Ostroh Bible❧Перша книга Самуїлова (Перша книга царів), розділ 30

1

И бы́сть ѿшед̑шꙋ дв҃дꙋ и҆ мꙋжемъ е҆го ѿ сикела́га. и҆ въ дн҃ь тре́тїи. и҆ ам̑мали́къ на́иде на ѹ́жнꙋю странꙋ̀ и҆ на сикела́гъ. и҆ побра́ша мꙋже́и сикела́гъскихъ. и҆ гра́дъ зажго́ша ѻ҆гнемъ·

2

Же́ны же и҆ вс̂ѧ сꙋщаѧ на мѣ́стѣ то́мъ. ѿ ма́ла и҆ до вели́ка побра́ша и҆ не ѹ҆би́ша ѿ них꙽ ни мꙋжа ни жены̀. н̂о плени́ша и҆дѧ́хꙋ пꙋте́мъ свои҆мъ·

3

И҆ прїиде дв҃дъ и҆ мꙋжи е҆го въ́ градъ, и҆ съж꙽же́нъ бѧ́ше ѻ҆гне́мъ град̑. и҆ же́ныж̑ и҆хъ и҆ сн҃ове и҆хъ и҆ дще́ри и҆хъ бѧ́хꙋ полоне́ни·

4

И въздви́же дв҃дъ и҆ мꙋжи е҆го гла́съ свои. и҆ пла́кашасѧ дон̑҇деже нача́ша не мощѝ пла́катисѧ·

5

И же́ны е҆го ѻ҆́бѣ бѣша плѣне́ни. а҆хинамїи, і҆и҆л҃ьтѧны́ни. і҆ а҆вигѣѧ́ бы́вшїѧ жена̀, нава́на карми́льскаго·

6

И҆ ѻ҆скорбѣ дв҃дъ ѕѣ́ло, ꙗ҆́ко съвѣща́шасѧ лю́дїе ка́менїем̑ поби́ти е҆го, ꙗ҆ко ѻ҆ѕло́блена бѧ́ше дш҃а всх̑ѣ людїи, комꙋж́до сн҃овъ своих̑ ра́ди и҆ дще́рїи. н̂о ѹ҆крѣпи́сѧ дв҃дъ ѻ҆ г҃ѣ бѕ҃ѣ е҆го·

7

И҆ рече дв҃дъ къ а҆виѳа́рꙋ і҆е҆ре́ю сн҃ꙋ а҆вимеле́ховꙋ. принесѝ е҆фꙋ́дъ и҆ принесѐ а҆виѳа́ръ е҆фꙋ́дъ къ дв҃дꙋ·

8

И҆ въпросѝ дв҃дъ г҃а гл҃ѧ. а҆ще женꙋ̀ въ слѣдъ во́и си́хъ а҆ще пости́гнꙋ ѧ҆̀ и҆ побѣжꙋ л̂и ѧ҆̀. и҆ рече г҃ь женѝ, ꙗ҆́ко пости́гнꙋѧ пости́гнеши. і҆ и҆збавѧ́и и҆зба́вити и҆́маши своѧ лю́ди·

9

І҆ и́де дв҃дъ са́мъ и҆ х҃, мꙋжъ с ни́мъ. и҆ прїидо́ша даже до пото́ка въсо́рска. а҆ прочїи ѻ҆ста́ша, и҆ гна́въ съ д҃ ми сты̀ мꙋжъ, с҃ б̂о и҆хъ ѻ҆ста́ша, и҆ сѣдѧ́хꙋ ѻ҆бо́нъ пол̑҇ пото́ка въсо́р꙽ска·

10

И҆ ѻ҆брѣто́ша т̂ꙋ мꙋж́а е҆гѷптѧнина на селѣ̀. и҆ поѧ́ша и҆̀. и҆ приведо́ша и҆̀ къ дв҃дꙋ. и҆ да́ша е҆мꙋ хлѣбъ ꙗ҆́сти, и҆ напои́ша и҆̀ воды̀·

11

И҆ да́ша е҆мꙋ ѹ҆крꙋхъ сы́ра, и҆ ꙗ҆́сть. и҆ ста̀ дꙋхъ е҆го в немъ, ꙗ҆́ко бѧ́ше не ꙗ҆лъ хлѣба, ни пи́лъ воды̀, г҃. дн҃и, и҆ г҃ но́щи·

12

И҆ рече дв҃дъ ѿкꙋдꙋ е҆си, и҆ чїи е҆си т̂ы. и҆ рече е҆мꙋ ѻ́трокъ. е҆гѷптѧнинъ е҆смь а҆зъ и҆ ра́бъ мꙋжа а҆м꙽мали́кова, и҆ ѻ҆ста́ви мѧ господи́нъ мои, ꙗ҆́ко разболѣ́хсѧ дне́сь ѹ҆же тре́тїи дн҃ь. и҆ м̂ы с̂е входи́хомъ на ю҆́гъ до хеле́фи и҆ на і҆ѹ҆де́искїѧ страны̀. и҆ на гелвꙋ́е и҆ сикеи́лꙋ, заж꙽го́хомъ ѻ҆гне́мъ·

13

И҆ рече е҆мꙋ дв҃дъ. вести л̂и м̂ѧ и҆́маши до во́и тх̑ѣ, ѻ҆́н же реч̑҇ к немꙋ кленѝ м̂и сѧ бм҃ъ ꙗ҆́ко не ѹ҆бі́еши м̂ѧ, и҆ не предасѝ менѐ в рꙋцѣ господи́нꙋ мое҆мꙋ и҆ доведꙋ тѧ на во́ѧ сѝ·

