Ostroh Bible❧Перша книга Самуїлова (Перша книга царів), розділ 16

1

И рече г҃ь къ само́и҆лꙋ, доко́лѣ т̂ы пла́чеши по саѹ҆́лѣ. а҆́з꙽ ѹ҆ничижих̑ не црс̑҇твова́ти въ і҆ил҃и е҆мꙋ. и҆ рече и҆спо́лни ро́гъ і҆е҆ле́ю. и҆ прїидѝ послю̀ т̂ѧ къ і҆е҆с꙽се́ю въ виѳлеѻ́мъ. ꙗ҆́ко ѹ҆зрѣ́хъ въ сн҃ѣ́хъ е҆го себѣ̀ цр҃ѧ·

2

И҆ реч̑҇ самоилъ ка́ко поидꙋ̀ и҆ ѹ҆слы́шитъ саѹ҆́лъ и҆ ѹ҆бі́етъ м̂ѧ. и҆ рече г҃ь ю҆́ницꙋ ѿ воло́въ, прїимѝ в рꙋ́цѣ с̂и. и҆ рече́ши пожрѣт́и гв҃и прїидох̑·

3

И҆ призове́ши і҆е҆с꙽се́ѧ, и҆ сн҃ы е҆го на жр́ьтвꙋ. и҆ а́зъ т̂и покажꙋ̀ ꙗ҆́же сътвори́ши. и҆ пома́жеши м̂и е҆го́же т̂и рекꙋ̀·

4

И҆ сътворѝ само́илъ вс̂ѧ е҆ли́ко рече е҆мꙋ г҃ь. и҆ прїиде въ виѳлеѻ́мъ. и҆ ѹ҆жасо́шасѧ ста́рцы гра́да, і҆ и҆зыидо́ша въ срѣте́нїи его. и҆ рѣш́а ми́ръ вхо́дꙋ твое҆мꙋ, ѽ прозорли́вче·

5

И҆ рече въ ми́рѣ пожрѣт́и г҃ꙋ прїидо́хъ. ѻ҆ст҃и́тесѧ и҆ възвесели́тесѧ дне́сь со мно́ю. и҆ ѻ҆ст҃и і҆е҆с꙽се́ѧ и҆ сн҃ы е҆го. и҆ призва̀ ѧ҆̀ на жр́ътвꙋ·

6

И҆ бы́сть е҆гда̀ въведѐ ѧ҆̀ и҆ ви́дѣ е҆лїа́ва. и҆ рече а҆ще с̂и е҆сть пред̑ гм҃ъ цр҃ь е҆го·

7

И҆ рече г҃ь само́илꙋ не зрѝ на лицѐ е҆го, ни на ѻ҆бы́чаи вели́чества е҆го. ꙗ҆́ко ѹ҆ничижи́хъ и҆̀ поне́же б̂о не та́ко зрит̑ чл҃къ·

8

ꙗ҆́ко зри́тъ б҃ъ, ꙗ҆́ко чл҃къ ви́дитъ на лицѐ. а҆ б҃ъ ви́дитъ на срд̑це·

9

И҆ призва̀ і҆е҆с꙽се́и и҆ а҆минада́ва, и҆ пред̑ста́ви и҆̀ пред̑ лице́мъ само́ила. и҆ рече само́илъ. н̂и сего и҆збра̀ г҃ь. и҆ приведѐ і҆е҆с꙽се́и сам꙽ма́ѧ, и҆ рече и҆ сего не и҆збра̀ г҃ь. и҆ приведѐ і҆е҆с꙽се́и вс̂ю, з҃, сн҃овъ свои҆хъ пред̑ само́ила. и҆ рече само́илъ къ і҆е҆с꙽се́ю, не и҆збра̀ г҃ь всѣхъ сих̑·

10

И҆ рече па́кы само́и҆лъ къ і҆е҆с꙽се́ю, не доста̀ л̂и ѹ҆́же дѣтїи. и҆ реч̑҇ і҆е҆с꙽се́и и҆ е҆щѐ е҆сть е҆ді́нъ ма́лъ, и҆ се́й пасет̑ на па́жити. и҆ реч̑҇ само́илъ къ і҆е҆с꙽се́ю. послѝ и҆ приведи и҆̀, ꙗ҆́ко не и҆́мамъ и҆зыитѝ, а҆́ще то́й не прїидет̑ сѣмо, и҆ посла̀ и҆ въведе и҆̀. бѣ б̂о се́й чр́ъмен̑҇ до́брыма ѻ҆чи́ма, и҆ бл҃гъ възо́ром̑·

