Ostroh Bible❧Перша книга Самуїлова (Перша книга царів), розділ 25

1

И ѹ́мре само́илъ, и҆ събра́сѧ ве́сь і҆и҆л҃ь. и҆ пла́кашесѧ е҆го и҆ погребо́ша и҆̀ в до́мꙋ е҆го въ саръмаѳе́мѣ. и҆ въста́въ дв҃дъ сни́де въ пꙋсты́ню маа́ню вънꙋтре́нюю·

2

И҆ б̂ѣ чл҃къ въ маа́нѣ. и҆ ста́да е҆мꙋ своѧ на карми́лѣ, и҆ чл҃къ с̂и вели́къ ѕѣ́ло, и҆ сего ѻ҆вецъ б̂ѣ, ҂г҃, а҆ ко́зъ ҂а҃. и҆ бы́сть е҆гда̀ стрижаще стада своѧ на кар̑҇ми́лѣ·

3

И҆мѧ́ же чл҃кꙋ нава́нъ, і҆ и́мѧ женѣ̀ е҆го и҆а҆вигѣѧ, и҆ бѧ́ше жена̀ е҆го бл҃га и҆ смысле́на, и҆ възоро́мъ ви́дѣти ѕѣ́ло добра̀, а҆ мꙋжъ е҆ѧ̀ чл҃къ твръдъ, и҆ лꙋка́въ при всѣмъ, и҆ не ѻ҆бщи́въ·

4

И҆ слы́ша дв҃дъ въ пꙋсты́ни, ꙗ҆́ко стрижетъ нава́нъ на каръми́лѣ ста́да своѧ·

5

И҆ посла̀ дв҃дъ, і҃, ѻ҆́троковъ, и҆ рече ѻ҆́трокомъ възы́дѣте на карми́ль, і҆ и҆де́те къ нава́нꙋ и҆ въпроси́те и҆̀ ѿ менѐ с миром̑·

6

Негли здра́въ е҆си и҆ до́мъ тво́и, и҆ вс̂ѧ твоѧ здра́ва л̂и сꙋть·

7

И҆ нн҃ѣ ѹ҆бо слы́шꙋ ꙗ҆́ко стригꙋтъ пастꙋси твоѝ, и҆же бѣша с на́ми въ пꙋсты́ни, и҆ не възбра́нихомъ и҆мъ, и҆ не сътвори́хомъ ничесо́же въ вс̂ѧ дн҃и, е҆гда бѣша на карми́лѣ·

8

Въпросѝ ѻ҆́троки своѧ, и҆ възвѣстѧ́т꙽ ти, и҆ ѻ҆брѣто́шасѧ ѻ҆тро́цы твоѝ съ радостїю пред̑ ѻ҆чи́ма твои́ма. ꙗ҆́ко въ дн҃ь бл҃гъ прїидо́хом̑, т̂о да́ же нн҃ѣ сн҃ови твое҆мꙋ дв҃дꙋ, е҆же а҆́ще хо́щеши·

9

И҆ прїидо́ша ѻ҆́троцы дв҃дви и҆ гл҃аша словеса̀ с̂и къ нава́нꙋ. и҆ вс̂ѧ гл҃ы сїа и҆менем̑ дв҃двым̑·

10

И҆ въско́чи наван̑҇ ѿвѣща ѻ҆́троком̑ двд̑вым̑ рекъ. чт̂о ес̑҇ двд̑ъ и҆л̂и чт̂о е҆сть сн҃ъ і҆е҆с꙽сеѻв̑҇. днс̑҇ь ѹ҆множе́ни сꙋть рабѝ, ѿходѧ́ще ко́жд̑о ѿ лица̀ господи́на свое҆го, и҆ возмꙋ̀ хлѣба и҆ вина̀ и҆ закла́нїа моѧ̀ ꙗ҆́же заклах̑ стригꙋщим̑ моѧ̀ ѻ҆́вца. то та̀ л̂и дам̑ мꙋжем̑ их̑же не вѣ́дѣ ѿкꙋ́дꙋ сꙋть·

11

И҆ възврати́шасѧ ѻ҆́троцы дв҃дви пꙋтемъ свои҆м꙽. и҆ възвра́щ꙽шесѧ прїидо́ша и҆ възвѣсти́ша дв҃дꙋ по гл҃ꙋ семꙋ̀·

