Ostroh BibleПерша книга царів (Третя книга царств), розділ 8
Шрифт:
Запис:
1
И бысть е҆гда совръши соло́мон̑҇ ѕижда́и домъ гн҃ь, и҆ домъ свои, по к҃, лѣтех̑·
2
И҆ тогда̀ собра цр҃ь соло́монъ вс̂ѧ старѣ́ишины і҆и҆л҃вы во і҆ерс̑҇лим̑ да въздви́гнꙋтъ кїѻ́тъ завѣта гн҃ѧ, ѿ гра́да дв҃дова. т̂о е҆сть ѿ сїѻ́на·
3
И҆ собра́шасѧ къ цр҃ю соло́монꙋ вс̂и лю́дїе і҆и҆л҃евы въ мс̑҇ць, а҆ѳаним̑. въ пра́зник̑҇, сїи б̂о е҆сть мс̑҇ць сед̑мыи·
4
И҆ прїидо́ша вс̂ѧ старѣи́шины і҆и҆л҃евы и҆ взѧ́ша і҆е҆реѝ кїѻ́тъ, и҆ сѣнь завѣтнꙋю, и҆ вс̂ѧ сосꙋды ст҃ыѧ. и҆же бѣша в сѣни свѣдѣнїѧ·
5
И҆ несо́ша і҆ и҆е҆реѝ и҆ левѷти цр҃ь же и҆ весь і҆и҆л҃ь и҆дꙋще пред̑ кїѻ́томъ, жрѧхꙋ ѻ҆вны̀ и҆ волы бес числа̀·
6
Внесо́ша кїѻ́тъ і҆ереѝ в꙽ мѣсто е҆го въ ѻ҆лта́рь въ храм̑ гн҃ь въ ст҃аѧ ст҃ыхъ. под̑ кры́ла херꙋви́мова·
7
Херꙋви́ма б̂о бѣста раскри́лила кры́лѣ свои над̑ мѣсте кїѻ́та и҆ прикры́ста херꙋви́ма над̑ кїѻ́том꙽. и҆ над̑ ст҃ыми е҆го сверхꙋ·
8
И҆ ѻ҆бдержа́ста сщ҃енїѧ. и҆ принича́ста главѣ̀ сщ҃енныма. ѿ ст҃ыхъ пред̑ лице ѻ҆лъта́ра, и҆ не ꙗ҆влѧ́хꙋсѧ внѣ̀·
9
И не б̂ѣ ничтоже въ кїѻ҆́тѣ то́кмо дв̂ѣ скрижа́ли ка́меннѣ, скрижа́ли завѣта и҆же положи т̂ꙋ моѷсїи въ хоривѣ. и҆же завѣща г҃ь междꙋ сн҃ъми і҆и҆л҃евы. внегда̀ и҆зытѝ им̑ ѿ землѧ̀ е҆гѷпетъскїѧ·
10
И҆ бысть ꙗ҆́ко и҆зыдо́ша і҆е҆реѝ ѿ ст҃и́лища, и҆ ѻ҆блак̑҇ и҆спо́лни храмъ гн҃ь·
11
И҆ не можа́хꙋ і҆е҆реѝ ста́ти слꙋжи́ти пред̑ лице́мъ ѻ́блака. ꙗ҆́ко и҆спо́лни сла́ва гн҃ѧ храм̑·
12
И҆ рече соло́монъ, г҃и, и҆же ѻ҆бѣща пребыва́ти во м꙽глѣ̀·
13
зи́жда соѕиждохъ хра́мъ жи́лища тебѣ̀·
14
И҆ ѻ҆братѝ цр҃ь лицѐ свое. и҆ блс̑҇ви цр҃ь всего і҆и҆л҃ѧ и҆ весь собо́ръ і҆и҆л҃евъ и҆же стоѧ́ше та́мо·
15
И҆ реч̑҇ цр҃ь блс̑҇ве́нъ г҃ь б҃ъ і҆и҆л҃евъ днс̑҇ь. и҆же гл҃а ѹ҆сты свои́ми дв҃дꙋ ѿц҃ꙋ мое҆мꙋ, и҆ вс̂ѧ е҆мꙋ и҆сплъни гл҃ѧ·
16
