Ostroh BibleПерша книга Самуїлова (Перша книга царів), розділ 17
Шрифт:
Запис:
1
И събира́шасѧ и҆ноплеме́нници, въ по́лки своѧ на́ брань и҆ събра́шасѧ в сокхо́ѳѣ і҆ѹ҆де́истемъ. и҆ ста́ша средѣ сокхо́ѳа. въ срѣди а҆зи́ка въ а́фездо́мине·
2
И҆ саѹ́лъ и҆ мꙋжи і҆и҆л҃еви събра́шасѧ. и҆ внидо́ша въ ѹ҆до́ль тереви́н꙽ѳю. строѧ́хꙋтьсѧ на́ брань и҆зыити къ и҆ноплеменником̑·
3
І҆ и҆ноплеме́нницы стоѧ́хꙋ на горѣ ѻ҆со́бе. і҆и҆л҃ь стоѧ́ше ѻ҆со́бе. ѹ҆до́ль же междꙋ и҆́ми бѧ́хꙋ·
4
І҆ и҆зы́де мꙋжъ си́ленъ. и҆с по́лкъ и҆ноплеме́нникъ, и҆́мѧ е҆мꙋ голїѧ́дъ, ѿ меге́ѳа. высота́ же е҆го бѧ́ше ѕ҃, лако́тъ, и҆ пѧ́дь·
5
И҆ шле́мъ мѣдѧнъ на главѣ̀ е҆го. и҆ бро́нѧ ꙗ҆ко ѹ́жа и҆зви́ты в нѧ́же ѻ҆болче́нъ бѧ́ше. и҆ число бро́нь е҆го, ҂е҃. си́кли. мѣры мѣди и҆ желѣза·
6
И поно́жи мѣдѧны ве́рхꙋ го́ленїю е҆го. и҆ щи́тъ мѣдѧнъ на пле́щꙋ е҆го·
7
И҆ ко́пїе в рꙋкꙋ е҆го ꙗ҆́ко вода̀ и҆щище́но блеща́щесѧ. и҆ сꙋ́лица е҆го, х҃. си́кль мѣры желѣза в не́и. и҆ носѧ̀ ѻ҆рꙋжїе е҆го пре́ди и҆дѧ́ше пред̑ нимъ·
8
И҆ ста́въ и҆ възопѝ пред̑ по́лки і҆и҆л҃евыма, и҆ рече и҆мъ. почт̂о и҆зыдо́сте въполчи́тисѧ л̂и на́ брань проти́вꙋ на́мъ. нѣсмь л̂и а҆зъ и҆ноплеме́нникъ и҆ вы̀ е҆вре́и. съ саѹ́ломъ пришед̑шїи. и҆збери́те в себѣ мꙋжа да сни́девѣсѧ, и҆ побо́ретсѧ со мно́ю·
9
И҆ а҆ще възмо́жет꙽ со мно́ю бра́тисѧ и҆ ѻ҆долѣе҆тъ м̂и. т̂о бꙋ́демъ ва́мъ рабѝ.
10
А҆ще л̂и а҆зъ възмогꙋ̀ ѻ҆долѣти и҆̀. бꙋдете вы̀ на́мъ рабѝ. и҆ поработае҆те нам̑·
11
И҆ рече и҆ноплеме́нникъ. с̂е а҆зъ днс̑҇е ѹ҆ничижи́хъ по́лкъ і҆и҆л҃евъ, въ дн҃ешнїи дн҃ь рекъ дади́те м̂и мꙋжа и҆же побо́ретъ со мно́ю е҆ді́нъ·
12
И҆ слы́ша саѹ́лъ, и҆ весь і҆и҆л҃ь гл҃ы и҆ноплеме́ннича, и҆ ѹ҆жасо́шасѧ, и҆ ѹ҆боѧ́шасѧ ѕѣ́ло·
13
дв҃дъ же е҆фраѳе́е҆въ. сїи бѣ̀ ѿ виѳлеѻ́ма і҆ю́дина, и҆́мѧ же ѿц҃ꙋ е҆го і҆е҆с꙽се́и, е҆мꙋже б̂ѣ и҃, сн҃овъ. въ дн҃и же саѹ́ловы б̂ѣ мꙋжъ то́и, состарѣ́сѧ въ мꙋже́хъ ѕѣ́ло·
14
І҆ и҆до́ша тр̂и сн҃ы і҆е҆с꙽се́ѻ҆вы старѣ́ишїи на́ брань съ саѹ́ломъ, и҆ме́на же сн҃овъ е҆го пошед̑шихъ на́ брань, е҆лїа́въ перворо́дныи е҆го, и҆ вторы́и а҆минада́въ. и҆ тре́тїи са́м꙽ма·