12

И҆ рече дв҃дъ мꙋж́емъ своим̑, ѻ҆поѧ́шисѧ ко́ждо вас̑҇ ѻ҆рꙋжїемъ своим̑ і҆ и҆до́ша въ слд̑ѣ дв҃дъ. ꙗ҆́ко у҃, мж̑ꙋ. а҆ с҃ и҆хъ ѻ҆ста̀ ѹ҆ сосꙋдовъ·

13

И҆ а҆вигѣѝ женѣ̀ нава́новѣ повѣ́да е҆ді́нъ ѻ҆́трокъ гл҃ѧ. с̂е присыла̀ дв҃дъ послы̀ ѿ пꙋсты́нѧ блс̑҇ви́ти господи́на на́шего. н̂о ѻ҆́нъ ѹ҆врати́сѧ ѿ них̑·

14

Сїи же мꙋж́и бла́ѕи бѣша на́мъ ѕѣ́ло, и҆ не възбранѧ́хꙋ на́м꙽ ѕѣ́ло, н̂и сътвори́ша н̂ы ѕл̂а ничт̂оже въ вс̂ѧ дн҃и в нѧ́же бѣхом̑ с ни́ми·

15

И҆ сꙋщим̑ нам̑ т̂ꙋ, ꙗ҆́ко стѣны бѣша ѻ҆ нас̑҇, въ нощѝ и҆ въ дн҃и по вс̂ѧ дн҃и сꙋщим̑ с ни́ми, на селѣ̀ пасꙋщ́е ста́да·

16

А҆ нн҃ѣ разꙋмѣи и҆ ви́ждъ т̂ы чт̂о сътвори́ши ꙗ҆́ко съверши́сѧ вс̂ѧ ѕло́ба господи́на на́шего, и҆ на домꙋ̀ е҆го. и҆ семꙋ̀ глад̑нꙋ сꙋщꙋ, нел꙽зѣ гл҃ати к немꙋ̀·

17

И҆ пот꙽щасѧ а҆вигѣѧ́. и҆ взѧ̀, с҃, хлѣбъ и҆ дв̂ѣ корча́ѕѣ вина̀, и҆ е҃, ѻ҆́венъ, и҆ е҃, хлѣбъ смида́ленъ чи́стъ, и҆ ко́шницꙋ гро́здїѧ, и҆ с҃, вѧ́заницъ смо́квеи, и҆ възложѝ на ѻ҆слѧ́та·

18

И҆ рече къ ѻ҆́трокомъ своим̑ пои҆дѣте предо мно́ю, и҆ с̂е а҆́зъ въ слд̑ѣ вас̑҇ и҆дꙋ̀. и҆ мꙋжꙋ свое҆мꙋ с̂и не възвѣстѝ·

19

И҆ бы́сть е́й въсѣд꙽ше на ѻ҆слѧ̀. і҆ и҆сходѧ́щꙋ въ часть горы̀. и҆ с̂е дв҃дъ и҆ мꙋжи е҆го и҆дꙋще сꙋпроти́въ е́й, и҆ та̀ срѣте ѧ҆̀·

20

И҆ рече дв҃дъ до́брѣ сп҃се непра́вед̑ника. а҆́зъ б̂о всѧ̀ съхраних̑ нава́нꙋ въ пꙋсты́ни. и҆ не помы́слих̑ поꙗ҆́ти ничт̂оже ѿ всего е҆мꙋ̀. и҆ възда́сть м̂и ѕла́ѧ въз꙽ бл҃гаа·

21

Се̂ же сътворѝ б҃ъ двд̑ви и҆ с̂и приложѝ. а҆́ще ѻ҆ста́нетъ нѣ́что ѿ всего̀ нава́нꙋ. да́же и҆ до ѹ́тра ѹ҆ви́ди ꙗ҆же полꙋчѝ·

22

И҆ ѹ҆ви́дѣ а҆вигѣ́ѧ дв҃да. и҆ потщав̑҇шисѧ ско́чи съ ѻ҆слѧ́те. и҆ падѐ пред̑ дв҃дом̑, и҆ поклони́сѧ е҆мꙋ до землѧ̀·

