Ostroh Bible❧Перша книга царів (Третя книга царств), розділ 3

1

И поѧ́тъ соло́мон꙽ дще́рь фараѻ́на цр҃ѧ е҆гѷпет꙽ска себѣ въ женꙋ и҆ приведе́ ю҆̀ въ́ град̑ дв҃двъ до́ндеже сконча себѣ здати до́мъ свои и҆ дом̑ гн҃ь пе́рвое и҆ стѣнꙋ і҆ерс̑҇ли́мовꙋ ѻ҆́крс̑҇тъ.

2

За сед̑мь лѣтъ, сътвори и҆ сконча̀·

3

И҆ бѧ́ше ѹ҆ соло́мона, ҂о҃, мꙋж́ъ, носѧ́щихъ бре́мена. дѣ́лающихъ ка́менїе. и҆, ҂п҃, сѣкꙋщ́ихъ въ горѣ̀ дре́во. и҆ сътворѝ соло́монъ мо́ре и҆ ѹ҆крѣпленїа, и҆ ба́нѧ вели́кїѧ и҆ столъпы̀, и҆ ѹ҆глы дво́рныѧ и҆ море мѣ́дѧное, и҆ созда̀ кра́инаа и҆ среднаа е҆го. и҆ разбѝ гра̑ двд҃въ. та́ко дщ̂и фараѻ́нѧ преиде ѿ гра́да двд҃ва, в до́мъ сво́и е҆́же созда̀ е́й. и҆ тогда̀ созда ѻ҆́лтарь и҆ соло́монъ возноша́ше трижды лѣтомъ жрътвꙋ·

4

И҆ ми́рнаѧ на ѻ́лтарь и҆же созда гв҃и. и҆ жрѧ́ше пред̑ гм҃ъ, и҆ скон꙽ча до́мъ. и҆ сїи старѣ́ишины притсавле́ныѝ над̑ дѣ́ломъ црѧ҃ соло́мона, ҂г҃, и҆ х҃, приста́вник̑҇ за люд̑ми дѣ́лающими дѣ́ло. и҆ созда̀ а҆сꙋръ, и҆ магъдо́нъ, и҆ газе́ръ, и҆ вѣтꙋрꙋ. и҆ вы́шнїи а҆вела́ѳъ. ток̑҇мо же по созданїи домꙋ гн҃ѧ, и҆ стѣны і҆е҆рс̑҇ли́мъскїѧ ѻ҆́кс̑҇ртъ·

5

Таже потомъ созда̀ грады сїѧ. вънегда̀ е҆ще̑ сꙋщ́е двд҃ꙋ жи́вꙋ, заповѣ́да соло́монꙋ гл҃ѧ·

6

Се́й да е҆сть с тобо́ю семе́и сн҃ъ гираи́нъ, сн҃ъ семе́не и҆е҆менеи́на ѿ хевро́на·

7

И҆ с̂е клѧ́тъ м̂ѧ клѧтво́ю ѹ҆кори́зненою. въ дн҃ь вонже и҆дѧ́хꙋ с по́лки. ты же сни́де въ срѣтенїе м̂и на і҆ѻ҆рда́нъ. и҆ клѧх̑сѧ е҆мꙋ гм҃ъ гл҃ѧ. ꙗ҆́ко не ѹ҆мръщ꙽влю тебе ѻ҆рꙋжїемъ. и҆ нн҃ѣ не каса́исѧ е҆мꙋ ꙗ҆́ко мꙋж́ъ смы́сленъ е҆си т̂ы. и҆ разꙋмѣи ꙗ҆́же сътвори́ши е҆мꙋ. и҆ сведе́ши ста́рость е҆го со кро́вїю во ад̑·

8

И҆ посла цр҃ъ соло́монъ, и҆ призва̀ семе́ѧ, сн҃а гираа́ша, и҆ рече е҆мꙋ. соѕи́жди себѣ̀ дом̑ въ і҆е҆рлс̑҇и́мѣ, и҆ сѣдѝ тꙋ и҆ не ходи ѿтꙋдꙋ ника́мож̑·