14

И҆ клѧ́тсѧ е҆мꙋ дв҃дъ. и҆ ведѐ и҆̀ та́мо. и҆ с̂е тїи бѧ́хꙋ розошли́сѧ по всеи землѝ. и҆ бѧхꙋ ꙗ҆дꙋще и҆ пїю́ще и҆ празднꙋ́юще ѻ҆ все́и коры́сти то́и вели́цеи. ꙗ҆́же бѧ́хꙋ взѧлѝ на зем̑ли и҆ноплеме́нничи, и҆ на землѝ і҆ѹ́динѣ·

15

И҆ прїиде на́ нѧ дв҃дъ, и҆ би ѧ҆̀ ѿ ѹ́тра и҆ до́ вечера. и҆ наѹ́трїѧ и҆збѝ ѧ҆̀. и҆ ни е҆ді́нъ же ѻ҆ста̀ ѿ ни́хъ мꙋжъ. ра́звѣ у҃ ѻ҆́трокъ всѣдше на велблю́ды ѹ҆бѣжа́ша·

16

И҆ взѧ́тъ дв҃дъ вс̂ѧ е҆ли́ко бѣша взѧ́ли а҆м꙽мали́киты. и҆ ѻ́бѣ женѣ̀ своѝ поꙗ҆́тъ·

17

И҆ не ѻ҆ста̀ т̂ꙋ ничтож̑ ѿ ма́ла и҆ до вели́ка, и҆ ѿ коры́сти до сн҃овъ и҆ дще́рїи и҆ вс̂ѧ и҆же бѣша взѧ́ли, възвратѝ ѧ҆̀ дв҃дъ въспѧтъ вс̂ѧ·

18

И҆ поѧ̀ дв҃дъ вс̂ѧ ста́да и҆ па́ствины, и҆ женѧ́ше ѧ҆̀ пред̑ плѣномъ и҆ плѣ́нъ нарица́шесѧ плѣ́нъ двд̑въ·

19

И҆ прїиде дв҃дъ къ двѣма сто́ма мж̑ꙋ ѻ҆ста́вшихъ, и҆тѝ въ слѣ́дъ дв҃двъ и҆же повелѣша ѻ҆ста́ти на пото́цѣ въсо́ръстѣ. і҆ и҆зыидо́ша на срѣте́нїе дв҃дꙋ, и҆ на срѣте́нїе людем̑, и҆же с ни́мъ. и҆ прїиде дв҃дъ до людїи. и҆ въпроси́ша е҆го ѻ҆ ми́рныхъ·

20

И҆ ѿвѣща́ша вс̂и мꙋжи гнѣвливыѝ и҆ лꙋка́вныѝ, ѿ мꙋжебо́рцеи сходѧ́щихъ съ дв҃домъ. и҆ рѣша ꙗ҆́ко не гони́ша с на́ми. не да́мы и҆мъ ѿ плѣ́на, и҆же е҆смы̀ поѧ́ли. н̂о то́кмо ко́ждо их̑ же́ны своѧ̀ и҆ ча́да своѧ да во́змꙋтъ и҆ възвратѧ́тсѧ·

21

И҆ рече дв҃дъ не твори́те бра́тїѧ моѧ та́ко. преда́нїѧ ради гн҃ѧ и҆ снабдѣ́нїѧ и҆мже съхранѝ насъ. и҆ преда́сть г҃ь во́ѧ пришед̑шаѧ на́ ны в рꙋ́ки на́ша·

22

И҆ кт̂о послꙋшаетъ ва́шего словесѝ. ꙗ҆́ко не на́ши л̂и сꙋть. поне́же ꙗ҆́ко по ча́сти съшед̑шаго на́ брань. та́ко е҆сть ча́сть сѣдѧ́щаго ѹ҆ рѣшины, с тѣмѝ то́чно да раздѣли́тсѧ·

23

И҆ бы́сть ѿ дн҃е того̀ и҆ вы́ше, и҆ бы́сть въ повеле́нїе и҆ на ѻ҆правда́нїе, до дн҃е сего̀ і҆и҆л҃ю.

24

И҆ прїиде дв҃дъ в сикела́гъ и҆ посла̀ къ ста́рцемъ і҆ѹ́диномъ ѿ плѣ́на, і҆ и҆скрени́мъ е҆го гл҃ѧ с̂е вам̑ блс̑҇венїе. ѿ плѣ́нникъ и҆же бѣша плѣни́ли вра́ѕи гн҃и·

25

И҆же ѿ веѳъсꙋра і҆ и҆же ѿ рано́ма на ю́гꙋ. и҆ ѿ е҆и҆ѳиѳе́ра. і҆ и҆же ѿ а҆рои́ра. і҆ и҆же ѿ а҆мадїѧ і҆ и҆же ѿ саѳїѧ·

26

І҆ и҆же ѿ е҆сѳїѧ і҆ и҆же ѿ геѳа і҆ и҆же ѿ кина́на·

27

І҆ и҆же ѿ сафе́ха. і҆ и҆же ѿ ѳимаѳїѧ. і҆ и҆же ѿ карми́ла.

28

І҆ и҆же ѿ гра́дъ и҆рее҆меи҆ль. і҆ и҆же ѿ гра́дъ кинезїи́нъ. і҆ и҆же ѿ римꙋѳа і҆ и҆же ѿ вирсавїѧ. і҆ и҆же ѿ номъвѣѧ·

29

І҆ и҆же ѿ хевро́на. и҆ въ вс̂ѧ мѣ́ста. а҆́може ходи́лъ дв҃дъ т̂ꙋ и҆ мꙋжи е҆го с ни́мъ·