Ostroh Bible❧Перша книга Самуїлова (Перша книга царів), розділ 19

1

И гл҃а саѹ́лъ къ и҆ѻ҆а҆наѳа́нꙋ сн҃ꙋ свое҆мꙋ и҆ къ всѣ́мъ ѻ҆́трокомъ свои҆мъ. да ѹ҆мрътвѧ́тъ дв҃да. н̂о и҆ѻ҆а҆наѳа́нꙋ же сн҃ꙋ саѹ́лю, ѹ҆го́денъ бѧ́ше дв҃дъ ѕѣ́ло·

2

И҆ възвѣстѝ и҆ѻ҆а҆наѳа́нъ дв҃дꙋ гл҃ѧ. ѿц҃ъ мо́и саѹ́лъ и҆́щетъ т̂ѧ ѹ҆би́ти, съхрани́сѧ ѹ҆бо ѹ҆́тро, заѹ҆́тра скры́исѧ, и҆ сѧ́ди въ съкро́вищи·

3

И҆ а́зъ и҆зыидꙋ̀ и҆ ста́нꙋ молѧ́сѧ ѿц҃ꙋ свое҆мꙋ на селѣ̀ и҆дѣ́же а҆ще е҆си т̂ы. и҆ а́зъ гл҃ю ѿц҃ꙋ свое҆мꙋ ѻ҆ тебѣ̀, да и҆дѣ́же бꙋ́деши възвѣщꙋ̀ т̂и·

4

И҆ гл҃а и҆ѻ҆а҆наѳа́нъ ѻ҆ дв҃дѣ бл҃гаѧ къ саѹ́лꙋ ѿц҃ꙋ свое҆мꙋ и҆ речѐ к немꙋ. е҆да̀ съгрѣшѝ ѽ цр҃ю ра́бъ тво́и дв҃дъ н̂о мню̀ ꙗ҆́ко не съгрѣшѝ ничи́мъже, и҆ дѣ́ла б̂о е҆го бл҃га сꙋть ѕѣ́ло·

5

И҆ положѝ дш҃ꙋ свою̀ в рꙋ́кꙋ е҆го и҆ побѣдѝ и҆ноплеме́нника. и҆ сътворѝ г҃ь сп҃се́нїе вели́ко всемꙋ̀ і҆и҆л҃ю. ты́ же вѣ́дѣ и҆ пора́довасѧ. и҆ почто̀ съгрѣша́еши въ кро́вь непови́ннꙋ, ѹ҆би́ти велѧ̀ дв҃да въсꙋ́е·

6

И҆ послꙋша саѹ́лъ глс̑҇а и҆ѻ҆а҆наѳа́нь и҆ клѧ́сѧ и҆ гл҃ѧ, жи́въ г҃ь ꙗ҆́ко не ѹ́мретъ дв҃дъ·

7

И҆ призва̀ и҆ѻа҆наѳа́нъ дв҃да и҆ възвѣстѝ е҆мꙋ вс̂ѧ гл҃ы сїѧ. и҆ в꙽ведѐ и҆ѻ҆а҆наѳа́нъ дв҃да къ саѹ́лꙋ, и҆ б̂ѣ пред̑ ни́мъ ꙗ҆́ко и҆ пре́жде·

8

И҆ приложи́сѧ бра́ни бы́ти на саѹ́ла. и҆ ѹ҆крѣпи́сѧ дв҃дъ и҆ побѣдѝ и҆ноплеме́нникъ. і҆ и҆збѝ ꙗ҆́звою вели́кою ѕѣ́ло. и҆ бѣжа́ша ѿ лица̀ е҆го·

9

И҆ бы́сть дꙋ́хъ лꙋка́въ на саѹ́лѣ. и то́и в домꙋ̀ своем̑ почива́ше, и҆ ко́пїе в рꙋцѣ̀ его. и҆ дв҃дъ поѧ́ше въ гꙋ́сли своѧ̀·

10

І҆ и҆ска́ше саѹ́лъ ѻ҆рꙋжїемъ разби́ти дв҃да, и҆ ѿстꙋпѝ дв҃дъ ѿ лица̀ саѹ́лѧ. и҆ съкрꙋшѝ саѹ́лъ ѻ҆рꙋж́їе ѻ҆́ стѣнꙋ, и҆ дв҃дъ ѿшед̑ сп҃се́сѧ в но́щь т̂ꙋ·