9

И҆ бꙋдет̑ в꙽ дн҃ь исхо́да твое҆го, и҆ пре́идеши потоки ке́дръскїѧ. и҆ разꙋмѣѧ разꙋмѣи, ꙗ҆́ко смрт҃їю ѹ҆́мреши. и҆ кровь твоѧ бꙋдет̑ на главѣ̀ твое́и. и҆ заклѧт̑ и҆̀ цр҃ь в꙽ дн҃ь то́й. и҆ рече семе́и къ цр҃ю. бл҃гъ гл҃ъ и҆же гл҃а г҃и мо́и цр҃ꙋ та́ко да сътворит̑ рабъ тво́и, и҆ сѣде семе́и въ і҆е҆рлс̑҇и́мѣ, г҃, лѣта. и҆ бы́сть по трех̑ лѣтех̑. и҆ бѣжаста дв̂а раба̀ семе́ина ко а҆к꙽хꙋсꙋ сн҃ꙋ маа҆ха́инꙋ, цр҃ю геѳъскꙋ. и҆ возвѣсти́ша семе́ю гл҃юще, с̂е е҆́ста раба̀ твоа въ геѳ꙽тѣ, и҆ въстав̑҇ семеѝ. и҆ ѻ҆сѣдла ѻ҆слѧ̀ свое, и҆́де в꙽ ге́ѳꙋ ко а҆кхꙋсꙋ взыска́а рабꙋ̀ свое́ю, і҆ и́де семе́и и҆зъ і҆е҆рлс̑҇и́ма. и҆ приведѐ раба̀ своа ѿ геѳа. и҆ возвѣстиша соло́монꙋ гл҃юще. ꙗ҆́ко семе́и ходѝ и҆зъ і҆е҆рлс̑҇и́ма въ геѳы, и҆ возврати раба̀ своѧ·

10

И҆ посла цр҃ь и҆ призва семе́ѧ, и҆ рече цр҃ь к немꙋ̀. не клѧ́хъ ли т̂и сѧ гм҃ъ и҆ засвѣдѣтельствова́хъ т̂и гл҃ѧ, во́нже а́ще дн҃ь и҆зы́деши и҆зъ е҆рлс̑҇и́ма. і҆ и҆зы́деши на́ десно, и҆л̂и на шꙋ́е, разꙋмѣѧ разꙋмѣи, ꙗ҆́ко смр҃тїю ѹ҆́мреши·

11

И҆ рече м̂и бл҃гъ гл҃ъ и҆́же слы́шах̑. чтож̑ ꙗ҆́ко не сохранѝ клѧ́твы гн҃ѧ, и҆ за́повѣди и҆́же бѣхъ т̂и заповѣ́далъ·

12

И҆ ре́че цр҃ь къ семе́ю, т̂ы вѣ́си вс̂ю ѕло́бꙋ свою ꙗ҆́же вѣ́сть срд̑це твое, и҆ ꙗ҆́же сътвори дв҃дꙋ мое҆мꙋ ѿц҃ꙋ. и҆ возвратѝ г҃ь ѕло́бꙋ твою на главꙋ твою. и҆ цр҃ь соло́монъ е҆сть блс̑҇ве́нъ. и҆ прс̑҇толъ двд̑въ е҆сть гото́въ пред̑ бм҃ъ во́ вѣки, и҆ заповѣ́да цр҃ь соло́монъ ванѣю сн҃ꙋ і҆ѻ҆да́евꙋ, и҆ шед̑ ѹ҆бїи семе́ѧ, и҆ ѹ́мре семе́и·

13

И҆ б̂ѣ цр҃ь соло́монъ смы́слен̑҇ ѕѣло и҆ мꙋдръ. і҆ѹ́да же і҆и҆л҃ь мно́ѕи бѣхꙋ ѕѣло, ꙗ҆́ко пѣсокъ и҆́же при мо́ри, въ мно́жествѣ ꙗ҆дꙋще и҆ пїюще и҆ веселѧ́щесѧ·

14

И҆ соло́мон̑҇ б̂ѣ ѻ҆блада всѣми црс̑҇твы, ѿ рѣкъ и҆ до землѧ̀ ѳилистим̑скїѧ, даже до предѣлъ е҆гѷпетъскъ, и҆ бѣхꙋ приносѧ́ще да́ры и҆ рабо́тающе соло́монꙋ во вс̂ѧ дн҃и живота е҆го·

15

И҆ соло́монъ нача̀ развръза́ти си́лнаѧ лива́нова, и҆ то́й сам̑ созда̀ ѳермі́ю въ пꙋсты́ни·