Въ дн҃ь во́ньже и҆зведох̑ лю́ди моѧ і҆и҆л҃ѧ ѿ е҆гѷпта. не и҆збра́хъ града ѿ всѣ́хъ племе́нъ въ і҆и҆л҃и. на созда́нїе хра́мꙋ, и҆ на пребыва́нїе и҆́мени мое҆мꙋ т̂ꙋ. н̂о и҆збра́хъ въ і҆ерс̑҇ли́мѣ бы́ти и҆́мени мое҆мꙋ. і҆ и҆зъбра́хъ дв҃да бы́ти е҆мꙋ властели́нꙋ над̑ люд̑ми мои́ми і҆и҆л҃емъ·
17
И҆ бысть на срд̑цы ѿц҃ꙋ мое҆мꙋ дв҃дꙋ. е҆же созда́ти хра́мъ и҆́мени г҃а б҃а і҆и҆л҃ева·
18
И҆ рече г҃ь къ дв҃дꙋ ѿц҃ꙋ мое҆мꙋ, понеж̑ възы́де на срд̑це твое, е҆же созда́ти храмъ и҆́мени мое҆мꙋ. до́брѣ сътворил̑҇ е҆си, ꙗ҆́ко бысть т̂и на срд̑цы·
19
Тыж̑ не соѕи́ждеши хра́ма. н̂о сн҃ъ твои и҆же и҆зы́детъ и҆зъ чреслъ твои҆хъ. то́й соѕи́ждетъ храм̑ и҆́мени мое҆мꙋ·
20
И воста́ви г҃ь гл҃ы своѝ и҆же гл҃а. и҆ воста́ви въ дв҃да мѣсто ѿц҃а мое҆го менѐ, и҆ сѣдо́хъ на прс̑҇толѣ і҆и҆л҃евѣ, ꙗ҆коже гл҃а г҃ь. и҆ соѕи́ждохъ хра́мъ и҆́мени г҃а б҃а і҆и҆л҃ева·
21
И҆ поста́вихъ на мѣ́стѣ т̂ꙋ кїѻ́тъ, в не́мже завѣтъ гн҃ь. и҆же завѣща̀ г҃ь съ ѿц҃ы на́шими, во и҆звоже́нїю их̑ и҆з꙽ землѧ̀ е҆гѷпет꙽скїѧ·
22
И҆ ста̀ соло́монъ пред̑ лицемъ ѻ҆лтарѧ̀ гн҃ѧ. пред̑ всѣмъ собо́ромъ і҆и҆л҃евомъ, и҆ воздви́же рꙋцѣ своѝ на́ нб҃о·
23
И҆ реч̑҇. г҃и б҃е і҆и҆л҃въ нѣсть б҃а ра́звѣ тебѐ на нб҃си го́рѣ, и҆ на землѝ ни́зꙋ. сохранѝ завѣтъ и҆ млс̑҇ть даже рабꙋ̀ твое҆мꙋ ходѧ́щемꙋ пред̑ тобо́ю, всѣмъ срд̑цемъ е҆го·
24
Ꙗ҆́коже сохрани дв҃дꙋ рабꙋ̀ свое҆мꙋ, ѿц҃ꙋ мое҆мꙋ. ꙗ҆́коже е҆мꙋ ѻ҆бѣща̀. и҆ гл҃а ѹ҆сты свои́ми, и҆ рꙋко́ю свое́ю съвръши, и҆ до дне́шнѧго дн҃е·
25
И҆ нн҃ѣ г҃и б҃е і҆и҆л҃евъ сохранѝ раба̀ своег̑҇ дв҃да ѿц҃а мое҆го, ꙗ҆́коже реч̑҇ е҆мꙋ гл҃ѧ не ѻ҆скꙋдѣ́етъ мꙋжъ ѿ лица̀ мое҆го, сѣдѧ́и на прс̑҇толѣ і҆и҆л҃евѣ. то́кмо а҆́ще сохранѧ́тъ ча́да твоѧ пꙋтѝ моѧ, по ним̑же ходи́ти предо мно́ю. ꙗ҆́коже ходил̑҇ е҆си предо мно́ю·
26
И҆ нн҃ѣ г҃и б҃е і҆и҆л҃евъ. да ѹ҆вѣри́тсѧ гл҃ъ твои, е҆же ѻ҆бѣща двд̑ꙋ ѿц҃ꙋ мое҆мꙋ·
