Ostroh Bible❧Перша книга царів (Третя книга царств), розділ 2

1

И приближи́шасѧ дв҃дꙋ дн҃їе ѹ҆мрѣти. и҆ заповѣ́да соло́монꙋ сн҃ꙋ е҆мꙋ гл҃ѧ·

2

А҆́зъ ѿхождꙋ̀ въ пꙋть все́ѧ землѧ̀. ты́ же крѣ́писѧ, и҆ бꙋди мꙋж꙽ съвръшен̑҇·

3

И҆ съхранѝ храни́лище г҃а и҆ б҃а твое҆го ходити въ всѧ̀ пꙋтѝ е҆го. съхранѧ́и за́повѣди е҆го и҆ ѻ҆пра́вданїа и҆ сд̑ꙋбы̀ и҆ свѣдѣ́нїѧ е҆го пи́санныѧ въ зако́нѣ моѷсїѻ҆вѣ. да разꙋмѣ́еши ꙗ҆́же сътвори́ши ѻ҆ всх̑ѣ, е҆ли́коже заповѣдах̑ т̂и·

4

да поста́витъ г҃ь сло́во е҆го. и҆же гл҃а к не́мꙋ гл҃ѧ, а҆́ще съхранѧ́тъ сн҃ове твоѝ пꙋти е҆го, ꙗ҆́ко ходи́ти предо мно́ю вои҆́стиннѣ всѣмъ срд̑цем̑ и҆́хъ. и҆ все́ю дш҃ею и҆́хъ, гл҃ѧ не сожене́тъ тебѐ мꙋж́ъ съ прс̑҇тола і҆и҆л҃ева·

5

Се бо т̂ы вѣ́си е҆ли́ко сътворѝ м̂и и҆ѻ҆а҆въ сн҃ъ сарꙋ́инъ колико сотвори м̂и ѻ҆бѣ́ма старѣ́ишинома си́лы і҆и҆л҃евы. а҆вени́рꙋ сн҃ꙋ ни́ровꙋ, и҆ а҆месїю сн҃ꙋ н̂е҆ѳе́ровꙋ вое҆водѣ і҆ѹ́динꙋ ѹ҆бѝ ѧ҆̀. и҆ вы́лїѧ кро́ви бра́ни в ми́рнаѧ и҆ да́сть кро́ви неви́нныхъ. на ѻ҆поѧсанїе чре́слом꙽ е҆го и҆ под̑ ногꙋ е҆го под̑ложѝ е҆го·

6

И҆ сътвори́ши по мꙋ́дрости свое́и. и҆ не сведе́ши ста́рость е҆го ѿ ми́ра во а҆́дъ.

7

И҆ сн҃омъ верзовелеи҆номъ галатьског̑҇ сътвори́ши млс̑҇ть. и҆ да бꙋ́дꙋтъ съ ꙗ҆дꙋщими трапе́зꙋ твою̀. ꙗ҆́ко та́ко приближи́шасѧ мн̂ѣ. и҆ вънегда̀ бѣжа́ти м̂и ѿ лица̀ а҆весало́млѧ бра́та твое҆го·

8

И҆ с̂е бꙋ́детъ с тобо́ю семенїи сн҃ъ гирїи́нъ сн҃ъ и҆ю҆минеи́нъ ѿ ваѳарїи́ма·

9

И҆ то́й клѧт̑ м̂ѧ клѧ́твою не́мощною въ дн҃ь во́нже и҆схожа́хъ с полки. и҆ то́й сниде на срѣтенїе м̂и на і҆ѻ҆рда́нъ. и҆ клѧ́хъсѧ е҆мꙋ ѻ҆ г҃ѣ гл҃ѧ. не ѹ҆бїю т̂ѧ ѻ҆рꙋж́їемъ, и҆ не погꙋбиши е҆го·

10

И҆ ѹ҆вѣ́си чт̂о сътвори́ши е҆мꙋ ꙗ҆́ко мꙋж́ъ мꙋ́дръ е҆си. и҆ сведе́ши ста́рость е҆го съ кровїю во а҆́дъ·

