Ostroh BibleПерша книга царів (Третя книга царств), розділ 9
Шрифт:
Запис:
1
И бы́сть ꙗ҆́ко сконча̀ соло́монъ зи́жда хра́мъ гн҃ь. и҆ до́мъ цр҃евъ. и҆ всѧ́кꙋ ве́щъ е҆го соло́монъ сътворѝ, е҆ли́ко въсхотѣ̀·
2
И ꙗ҆́ви́сѧ г҃ь соло́монꙋ вторицею. ꙗ҆́коже бѣ ꙗ҆вил̑҇сѧ е҆мꙋ въ гаваѻ́нѣ·
3
И҆ рече к немꙋ̀ г҃ь ѹ҆слы́шахъ гла́съ мл҃твы твое́ѧ. и҆ моле́нїѧ твое҆го и҆́мже моли́ ми сѧ предо мно́ю, сътвори́х ти по все́и мл҃твѣ твое́и. и҆ ѻ҆ст҃ихъ храм̑ се́и. е҆гоже созда е҆же положи́ти и҆́мѧ мое т̂ꙋ въ вѣки. и҆ бꙋдт̑ꙋ ѻ҆́чи моѝ т̂ꙋ, и҆ срд̑це моѐ въ всѧ̀ дн҃и·
4
И҆ т̂ы а҆ще хо́диши предо мно́ю, ꙗ҆́коже ходѝ и дв҃дъ ѿц҃ъ тво́и въ прпд̑бїи срд̑ца, и҆ въ простотѣ̀ и҆ е́же твори́ти по всемꙋ̀ ꙗ҆́коже заповѣ́дахъ е҆мꙋ. и҆ повелѣнїѧ моѧ̀, и҆ за́повѣди моѧ съхрани́ши·
5
И҆ ѹ҆твержꙋ̀ прс̑҇тлъ црс̑҇твїѧ твое҆го въ і҆и҆л҃и въ вѣки. ꙗ҆́коже гл҃ах̑ къ дв҃дꙋ ѿц҃ꙋ твое҆мꙋ гл҃ѧ. не ѻ҆скꙋдѣ́етъ т̂и мꙋжъ властели́нъ въ і҆и҆л҃и·
6
А҆ще възвраща́ющесѧ въз꙽врати́тесѧ в̂ы, и҆ ча́да ваша ѿ мене и҆ не съхрани́те за́повѣдеи мои҆хъ, и҆ повелѣ́нїи мои҆хъ, ꙗ҆́же да́лъ е҆сть моѷсїи пред̑ всѣмѝ ва́ми, и҆ по́идꙋт꙽ и҆ порабо́таю҆тъ бого́мъ дрꙋги́мъ. и҆ покло́нѧтсѧ им̑·
7
І҆ и҆зринꙋ̀ і҆и҆л҃ѧ и҆з꙽ землѧ̀ ю́же да́хъ и҆мъ. и҆ хра́мъ се́и е҆гоже ѻ҆ст҃ыхъ и҆́мени мое́мꙋ, ѿвръ́гꙋ ѿ лица̀ мое҆го. и҆ бꙋдет̑ і҆и҆л҃ь въ и҆зринове́нїе. и҆ въ гл҃анїе всѣмъ лю́демъ·
8
И҆ до́мъ высо́кїи се́и всѧк̑҇ и҆же прїидетъ во́нь ѹ҆жасне́тсѧ. и҆ възмѧте́тсѧ·
9
И҆ речетъ чесо̀ ради сътворѝ г҃ь та́ко землѝ се́и и҆ хра́мꙋ семꙋ·
10
И҆ рекꙋтъ поне́же ѻ҆ста́виша г҃а б҃а и҆х꙽. и҆же и҆зведѐ ѿц҃ы их̑ и҆зъ е҆гѷпта. ѿ до́мꙋ работ̑на и҆ прїꙗ҆́ша богѝ чꙋжаѧ. и҆ поклони́шасѧ и҆мъ. и҆ порабо́таша и҆мъ. сего ради наведѐ на́ нѧ г҃ь ѕло́бꙋ сїю·
11
И бы́сть въ к҃ лѣтъ в нѧ́же созда̀ соло́монъ дв̂а домы̀. хра́мъ гн҃ь и҆ до́мъ цр҃евъ. хира́мъ цр҃ь тѵ́рскїи помага́ше соло́монꙋ дре́вы ке́дръскими. и҆ дре́вы пе́вгиновыми. и҆ зла́том̑ и҆ всѣмъ хотѣ́нїемъ е҆го. тогда̀ да́сть соломонъ хира́мꙋ, к҃ градов̑҇ въ землѝ галиле́истѣи·
12
И҆ шед̑ хирам̑ ѿ тѵ́ра. и҆дѧ́ше в галиле́ю. ви́дѣти хотѧ̀ гра́ды, ꙗ҆́же е҆мꙋ дадѐ соло́монъ. и҆ ви́дѣ и҆ не бы́ша е҆мꙋ го́дни·