16

И҆ сїе снѣ́дь бываше соло́монꙋ, и҆ сїѝ потребованїѧ соло́монова въ дн҃ь е҆ді́нъ, л҃, мѣръ смида́леныѧ мꙋкѝ, и҆ ѯ҃, ꙗ҆́дїи разли́чныхъ, и҆ і҃ те́лецъ из꙽бра́нныхъ, и҆ к҃, говѧд̑ тꙋчныхъ, и҆ ст̂о, ѻ҆́внов̑҇, ра́звѣ е҆́ленїи, и҆ сернъ и҆ бꙋи́воловъ. и҆ вс̂ѧ потре́бна ѕвѣрїи и҆ ѿ кꙋрѧтъ тꙋ́чныхъ и҆збра́нных̑, и҆ ѿ всѧ́кого пти́ча и҆же на потре́бꙋ, мно́гое мно́жество·

17

И҆ бѧ́ше соло́монъ ѻ҆блада́ѧ всѣми стра́нами, и҆ ѻ҆б о́нъ полъ рѣкѝ·

18

И҆ ѿ ѳара́ѳы до га́зы, и҆ всѣми црс̑҇твїи, ѻ҆б о́нъ полъ рѣкѝ, и҆ б̂ѣ е҆мꙋ ми́рно ѿ всѣ х̑ стра́нъ ѻ҆́крс̑҇тъ е҆го·

19

И҆ живѧ́хꙋ і҆ѹ҆де́и і҆и҆л҃ьтѧ́не безъ печа́ли кож̑до въ домꙋ̀ свое҆мъ, и҆ под̑ виногра́домъ свои҆мъ, и҆ под̑ смоко́вницами свои҆ми ꙗ҆дꙋще и҆ пїю́ще, и҆ ликꙋ́юще, и҆ ѿ да́на и҆ до вирсавїѧ въ всѧ дн҃и соло́монѧ·

20

И҆ с̂е старѣ́ишины бѧ́хꙋ соло́монѧ, а҆зорѣѧ сн҃ъ садо́ков̑҇, і҆ере́ѧ и҆ ѻ҆рнїѧ сн҃ъ і҆а҆вїа҆ѳа́рь, ꙗ҆́же бѣ̀ старѣ́ишина пред̑стоѧ́щимъ, и҆ е҆сара́нъ и҆же над̑ до́мом̑ е҆го к҃а, кни́гочїѧ и҆ ва́ра сн҃ъ и҆ѻ҆а́ра вое҆во́ды, и҆ а҆химам̑ сн҃ъ вара́конь, гатарси́на, и҆ ванѣ́ѧ сн҃ъ и҆ѻ҆даев̑҇, над̑ а҆лꙋхї́ею, на возда́нїи бѧ́ше, и҆ сак꙽хꙋ́съ сн҃ъ наѳа́нь, и҆же въ свѣтех̑, и҆ бѧ́ше ѹ҆ соло́мона ҂м҃, ко́нїи и҆збра́нныхъ со колесни́цами, ҂в҃і, ко́нникъ, и҆ бѣ̀ ѻ҆блада́ѧ всѣми црс̑҇твы, и҆ ѿ рѣкѝ и҆ до землѧ̀ и҆ноплеме́нникъ и҆ до предѣлъ е҆гѵ́пта·

21

И҆ соло́монъ сн҃ъ дв҃двъ, црс̑҇твова̀ над̑ і҆и҆л҃емъ, и҆ над̑ і҆ѹ́дою въ і҆ерс̑҇ли́мѣ то́кмо·

22

Лю́дїе же тогда̀ бѧ́хꙋ жрꙋщ́е на высина́хъ, ꙗ҆ко не бѣ̀ созда́нъ до́мъ и҆́мени гн҃ю да́же и҆ до дн҃и ѻ҆́ного·

23

И҆ възлюбѝ соло́монъ г҃а. ходи́ти в наѹ҆че́нїих̑ дв҃двыхъ ѿц҃а свое҆го, то́кмо на хол̑҇мѣхъ жрѧ́ше и҆ кадѧ́ше·

24

И҆ въста̀ соломонъ и҆́де в гаваѻ́нъ пожрѣти т̂ꙋ, ꙗ҆́ко та́мо бѣ̀ высота̀ ве́лїѧ и҆ ты́сѧщꙋ жрътвъ възнесѐ, на жрътвеницѣ в гаваѻ҆́нѣ·