11

И҆ ѹ҆спѐ дв҃дъ, и҆ погребен꙽ бы́сть ѹ҆ ѿц҃ъ свои҆хъ. въ́ градѣ давы́довѣ·

12

И҆ бы́сть дн҃їи въ нѧ́же црс̑҇твова дв҃дъ въ і҆и҆л҃и, м҃, лѣтъ. в хевро́нѣ црс̑҇твова, з҃, лѣтъ, а҆ въ і҆ерс̑҇ли́мѣ, л҃г, лѣта·

13

И҆ соло́монъ сѣде на прс̑҇толѣ дв҃да ѿц҃а свое҆го. сы́и, в҃і, лѣтъ. и҆ ѹ҆чести́сѧ црс̑҇твїе е҆го ѕѣ́ло·

14

И҆ вни́де а҆до́нїѧ сн҃ъ а҆ги́ѳоновъ. къ вирсавїѝ мт҃ри соло́мони и҆ поклони́сѧ е́й. ѻ҆на́ же реч̑҇, ми́ръ въходꙋ твое҆мꙋ. и҆ рече а҆до́нїа ми́ръ·

15

И па́ки рече. рѣчъ м̂и е҆сть к тебѣ̀. и҆ рече е҆мꙋ вирса́вїѧ гл҃и·

16

И҆ рече е́й т̂ы вѣ́си, ꙗ҆́ко б̂ѣ моѐ цр҃ьство. къ мнѣ̀ б̂ѣ ѹ҆же ве́сь і҆и҆л҃ь ѻ҆брати́лъ лицѐ свое, ꙗ҆́ко црс̑҇твовати мн̂ѣ в ни́хъ. и҆ ѻ҆брати́сѧ црс̑҇тво моѐ ѿ менѐ, и҆ бы́стъ на бра́тѣ моем̑, ꙗ҆́ко ѻ҆ г҃ѣ бы́сть та́ко·

17

И҆ нн҃ѣ проше́нїѧ е҆ді́ного ма́ла прошꙋ̀ ѿ тебѐ, т̂о не ѿврати лица̀ свое҆го. и҆ реч̑҇ е҆мꙋ вирсавїѧ просѝ·

18

И҆ рече к не́и а҆до́нїа рцы̀ къ соло́монꙋ цр҃ю гл҃ѧ. ꙗ҆́ко не и҆́мать ѿврати́ти лица̀ свое҆го ѿ тебѐ, и҆ дабы м̂и далъ а҆веса́нꙋ сꙋман꙽тѧны́ню въ женꙋ̀·

19

И҆ рече вирсавїа добрѣ а҆́зъ и́мам̑ гл҃ати ѻ҆ тебѣ̀ къ цр҃ю·

20

И҆ вни́де пред̑ цр҃ѧ вирсаві́а гл҃ати е҆мꙋ ѻ а҆до́нїи. и҆ воста̀ цр҃ь на срѣте́нїе е́й и҆ поклони́сѧ е́й и҆ сѣде на прс̑҇толѣ своем̑. и҆ поста́виша прс̑҇толъ дрꙋгїи мт҃ери цр҃евїи. и҆ сѣ́де ѻ҆де́снꙋю сн҃а·

21

И реч̑҇ сн҃ꙋ свое҆мꙋ проше́нїѧ мала е҆ді́ного прошꙋ̀ ѹ҆ тебѐ и҆ не ѿвратѝ лица̀ твое҆го ѿ мене. и҆ реч̑҇ к не́и цр҃ь просѝ мт҃и моѧ̀, ꙗ҆́ко не ѿвращꙋсѧ ѿ тебѐ·

