Ostroh Bible❧Друга книга хронік, розділ 13

1

Въ лѣто, и҃і. цр҃ѧ и҆е҆ровоа́ма, црс̑҇твова̀ а҆вїѧ на і҆ѹ҆де́и. и҆ г҃, лѣта црс̑҇твова̀ въ і҆ерс̑҇лимѣ. и҆мѧ же мт҃ри е҆го миа҆ха́їѧ дщ̂и ѹ҆рїи́лева ѿ гаваѻ́на, и҆ б̂ѣ бра́нь межи а҆вїею, и҆ е҆ровоа́момъ. и҆ въполъчи́шасѧ. а҆вїѧ же и҆мѣа҆ше бран꙽нѣ́ишихъ мꙋже́и и҆збра́нныхъ, ҂м҃. і҆ и҆е҆ровоа́мъ състро́и съпроти́вꙋ е҆го бра́нь, ҂п҃. мꙋже́и, и҆же и҆ тїи и҆збра́нни бѣша. и҆ къ бра́немъ крѣпча́иши·

2

Ста́ же а҆вїа на горѣ̀ сомо́ри и҆же бѣ̀ въ предѣле е҆фре́мли и҆ рече. слы́шите е҆ровоа́мъ и҆ весь і҆и҆л҃ь. н̂и ли не вѣ́сте ꙗ҆́ко г҃ь б҃ъ і҆и҆л҃евъ. възда́лъ црс̑҇тво дв҃дꙋ на і҆и҆л҃и въ вѣ́ки, и҆ сн҃овомъ е҆го, завт̑ѣ вѣ́ченъ·

3

И҆ въста̀ и҆е҆ровоа́мъ сн҃ъ нава́товъ рабъ соло́моновъ сн҃а двд̑а. и҆ ѿве́ржесѧ ѿ господи́на свое҆го, и҆ събра́ша же сѧ к немꙋ мꙋ́жи сꙋетнѣ́иши сн҃ове законопрестꙋ́пнїи и҆ сопроти́ви́шасѧ проти́вꙋ ровоа́ма сн҃а соло́монѧ.

4

Ровоа́м же бѣ̀ ю҆нѣ́ишїи и҆ срд̑цемъ страшлив̑҇, и҆ не мо́же проти́витисѧ и҆мъ. и҆ нн҃ѣ ