Ostroh Bible❧Перша книга Самуїлова (Перша книга царів), розділ 27

1

И рече дв҃дъ въ срд̑цы свое҆мъ гл҃ѧ, нн҃ѣ приложит̑мисѧ бы́ти въ дн҃ь е҆ді́нъ в рꙋкꙋ саѹ́лю. и҆ не бꙋдетъ м̂и бл҃го. а҆ще не и҆дꙋ̀ в зе́млю и҆ноплеме́нничꙋ, и҆ т̂ꙋ и҆збꙋдꙋ е҆го, а҆ще по́слетъ саѹ́лъ и҆ска́ти менѐ въ всѧ̀ предѣлы і҆и҆л҃ѧ, и҆ сп҃сꙋсѧ и҆з꙽ рꙋкѝ е҆го·

2

И҆ въста́въ дв҃дъ, и҆ х҃ мꙋжъ и҆же с ни́мъ, і҆ и́де къ а҆кхꙋ́сꙋ сн҃ꙋ а҆ма́ховꙋ цр҃ю ге́ѳъскꙋ·

3

И҆ пребы́сть ѹ҆ него самъ и҆ мꙋжи е҆го с ним̑ и҆ до́мъ е҆го, и҆ ѻ́бѣ женѣ е҆го. а҆хиное́ми і҆и҆л҃ьтѧны́ни. и҆ а҆вигѣѧ́ и҆же бѣ̀ жена̀ нава́на карми́льскаго·

4

И҆ възвѣсти́ша саѹ́лꙋ ꙗ҆́ко ѿбѣже дв҃дъ в ге́ѳы. и҆ не приложѝ ктомꙋ̀ саѹ́лъ и҆ска́ти дв҃да·

5

И҆ рече дв҃дъ къ а҆кхꙋ́сꙋ а҆ще ѻ҆брѣтѐ ра́бъ твой ра́дость пред̑ ѻ҆чи́ма твои́ма. да дасѝ м̂и мѣсто е҆ді́но ѻ҆гра́дникъ на селѣ̀, и҆ сѧ́дꙋ т̂ꙋ. а҆ въскꙋ́ю седи́тъ ра́бъ твой въ гра́дѣ, црс̑҇твꙋ́ющи с тобо́ю·

6

И҆ да̀ е҆мꙋ въ дн҃ь то́и сикела́гъ, сего ра́ди бы́сть црс̑҇твꙋ і҆ѹ́де́искꙋ сикела́гъ, до дне́шнѧго дн҃е.

7

И҆ бы́сть число̀ дне́и. в нѧ́же сѣ́де дв҃дъ на селѣ̀ и҆ноплемен̑҇ничи четы́ри мс̑҇цы·

8

И҆ въсхожда́ше дв҃дъ и҆ мꙋжи е҆го, напада́хꙋ на вс̂ѧ гесѣры, и҆ на а҆м꙽мали́киты. и҆ с̂е сѝ землѧ̀ прилежа́ше ѿ ламосꙋ́ра. и҆ до землѧ̀ е҆гѷпетъски·

9

И побѣжд̑а́ша зе́млю т̂ꙋ. и҆ не живѧше мꙋжеска по́лꙋ и же́ньска. пои҆ма́хꙋ ста́да и҆ бꙋ́иволицы, ѻ҆слѧ́та вельблю́ды и҆ ри́зы. и҆ възвраща́ющасѧ прихожда́хꙋ, къ а҆кхꙋ́сꙋ·

10

И҆ рече а҆кхꙋ́съ къ дв҃дꙋ ка́мо вое҆ва́стѣ нн҃ѣ·

11

И҆ рече дв҃дъ къ а҆кхꙋ́сꙋ. на ю҆́гъ і҆ѹ҆деѧ и҆ на ю҆́гъ и҆е҆зме́ги. и҆ на ю҆́гъ кенезїѧ·

12

Ни мꙋжеска по́лꙋ и҆ же́ньска не живи́хомъ ꙗ҆́ко не въвестѝ в ге́ѳы гл҃ѧ, е҆гда ка́ко възвестѧ́тъ в ге́ѳы на́ ны гл҃юще. ꙗ҆́ко с̂е дв҃дъ тво́ритъ. себѣ ѻ҆правда́нїе е҆го, вс̂ѧ дн҃и. в нѧ́же сѣде дв҃дъ на селѣ̀ и҆ноплеме́нничи·

13

И҆ ѹ҆вѣри́сѧ дв҃дъ а҆кхꙋ́сови ѕѣло гл҃ѧ. ѹ҆крѣпи́сѧ крѣпѧ́сѧ в лю́дех꙽ свои҆хъ і҆и҆л҃и. и҆ бꙋдетъ м̂и ра́бъ въ вѣки·