22

И҆ рече да́жъ а҆веса́нꙋ сꙋмантѧны́ню а҆до́нїю братꙋ свое҆мꙋ въ женꙋ̀·

23

И҆ ѿвѣща цр҃ь соло́монъ мт҃ри свое́и и҆ рече. въскꙋ́ю т̂ы про́сиши а҆виса́ны сꙋмантѧны́нѣ въ женꙋ̀ е҆мꙋ, т̂о и҆ просѝ ѹ҆́же е҆мꙋ и҆ црс̑҇тво. ꙗ҆́ко то́й ес̑҇ брат̑ мо́и старѣ́и надо мно́ю. того б̂ѣ а҆вїаѳа́ръ і҆е҆ре́и, и҆ того і҆ѻ҆а́въ сн҃ъ сарꙋи́нъ вое҆вода дрꙋ́гыи·

24

И҆ клѧт̑сѧ цр҃ь соло́монъ пред̑ гм҃ъ гл҃ѧ. с̂и да сътвори́тъ м̂и б҃ъ, и҆ с̂и да приложит̑ м̂и ꙗ҆́ко ѻ҆ дш҃и свое́и гл҃ѧ а҆до́нїѧ слово·

25

И҆ нн҃ѣ жи́въ г҃ь, и҆же ѹ҆гото́ва м̂ѧ, и҆ посадѝ м̂ѧ на прс̑҇толѣ ѿц҃а мое҆го дв҃да. и҆ то́й сътвори м̂и до́мъ, ꙗ҆́коже гл҃а г҃ь. ꙗ҆́ко да днс̑҇ь ѹ҆́мре а҆до́нїѧ·

26

И҆ посла̀ цр҃ь соло́монъ рꙋкою ванѣѻ́вою сн҃а и҆ѻ҆да́ева, и҆ ѹ҆би и҆̀. и҆ ѹ́мре а҆до́нїѧ в то́й дн҃ь·

27

И҆ а҆виаѳа́рꙋ і҆е҆ре́ю рече цр҃ь соло́мон꙽. тецѝ т̂ы во а҆наѳа́ѳъ на село̀ свое. ꙗ҆́ко мж̑ꙋ смр҃ти е҆си въ дн҃ешнїи дн҃ь, да не ѹ҆мръщ꙽вѧю тебѐ ꙗ҆́ко носи́лъ е҆си кїѻт̑ завѣта гн҃ѧ пред̑ ѿц҃емъ моим̑ дв҃дом̑. и҆ къ семꙋ̀ ꙗ҆́ко ѻ҆злоби́сѧ ѻ҆ все́мъ. и҆́мже ѻ҆злоби́сѧ ѿц҃ъ мо́и·

28

І҆ и҆згна̀ соло́монъ а҆вїаѳа́ра, не бы́ти і҆е҆рею гн҃ю·

29

Ꙗ҆́коже собы́тисѧ словеси гн҃ю е҆же гл҃а в домꙋ и҆л̂и в сило́мѣ·

30

И҆ слх̑ꙋ до́иде сїй до і҆ѻ҆а́ва сн҃а сарꙋ́ина ꙗ҆ко і҆ѻ҆а́въ послѣ́дова а҆до́нїи. и҆ въ слд̑ѣ соло́монь не ѹ҆клони́сѧ, и҆ бѣжа̀ і҆ѻ҆а́въ въ кро́въ гн҃ь, и҆ ꙗ҆́сѧ по ро́гъ ѻ҆лтарѧ̀ гн҃ѧ·

31

И҆ възвѣсти́ша соло́монꙋ гл҃юще. ꙗ҆́ко бѣжа̀ і҆ѻ҆а́въ въ кро́въ гн҃ь, и҆ дръжи́тсѧ по рогъ ѻ҆лтарѧ̀, и҆ посла цр҃ь соло́монъ къ і҆ѻ҆а́вꙋ гл҃ѧ. что̀ т̂и е҆сть да бѣжал̑҇ е҆си въ ѻ҆лта́рь гн҃ь, и҆ рече і҆ѻ҆а́въ ꙗ҆́ко ѹ҆боѧ́хсѧ ѿ лица твое҆го, и҆ бѣжа́хъ къ г҃ꙋ·

32

И҆ посла соло́монъ ванѣ́ю сн҃а и҆ѻ҆да́ева гл҃ѧ. и҆дѝ ѹ҆бїи і҆ѻ҆а́ва и҆ погреби и҆̀·

