Ostroh BibleПерша книга Самуїлова (Перша книга царів), розділ 13
Шрифт:
Запис:
1
По двꙋ ж́е лѣтехъ црс̑҇тва свое҆го. ꙗ҆ко нача црс̑҇твова́ти въ і҆и҆л҃и и҆збра̀ себѣ̀ саѹ҆́лъ ҂г҃, мꙋж́ъ. ѿ мж̑ꙋ. і҆и҆л҃въ и҆ бѣ́ста съ саѹ҆́ломъ, ҂в҃. въ махма́се и҆ въ горѣ̀ веѳи́ли. и ты́сѧща же бѣша съ и҆ѻ҆а҆наѳа́номъ. въ гава́и. венїа҆ми́новѣ. і҆ и́ныѧ же вс̂и лю́ди ѿпꙋстѝ кое҆го́ждо въ своѧ̀ се́ла·
2
И҆ поразѝ и҆̀ѻ҆а҆наѳан̑҇. а҆си́ѳа и҆ноплеме́нника и҆же на хо́лмѣ. и҆ ѹ҆слы́шаша с̂е и҆ноплеме́нницы. и҆ саѹ҆́лъ въстрꙋбѝ трꙋбо́ю и҆ проповѣдѧтъ въ всю̀ зе́млю гл҃ѧ. да ѹ҆слы́шатъ е҆вре́и·
3
И҆ слы́ша ве́сь і҆и҆л҃ь гла́съ гл҃ющъ. ꙗ҆́ко нии҆зложѝ саѹ́л꙽ а҆си́ѳа и҆ноплеме́нника. и҆ ѹ҆ничижим̑ бы́сть і҆и҆л҃ь въ ѻ́чїю и҆ноплеме́нникъ и҆ собра́шасѧ вс̂и лю́ди въ слд̑ѣ саѹ́ла въ галга́лѣхъ·
4
І҆ и҆ноплеме́нницы же собра́хꙋсѧ на́ брань на і҆и҆л҃ѧ, ҂л҃. ѻ҆рꙋжникъ. и҆ ҂ѕ҃, ко́нникъ. ѻ҆́бщих̑ же людїи множество̀ бѧ́ше. ꙗ҆ко пѣсо́къ мо́рскїи. и҆ шед̑ше вполчи́шасѧ въ махма́се проти́вꙋ веѳоро́нꙋ на восток̑҇·
5
И҆ ви́дѧще мꙋжи і҆и҆л҃ви ꙗ҆́ко не мого́ша проти́вꙋ ста́ти. и҆ съкры́шасѧ лю́дїе въ врьте́пехъ. и҆ въ гора́хъ. и҆ в ка́менїѧхъ. и҆ въ про́пастехъ и҆ въ ѧ́махъ·
6
дрꙋзїи же бѣжа́ша и҆ пробѣго́ша і҆ѻ҆рда́нъ. въ зе́млю га́довꙋ. и҆ галаад̑скꙋ. саѹ́л же бѧ́ше е҆щѐ в галга́лѣхъ. и҆ вс̂и лю́дїе ѹ҆жасо́шасѧ и҆же бѧ́хꙋ с ни́мъ·
7
И҆ жда́ше, з҃. дн҃їи до вре́мени. ꙗ҆кож̑ повелѣ̀ е҆мꙋ само́и҆лъ. и҆ не прїиде само́и҆лъ въ галга́лы . и҆ ѿхожда́хꙋ лю́дїе е҆го ѡ него̀·
8
И҆ рече саѹ́лъ приведѣте ꙗ҆́ко да сътворю̀ вс̂есъж꙽же́нїа и҆ ми́рное. и҆ възнесѐ вс̂есъж꙽же́наѧ·
9
И҆ бы́сть е҆гда сконча̀ възносѧ̀ вс̂есъж꙽же́нїѧ. и҆ с̂е само́илъ прїиде. и҆ саѹ́лъ и҆зы́иде на срѣте́нїе е҆мꙋ блс̑҇ви́тисѧ и҆мъ·
10
И҆ рече само́и҆лъ чт̂о с̂е сътворѝ. и҆ рече саѹ́лъ ви́дѣхъ ꙗ҆ко ѿхожда́хꙋ лю́дїе ѿ менѐ. и҆ ты̀ не прїиде. ꙗ҆́коже заповѣ́да въ времѧ дн҃їи. и҆ноплеме́нницы же събра́шасѧ в махма́съ·
11
