо́ша и҆̀ во́нъ и҆з гра́да. и҆ побиша и҆̀ ка́менїем̑ и҆ ѹ́мре·

15

И҆ посла́ша къ и҆е҆заве́ли гл҃юще. побїенъ бы́сть навꙋѳе́и и҆ ѹ́мретъ·

16

И҆ бысть ꙗ҆́ко ѹ҆слы́ша и҆е҆заве́ль, гл҃ющихъ ꙗ҆́ко побїе҆нъ навꙋѳе́и и҆ ѹ́мре. и҆ рече а҆ха́вꙋ, воста́ни наслѣдꙋй виноград̑ навꙋѳе́евъ і҆и҆л҃ьтѧнина, и҆же не взѧ́тъ т̂и сре́бра. и҆ ѹ҆же нѣ́сть навꙋѳе́и жи́въ, н̂о ѹ́мре·

17

И҆ бы́сть ꙗ҆́ко ѹ҆слы́ша а҆ха́въ ꙗ҆́ко ѹ҆бїенъ бы́сть навꙋѳе́и і҆и҆л҃ьтѧнинъ. и҆ све́рже ри́зы своа и҆ ѻ҆блече́сѧ въ врѣти́ще. и҆ бысть по си́хъ и҆ въста́въ і҆ и҆де а҆ха́въ въ виноград̑ навꙋѳе́ѧ і҆и҆л҃ьтѧнина наслѣдити и҆̀·

18

И҆ рече г҃ь ко и҆лїѝ ѳезви́тѧнинꙋ гл҃ѧ, въста́въ и҆ сни́ди на срѣте́нїе а҆ха́вꙋ цр҃ю і҆и҆л҃евꙋ, и҆же в꙽ самарїи. се бо се́й въ виногра́дѣ навꙋѳе́евѣ, ꙗ҆ко сни́де т̂ꙋ прїѧ́ти е҆го·

19

И҆ речеши е҆мꙋ гл҃ѧ си́це гл҃етъ г҃ь. поне́же т̂ы ѹ҆бѝ навꙋѳе́ѧ. и҆ прїѧ́тъ виноград̑ е҆го. сего ради гл҃етъ г҃ь. на мѣстѣ и҆дѣж́е полиза́ша ѱѝ кро́вь е҆го т̂ꙋ поли́жт̑ꙋ и҆ кро́вь твою̀. и҆ блд̑ꙋница и҆змы́ют̑сѧ въ кро́ви твое́й·

20

И҆ реч̑҇ а҆ха́въ къ и҆лїѝ ѻ҆брѣте ли м̂ѧ враже мои. и҆ реч̑҇ и҆лїѧ ѻ҆брѣто́хъ поне́же т̂ы всꙋе́ разъждежесѧ. и сътворѝ лꙋка́вное пред̑ гм҃ъ, въ раз꙽гнѣ́вати и҆̀·

21

Си́це гл҃етъ г҃ь с̂е а҆́зъ наведꙋ на́ тѧ ѕла́ѧ. и҆ попалю̀ за́днѧѧ твоѧ̀. и҆ расточꙋ̀ вс̂ѧ а҆ха́вова ѹ҆вращ꙽шагосѧ ѿ менѐ кро́мѣ. и҆ съдръжи́мыѧ, и҆ ѻ҆ста́вшаѧ въ і҆и҆л҃и·

22

И҆ преда́мъ до́мъ твои ꙗ҆́ко до́мъ и҆е҆ровоа́ма сн҃а нава́това·

23

и҆ ꙗ҆́коже до́мъ ваа́синъ сн҃а а҆ха́и҆на ѻ҆ прогнѣванїихъ, и҆́миже мѧ прогнѣ́ва. и҆ съгрѣшѝ въ і҆и҆л҃и·

24

И҆ е҆заве́ль рече гл҃етъ г҃ь ѱѝ снѣдѧтъ ю҆̀ в꙽ пе́рвое паде́нїе въ і҆ил҃и·

25

И҆ ѹ҆мръшихъ а҆ха́влихъ и҆ въ гра́дѣ снѣдѧт̑ ѱѝ. и҆ ѹ́мръшаѧ е҆го на́ поли снѣдѧт̑ пти́ца нбс̑҇ныѧ·

26

И҆ в сꙋе́тѣ т̂ы е҆си а҆ха́вѣ. поне́же нача́тъ твори́ти лꙋка́вое пред̑ гм҃ъ. ꙗ҆́ко превратѝ и҆е҆заве́ль жена̀ е҆го·

27

И҆ ѻ҆мрази́сѧ ѕѣ́ло в мерз꙽скихъ, по все́мъ ꙗ҆́же сътвори́ша в самарїи. и҆́хже и҆стощѝ г҃ь ѿ лица сн҃овъ і҆и҆л҃евъ·

28

И҆ внегда̀ слы́ша а҆ха́въ словеса̀ с̂и. склони́сѧ пред̑ лицем̑ гн҃имъ, і҆ и҆дѧ́ше пла́часѧ, и҆ сверже ри́зы своѧ̀ и҆ препоѧ́сасѧ вре́тищемъ по тѣлꙋ свое҆мꙋ и҆ пости́сѧ и҆ б̂ѣ ѻ҆блечен̑҇ въ вре́тище ѿ дн҃и во́ньже ѹ҆бѝ навꙋѳе́ѧ і҆и҆л҃ьтѧнина·

29

И҆ хожда́ше скорбенъ и҆ бы́сть гл҃ъ гн҃ь рꙋко́ю раба̀ е҆го и҆лїѝ ѻ҆ а҆ха́вѣ·

30

И҆ рече г҃ь ви́дѣхъ ꙗ҆́ко склони́сѧ а҆ха́въ предо мно́ю. сего ра́ди не наведꙋ зло́бы е҆го во́ дн҃и е҆го. н̂о во́ дн҃и сн҃а е҆го наведꙋ ѕло́бꙋ на до́мъ е҆го·