23

И҆ посе́мъ падѐ пред̑ нога́ми е҆го. и҆ реч̑҇, на мн̂ѣ вина с̂и господи́не, моа̀ е҆сть непра́вда. а҆́ще вели́ши да гл҃етъ раба̀ твоа̀ въ ѹ́ши твоѝ, и҆ послꙋшаи словесъ рабы̀ твое́ѧ·

24

Не положѝ господи́не на срд̑цы свое҆мъ ничесо́же, чл҃ка сего̀ ра́ди глд̑аствꙋю́щаго. ꙗ҆ко б̂о и҆́мѧ е҆мꙋ та́ко и҆ е҆сть нава́нъ б̂о е҆сть и҆́мѧ е҆мꙋ и҆ нѣсть смы́сла в нем̑, а҆́з же раба̀ твоа̀ не вѣ́да ѻ҆́трок̑҇ твоих̑ господи́на мое҆го ꙗ҆́же е҆си посла̀·

25

И҆ нн҃ѣ господи́не мо́и живъ г҃ь и҆ жива дш҃а твоѧ̀, ꙗ҆ко въз꙽бранѝ т̂и г҃ь. да прїидеши на кро́вь непови́ннꙋ, и҆ сп҃се рꙋ́кꙋ свою самъ. и҆ нн҃ѣ да бꙋдꙋт̑ ꙗ҆́ко и҆ нава́нъ вра́ѕи твоѝ и҆́щꙋще господи́нꙋ мое҆мꙋ ѕл̂а·

26

И҆ нн҃ѣ возмѝ принесе́нїе с̂е е҆же бѣ̀ принесла̀ раба̀ господи́нꙋ свое҆мꙋ. и҆ даждъ ѻ҆́троком̑ пред̑стоа́щимъ господи́нꙋ мое҆мꙋ·

27

ѿи҆мѝ нн҃ѣ непра́вдꙋ рабы̀ твое́ѧ. ꙗ҆́ко творѧ̀ сътвори́тъ г҃ь до́мъ вѣренъ господи́на мое҆го. ꙗ҆ко бра́нїю господи́на мое҆го г҃ь побо́ретъ, и҆ ѕло́ба не ѻ҆брѧ́щет꙽сѧ въ тебѣ̀ нико́лиже·

28

А҆́ще же и҆ въста̀ чл҃къ гонѧ́и тѧ, и҆́ща дш҃а твое́ѧ. и҆ е҆сть дш҃а господи́на мое҆го привѧ́зана при ѹ́зомъ живы́мъ ѿ г҃а б҃а, и҆ дш҃ꙋ врага̀ своег̑҇ ѹ҆рази́ши пра́щею·

29

И҆ бꙋдетъ е҆гда̀ сътвори́тъ г҃ь господи́нꙋ мое҆мꙋ вс̂ѧ е҆ли́ко гл҃а бл҃го тебѣ̀. и҆ съвръшит̑ т̂ѧ г҃ь на влд̑чество въ і҆и҆л҃и. и҆ не бꙋдетъ с̂е на ме́рзость и҆ на собла́знь срд̑цꙋ господи́на мое҆го, е҆же и҆злїа́ти кро́вь непови́ннꙋ безꙋма̀. и҆ сп҃си рꙋкꙋ свою̀ господи́нꙋ мое҆мꙋ. и҆ да ѹ҆бла́житъ г҃ь господи́на мое҆го. и҆ помѧне́ши рабꙋ̀ свою ѹ҆блажи́ти ю҆̀·

30

И҆ реч̑҇ дв҃дъ къ а҆вигѣ́и. блс̑҇вен̑҇ г҃ь б҃ъ і҆и҆л҃евъ, и҆же посла̀ т̂ѧ днс̑҇ь на срѣте́нїе м̂и. и҆ блс̑҇вен̑҇ совѣтъ тво́и. и҆ блс̑҇ве́на т̂ы ѹ҆ставле́ши м̂ѧ въ дн҃ь сїи. во́ньже не прїити м̂и на проли́тїе кро́ви, и҆ спс̑҇ти м̂и рꙋкꙋ свою̀·

