Ostroh Bible❧Перша книга Самуїлова (Перша книга царів), розділ 24

1

И бы́сть е҆гда̀ възврати́сѧ саѹ҆́лъ въспѧ́тъ ѿ и҆ноплеменникъ. и҆ възвѣсти́ша е҆мꙋ гл҃юще, с̂е дв҃дъ б̂ѣ въ пꙋсты́ни гад̑стѣи. и҆ поѧт̑ саѹ҆́лъ съ собо́ю, ҂г҃, мꙋжъ, и҆збранны ѿ всего і҆и҆л҃ѧ. і҆ и҆де и҆ска́ти давы́да и҆ мꙋжь е҆го въ мѣсто сад̑де́емъ въ горꙋ̀ е҆леѻ́ню·

2

И҆ прїидо́ша до стад̑ пасо́мых̑ пꙋте́мъ. и҆ бѣ т̂ꙋ верте́пъ и҆ саѹ҆́лъ вни́де да почїет̑ т̂ꙋ. дв҃дъ же и҆ мꙋжи е҆го внꙋтрених꙽ връте́пѣхъ сѣдѧ́хꙋ·

3

И҆ рѣша мꙋжи дв҃дви к немꙋ̀. с̂е дн҃ь то́й и҆же рече г҃ь тебѣ преда́ти врагы̀ твоѧ̀ в рꙋцѣ твоѝ. и҆ сътвори́ши и҆мъ ꙗ҆́ко бл҃го пред̑ ѻ҆чи́ма твои́ма·

4

И҆ въста́въ дв҃дъ. и҆ ѿѧ́тъ въскри́лїе приѻ҆дѣва́ла саѹ́лѧ ѻ҆та́и·

5

И҆ бы́сть по си́х и҆ въстопта̀ дв҃дꙋ срд̑це своѐ. ꙗ҆́ко ѿѧ́тъ въскри́лїе приѻ҆дѣва́ла саѹ҆́лѧ·

6

И҆ рече дв҃дъ къ мꙋж́емъ своим̑ не бꙋ́ди мн̂ѣ ничто́же ѿ г҃а. а҆ще сътворю̀ гла́съ се́и господи́нꙋ с̂и х҃ꙋ гн҃ю, и҆же въздви́гнꙋти рꙋкꙋ мою̀ на́нь, ꙗ҆́ко х҃с гн҃ь е҆сть се́й·

7

И҆ ѹ҆кротѝ дв҃дъ мꙋжа своѧ словесы̀. и҆ не да́стъ и҆мъ ѹ҆би́ти саѹ҆́ла. и҆ въста̀ саѹ́лъ и҆ сни́де на пꙋть сво́и·

8

І҆ и҆зы́де дв҃дъ въ слѣдъ е҆го и҆з верте́па. и҆ възопѝ дв҃дъ за ни́мъ гл҃ѧ. г҃и цр҃ю. и҆ ѻ҆зрѣсѧ саѹ́лъ въ слд̑ѣ е҆го. и҆ прекло́нъсѧ дв҃дъ до землѧ̀ лице́мъ и҆ поклони́сѧ е҆мꙋ·

9

И҆ рече дв҃дъ къ саѹ́лꙋ почт̂о послꙋша́еши словесѐ людїи гл҃ющъ. ꙗ҆́ко с̂е дв҃дъ и҆́щетъ дш҃а твое́ѧ·

10

Се б̂о днс̑҇ь ви́дѣста ѻ҆́чи твоѝ. ꙗ҆́ко преда́лъ т̂ѧ бѧ́ше г҃ь в рꙋ́цѣ моѝ въ вертепѣ. и҆ не помы́слихъ ѹ҆би́ти тебѐ, н̂о поми́ловахъ т̂ѧ. и҆ рѣхъ не прострꙋ̀ рꙋкѝ мое҆ѧ на г҃а мое҆го, ꙗ҆ко помаза́нникъ е҆сть гн҃ь се́й·