25

И҆ ꙗ҆ви́сѧ г҃ь соло́монꙋ въ снѣ̀ но́щїю, и҆ рече е҆мꙋ просѝ чт̂о хо́щеши и҆ да́мъ т̂и·

26

И҆ рече соло́монъ, ты̀ е҆си сътворил̑҇ со ра́бомъ твои҆мъ дв҃домъ ѿц҃емъ мои́мъ млс̑҇ть ве́лїю, ꙗ҆́коже е҆сть ходи́лъ пред̑ тобо́ю, и҆́стинною и҆ пра́вдою, и҆ пра́вымъ срд̑цемъ с тобо́ю и҆ съхранѝ е҆мꙋ млс̑҇ть вели́кꙋю, и҆ еж̑ да́ти сн҃ови е҆го сѣ́сти на прс̑҇тлѣ е҆го ꙗ҆́ко и҆ дне́сь ꙗ҆́вѣ·

27

И҆ н҃нѣ г҃и бж҃е мо́и ты̀ сътвори́лъ е҆си раба̀ свое҆го цр҃емъ въ дв҃да мѣсто ѿц҃а мое҆го, и҆ а́зъ е҆смь ѻ҆тро́чищъ ма́лъ, и҆ не ви́дѣ и҆схо́да свое҆го и҆ вхо́да·

28

Раб̑҇ же твои посредѣ людїи твои҆хъ. ꙗ҆́же и҆збра̀ лю́ди мно́ги, ꙗ҆́ко пѣсо́къ и҆же при́ мори, е҆гоже никто́же не и҆зочте́тъ ѿ мно́жества·

29

Сего ради да́ждь рабꙋ̀ свое҆мꙋ срд̑це смы́слено. на послꙋша́нїе и҆ сꙋже́нїе лю́дем꙽ твоим̑ въ пра́вдꙋ и҆же разꙋмѣва́ти посреди добрꙋ и҆ ѕл̂ꙋ, ꙗ҆ко кт̂о мо́жетъ сꙋди́ти людемъ твои҆мъ тѧ́жкимъ си́мъ·

30

И҆ ѹ҆го́дно бы́сть сло́во с̂е пред̑ гм҃ъ бм҃ъ. ꙗ҆́ко и҆спросѝ соло́мон꙽ гл҃ъ се́и·

31

И҆ рече г҃ь к немꙋ зане́же просѝ ѿ менѐ гл҃ъ се́и. и҆ не просѝ ѿ менѐ дн҃їи мно́го, и҆ не просѝ богат̑ства, ниже просѝ дш҃а вра́гъ твоих̑ н̂о и҆спросѝ себѣ мꙋ́дрости и҆ ра́зꙋма, да послꙋш́аеши сꙋ́да·

32

с̂е сътворих̑ по гл҃ꙋ твое҆мꙋ. с̂е да́хъ т̂и срд̑це смы́слено, и҆ мꙋ́дрость·

33

Ꙗ҆́коже нѣсть бы́лъ мꙋж́ъ пред̑ тобо́ю и҆ по тебѣ̀ не воста́нет̑ подо́бенъ тебѣ·

34

И к семꙋ и҆хже не просѝ да́хъ т̂и, и҆ бога́тъство и҆ сла́вꙋ. ꙗ҆́ко нѣ́сть бы́лъ ни е҆ді́нъ мꙋжъ подо́бенъ т̂и въ цр҃ехъ по вс̂ѧ дн҃и твоѧ·

35

И҆ а́ще хо́диши по пꙋтѝ мое҆мꙋ, и҆ сохраниши за́повѣди моѧ и҆ повеленїа моѧ. ꙗ҆коже ходи и҆ дв҃дъ ѿц҃ъ тво́и ѹ҆мно́жꙋ дн҃и твоѧ̀·

36

И҆ въз꙽бнꙋ соло́монъ и҆ се бѣ̀ со́ненъ. и҆ воста́въ и҆́де въ і҆ерс̑҇ли́мъ, и҆ ста̀ пред̑ лицемъ жрътевникꙋ пред̑ лицемъ кїѻ́та завѣта гн҃ѧ въ сїѻ́нѣ. и҆ вознесе жрътвꙋ, и҆ сътвори ми́рнаѧ. и҆ сътвори пи́ръ ве́лїи себѣ̀ и҆ всѣмъ ѻ҆́троком̑ свои҆мъ·