33

И҆ прїиде ванѣ́ѧ сн҃ъ и҆ѻ҆даин̑҇ къ і҆ѻ҆авꙋ въ кро́въ гн҃ь свѣдѣнїѧ. и҆ рече е҆мꙋ с̂е гл҃етъ т̂и цр҃ь и҆зы́ди. и҆ рече і҆ѻ҆а҆въ не и҆зы́дꙋ, н̂о да здѣ̀ ѹ҆мрꙋ. и҆ возврати́сѧ и҆ ванѣѧ сн҃ъ и҆ѻда́евъ. и҆ рече цр҃еви гл҃ѧ, с̂и гл҃а іѻ҆ав̑҇, и҆ с̂и ѿвѣща м̂и·

34

И҆ рече е҆мꙋ цр҃ь и҆дѝ и҆ сътвори е҆мꙋ та́ко ꙗ҆́коже т̂и е҆смь ре́клъ. ѹ҆бїи и҆ погреби и҆̀ и҆ ѿи́ми днс̑҇ь кровь ю҆́же безꙋма̀ пролїѧ і҆ѻ҆ав̑҇ ѿ мене. и҆ ѿ домꙋ ѿц҃а мое҆го·

35

И҆ возвратит̑ г҃ь днс̑҇ь кро́вь непра́вды е҆го на главꙋ̀ е҆го, ꙗ҆́кож̑ и҆ ѻ́нъ ѹ҆бѝ дв̂а мꙋж́а правед̑на, и҆ бл҃же́ише па́че е҆го и҆ ѹ́би ѧ҆̀ ѻ҆рꙋжїем̑, и҆ ѿц҃ъ мо́и дв҃дъ не разꙋмѣ кро́ви то́ѧ. и҆ а҆вени́ра сн҃а ни́рова. вое҆во́ды і҆и҆л҃ева, и҆ а҆месїа сн҃а и҆е҆ѳи́рова вое҆воды і҆ѹ́дина·

36

И҆ возвратит̑сѧ кро́вь е҆го на главꙋ̀ е҆го. и҆ на главꙋ̀ сѣмени е҆го во вѣ́ки. дв҃дꙋ же и҆ сѣмени е҆го и҆ до́мꙋ е҆го. и҆ прс̑҇толꙋ е҆го ми́ръ да бꙋдет̑ до́ вѣка ѿ г҃а·

37

И҆ възы́де ванѣѧ сн҃ъ и҆ѻ҆да́евъ. и҆ ѻ҆брѣте і҆ѻ҆а́ва и҆ ѹ҆би и҆̀ и҆ погребе и҆̀ в домꙋ е҆го въ пꙋстыни·

38

И҆ воставѝ цр҃ь соло́монъ ванѣѧ сн҃а и҆ѻ҆да́ева. во і҆ѻ҆а́ва мѣ́сто вла́стелѧ. и҆ црс̑҇тво и҆спра́висѧ въ і҆ерс̑҇ли́мѣ и҆ садо́ка і҆е҆ре́ѧ да́сть соло́монъ цр҃ь пр́ьвого. и҆ въ и҆а҆ѳа́ра мѣ́сто·

39

И҆ соло́монъ сн҃ъ дв҃дъ въцр҃исѧ въ і҆ерс̑҇ли́мѣ и҆ над̑ і҆ѹ́дою въ е҆ли́мѣ. и҆ дасть г҃ь смы́слъ соло́монꙋ и҆ мꙋдрость мно́гꙋ ѕѣ́ло. и҆ широтꙋ срд̑ца ꙗ҆́ко и҆ пѣсокъ и҆же въ мо́ри·

40

І҆ и҆спл́ънисѧ смы́сла соло́мон̑҇ ѕѣло, паче смысла всх̑ѣ сн҃овъ старѣиших̑ и҆ пач̑҇ всх̑ѣ мꙋдрых̑ е҆гѷпет̑ских̑·