27
Ꙗ҆́ко а҆́ще и́стинно пребывае҆т꙽ б҃ъ съ чл҃кы на землѝ. а҆́ще б̂о нб҃о нб҃си не довлѣ́ютъ т̂и. не то́кмо хра́мъ се́й, и҆же созда́хъ и҆́мени твое҆мꙋ·
28
И҆ да при́зритъ на мл҃твꙋ мою г҃ь б҃ъ і҆и҆л҃евъ. послꙋшати моле́нїѧ и҆ моли́твы. е҆ю́же сѧ мо́лит̑ ра́бъ тво́и пред̑ тобо́ю днс̑҇е·
29
И҆ да бꙋ́дꙋтъ ѻ҆́чи твоѝ ѿвр́ъсты на хра́мъ сїи дн҃ь и҆ но́щъ на мѣсто ѻ҆ не́мъже рече. ꙗ҆́ко быти и҆́мени мое҆мꙋ т̂ꙋ на послꙋшанїе мл҃твы. ею́же помо́литсѧ ра́бъ тво́и на мѣстѣ се́мъ дн҃ь и҆ нощ̑҇·
30
И҆ ѹ҆слы́ши мл҃твꙋ мою раба̀ своег̑҇, и҆ людїи свои҆хъ і҆и҆л҃ѧ, е҆гда помо́лѧт̑ ти сѧ на мѣстѣ сем̑. и҆ т̂ы ѹ҆слы́ши на мѣ́стѣ ѻ҆бита́лища свое҆го на́ нб҃си и҆ ѹ҆слы́шимъ и҆ поми́лꙋе҆ши·
31
Є҆ли́ко а҆́ще съгрѣши́тъ бли́жнїи къ и҆скрънемꙋ свое҆мꙋ. и҆ а́ще прїи́метъ ѿ них̑ клѧ́твꙋ клѧ́тїе. и҆ прїидетъ і҆ и҆сповѣ́сть пред̑ лицемъ ѻ҆лтарѧ̀ твое҆го, въ хра́мѣ се́мъ·
32
И҆ т̂ы ѹ҆слы́ши ѿ нб҃съ и҆ сътвори сꙋдъ люде́мъ своим̑ і҆и҆л҃ю. ꙗ҆влѧ́ѧ безаконова́ти безако́нїѧ да́ти пꙋть е҆го на главꙋ̀ е҆го. і҆ и҆зба́вити пра́вед̑наго, и҆ да́ти е҆мꙋ по пра́вдѣ е҆го·
33
Є҆да̀ съгрѣши́тъ лю́демъ твоим̑ і҆и҆л҃ю. пред̑ врагы̀ е҆го ꙗ҆́ко съгрѣшат̑ т̂и, и҆ возвратѧт̑сѧ. и҆сповѣдѧ́тъ ти сѧ и҆́мени твое҆мꙋ, и҆ мо́лѧтсѧ. и҆ възгл҃ютъ мл҃твꙋ к тебѣ̀ въ хра́мѣ семъ·
34
И҆ т̂ы ѹ҆слы́шиши съ нб҃се, и҆ млс̑҇тив̑҇ бꙋ́деши ѻ҆ согрѣше́нїихъ людїи свои҆хъ і҆и҆л҃ѧ, и҆ возврати́ши ѧ҆̀ въ зе́млю и҆же да́лъ е҆си ѿц҃емъ и҆́хъ·
35
Внегда̀ затѧгнꙋтисѧ нб҃си, ꙗ҆́ко не бы́ти до́ждꙋ. ꙗ҆ко съгрѣшатъ т̂и и҆ помо́лѧтсѧ на мѣ́стѣ се́мъ. і҆ и҆сповѣдѧ́тсѧ и҆́мени твое҆мꙋ. и҆ ѿ грѣхъ и҆хъ възвратѧт̑сѧ е҆гда̀ смири́ши ѧ҆̀·
36
И҆ ѹ҆слы́шиши съ нб҃се. и҆ млс̑҇тив̑҇ бꙋ́деши ѻ҆ грѣсѣхъ ра́бъ свои҆хъ людїи свои҆хъ і҆и҆л҃ѧ. ꙗ҆́ко возвѣстиши и҆мъ пꙋть бл҃гыи ходи́ти по немꙋ̀. и҆ дасѝ и҆мъ до́ждъ на́ землю, ю́же далъ е҆си людем̑ свои҆мъ въ достоа́нїе·