31

Ѡ҆ба́че жив̑҇ г҃ь б҃ъ і҆и҃лев̑҇, и҆же възбрани́ ми днс̑҇ь ѕл̂а не сътвори́ти. а҆́ще б̂о бы̀ не пот꙽щасѧ на срѣтенїе м̂и. тогда̀ рѣ́хъ, а҆ще кт̂о ѻ҆скꙋдѣе҆тъ м̂и ѿ нава́на. ѹ҆тро до́ свѣта полꙋчи́та ви́димоѐ·

32

И҆ прїѧт̑ дв҃дъ ѿ рꙋкꙋ е҆ѧ вс̂ѧ ꙗ҆́же принесѐ е҆мꙋ и рече е́й и҆дѝ с ми́ромъ в до́мъ сво́и, ꙗ҆́ко послꙋшахъ гла́са твое҆го, и҆ възлюби́хъ лицѐ твое. і҆ и́де а҆вигѣѧ́ къ наванꙋ, и҆ се́й и҆мѣа́ше пи́ръ в домꙋ̀ свое҆мъ, ꙗ҆́ко пи́ръ цр҃евъ, и҆ срд̑це нава́ново веселѧ́сѧ бѣ в не́мъ, пїѧн̑҇ б̂о бѧше ѕѣло. и҆ не възвѣстѝ а҆вигѣ́ѧ нава́нꙋ гл҃а н̂и вели́ка н̂и ма́ла, до́ свѣта ѹ҆́тренѧго·

33

И҆ бы́сть заѹ҆́тра ꙗ҆́ко и҆стрезви́сѧ нава́нъ ѿ вина̀ и҆ повѣ́да е҆мꙋ жена̀ е҆го вс̂ѧ гл҃ы сїѧ̀, и҆ ѹ́мре срд̑це е҆го в нем̑, и҆ то́й сам̑ бы́сть ꙗ҆́ко ка́мень·

34

И҆ ꙗ҆́ко бы́сть де́сѧть дн҃ь, поразѝ г҃ь нава́на и҆ ѹ́мре·

35

И҆ слы́шавъ дв҃дъ и҆ рече, блс̑҇вен̑҇ г҃ь е҆же сꙋдѝ сꙋ́дъ поноше́нїа мое҆го ѿ рꙋкѝ нава́нѧ, и҆ раба̀ свое҆го въздръжа̀ ѿ ѕла̀, и҆ ѕло́бꙋ нава́ню възврати г҃ь на главꙋ̀ е҆го. и҆ посла̀ дв҃дъ гл҃а къ а҆вигѣ́и, да поимꙋ̀ т̂ѧ себѣ въ женꙋ̀·

36

И҆ прїидо́ша ѻ҆́троцы двд̑ви къ а҆вигѣ́и въ карми́лъ, и҆ рѣша е́й гл҃юще, дв҃дъ посла̀ н̂ы къ тебѣ̀ да т̂ѧ по́иметъ себѣ въ женꙋ̀·

37

И҆ въста́вши поклони́сѧ до землѧ̀ лице́мъ, и҆ ре́че с̂е раба̀ твоѧ̀, ꙗ҆́ко и҆ раба̀ и҆же ѹ҆мыва́етъ но́гы ѻ҆́трокомъ твоим̑·

38

И҆ въста̀ а҆вигѣѧ́ и҆ въсѣдъ на ѻ҆слѧ̀ и҆ е҃, дв҃ць и҆дѧ́ше въ слѣ́дъ е҆ѧ̀ і҆ и҆дѧ́ше въ слѣ́дъ ѻ҆́трокъ дв҃двыхъ, и҆ бы́сть е҆мꙋ в꙽ женꙋ̀ а҆вигѣѧ́·

39

И҆ по се́мъ и҆ нахина́мꙋ поѧ́тъ дв҃дъ ѿ і҆и҆л҃ѧ. и҆ бѣ́ста е҆мꙋ дв҃ѣ женѣ̀. саѹ́лъ да́сть мельхо́лꙋ дще́рь свою̀ женꙋ̀ дв҃двꙋ, ѳалтїю сн҃ꙋ ами́шꙋ, и҆же ѿ ро́м꙽ма·