15
дв҃дъ же б̂ѣ ю҆нѣ́ишїи, и҆ тр̂и старѣ́ишїи е҆го, и҆до́ша въ слѣдъ саѹ́ла·
16
дв҃дъ же възврати́вшисѧ ѿ саѹ́ла ѿи́де па́сти ѻ҆вца̀ ѿц҃а свое҆го въ виѳлеѻ́мъ·
17
И҆ прихожда́ше и҆ноплеме́нникъ ѹ́тро и҆ въ ве́черъ, ꙗ҆влѧ́ющисѧ пред̑ і҆и҆л҃емъ, м҃ дн҃їи·
18
И҆ рече і҆е҆с꙽се́и дв҃дꙋ сн҃ꙋ свое҆мꙋ. възмѝ ѹ́бо бра́тома твои҆ма мѣрꙋ е҆́фи мꙋкѝ, и҆ десѧть хлѣ́бъ си́хъ і҆ и҆дѝ в по́лкъ, и҆ да́ждь бра́тома твои҆ма·
19
И҆ де́сѧть сы́ров̑҇ ѿ мле́ка сего̀ и҆ да́ждь ты́сꙋщникꙋ. и҆ бра́тїю свою̀ посети́ши въ ми́ре. и҆ е҆ли́ко а҆́ще требꙋ́ютъ ѹ҆вѣ́си. празнова́ти же бꙋ́деши со мно́ю·
20
Саѹ҆́л же и҆ вс̂и лю́дїе бѣхꙋ въ ѹ҆до́ли дриѻ́си. ратꙋ́юще съ и҆ноплеме́н꙽ники·
21
И҆ въста̀ дв҃дъ ѿ ѹ҆́тра, ѻ҆́вца же ѻ҆ста́ви съ стра́жею, и҆ взѧ̀ ꙗ҆́коже заповѣ́да е҆мꙋ ѿц҃ъ е҆го і҆е҆с꙽се́и ѿи́де. и҆ пришед̑ на мѣсто и҆дѣже и҆схожда́хꙋ си́лнїи на́ врань. и҆ въпиꙗ҆́хꙋ во по́лцехъ. зане́же въѻ҆рꙋжа́шесѧ і҆и҆л҃ь проти́вꙋ и҆ноплеме́нником̑ і҆ и҆ноплеме́нницы въѻ҆рꙋжа́хꙋсѧ проти́вꙋ і҆и҆л҃ѧ·
22
И҆ положѝ дв҃дъ бре́мѧ своѐ в рꙋках̑ стра́жа. и҆ течѐ въ по́лк꙽ и҆ пришед̑ въпросѝ бра́тїю свою въ ми́ре·
23
Гл҃ющꙋ же е҆мꙋ съ ни́ми. и҆ с̂е мꙋжъ а҆месе́искїи е҆мꙋже и҆́мѧ голиꙗ҆́дъ филисти́млѧнинъ ѿ ге́ѳы, пришед̑ ѿ по́лковъ и҆ноплеме́ннических̑ и҆ гл҃а по словесе́мъ ѻ҆́нымъ. и҆ слы́шав̑҇ дв҃дъ·
24
Вс̂и же мꙋжи і҆и҆л҃еви е҆гда̀ ви́дѣша мꙋжа. пробегнꙋша ѿ лица̀ е҆го, ѹ҆боꙗ҆́ша бо сѧ ѕѣло̀·
25
И҆ рѣша мꙋжи і҆и҆л҃ьтески, ви́дѣсте л̂и мꙋжа сего въсходѧ́ща. ꙗ҆́ко поноси́ти і҆и҆л҃ѧ прїиде. и҆ а́ще бꙋдетъ мꙋжъ и҆же ѹ҆бїетъ е҆го. ѻ҆богати́тъ е҆го цр҃ь бога́тествомъ ве́лїимъ. и҆ дщер̑҇ свою̀ да́сть е҆мꙋ, и҆ до́мъ ѿц҃а е҆го сътвори́тъ свобо́денъ въ і҆и҆л҃и·
26
И҆ реч̑҇ дв҃дъ къ мꙋжем̑ стоꙗ҆́щимъ с ним̑ гл҃ѧ. чт̂о сътвори́те мꙋжꙋ, и҆же ѹ҆бїетъ и҆ноплеме́нника сего̀. и҆ ѿи́метъ поно́съ ѿ і҆и҆л҃ѧ. ꙗ҆́ко кт̂о е҆сть и҆ноплеме́нникъ неѻ҆брѣзаныи се́и. и҆же поно́ситъ по́лкꙋ б҃а жива́го.