И҆ рѣхъ и҆ноплеме́нницы нн҃ѣ съшед̑шесѧ къ мнѣ̀ въ галга́лы. и҆ лица̀ гн҃ѧ не ѹ҆молих̑. и҆ не въздръжа́всѧ възнесо́хъ вс̂ѧсъж꙽же́наѧ·
12
И҆ рече само́илъ къ саѹ́лꙋ въсꙋ́е е҆́сть т̂и с̂е, поне́же не съхранѝ за́повѣди г҃а б҃а твое҆го, и҆же заповѣ́да т̂и а҆ще б̂ы не сътворил̑҇ е҆си сего̀, т̂о нн҃ѣ б̂ы ѹ҆крѣпи́лъ г҃ь црс̑҇тво твое на і҆и҆л҃и до́ вѣка·
13
И҆ нн҃ѣ црс̑҇тво твое не ста́нетъ. ꙗ҆́ко ѻ҆брѣтѐ г҃ь чл҃ка по срд̑цꙋ свое҆мꙋ·
14
И҆ повелѣ̀ е҆мꙋ г҃ь властели́на бы́ти над̑ людмѝ е҆го. ꙗ҆́ко не съхранѝ за́повѣди е҆ли́ко заповѣ́да т̂и г҃ь·
15
И҆ въста́въ само́илъ і҆ и́де ѿ галга́лы пꙋте́мъ свои҆мъ. и҆ ѻ҆ста́нокъ людїи и҆до́ша въ слѣ́дъ саѹ́ла. на срѣте́нїе люде́мъ ра́тнымъ. тѣмже приходѧ́щимъ ѿ галга́лы въ ста́нъ венїа҆ми́новъ. и҆ съгледа̀ саѹ́лъ лю́ди ѻ҆брѣтшаѧсѧ с ни́мъ ꙗ҆́ко х҃, мꙋжъ·
16
Саѹ́л же и҆ ѻ҆а҆наѳа́нъ сн҃ъ е҆го и҆ лю́ди ѻ҆брѣтшаѧсѧ с ни́ми, сѣдо́ша въ станꙋ̀ венїа҆ми́новѣ и҆ пла́кашасѧ, і҆ и҆ноплеме́нницы ѻ҆полчи́шасѧ въ махма́се·
17
І҆ и҆зыидо́ша тр̂и по́лки и҆ноплеме́нникъ гꙋбѧ́ще се́ла. по́лкъ же прьвое по́иде пꙋтем꙽ гоѳе́ры на́ землю сова́лю·
18
И҆ по́лкъ вторы́и по́иде пꙋте́мъ веѳо́рским̑. и҆ по́лкъ тре́тїи по́иде пꙋте́мъ гаве́искимъ ѹ҆мѣта́ющимсѧ на ѹ҆дол̑҇ ѻ҆рнїи в пꙋсты́ню, на и҆сто́чники саве́м꙽ски·
19
Творе́нїе же желѣзное не ѻ҆брѣта́шесѧ. въ все́и землѝ і҆и҆л҃вѣ ꙗ҆́ко рѣша и҆ноплеме́нницы. да не сътво́рѧтъ е҆вре́и ѻ҆рꙋжїѧ и҆ ко́пїѧ·
20
И҆ хожда́хꙋ вс̂и сн҃ове і҆и҆л҃еви до и҆ноплеме́нникъ. кова́ти ко́ждо своѧ ко́сы. и҆ ѻ҆рꙋжїѧ своѧ, і҆ и҆ ко́ждо секи́ры своѧ̀, и҆ серпы̀ своѧ̀·
21
И҆ притꙋпи́шасѧ вс̂ѧ ѹ҆готова́нїѧ въ вре́мѧ жа́твы. секи́ры. и҆ серпы̀. и҆справле́нїѧ же и҆́ма не бы́сть·
22
И҆ бы́сть въ дн҃и бра́ни махма́м꙽скїѧ. не ѻ҆брѣте́сѧ ѻ҆рꙋжїе и҆ копїѧ в рꙋках̑ всѣхъ людїи, и҆же съ саѹ́ломъ. и҆ съ і҆ѻ҆а҆наѳа́номъ. кро́мѣ толи́ко ѹ҆ саѹ́ла і҆ ѻ҆а҆наѳа́на сн҃а е҆го. и҆ ѻ҆бра́ти́сѧ саѹ́лъ. и҆ ѻ҆а҆наѳа́нъ сн҃ъ е҆го. і҆ и҆зыидо́ша и҆зо ѻ́бласти и҆ноплеме́нникъ. въ прехо́дъ махе́м꙽скїи·
Джерела