11

И҆ ви́ждъ въскри́лїе ѻ҆дѣѧ́ла свое҆го въ рꙋцѣ̀ мое́и. а҆́зъ ѿѧ́хъ въскры́лїе ѻ҆дѣѧ́ла твое҆го, и҆ не ѹби́хъ тебѐ. и҆ разꙋмѣ́и и҆ ви́ждъ днс̑҇е ꙗ҆́ко нѣсть ѕло́би въ рꙋцѣ̀ мое́и, н̂и бесче́стїѧ ни нена́висти, н̂иже съгрѣши́хъ к тебѣ̀. а҆ т̂ы и҆́щеши дш҃а мое҆ѧ и҆зѧ́тї ю·

12

да сꙋдит̑ г҃ь межди мно́ю и҆ тобо́ю. и҆ да ѻ҆пра́вдитъ м̂ѧ г҃ь ѿ тебѐ, рꙋка̀ б̂о моѧ нѣсть на́ тѧ·

13

Ꙗ҆́коже гл҃етъ при́тча пр́ьваѧ, ѿ безако́н꙽никъ, и҆зы́детъ престꙋпле́нїе, н̂о рꙋка̀ моѧ нѣсть на́ тѧ·

14

И҆ нн҃ѣ цр҃ю і҆и҆л҃евъ въ слѣдъ кого̀ т̂ы ходи́ши, и҆л̂и по ко́мъ го́ниши въслѣдъ л̂и ѱа̀ ѹ҆мръша, и҆л̂и въ слд̑ѣ блохы̀ е҆ді́ноѧ·

15

да бꙋ́дет꙽ г҃ь сꙋдїѧ и҆ ѿвѣтни́к꙽, ме́ждꙋ мно́ю и҆ тобо́ю ви́ждъ г҃и и҆ сꙋдѝ сꙋ́домъ м̂и, и҆ ѿсꙋди м̂ѧ ѿ рꙋкѝ твое҆ѧ·

16

И҆ бы́сть е҆гда̀ сконча̀ дв҃дъ гл҃ы сїѧ, гл҃ѧ къ саѹ́лꙋ. и҆ рече саѹ́лъ тво́и л̂и е҆сть с̂е гла́съ ча́до дв҃де, и҆ въздви́же саѹ́л꙽ глас̑҇ свои, и҆ въспла́ка·

17

И҆ рече дв҃дꙋ пра́веденъ е҆си т̂ы надо мно́ю. ꙗ҆́ко т̂ы възда̀ м̂и бл҃га́ѧ, а҆́з же тебѣ въз꙽да́хъ ѕла́ѧ·

18

И҆ т̂ы възвѣсти м̂и днс̑҇ь, и҆же сътвори м̂и бл҃гаѧ. е҆гда̀ б̂о предалъ м̂ѧ е҆сть г҃ь б҃ъ і҆и҆л҃евъ въ рꙋкꙋ твое҆ю, и҆ нѣси менѐ ѹ҆би́лъ·

19

Ꙗ҆́коже а҆́ще кт̂о ѻ҆брѧ́щетъ врага̀ свое҆го въ печа́ли и҆зведет̑ и҆̀ въ пꙋть бл҃гъ. и҆ г҃ь въздасть е҆мꙋ бл҃гыхъ ꙗ҆́коже т̂ы сътворил̑҇ е҆си днс̑҇ь·

20

И҆ нн҃ѣ с̂е а҆зъ ви́дѣ ꙗ҆́ко цр҃юѧ црс̑҇твова́ти и҆́маши. и҆ ста́ти и҆́мать въ рꙋцѣ̀ твоѝ црс̑҇тво і҆и҆л҃ево. и҆ нн҃ѣ покленимисѧ гм҃ъ, ꙗ҆́ко не и҆скорени́ши сѣмени мое҆го по мнѣ̀. и҆ не погꙋби́ши и҆́мени мое҆го ѿ до́мꙋ ѿц҃а мое҆го·

21

И҆ клѧ́тсѧ дв҃дъ саѹ́лови. і҆ и́де саѹ́лъ на мѣсто своѐ. дв҃дъ же и҆ мꙋжи е҆го възыдо́ша въ срѣдꙋ тѣсноты̀·