27
И҆ реко́ша е҆мꙋ лю́дїе по словесѝ пре́жнем̑ гл҃юще, та́ко сътвори́тсѧ мꙋжꙋ и҆же ѹ҆бїе́тъ е҆го·
28
И҆ слы́шавъ е҆лиа҆́въ бра́тъ е҆го старѣ́ишїи. вънегда̀ гл҃ати е҆мꙋ къ мꙋжемъ, и҆ разъгнѣ́васѧ ꙗ҆́ростїю е҆лїа́въ на дв҃да, и҆ речѐ почт̂о с̂е прише́лъ е҆си. и҆ комꙋ̀ ѻ҆ста́ви малы́ѧ ѻ҆́вца ѻ҆ны̀ въ пꙋсты́ни, вѣ́де б̂о а́зъ го́рдость твою̀, и҆ ѕло́бꙋ срд̑ца твое҆го, ꙗ҆́ко видѣ́нїѧ ради бра́ни прише́лъ е҆си сѣмо·
29
И҆ речѐ дв҃дъ, чт̂о сътвори́хъ нн҃ѣ. нѣ́сть л̂и рѣчь, и҆ ѿврати́сѧ ѿ него̀ проти́вꙋ и҆́номꙋ. и҆ речѐ по словесѝ семꙋ̀. и҆ ѿвеща́ша е҆мꙋ лю́дїе по словесѝ пре́жнемꙋ·
30
И҆ слы́шаны бы́ша гл҃ы, и҆́хже гл҃а дв҃дъ. и҆ възвести́ша пред̑ саѹ́ломъ, и҆ поꙗ҆́ша е҆го лю́дїе и҆ приведо́ша пред̑ саѹ́ла. и҆ речѐ дв҃дъ къ саѹ́лꙋ да не ѹ҆жаса́етсѧ срд̑це господи́нꙋ мое҆мꙋ ѻ҆ се́мъ. и҆ да и҆́детъ ра́бъ тво́и, и҆ побо́ретсѧ съ и҆ноплеме́нникомъ си́мъ·
31
И҆ рече саѹ́лъ къ дв҃дꙋ не мо́жеши и҆тѝ, къ и҆ноплеме́нникꙋ семꙋ̀, и҆ побори́тисѧ с ни́мъ. ꙗ҆́ко т̂ы дѣт́ищъ е҆си. а҆ с̂е мꙋжъ боре́цъ е҆сть ѿ ю́ности свое́ѧ·
32
И҆ рече дв҃дъ къ саѹ́лꙋ, послꙋшаи гл҃ы раба̀ твое҆го. е҆да̀ пасѧ́хъ а҆зъ ѿц҃а свое҆го ста́да. и҆ е҆гда̀ прихожда́ше ле́въ и҆л̂и медвѣдица, и҆ въсхища́ше ѿ ста́дъ ѻ҆вцꙋ е҆ді́нꙋ·
33
И҆ а́зъ въ слѣдъ е҆го и҆схожда́хъ и҆ поража́хъ и҆̀. і҆ и҆зъторгах̑ и҆зъ ѹ҆́стъ е҆го взѧ́тое, и҆ а́ще въспротивлѧ́ше ми сѧ. т̂о е҆́мъ за горта́нь е҆го и҆ разбива́хъ, и҆ ѹ҆мръщвѧ́хъ и҆хъ ра́бъ твои·
34
И҆ а́ще бꙋдетъ и҆ноплеме́нникъ се́и бес по́мощи. ꙗ҆́коже и҆ звѣрїе ѻ҆нѝ, т̂о не и҆дꙋ л̂и и҆ поражꙋ̀ и҆̀ и҆ ѿи҆мꙋ̀ дне́сь поноше́нїе і҆и҆л҃ево. понеже непоко́рныи се́и и҆ноплеме́нникъ, ѹ҆ничижѝ повелѣнїе б҃а жи́ва·
35
