Ostroh Bible❧Перша книга Самуїлова (Перша книга царів), розділ 3

1

Ѡтро́чище же самои҆лъ б̂ѣ слꙋжа гв҃и прд̑е и҆лі́емъ і҆е҆ре́ем꙽. и҆ гл҃ъ гн҃ь б̂ѣ че́стенъ, в ты̀ дн҃и, не бѣ видѣ́нїе посыла́емо·

2

И҆ бы́сть въ дн҃и т̂ы і҆ и҆лі́и сѣдѧ́ше на мѣ́стѣ свое҆мъ, и҆ ѻ҆́чи е҆го нача́ста тѧ́жцѣ бы́ти. и҆ не можаа́ше зрѣти·

3

И҆ прежде да́же ѹ҆гасѐ свѣти́лникъ бж҃їи. самои҆лъ спа́ше въ цр҃кви гн҃и, и҆дѣ́же кѣѻ́тъ бж҃їи·

4

И҆ възва̀ г҃ь гл҃ѧ, само́и҆ле, само́и҆ле, и҆ рече с̂е а҆зъ·

5

И҆ течѐ къ и҆лі́ю, и҆ реч̑҇ с̂е а҆зъ ꙗ҆́ко звал̑҇ мѧ е҆си. и҆ рече и҆лі́и не възвах̑ тебѐ, възврати́сѧ и҆ спѝ и҆ възврати́сѧ и҆ спа̀·

6

И҆ приложѝ г҃ь е҆щѐ призва́ти само́и҆ла, и҆ възва̀, само́и҆лъ, само́и҆лъ, и҆ въста̀ само́и҆лъ, і҆ и́де къ и҆лі́и втори́цею и҆ рече, с̂е а҆зъ ꙗ҆́ко възва́лъ мѧ е҆си. и҆ реч̑҇, не зва́хъ тебѐ ча́до. възврати́сѧ и҆ спѝ·

7

И҆ самои҆лъ же в т̂о вре́мѧ е҆щѐ не зна̀ б҃а. пре́жд̑е ѿкрове́нїа е҆мꙋ гла́са гн҃ѧ·

8

И҆ приложѝ г҃ь призва́ти само́и҆ла трети́цею. и҆ въста́въ и҆де къ и҆лі́и, и҆ рече, с̂е а҆зъ ꙗ҆́ко зва́лъ мѧ е҆си. и҆ разꙋмѣ и҆лі́и ꙗ҆́ко г҃ь призыва́етъ ѻ҆тро́чища·

9

И҆ реч̑҇ възвра́щсѧ и҆ спѝ ча́до, и҆ бꙋ́детъ а҆ще възове́тъ т̂ѧ зовы́и, и҆ рече́ши. гл҃и г҃и, ꙗ҆́ко слы́шитъ ра́бъ тво́и. і҆ и́де само́и҆лъ и҆ спа̀ на мѣ́стѣ свое҆мъ·

10

И҆ прїиде г҃ь и҆ ста̀, и҆ възва̀ е҆го ꙗ҆́коже пр́ьвое, и҆ второ́е, и҆ реч̑҇, само́и҆лъ, само́и҆лъ, гл҃и г҃и, ꙗ҆́ко слы́шитъ ра́бъ тво́и·

11

И҆ реч̑҇ г҃ь къ само́и҆лꙋ. с̂е а҆зъ творю̀ гл҃ы моѧ̀ въ і҆и҆л҃и, ꙗ҆́коже всѣмъ слы́шащим̑ сїѧ. пошꙋмѣта ѻ҆́бѣ ѹ҆́ши е҆го·

12

И҆ въ дн҃ь то́й въздви́гнꙋ на и҆лі́и, вс̂е е҆ли́ко гл҃ахъ до́мꙋ е҆го. начнꙋ и҆ сконча́ю·

13

И҆ възвѣстих̑ е҆мꙋ, ꙗ҆́ко ѿмщꙋ а҆зъ на до́мѣ е҆го до́ вѣка, в непра́вдахъ сн҃овъ е҆го ꙗ҆́же вѣ́дѣ. ꙗ҆́ко ѕл̂ослови́ста б҃а сн҃ове е҆го, и҆ не наказа̀ е҆ю̀·

14

Сего ради клѧх̑сѧ до́мꙋ и҆лі́и҆нꙋ, ꙗ҆́ко не ѻ҆́чи́ститсѧ непра́вда до́мꙋ и҆лі́и҆на. в кади́лахъ и҆ жр́ътвахъ е҆го до́ вѣка·

15

И҆ спа̀ само́и҆лъ до ѹ҆́тра, и҆ ѹ҆тренева заѹ҆́тра и҆ ѿвр́ьзе две́ри хра́ма гн҃ѧ. самои҆л꙽ же боѧ́сѧ повѣ́дати видѣ́нїѧ и҆лі́и·

16

И҆ възва̀ и҆лі́и само́и҆ла и҆ реч̑҇. само́и҆ле ча́до, и҆ реч̑҇ с̂е а҆зъ·

17

И҆ рече и҆лі́и. чт̂о гл҃ъ гл҃аныи к тебѣ̀. не съкры́и ѹ҆бо ѿ менѐ гл҃а, ѿ всѣхъ слове́съ гл҃аных̑ к тебѣ̀. молю̀ т̂ѧ не ѹ҆та́и предо мно́ю. сїѧ сътвори́тъ тебѣ̀ г҃ь, и҆ сїа приложи́тъ а҆ще ѹ҆та́иши ѿ менѐ ѿ всх̑ѣ гл҃ъ, гл҃анных̑ к тебѣ̀·

18

І҆ и҆сповѣда само́и҆лъ и҆ не ѹ҆таѝ ѿ него ни е҆ді́наго гл҃а. и҆ реч̑҇ и҆лі́и. г҃ь самъ е҆сть ꙗ҆́ко го́дѣ бы́сть е҆мꙋ та́ко да сътвори́тъ·

19

И҆ възвелича́шесѧ само́и҆лъ. и҆ г҃ь б̂ѣ с ни́мъ и҆ не падѐ ѿ всѣхъ слове́съ е҆го на землѝ ни е҆ді́нъ гл҃ъ·

20

И҆ разꙋмѣша вс̂и і҆и҆л҃ьти ѿ да́на, даже и҆ до вирса́вїа, ꙗ҆́ко вѣ́ренъ само́и҆лъ г҃ꙋ въ прро̑҇цѣх꙽·

21

И҆ приложѝ г҃ь възвѣсти́тисѧ в силом̑, ꙗ҆ви́ бо сѧ г҃ь самои҆лꙋ, и҆ вѣ́ренъ бы́сть въ прро̑҇цѣхъ само́и҆лъ къ г҃ꙋ въ все́мъ і҆и҆л҃и, ѿ конца̀ до ко́нца землѝ, і҆ и҆лі́и състарѣ́сѧ ѕѣло, и҆ сн҃а е҆го ходѧ́ще хожа́ста лꙋка́вїи пꙋтїе и҆хъ пред̑ гм҃ъ·