Ostroh BibleПерша книга Самуїлова (Перша книга царів), розділ 31
Шрифт:
Запис:
1
А иноплеме́нницы вое҆ва́хꙋ тогда̀ на і҆и҆л҃ѧ и҆ бѣжа́ша мꙋжи і҆и҆л҃еви. ѿ лица̀ и҆ноплеме́нникъ. и҆ па́дахꙋ ꙗ҆́звени въ горѣ̀ гелвꙋнїи·
2
И҆ снидо́шасѧ и҆ноплеме́нницы съ саѹ́лом̑ и҆ съ сн҃ьми е҆го, и҆ ѹ҆би́ша и҆ноплемен̑҇ницы и҆ѻ҆а҆наѳа́на. и҆ минода́ва, и҆ мел̑҇хесꙋѧ, сн҃ы саѹ́лѧ·
3
И҆ ѻ҆тѧгчи́сѧ бра́нь на саѹ́ла. и҆ прїидо́ша на́ нѧ бескопе́йницы мꙋжи стрѣлцы̀, и҆ ꙗ҆зви́ша саѹ́ла в дебе́лое мѣ́сто·
4
И҆ рече саѹл̑҇ к носѧ́щемꙋ ѻ҆рꙋжїе из̑сꙋни ѻ҆рꙋжїе свое прободѝ м̂ѧ им̑ да не пришед̑ше неѻ҆брѣзанїи сїи и҆збодт̑ꙋ м̂ѧ и҆ порꙋга́ютсѧ мно́ю·
5
и҆ не хотѧ́ше того сътвори́ти носѧ́и ѿрꙋжїе е҆го ꙗ҆ко боꙗ҆́шесѧ ѕѣ́ло, и҆ взѧ́тъ саѹ́лъ ѻ҆рꙋжїе свое, и҆ нападе́сѧ са́м꙽ на нѐ·
6
И҆ ви́дѣ носѧ́и ѻ҆рꙋжїе е҆го, ꙗ҆ко ѹ́мре саѹ́лъ, и҆ падѐ и҆ то́и сам̑ на ѻ҆рꙋжїе е҆го, и҆ ѹ́мре с ни́мъ·
7
И҆ ѹ́мре саѹл̑҇, и҆ трїе сн҃ове е҆го, и҆ носѧ́и ѻ҆рꙋжїе е҆го, и҆ вс̂и мꙋжи е҆го въ дн҃ь то́и с нимъ·
8
И҆ ви́дѣвше мꙋжїе і҆и҆л҃ьстїи, и҆же ѻ҆бо́нъ по́лъ и҆ ѹ҆до́лїѧ, і҆ и҆же ѻ҆бо́нъ по́лъ і҆ѻ҆рда́на, ꙗ҆коже бѣжа́ша мꙋжи і҆и҆л҃ьстїи и҆ ꙗ҆́ко ѹ́мре саѹ́лъ и҆ сн҃ове е҆го, и҆ ѻ҆ста́вльше гра́ды своѧ и҆ бѣжа́ша, и҆ прїидо́ша и҆ноплеме́нницы и҆ пребы́ша в ни́хъ·
9
И҆ бы́сть наѹ́трїе, и҆ прїидо́ша и҆ноплеме́нницы съвлачи́ти мрътве́цъ, и҆ ѻ҆брѣто́ша саѹ́ла мрътва сꙋща и҆ тр̂и сн҃ы е҆го, па́дша въ горѣ̀, е҆йже и҆́мѧ гелвꙋнїи·
10
И҆ снѧ́ша ѻ҆рꙋжїе е҆го и҆ ѿсѣкше главꙋ̀ е҆го, и҆ посла́ша въ зем̑лю и҆ноплеме́нникъ, ѻ҆́крс̑҇тъ възвѣща́юще и҆́доломъ их̑, и҆ лю́демъ их̑·
11
И положи́ша ѻ҆рꙋжїе и҆хъ ѹ҆ васта́ръта, а҆ тѣ́ло и҆хъ въткнꙋша на стѣнѣ веѳъса́мли·
12
И҆ слы́шаша живꙋщїи въ а҆ви́сѣ гала́тъстѣмъ, ꙗ҆́же сътвори́ша саѹ́лови и҆ноплеме́нницы·
13
И҆ въста́вше вс̂е мно́жество си́лныхъ мꙋжъ, і҆ и҆до́ша вс̂ю но́щь, и҆ взѧ́ша тѣло саѹ҆́лово, и҆ѻ҆ана́ѳаново сн҃а е҆го, съ стѣны веѳ̑҇са́мъски, и҆ принесо́ша ѧ҆̀ въ а҆вис̑҇, и҆ съжъго́ша ѧ҆̀ т̂ꙋ·
14
И҆ взѧ́ша ко́сти и҆хъ, и҆ погребо́ша ѧ҆̀ под̑ кома́рою, ꙗ҆́же въ а҆ви́сѣ, и҆ пости́шасѧ сед̑мь дн҃їи·
15
Конецъ а҃ кни́гъ црс̑҇твъ. и҆́мать в себѣ глв̑҇а, л҃а·
Джерела