И҆ речѐ двд̑ъ г҃ь ꙗ҆́коже и҆зѧ́тъ м̂ѧ ѿ ѹ́стъ львов̑҇ и҆ ѿ рꙋкѝ медвѣдица. сїи же г҃ь и҆змѝ м̂ѧ ѿ рꙋкꙋ и҆ноплеме́нн꙽ика сего непоко́рнаго. и҆ рече саѹ́лъ къ дв҃дꙋ. и҆дѝ и҆ бꙋди г҃ь с тобо́ю. и҆ ѻ҆блечѐ саѹ́лъ дв҃да ѻ҆де́жею и҆ шле́мъ мѣдѧнъ възложѝ на главꙋ̀ е҆го. и҆ препоꙗ҆са̀ и҆̀ ѻ҆рꙋжїемъ е҆го верхꙋ̀ ѻ҆де́жи е҆го·
36
И҆ дв҃дъ похожа̀ въ ѻ҆рꙋжїѝ сѣмо и҆ ѻ҆ва́мо, и҆ ѹ҆трꙋди́сѧ. б̂ѣ б̂о мно́жество ѻ҆рꙋжїѧ на не́мъ, и҆ речѐ дв҃дъ саѹ́лꙋ, не могꙋ̀ и҆тѝ въ ѻ҆рꙋжїѝ семъ, ꙗ҆́ко нѣсмъ ѻ҆бы́клъ е҆го, и҆ взѧ́ша ѿ него ѻ҆рꙋжїе·
37
И҆ взѧ̀ па́лицꙋ свою̀ въ рꙋкꙋ, і҆ и҆збра̀ себѣ пѧ́ть ка́менїи до́бръ ѿ потока и҆ вложѝ ѧ҆̀ в тобо́лецъ па́стыр꙽скїи, и҆же ноша́ше, и҆ пра́щꙋ и҆мы́и в рꙋкꙋ свое́ю, і҆ и́де к꙽ мꙋжеви и҆ноплеме́нникꙋ·
38
І҆ и҆дѧ́ше и҆ноплеме́нникъ, и҆ды́и на побѣдꙋ къ дв҃дꙋ, и҆ носѧ́и ѻ҆рꙋжїе е҆го пред ни́мъ и҆дѧ́ше·
39
И҆ ви́дѣ голїꙗ҆́дъ и҆ноплеме́нникъ дв҃да ѻ҆безчествова́ше и҆̀, зане дѣтищъ б̂ѣ и҆ черме́нъ и҆ лѣпъ ѻ҆чи́ма·
40
И речѐ и҆ноплеме́нникъ къ дв҃дꙋ, та́к же л̂и е҆смь а́зъ ꙗ҆́ко пе́съ, да и҆́деши проти́вꙋ мн̂ѣ съ па́лицею то́кмо и҆ ка́менїемъ, и҆ проклѧ́тъ и҆ноплеме́нникъ дв҃да богѝ свои́ми и҆ речѐ и҆ноплеме́нникъ къ дв҃дꙋ и҆дѝ на́ мѧ, и҆ дамъ пло́ть твою пти́цамъ нбс̑҇нымъ, и҆ звѣрем̑ зе́мным̑·
41
И речѐ дв҃дъ и҆ноплеме́нникꙋ, т̂ы и҆деши на́ мѧ въ ѻ҆рꙋжїи и҆ въ бро́нѧхъ и҆ съ щи́томъ, а҆́з же и҆дꙋ̀ на́ тѧ въ и҆́мѧ г҃а саваѻ́ѳа, б҃а, наста́вника і҆и҆л҃ева и҆ е҆гоже т̂ы ѹ҆ничижѝ дне́сь·
42
И҆ преда́ти т̂ѧ и҆́мать б҃ъ днесь въ рꙋ́цѣ моѝ и҆ ѹ҆бїю̀ т̂ѧ, и҆ ѿи҆мꙋ̀ главꙋ̀ твою ѿ тебѐ, и҆ да́мъ тѣло твоѐ, и҆ телеса̀ по́лка твое҆го и҆ноплеме́ннича въ дн҃ь сїи пти́цамъ нбс̑҇нымъ, и҆ звѣремъ зе́мнымъ, и҆ рзсꙋмѣ́етъ вс̂ѧ землѧ̀, ꙗ҆́ко есть г҃ь б҃ъ въ і҆и҆л҃и·
43
И҆ разꙋмѣ́етъ весь събо́ръ се́и, ꙗ҆ко ни ѻ҆рꙋ́жїемъ н̂и бро́нѧми сп҃са́етъ г҃ь, ꙗ҆́ко гн҃ѧ е҆сть бра́нь с̂и, и҆ преда́сть в̂ы г҃ь в рꙋки на́ша·
