Ostroh Bible❧Перша книга Самуїлова (Перша книга царів), розділ 12

1

И рече само́и҆лъ къ всѣ́мъ люде́мъ і҆и҆л҃евымъ, с̂е слы́шах̑ гла́съ ва́шъ ѻ҆ всѣ́хъ е҆ли́ко м̂и рѣ́сте. и҆ поста́вихъ над ва́ми цр҃ѧ·

2

И҆ с̂е нн҃ѣ цр҃ь прехо́дитъ пред̑ ва́ми. а҆зъ же състарѣхсѧ и҆ сѣ́дъ. и҆ сн҃ове моѝ съ мно́ю. и҆ а҆зъ б̂о преходи́хъ пред̑ ва́ми, ѿ ю́ности мое҆ѧ до дн҃е́шнѧго дн҃е·

3

И с̂е а҆зъ вѣща́ите м̂и пред̑ гм҃ъ, и҆ пред̑ хм҃ъ е҆го. е҆да̀ ѹ҆ кого̀ вас̑҇ те́лца взѧх̑, или ѻ҆слѧ̀. и҆ли кого̀ васъ насил꙽ствова́хъ, и҆л̂и ѿ кого̀ ва́съ взѧ́хъ чт̂о. и҆ли ѿ рꙋ́кꙋ нѣ́кого ѿ васъ прїѧ́хъ м꙽здꙋ, и҆ли та́йно взѧх̑. вѣща́ите на́ мѧ, и҆ възвращꙋ̀ ва́мъ·

4

И҆ рѣша къ само́и҆лꙋ, нѣ́си насъ ничим̑же ѻ҆би́дѣлъ ни наси́л꙽ствовал̑҇ е҆си на нас̑҇. ни́же разгра́билъ е҆си на́съ. н̂и м꙽зды̀ взѧ́лъ е҆си ѿ на́съ. н̂иже взѧ́лъ ѿ рꙋкы̀ ничїе҆ѧ же ничтоже·

5

И҆ рече само́и҆лъ къ люде́мъ. свѣдѣт́ель е҆сть г҃ь на ва́съ. и҆ свѣдѣт́ель е҆сть х҃с е҆го, въ дн҃е́шнїи дн҃ь ꙗ҆́ко нѣ́сте ѻ҆брѣ́ли въ рꙋ́кꙋ мое҆ю ничтоже. и҆ рѣша лю́дїе свѣдѣт́ель·

6

И҆ реч̑҇ само́и҆лъ па́ки къ люде́мъ. гл҃ѧ, свѣдѣт́ель е҆сть г҃ь, сътвори́выи моѷсїѧ и҆ а҆а҆ро́на, і҆ и҆зведы́и ѿ землѧ̀ е҆гѷпет꙽скїа ѿц҃а на́ша·

7

И҆ нн҃ѣ пред̑ста́нѣте. и҆ ѿвѣща́ю ва́мъ пред̑ гм҃ъ. и҆ възвѣщ́ꙋ вам̑ вс̂ю пра́вдꙋ гн҃ю, ꙗ҆́же сътворѝ ва́мъ и҆ ѿц҃емъ ва́шимъ·

8

Є҆гда б̂о вни́де і҆а́ковъ и҆ сн҃ове е҆го въ е҆гѷпетъ, и҆ смири́ша и҆хъ ѕѣло е҆гѷптѧне. и҆ възопи́ша ѿц҃ы на́ши къ г҃ꙋ. и҆ посла̀ им̑ г҃ь моѷсїѧ и҆ а҆а҆ро́на, і҆ и҆зведо́ша ѿц҃а на́ша и҆зъ е҆гѷпта, и҆ въсели́ста их̑ на мѣ́стѣ се́мъ, н̂о забы́ша г҃а б҃а свое҆го. и҆ въда́стъ ѧ҆̀ в рꙋ́цѣ сиса́рѣ а҆рхистрати́гꙋ, и҆а҆ви́сꙋ цр҃ю а҆со́рскꙋ. и҆ въ рꙋ́кы и҆ноплеме́нникъ, и҆ въ рꙋцѣ цр҃ѧ моа́въска. и҆ побѣжа́хꙋ ѧ҆̀·

9

И възопи́ша къ г҃ꙋ и҆ рѣ́ша съгрѣши́хомъ ꙗ҆́ко ѻ҆ста́вихомъ г҃а, и҆ порабо́тахомъ ваа́ломъ и҆ а҆старо́ѳомъ. и҆ нн҃ѣ и҆змѝ н̂ы ѿ рꙋ́къ вра́гъ на́ших̑, и҆ порабо́таемъ т̂и·

10

И҆ посла̀ г҃ь и҆ероваа́ла и҆ вара́ка, и҆ е҆ѳа́ѧ, и҆ само́и҆ла, і҆ и҆зѧ̀ в̂ы и҆з рꙋ́къ вра́гъ ва́ших̑, ѻ҆́крс̑҇тных̑ и҆ ѻ҆бита́сте ѹ҆пова́юще, и҆ вѣ́сте ꙗ҆́ко наа҆съ цр҃ь сн҃ъ а҆м꙽мо́нь прїиде на́ вы. и҆ рѣ́сте м̂и, н̂и, н̂о цр҃ь, да црс̑҇твꙋе́тъ над на́ми. вънегда̀ г҃ь б҃ъ црс̑҇твова̀ над̑ ва́ми, и҆ с̂е нн҃ѣ цр҃ь е҆го́же избра́сте, и҆ его́же проси́сте, и҆ с̂е да́сть г҃ь над ва́ми цр҃ѧ·

11

А҆́ще ѹ҆бои́тесѧ г҃а, и҆ порабо́таете емꙋ и҆ послꙋш́аете гла́са его, и҆ не ѿвр́ьжетесѧ ѹ҆сте́нъ гн҃ь. и҆ бꙋ́детъ ва́мъ цр҃ь црс̑҇твꙋѧ над̑ ва́ми и҆ в̂ы бꙋ́дете въ слѣдъ г҃а ходѧ́ще, рꙋка̀ гн҃ѧ не бꙋ́детъ над̑ ва́ми·

12

А҆ще л̂и не послꙋш́аете гла́са гн҃ѧ. и҆ речетѐ проти́вꙋ ѹ҆стомъ гн҃имъ, бꙋ́детъ рꙋка̀ гн҃ѧ на ва́съ, и҆ на цр҃и ва́шем̑. и҆ потреби́тъ ва́съ. и҆ нн҃ѣ ста́нете и҆ ви́дите гла́съ се́и вели́кїи, и҆же сътвори́тъ г҃ь прд̑е ѻ҆чи́ма ва́шима·

13

Нѣсть л̂и жа́тва пшени́цы, дне́сь призовꙋ̀ г҃а, и҆ да́сть гро́ми и҆ тꙋ́ча. и҆ въразꙋмѣ́ете и҆ ѹ҆ви́дите, ꙗ҆́ко ѕло́ба ва́ша вели́ка, ю҆́же сътвори́сте пред̑ гм҃ъ просѧ́ще себѣ̀ цр҃ѧ·

14

И҆ призва̀ само́илъ г҃а и҆ да̀ г҃ь гро́мъ и҆ до́ждь в то́и дн҃ь. и҆ ѹ҆боѧ́шасѧ вс̂и лю́дїе ѕѣ́ло г҃а, и҆ само́и҆ла·

15

И҆ рѣш́а вс̂и лю́дїе къ само́илꙋ. помолисѧ ѻ҆ рабѣ́хъ свои҆хъ, г҃ꙋ б҃ꙋ свое҆мꙋ. да не ѹ҆́мремъ. ꙗ҆́ко приложи́хомъ къ всм̑ѣ грѣхо́мъ на́шимъ ѕло́бꙋ на́шꙋ. просѧ́ще себѣ̀ цр҃ѧ·

16

И҆ рече само́илъ къ люде́мъ, не бо́итесѧ в̂ы сътвори́сте вс̂ю ѕло́бꙋ сїю́. то́кмо не ѹ҆клони́тесѧ ѿ за́дныхъ гн҃ь. и҆ порабо́таите г҃ꙋ всѣ́мъ срд̑цемъ ва́шимъ·

17

И҆ не престꙋпи́те въ слѣ́дъ, ничтоже сꙋщихъ. и҆же не пособъствѧ́тъ, и҆ не ѿи́мꙋтъ ѧ҆̀. ꙗ҆ко ничтоже сꙋть·

18

Поне́же не ѻ҆ста́витъ г҃ь люді́и своих̑, именѝ ра́ди свое҆го вели́кого. ꙗ҆́ко крѣпокъ г҃ь. прїиметъ в̂ы себѣ̀ в лю́ди·

19

И҆ да ѿстꙋ́питъ ѿ менѐ с̂е ктомꙋ̀ не съгрѣша́ти г҃ꙋ. и҆ е҆же ктомꙋ̀ не моли́тисѧ па́кы ѻ҆ вас̑҇ къ г҃ꙋ. н̂о рабо́таю гв҃и. и҆ покажꙋ̀ ва́мъ пꙋт́ь бл҃гъ и҆ гла́докъ·

20

То́кмо бо́итесѧ б҃а. и҆ рабо́таите е҆мꙋ по и́стиннѣ всѣ́мъ срд̑цемъ ва́шимъ ꙗ҆́ко свѣ́сте. и҆же вели́каѧ сътворѝ г҃ь с ва́ми·

21

И҆ а҆ще ѕл̂о сътво́рите то в̂ы и҆ цр҃ь ва́шь сі́и поги́бнетъ·