37
Гла́дъ а́ще бꙋ́детъ и҆ли смр҃ть на землѝ. и҆ а́ще бꙋ́детъ, ꙗ҆́ко в раж꙽женїе гꙋсе́ница, и҆ хрꙋщеве, и҆ а́ще ѻ҆скорбѧт̑ ѧ҆̀ вра́ѕи их̑ и҆ли въ е҆ді́номъ ѿ град̑ и҆хъ вс̂е проти́вное всѧ́ка бо́лѣзнь и҆ всѧ́ка ꙗ҆́зва·
38
Всѧ́ка мл҃тва, всѧ́ко приноше́нїе а҆́ще бꙋ́детъ всѧ́комꙋ чл҃кꙋ ѿ людїи і҆и҆л҃евыхъ. е҆ли́ко ѹ҆разꙋмѣет̑ ко́ждо бо́лезнь ѿ срд̑ца свое҆го. и҆ въздви́гнет̑ рꙋцѣ своѝ въ хра́мѣ се́мъ·
39
И҆ т̂ы ѹ҆слы́ши ѿ нб҃се, ѿ гото́ваго жи́лища̑ т̂и, и҆ млс̑҇тив̑҇ бꙋ́деши. и҆ сотвори́ши и҆ дасѝ мꙋ́жеви по пꙋтем̑ е҆го. ꙗ҆́коже б̂о совѣ́си срд̑це е҆го. ꙗ҆́ко т̂ы сам̑ то́кмо совѣ́си всѣхъ срд̑ца сн҃овъ чл҃чъ·
40
да боѧ́тсѧ тебе вс̂ѧ дн҃и, в нѧ́же т̂и живꙋтъ на землѝ. ю҆́же далъ е҆си ѿц҃емъ на́шимъ·
41
И҆ чю́ждимъ·
42
ꙗ҆́же не сꙋть ѿ людїи твои҆хъ і҆и҆л҃ѧ а҆́ще прїидꙋтъ и҆́мени ради твое҆го и҆ помо́лѧтсѧ на мѣ́стѣ се́мъ·
43
И҆ т̂ы ѹ҆слы́шиши съ нб҃се, ѿ гото́ваг̑҇ жи́лища т̂и. и҆ сотвори́ши по всемꙋ̀ е҆ли́ко а҆́ще призовет꙽ т̂ѧ сі́и чюжїи. ꙗ҆́ко да разꙋмѣ́ютъ вс̂и лю́дїе зем̑нїи и҆́мѧ твоѐ. и҆ ѹ҆боѧ́тъсѧ тебѐ. ꙗ҆́коже и҆ лю́дїе твоѝ і҆и҆л҃ь. и҆ разꙋмѣют̑ ꙗ҆́ко и҆́мѧ твоѐ наречетсѧ на хра́мѣ се́мъ и҆же созда́хъ·
44
Ꙗ҆́ко и҆зыдꙋт꙽ лю́дїе твоѝ на́ брань на врагы̀ своѧ, пꙋтем꙽ им̑же возвратиши ѧ҆̀. и҆ помо́лѧт̑сѧ и҆́менем̑ гн҃им꙽. пꙋте́мъ град̑ным̑ и҆же и҆збра̀ себѣ̀. и҆ къ хра́мꙋ и҆же а҆́зъ созда́хъ и҆́мени твое҆мꙋ·
45
И҆ т̂ы ѹ҆слышиши съ нб҃се мл҃твꙋ и҆хъ. и҆ моле́нїѧ и҆хъ. и҆ сътвори́ши ѻ҆правда́нїѧ их̑. и҆ внегда̀ согрѣшат̑ т̂и·
46
Ꙗ҆́ко нѣсть чл҃ка, и҆же не съгрѣшит̑. и҆ разгнѣ́вае҆шисѧ на́ нѧ, и҆ предасѝ ѧ҆̀ пред̑ врагы̀ и҆хъ. и҆ поплѣнѧ́тъ их̑ плѣнѧ́щїи землю дале́че и҆ бли́зъ·
47