44
И҆ въста́въ и҆ноплеме́нник꙽ и҆дѧ́ше ско́ро на срѣте́нїе дв҃дꙋ, и҆ ѹ҆скорѝ дв҃дъ и҆ течѐ с по́лка на срѣте́нїе и҆ноплеме́нникꙋ·
45
И҆ прострѐ рꙋкꙋ свою в тобо́лецъ, и҆зѧ̀ и҆з него ка́мень еді́нъ и҆ вложѝ въ пра́ще, врь́же ка́менем̑ и҆ ѹ҆разѝ и҆ноплеме́нника в чело̀, и҆ ѹ҆нъзѐ ка́мень под̑ шле́момъ е҆го в чело̀ его, и҆ падѐ голїꙗ҆́дъ на лицы̀ свое҆мъ на землѝ·
46
И҆ ѹ҆крѣпи́сѧ дв҃дъ над̑ и҆ноплеме́нникомъ, и҆ ѹ҆мр҃тви и҆̀ пра́щею и҆ ка́менем̑. и҆ ѹ҆би и҆̀, и҆ ѻ҆рꙋжїѧ не бѣ в рꙋцѣ̀ его·
47
И течѐ ско́ро дв҃дъ и҆ ста̀ над̑ ним꙽, и҆ прїе҆мъ ѻ҆рꙋжїе е҆го і҆ и҆звлечѐ и҆̀ ѿ ꙗ҆́дрꙋ е҆го ѹ҆мертвѝ и҆̀, и҆ ѿсѣчѐ и҆мъ главꙋ̀ е҆го, и҆ ви́дѣвше и҆ноплеме́нницы, ꙗ҆́ко ѹ҆же ѹ҆́мре си́лныи и҆хъ и҆ бѣжа̀ша·
48
И҆ въста́вше мꙋжи і҆и҆л҃еви, і҆ѹ҆́дины, и҆ въскли́кнꙋвше и҆ гна́ша съза́ди, до мѣста меге́ѳова, и҆ до вра́тъ а҆сколоньскихъ, и҆ падоша ꙗ҆́звами мно́ѕи и҆ноплеме́нницы по пꙋтѝ до врат̑ мегеѳа и҆ а҆сколона·
49
И҆ възврати́шасѧ мꙋжи і҆и҆л҃еви гна́вшїисѧ въ слд̑ѣ и҆ноплеме́нникъ і҆ и҆зби́вше по́лки и҆хъ·
50
И҆ взѧт̑ дв҃дъ главꙋ̀ и҆ноплеменничꙋ, и҆ внесѐ ю҆̀ въ і҆ерс̑҇лі́мъ. и҆ ѻ҆рꙋжїе е҆го положѝ въ хра́мѣ, и҆ е҆гда̀ ви́дѣ саѹ҆́лъ дв҃да исходѧ́ща, въ стрѣте́нїе и҆ноплеме́нникꙋ, речѐ къ а҆вени́рꙋ кнѧ́ѕю си́лы, чїи есть сн҃ъ ю҆́ноша се́и а҆венире и҆ рече а҆вени́ръ да живе́тъ дш҃а твоѧ̀ цр҃ю, ꙗ҆́ко не ви́дѣ·
51
И҆ рече цр҃ь, въпросѝ ѹ҆бо т̂ы чїи есть сн҃ъ ю҆́ноша се́и·
52
И҆ ꙗ҆́ко възврати́сѧ двд̑ъ по ѹ҆бїенїѝ и҆ноплеме́н꙽ника. поѧ̀ е҆го а҆вени́ръ и҆ приведѐ е҆го пред̑꙽ саѹ҆́ла. глава̀ же иноплеме́ннича б̂ѣ в рꙋцѣ е҆го·
53
И҆ рече к немꙋ саѹ́лъ, чїи еси сн҃ъ ю҆́ноше, и҆ рече дв҃дъ, сн҃ъ раба̀ твое҆го і҆е҆ссе́ѧ, ѿ виѳлеѻ́ма·
Джерела
