Ostroh Bible❧Друга книга хронік, розділ 10

1

И прїиде ровоа́мъ въ сихе́мъ. т̂ꙋ б̂о ве́сь і҆и҆л҃ь снїидесѧ да поста́вѧтъ е҆го цр҃емъ, и҆же е҆гда̀ слы́ша і҆е҆ровоа́мъ сн҃ъ нава́товъ, и҆же б̂ѣ въ е҆гѷптѣ. пробѣжа́лъ б̂о бѣ̀ та́мо пред̑ цр҃емъ соло́мономъ·

2

И҆ ѻ҆бита̀ і҆е҆ровоа́мъ въ е҆гѷптѣ. и҆ ѻ҆брати́сѧ ѿ е҆гѷпта. и҆ посла́вше призваша е҆го, и҆ прїиде съ всѣмъ і҆и҆л҃емъ·

3

И҆ гл҃али сꙋть къ цр҃ю, ровоа́мꙋ гл҃ющи. ѿц҃ъ твои твердѣ́ишимъ и҆́гом̑ на́съ ѹ҆гнетѐ. т̂ы ле́гъчеи повели ѿц҃а твое҆го, и҆же нам̑ наложи́лъ тѧготꙋ сложе́нїѧ. и҆ ма́ло ѿ бре́мени ѻ҆б꙽легчѝ, и҆ да слꙋж́имъ тебѣ·

4

И҆ реч̑҇ и҆мъ поидѣте по тре́хъ дн҃ехъ възврати́тесѧ ко мнѣ̀. е҆гда же ѿи҆до́ша лю́дїе, нача совѣтъ съ ста́рцы и҆же стоа́хꙋ пред̑ ѿц҃емъ е҆го соло́моном̑, е҆гда е҆щѐ живѧ́ше гл҃ющи. чт̂о дади́те совѣтъ ѿвѣщати лю́демъ си́мъ. и҆же рѣша е҆мꙋ. а́ще ѹ҆годи́ши по́лкꙋ томꙋ̀, и҆ ѹ҆слади́ши и҆хъ словесы̀ ми́лостивными. слꙋжа́тъ тебѣ всѧ́ко вре́мѧ. и҆ то́й ѻ҆ста́ви совѣтъ ста́рческъ, и҆ со ѹ҆́ношами дꙋ́мати нача̀, и҆же с ни́мъ въско́ръмлени бѧ́хꙋ. и҆же бѣхꙋ с ни́мъ въ кнѧже́нїи то́мъ. рече же къ ни́мъ. чт̂о сѧ вамъ ви́дитъ. е҆же ѿвѣща́ти чт̂о и́мамъ по́лкꙋ томꙋ̀, и҆же рѣша мн̂ѣ гл҃юще. ѻ҆блегчѝ и҆́го, е҆же наложил̑҇ на́ ны ѿц҃ъ твои. и҆ тїѝ ѿвѣщаша. ꙗ҆ко юноши воско́ръмлени с ни́мъ на сла́дости. и҆ реко́ша·

5

Тако гл҃еши по́лкꙋ, и҆же рече тебѣ. ѿц҃ъ твои ѻ҆тѧгчил̑҇ и҆́го на́ше, и҆ т̂ы ѻ҆блегчѝ ѻ҆ на́съ. и҆ тако ѿвѣща́еши и҆мъ. ме́ншїи прьстъ мо́и толъстѣе е҆сть чреслъ ѿц҃а мое҆го. ѿц҃ъ мои наложи́лъ вамъ тѧжело, и҆́го. и҆ а́зъ на́ипаче тѧ́гости приложꙋ̀. ѿц҃ъ мои би́лъ васъ бичъми а́зъ б̂о бїю васъ скоръпїѻ́ны·

6

И҆ прїиде і҆е҆ровоа́мъ, и҆ весь по́лкъ къ ровоа́мꙋ въ дн҃ь тре́тїи. ꙗ҆ко повелѣ̀ им̑ цр҃ь. да ѻ҆братѧт̑сѧ въ дн҃ь тре́тїи. ѿвѣща же цр҃ь жесто́ко, и҆ ѻ҆ста́вилъ ровоа́мъ совѣтъ ста́рцем̑. гл҃алъ же е҆сть по ю́ношъскои во́ли. ѿц҃ъ мо́и тѧ́жело вамъ наложи́лъ и҆́го. чт̂о а́зъ тѧже́лѣе сътворю̀. ѿц҃ъ мо́и би́лъ вас̑҇ плетьмѝ. и҆ а́зъ б̂о бїю в̂ы скорпїѻ́ны. и҆ не вѣдѣ ровоа́мъ. ꙗ҆́ко премѣненїе ѿ б҃а гл҃ѧ. да съвръши́тсѧ слово е҆го е҆же гл҃а рꙋко́ю а҆хїи хилони́тъскаго. і҆е҆ровоа́мꙋ сн҃ꙋ нава́товꙋ и҆ ѻ҆ всем̑ і҆и҆л҃ю занѐ послꙋша цр҃ь их̑. и҆ ѿвѣщаша лю́дїе ко цр҃ю гл҃щи·

7

Нѣсть намъ ча́сть въ дв҃дѣ ни достоѧ́нїѧ въ сн҃ѣ і҆ѻ҆сѣѻ҆вѣ. ѻ҆братисѧ въ жили́ща твоа і҆и҆л҃ь. ты́ же пасѝ домъ твои двд҃вѣ·

8

І҆ и҆дѐ весь і҆и҆л҃ь в жили́ща своѧ. и҆ мꙋжи і҆и҆л҃еви и҆же ѻ҆бита́хꙋ въ́ градѣхъ і҆ѹ́диных̑, въцрс̑҇твоваша над̑ ними і҆е҆ровоа́ма·

9

И҆ посла́ же цр҃ь ровоа́мъ к ни́мъ. а҆данира́ма и҆же настоѧ́ше да́немъ, и҆ ка́менїемъ поби́ша е҆го сн҃ове і҆и҆л҃вы и҆ ѹ́мре·

10

И҆ слы́ша цр҃ь ровоа́мъ, пот꙽ща́сѧ възыитѝ на колесни́цꙋ. и҆ бѣжа̀ въ і҆ерс̑҇лим꙽. и҆ ѿвръгъсѧ и҆л҃ь ѿ домꙋ двд҃ва да́же до дн҃е сего̀·