И҆ ѹ҆вратѧ́тъ срд̑ца въ зе́млю и҆дѣже пресели́шасѧ. т̂ꙋ и҆ възвритѧ́тсѧ и҆ помо́лѧтсѧ въ зе́мли преселе́нїѧ их̑ гл҃юще. съгрѣши́хом̑ и҆ безаконова́хом̑ и҆ не ѻ҆правди́хомъ·
48
И҆ ѻ҆брати́тсѧ к тебѣ̀, всѣмъ срд̑цемъ свои҆мъ, и҆ всею̀ дш҃ею свое́ю. въ зе́мли врагъ их̑ и҆дѣже возведе ѧ҆̀. и҆ помо́лѧтсѧ к тебѣ̀ на пꙋтехъ землѧ̀ свое́ѧ ю҆́же далъ е҆си ѿц҃емъ их̑, и҆ къ гра́дꙋ е҆гоже и҆збра̀. и҆ къ хра́мꙋ и҆же создах̑ и҆́мени твое҆мꙋ·
49
И҆ ѹ҆слы́ши ѿ нб҃се, ѿ готова́го жи́лища твое҆го. мл҃твꙋ и҆ моленїе и҆хъ и҆ сътвори́ши и҆мъ сꙋдъ·
50
И҆ млс̑҇тивъ бꙋ́деши на непра́вед̑ных꙽, и҆миже съгрѣши́ша т̂и. и҆ по всѣхъ ѿмѣта́нїи и҆хъ и҆миже ѿвр́ъгт̑ꙋсѧ тебѐ. да даси и҆мъ въ щедроты̀·
51
пред̑ всѣмѝ плѣн꙽шими ѧ҆̀. и҆ ѹ҆щедрѧ́тъ ѧ҆̀·
52
Ꙗ҆́ко лю́дїе твоѝ сꙋтъ и҆ наслѣдїе твое. ꙗ҆́же и҆зведѐ и҆з꙽ зем̑лѧ̀ е҆гѷпет̑ски. ѿ сре́ды пе́щы желѣзныа·
53
И҆ да бꙋ́дета ѹ҆́ши твоѝ и҆ ѻ́чи твоѝ ѿвр́ъз꙽ты на мл҃твꙋ раба̀ свое҆го. и҆ къ моле́нїю лю́дїи твои҆хъ і҆и҆л҃ѧ. и҆ послꙋшати и҆хъ ѻ҆ всѣхъ ѻ҆ ни́хже призовꙋт꙽ т̂ѧ·
54
Ꙗ҆ко т̂ы и҆збра ѧ҆̀ себѣ въ наслѣ́дїе ѿ всѣ́хъ лю́дїи. ѿ всѣ́хъ людїи зе́мных̑. ꙗ҆́коже гл҃а рꙋкою раба̀ свое҆го моѷсїѧ. е҆да и҆звести тебѣ и҆з꙽ землѧ е҆гѷпет̑ски ѿц҃ы на́ши г҃и г҃и·
55
Тогда̀ гл҃а соло́монъ ѻ҆ хра́мѣ ꙗ҆́ко съвръши ѕи́жда е҆го, сл҃нце позна̀ на нб҃си. г҃ь реч̑҇ пребыти во м꙽глѣ̀, соѕи́жди хра́мъ мой. храм̑ прелѣпъ е҆го, ꙗ҆́ко пребыва́ти в новости се́й. и҆ не с̂е л̂и пи́сано въ кни́гах̑ пѣ́сни·
56
И҆ бы́сть ꙗ҆́ко скон꙽ча соло́мон̑҇ молѧ́сѧ б҃ꙋ всею̀ мл҃твою и҆ моле́нїем̑ си́мъ. и҆ воста ѿ лица̀ ѻ҆лтарѧ̀ гн҃ѧ и҆ паки поклони́в꙽сѧ на колѣнꙋ̀ свое́ю, и҆ рꙋ́цѣ своѝ воздѣ на́ нб҃о·
57
И҆ е҆щѐ блс̑҇ви весь собо́ръ і҆и҆л҃евъ. гласомъ ве́лїимъ гл҃ѧ·
58
Блс̑҇венъ г҃ь б҃ъ днс̑҇ь, и҆же да́лъ е҆сть поко́и лю́демъ своим̑ і҆и҆л҃ю. по в꙽семꙋ и҆же гл҃а, не забы̀ словесѐ нико́егоже въ словесех̑ е҆го бл҃гихъ и҆ми́же гл҃а въ рꙋцѣ моѷсїѻ́вѣ раба̀ свое҆го·