11

И рече г҃ь къ само́илꙋ. въста́ни и҆ пома́жи дв҃да ꙗ҆́ко то́й бл҃гъ е҆сть·

12

И҆ прїѧ́тъ само́илъ ро́гъ со і҆е҆леѻм̑·

13

и҆ пома́за и҆̀ посредѣ бра́тїа е҆го. и҆ ноша́шесѧ дх҃ъ гн҃ь над̑ двд҃омъ, ѿ того̀ дн҃е и҆ пото́мъ·

14

И҆ въста̀ само́ил̑҇ ѿи҆́де въ сармаѳе́мꙋ·

15

И҆ дх҃ъ гн҃ь ѿстꙋпѝ ѿ саѹ́ла, и҆ давлѧ́ше и҆̀ дꙋхъ лꙋка́выи ѿ г҃а·

16

И҆ рѣша ѻ҆тро́цы саѹ҆́лови к не́мꙋ. се нн҃ѣ дх̑ꙋ лꙋка́выи ѿ г҃а да́витъ т̂ѧ·

17

да и҆́дꙋтъ рабѝ твоѝ нн҃ѣ пред̑ тобо́ю и҆ възы́щꙋтъ господи́нꙋ на́шемꙋ мꙋж́а зна́юща въ гꙋ́сли пѣти. и҆ вънегда́ же бꙋдет̑ дꙋхъ лꙋка́выи, на тебѣ̀. и҆ тогда̀ да пое҆тъ въ гꙋ́сли своѧ̀. и҆ бл҃го т̂и бꙋ́детъ и҆ поко́итъ т̂ѧ·

18

И҆ рече саѹ҆́лъ къ ѻ҆тро́комъ свои҆мъ. ви́дѣсте л̂и колѝ мꙋж́а до́брѣ пою́ща. и҆зыщи́те и҆ въведи́те и҆̀ ко мнѣ̀·

19

И҆ ѿвѣща е҆мꙋ е҆ді́нъ ѿ ѻ҆тро́къ е҆го, и҆ ре́че. с̂е нн҃ѣ ви́дѣхъ сн҃а і҆е҆с꙽се́ѻва и҆зъ виѳлеѻ́ма. и҆ то́и вѣ́дыи пѣтїе и҆ мꙋ́жъ разꙋ́менъ, и҆ чл҃кобо́рецъ и҆ мꙋдръ въ словесѝ. и҆ мꙋ́жъ бл҃гъ видѣнїемъ, и҆ г҃ь с ни́мъ·

20

И҆ посла̀ саѹ́лъ вѣстники къ і҆ес꙽се́ю гл҃ѧ. пꙋстѝ ко мнѣ̀ дв҃да сн҃а свое҆го, и҆же е҆сть ѹ҆ ста́да твое҆го. и҆ възе́мъ і҆ес꙽се́и бре́мѧ хлѣ́бовъ и҆ мѣхъ вина̀, и҆ козлѧ̀ ѿ ко́зъ е҆ді́но и҆ посла къ саѹ́лꙋ рꙋко́ю двд҃овою сн҃а свое҆го·

21

И҆ въни́де дв҃дъ къ саѹ́лꙋ, и҆ пред̑ста пред̑ ни́мъ. и҆ възлюбѝ и҆̀ ѕѣло саѹ́лъ, бы́сть е҆мꙋ носѧ́и ѻ҆рꙋжїе е҆го·

22

И҆ посла̀ саѹ́лъ къ і҆е҆с꙽се́ѻ҆ви гл҃ѧ. не дѣ́и дв҃да да пребꙋ́детъ ѹ҆ менѐ, ꙗ҆́ко ѻ҆брѣте блгд̑ть пред̑ ѻчи́ма мои́ма. и҆ бы́сть е҆гда̀ бы́ти дꙋхꙋ нечи́стꙋ въ саѹ́лѣ. и҆ прїимъ дв҃дъ рꙋкама свои́ма гꙋ́сли, и҆ поѧ́ше и҆̀ и҆ ѿдохнꙋ̀ саѹ́лъ и҆ бл҃го е҆мꙋ бы́сть и҆ ѿстꙋпѝ ѿ него̀ дꙋхъ нечи́стыи·