37

Тогда пред̑ста́стѣ дв̂ѣ женѣ̀ блꙋ́дницы пред̑ цр҃емъ, и҆ стоѧ́ста пред̑ нимъ·

38

И҆ рече жена̀ е҆ді́на, въ мнѣ̀ е҆сть бѣда̀ г҃и мо́и. а҆́зъ и҆ с̂и по́дрꙋга ми, и҆ живе́вѣ в домꙋ̀ е҆ді́ном̑ и҆ породи́ховѣ въ домꙋ·

39

И҆ бысть по третїем꙽ дн҃и роженїа мое҆го. и҆ родѝ и҆ жена̀ сїѧ, и҆ бѣ́ховѣ са́ми ме́ждꙋ собо́ю. и҆ не бѣ̀ никто́же с нама ра́звѣ нас̑҇ в домꙋ̀ на́ю·

40

И҆ ѹ҆́мре сн҃ъ жены̀ се́ѧ в но́щи, ꙗ҆́ко лежа̀ на не́мъ·

41

И҆ воста́вши полꙋно́щїю взѧ̀ ѻ҆троча̀ мое и҆з рꙋкꙋ мое́ю. и҆ ѹ҆спѝ на ло́нѣ своем̑, и҆ ѹ҆мръшее ѻ҆́троча своѐ положи́ла бѧше ѹ҆ ме́не·

42

И҆ востах̑ заѹ҆́тра накарми́ти ѻ҆троча́ти. и҆ ѻ҆брѣтох̑ е҆̀ мрътво. и҆ внегда̀ со тща́нїемъ зрѧ̀ заѹ҆́тра. и҆ с̂е нѣсть сн҃ъ мои е҆гоже е҆смь а҆́зъ родила·

43

И҆ реч̑҇ дрꙋга́ѧ жена н̂и, н̂о с̂е е҆сть сн҃ъ мо́и живы́и, а҆ с̂е е҆сть сн҃ъ твои ѹ҆мры́и. и҆ прѧ́стасѧ пред̑ цр҃емъ·

44

И҆ рече и҆́ма цр҃ь. т̂ы гл҃еши тако с̂е е҆сть сн҃ъ мо́и живы́и а҆ сн҃ъ се́ѧ мр҃твыи с̂е. и҆ т̂ы гл҃еши н̂и, н̂о живы́и е҆сть сн҃ъ мо́и, а҆ твой сн҃ъ ѹ҆мръшїи·

45

Принесите м̂и меч̑҇ и҆ принесо́ша мечъ пред̑ цр҃ѧ·

46

И҆ рече цр҃ь разсѣцыте ѻ҆́троча сꙋщее жи́во на́ двое, и҆ дади́те е́й полъ, а҆ ѻ҆но́и дрꙋгꙋю по́лъ·

47

И҆ ѿвѣща жена̀ е́йже б̂ѣ сн҃ъ живы́и къ цр҃ю. понеже смѧтесѧ ѹ҆троба е҆ѧ̀ ѻ҆ сн҃ꙋ е҆ѧ и҆ реч̑҇ во мнѣ е҆сть бѣда господи́не мо́и. дади́те е́й ѻ҆́троча с̂и жи́во, смр҃тїю же не ѹ҆морите е҆го. и҆ т̂а рече да не бꙋдетъ н̂и мнѣ н̂и тебѣ, н̂о пресицѣте е҆̀·

48

И҆ ѿвѣща цр҃ь рече, дади́те дѣтищ̑҇ живы́и женѣ рекше́и дади́те се́и е҆̀, а҆ смр҃тїю не ѹ҆мори́те е҆го, сїѧ е҆сть мт҃и е҆го·

49

И слы́шавъ весь і҆и҆л҃ь сд̑ꙋ се́й, и҆м꙽же сꙋдѝ цр҃ь, и҆ ѹ҆боѧ́шасѧ ѿ лица̀ цр҃ева, разꙋмѣша б̂о ꙗ҆́ко смы́слъ бж҃їи б̂ѣ в немъ сътвори́ти ѻ҆правда́нїѧ·