59
да бꙋдет̑ г҃ь б҃ъ на́шъ с на́ми ꙗ҆коже б̂ѣ съ ѿц҃ы на́шими. да не ѻ҆ста́витъ на́съ·
60
Но да возвратит̑ нас̑҇, преклони́ти срд̑ца на́ша к немꙋ̀. е҆же ходи́ти въ вс̂ѧ пꙋтѝ е҆го. и҆ храни́ти вс̂ѧ за́повѣди е҆го. и҆ повеленїа е҆го, и҆ ѻ҆правда́нїѧ е҆го. ꙗ҆́же заповѣ́да ѿц҃емъ на́шимъ·
61
И҆ да бꙋдт̑ꙋ словеса с̂и и҆миже мо́лимсѧ пред̑ гм҃ъ бм҃ъ на́шим꙽. днс̑҇ь приближа́ющесѧ г҃ꙋ б҃ꙋ на́шемꙋ. дн҃ь и҆ нощ̑҇ твори́ти ѻ҆правда́нїѧ рабꙋ̀ твое҆мꙋ. и҆ ѻ҆правданїѧ лю́демъ твои҆мъ і҆и҆л҃ю, во всѧ̀ дн҃и·
62
Ꙗ҆́ко да разꙋмѣ́ютъ вс̂и лю́дїе землѧ̀. ꙗ҆́ко г҃ь б҃ъ то́й сам̑ б҃ъ и҆ нѣ́сть и҆́ного·
63
И҆ да бꙋ́дꙋтъ срд̑ца на́ша съвръшена къ г҃ꙋ б҃ꙋ на́шемꙋ. прпд̑бно да ходи́ти въ повеле́нїих̑ е҆го, и҆ храни́ти за́повѣди е҆го до дне́шнѧго дн҃е·
64
И҆ цр҃ь и҆ вс̂и сн҃ове і҆и҆л҃еви пожро́ша жрътвꙋ пред̑ бм҃ъ·
65
И҆ пожре цр҃ь соло́монъ жрътвы ми́рныѧ, и҆же пожрѐ гв҃и. воло́въ. ҂в҃і. и҆ ѻ҆вецъ, р҃, и҆ к҃, ты́сѧщъ. и҆ ѻ҆бнови цр҃ь храм̑ гн҃ь, и҆ вс̂и сн҃ове і҆и҆л҃еви·
66
В то́иже дн҃ь ѻ҆ст҃и цр҃ь соло́монъ сред̑нѧѧ двор̑҇ и҆же пред̑ лицемъ хра́ма гн҃ѧ. ꙗ҆́ко сътвори т̂ꙋ всѧ̀сож̑женїѧ, и҆ жрътвы и҆ тꙋчныѧ ми́рныхъ. ꙗ҆́ко ѻ҆лта́рь мѣ́дѧныи, и҆же пред̑ гм҃ъ малыи б̂ѣ ꙗ҆ко не возмощи прїѧ́ти вс̂есож̑женїѧ и҆ да́ровъ и҆ жрътвы тꙋ́чнаѧ·
67
И҆ сътвори соло́мон̑҇ празнд̑икъ в то́й дн҃ь и҆ весь і҆и҆л҃ь с ним̑, собор̑҇ ве́лїи ѿ и҆схода и҆хима до рѣки е҆гѷпта, пред̑ гм҃ъ бм҃ъ на́шим̑, ѹ҆ хра́ма е҆гоже созда̀, ꙗ҆ды́и и҆ пїѧ и҆ веселѧ́сѧ пред̑ гм҃ъ бм҃ъ на́шимъ. по сед̑мь дн҃їи, и҆ во ѻ҆смы́и дн҃ь распꙋстѝ лю́ди. и҆ блс̑҇виша лю́ди цр҃ѧ. і҆ и҆до́ша ко́ждо в до́мъ сво́и, ра́дꙋющесѧ весе́ломъ срд̑цем̑ ѻ҆ бл҃гых̑. ꙗ҆́же сътворѝ г҃ь дв҃дꙋ рабꙋ свое҆мꙋ, і҆и҆л҃ю и҆ лю́демъ свои҆мъ·
Джерела