13
И҆ рече чт̂о м̂и сꙋть гра́ди сѝ. ꙗ҆́же м̂и да́лъ е҆си бра́те, и҆ нарече ѧ҆̀ землѧ̀ хавꙋль до дне́шнѧго дн҃е·
14
И҆ принесе хира́мъ соло́монꙋ, р҃, и҆ к҃. тала́нтъ зла́та сїѧ же е҆́сть вина̀ да́нїе ꙗ҆́же ѹ҆ста́ви цр҃ь соло́монъ. да сози́ждетъ хра́м꙽ гн҃ь и҆ хра́мъ свои. и҆ мильло́нъ. и҆ стѣнꙋ̀ і҆ерс̑҇ли́мъскꙋ, и҆ а҆сѷръ и҆ магда́ль и҆ газе́рꙋ·
15
фараѻ́нъ же цр҃ь е҆гѷпет꙽скїи и҆зы́иде и҆ взѧ̀ газе́ръ. и҆ съж꙽жѐ и҆̀ ѻ҆гне́мъ, и҆ ханаѻ́на живꙋщаго въ гра́дѣ то́мъ погꙋбѝ, и҆ да́сть гра́д꙽ въ прида́ное дще́ри свое́и женѣ̀ соло́мони·
16
И҆ съградѝ соло́монъ газе́ръ и҆ веѳиро́нъ ни́жнїи. и҆ валаа́ѳъ. и҆ палми́рꙋ в꙽ землѝ пꙋсто́и·
17
И҆ вс̂и гра́ды и҆же бѧ́хꙋ жи́тницы е҆го. и҆ вс̂и грады и҆деже бѣхꙋ колесни́цы и҆ ко́нницы е҆го и҆ вс̂е е҆же бысть ѹ҆годно цр҃ю соло́монꙋ съзи́жде въ і҆ерс̑҇ли́мѣ и҆ в лива́нѣ, и҆ въ все́и землѝ црс̑҇тва свое҆го·
18
Лю́дїе же ѻ҆ста́вшїи ѿ ам̑море́и. и҆ хет꙽ѳе́и. и҆ ферезе́и, и҆ е҆ве́и. и҆ е҆вꙋсе́и, ѻ҆ни́ же не сꙋть ѿ сн҃овъ і҆и҆л҃евъ·
19
Сн҃ове и҆хъ и҆же ѻ҆ста́ша по ни́хъ на землѝ, и҆хже не возмого́ша сн҃ове і҆и҆л҃евы и҆стощи́ти ѿ средѣ себе, цр҃ь соло́монъ порабо́ти и҆хъ, и҆ дава́хꙋ да́ни да́же до дне́сь·
20
ѿ сн҃ов же і҆и҆л҃евыхъ не да́сть на дѣло соло́монъ ꙗ҆́ко тїи бѧ́хꙋ мꙋжи хра́брїи е҆го и҆ ѻ́троцы е҆го и҆ кнѧ́ѕи и҆ вое҆во́ды е҆го и҆ властели́ни колесни́цъ и҆ ко́неи е҆го·
21
И҆ бѧ́хꙋ старѣ́ишины приста́вленым꙽ над̑ дѣлы цр҃ѧ соло́мона. и҆ бы́сть и҆хъ, фн҃. заповѣдаю҆ще дѣлаю҆щимъ·
22
дще́рь же фараѻ́нѧ принесе́сѧ и҆з гра́да двд҃ва. в до́мъ свои, и҆же созижде е́и соло́мон̑҇·
23
И҆ посем̑ сози́жде мильло́нъ. и҆ приноша́ше соло́монъ три́жды в го́дъ всесъж꙽же́нїѧ. и҆ ми́рныѧ жр́ътвы на ѻ҆лта́рь е҆гоже сози́жде г҃ꙋ. и҆ кадѧ́ше ѳимиꙗ҆́мъ бл҃гово́нныи пред̑ гм҃ъ, и҆ съвръши хра́мъ·
24
И҆ сътворѝ цр҃ь соло́мон̑҇ кора́бль въ е҆рга́зѣ гаве́рскомъ. и҆же при е҆ла́ѳе. при ѹ́стїи мо́рѧ послѣднего. в землѝ е҆до́м꙽стѣи·
25
И҆ посла̀ хира́мъ нѣкоих̑ ѿ ѻ҆́трокъ своих̑ мꙋжа. ко́рмъчїѧ направлѧ́ти свѣдꙋщихъ мо́ре съ ѻ́троки соло́мони, и҆ прїидо́ша ко е҆фи́рꙋ, и҆ взѧ́ша ѿтꙋдꙋ зла́та у҃, и҆ к҃ тала́нтъ и҆ принесо́ша цр҃ю соло́монꙋ·
Джерела