11

И҆ посла̀ саѹ́лъ вѣ́стники в до́мъ двд҃въ стрещѝ е҆го да ѹ҆бїютъ и҆̀. и҆ по совѣт́ꙋ възвѣсти дв҃дꙋ мелхо́ла жена̀ е҆го гл҃ющи. а҆ще не сп҃сеши дш҃а свое҆ѧ в но́щь сїю т̂о ѹ́тро ра́но ѹ́мреши·

12

И҆ свѣсѝ мелхо́ла дв҃да ѻ҆ко́нцемъ, и҆дѐ, и҆ бѣжа и҆ сп҃сесѧ·

13

И҆ прїѧ́тъ мелхо́ла новопогреба́лнаѧ, и҆ положѝ на ѻ҆́дрѣ, и҆ плат̑ и҆же полага́ше е҆мꙋ на главѣ̀, и҆ покры̀ ѧ҆̀ ри́зами·

14

И҆ посла̀ саѹ́лъ слꙋ́ги да и҆мꙋтъ дв҃да. и҆ гл҃аше ꙗ҆́ко бо́ленъ е҆сть. и҆ посла̀ саѹ́лъ второ́е да ѻ҆глѧда́ютъ дв҃да гл҃ѧ. принесѣте и҆̀ на ѻ҆́дрѣ къ мнѣ̀, да ѹ҆мрьщвлю и҆̀ а҆зъ·

15

И҆ прїидо́ша слꙋ́ги, и҆ с̂е но́вопогреба́лнаѧ на ѻ҆́дрѣ. и҆ ѹ҆брꙋ́съ і҆ и́же б̂ѣ на главѣ̀ е҆го·

16

И҆ рече саѹ́лъ къ мелхо́лѣ. что̀ с̂е помы́слила е҆си, и҆ ѿпꙋсти́ла е҆си вра́га мое҆го, и҆ гон꙽зѐ менѐ. и҆ реч̑҇ мелхо́ла саѹ́лови. сам̑ м̂и рече ѿпꙋстѝ м̂ѧ. а҆ще л̂и нѝ т̂о погꙋблю̀ т̂ѧ·

17

И҆ дв҃дъ бѣжав̑҇ сп҃сесѧ. і҆ и́де къ само́илꙋ въ сармаѳе́мꙋ. і҆ и҆сповѣ́давъ е҆мꙋ вс̂ѧ, е҆ли́ко сътворѝ е҆мꙋ саѹ́лъ. і҆ и҆до́ста дв҃дъ и҆ само́и҆лъ. и҆ сѣдо́ста на сꙋ́дищи в ра́мѣ·

18

И҆ възвѣсти́сѧ с̂е саѹ́лꙋ. и҆ посла̀ слꙋ́ги саѹ́лъ ꙗ҆́ти дв҃да. и҆ ви́дѣша събо́ръ прро̑҇къ. и҆ само́илъ стоѧ́ше всѧ́ко над ни́ми. и҆ бы́сть дх҃ъ бж҃їи на слꙋга́хъ саѹ́лихъ. и҆ нача́ша прорица́ти·

19

Възвѣсти́ша саѹ́лꙋ, и҆ посла̀ дрꙋгїѧ слꙋ́ги, и҆ прорица́ти нача́ша и҆ тїѝ. и҆ приложи саѹ́лъ посла́ти слꙋ́ги тре́тїи, и҆ нача́ша и҆ тїи прорица́ти·

20

И҆ разгнѣ́васѧ гнѣ́вомъ вели́кимъ саѹ́лъ. і҆ и́де са́мъ въ сармаѳе́мꙋ. и҆ прїиде до кла́дѧѕѧ вели́кого, и҆же е҆сть сеѳі́и҆нъ. и҆ въпросѝ саѹ́лъ рече гд̂ѣ е҆сть самоил̑҇ и҆ дв҃дъ. и҆ рѣш́а с̂е е҆сть въ наѳе́ѳѣ, в ра́мѣ·

21

І҆ и́де в наѳо́ѳы, ꙗ҆́же в рамѣ. и бы́сть и҆ на то́мъ дх҃ъ бж҃їи. і҆ и҆дѧ́ше и҆ды́и прорица́ѧ, до́ндеже прїитѝ е҆мꙋ в наѳо́ѳꙋ ꙗ҆́же в ра́мѣ·

22

И съвлече́сѧ съ ри́зъ свои҆хъ. и҆ прорицаше предо всѣ́ми и҆ми ве́сь дн҃ь то́и, и҆ вс̂ю но́щь т̂ꙋ. того̀ ра́ди гл҃ахꙋ, а҆ще и҆ саѹ́лъ е҆сть въ прро̑҇цѣхъ·