Ostroh BibleДруга книга хронік, розділ 11
Шрифт:
Запис:
1
Прїиде же ровоа́мъ въ і҆ерс̑҇лим̑. и҆ съзва̀ до́мъ ве́сь і҆ѹ́динъ, и҆ венїами́нь. ҂р҃, ҂п҃. и҆збран̑҇ныхъ, и҆ бранѧщихъ да воюетъ проти́вꙋ і҆и҆л҃ѧ, и҆ е҆ровоа́ма да ѻ҆братит̑ к꙽ себѣ црс̑҇тво своѐ·
2
Бы́сть же сло́во гн҃е къ семе́ю чл҃кꙋ бж҃їю гл҃ющи. гл҃и къ ровоа́мꙋ сн҃ꙋ соло́моню цр҃ю і҆ѹ́динꙋ, и҆ къ в꙽семꙋ̀ і҆и҆л҃ю. и҆же е҆сть въ і҆ѹ́дѣ, и҆ венїами́нѣ. сїа рече г҃ь. не въсходи́те ниже ѻ҆полча́итесѧ проти́вꙋ бра́тїа ва́шеѧ. ѻ҆брати́тесѧ е҆ді́нъ ко́ждо в до́мъ свой. занѐ мое҆ю т̂о съдѣла́но е҆сть во́лею. и҆же е҆гда слы́шаше сло́во гн҃е, възврати́шасѧ. не поидо́ша проти́вꙋ і҆е҆ровоа́мꙋ. ѻ҆бита́ же ровоа́мъ въ і҆ерс̑҇лимѣ. и҆ създа̀ гра́ды стѣна́ты въ і҆ѹ҆де́и. състро́и же виѳлее́мъ и҆ е҆ѳа́мъ, и҆ ѳекꙋ́е, и҆ веѳ꙽сꙋр́ъ, и҆ съкхо́хъ, и҆ ѻ҆дола́нъ, и҆ ге́ѳъ, и҆ марсаръ, и҆ зи́фъ. н̂о и҆ а҆дꙋра́мъ, и҆ лахи́съ, и҆ а҆зи́кꙋ, и҆ са́лю. и҆ е҆ло́нъ, и҆ хевро́нъ, и҆же е҆сть въ і҆ѹ҆де́и. и҆ въ венїами́нѣ гра́ды ѹ҆правленѣ́иши·
3
Є҆гда же затворѝ и҆хъ стѣна́ми. положѝ в ни́хъ нача́лники. и҆ пи́щамъ ѹ҆ста́вы. и҆ ѻ҆ле́и и҆ вино̀. по градꙋ ѻ҆рꙋж́ницы, и҆ щи́том̑ и҆ ко́пїемъ ѹ҆крѣпи́ же и҆хъ вельмѝ ѕѣ́ло. и҆ црс̑҇твова на і҆ѹ́дѣ и҆ венїами́нѣ·
4
Сщ҃енницы же и҆ левѷты. и҆же бѧ́хꙋ въ все́мъ і҆и҆л҃и. прїидо́ша к немꙋ ѿ всѣхъ предѣ́лъ и҆хъ. ѻ҆ставлѧ́ющи под̑гра́дїѧ. и҆ ѻ҆дръжа́нїѧ своѧ̀·
5
И҆ поидо́ша къ і҆ѹ́дѣ въ і҆ерс̑҇лим̑ того ра́ди е҆же и҆згна́ и҆хъ, і҆е҆ровоам̑, и҆ сн҃ы и҆хъ, е҆же не сщ҃енъствова́ти гв҃и·
6
И҆ поста́ви себѣ жерцы̀, на высо́кихъ, идоломъ. и҆ сꙋе́тным̑, и҆ те́л꙽цемъ, и҆́хже сътворѝ і҆е҆ровоам̑. и҆ съвратѝ ѿ всѣ́хъ колѣ́нъ і҆и҆л҃евых̑ къ и҆́доломъ и҆же въда́ста срд̑це свое да възы́щꙋтъ г҃а б҃а і҆и҆л҃ева, и҆ прихожда́хꙋ пожре́ти жр́ътвъ свои҆хъ. пред̑ гм҃ъ бм҃ъ ѿц҃ъ свои҆хъ·
7
И҆ ѹ҆силѧ́хꙋ црс̑҇тво і҆ѹ́дино. и ѹ҆крѣписѧ ровоа́мъ сн҃ъ соло́монь за тр̂и лѣта. ходи́ша б̂о въ пꙋтѝ двд̑а, и҆ соло́монѧ ѿц҃а е҆го. лѣта то́лько тр̂и. приве́де же ровоа́мъ женꙋ̀ моѻ҆ла́ѳъ. дще́рь и҆е҆римꙋѳ́ъ, сн҃овъ дв҃довых̑, а҆вигеи́ль же, дще́рь е҆лїа́влю сн҃овъ и҆е҆сай. ꙗ҆́же породѝ е҆мꙋ сн҃ы. е҆хꙋ́са, и҆ сам꙽морїѧ, и҆ заа́мъ. по сихъ же поѧ́тъ себѣ̀ маа́хꙋ дще́рь а҆весало́млю, и҆же родѝ е҆мꙋ а҆вїѧ, и҆ е҆ѳ꙽ѳїа, и҆ зи́зꙋ, и҆ салимо́ѳа·
8
И҆ възлюби́ же ровоа́мъ маа́хꙋ, дще́рь а҆весало́млю над̑ всѣ́ми жена́ми свои҆ми, и҆ под̑ло́ж꙽ницъ. ꙗ҆́ко же́нъ, и҃і, и҆мѣ̀, и҆ под̑ло́жницъ, ѯ҃. и҆ родѝ, к҃и, сн҃овъ. и҆ ѯ҃, дще́рїи·
9
И҆ поста́ви въ нача́лника ровоа́мъ. а҆вїѧ сн҃а маа́ха, и҆ кнѧ́ѕемъ над̑ всею̀ бра́тїею свое́ю. того б̂о и҆ цр҃емъ сътвори́ти помышлѧ́ше, и҆же ра́слъ над̑ всю̀ бра́тїю е҆го, и҆ над̑ всѣми сн҃ы і҆ѹ́дины, и҆ венїами́новыми, и҆ въ всѣ́хъ гра́дѣхъ і҆ѹ́ды, и҆ венїами́на. и҆ въ всѣхъ гра́дѣхъ стѣна́тых̑. и҆ въ зда́сть же и҆мъ пи́ща мно́ги. и҆ мно́гихъ просѝ же́нъ·
Джерела
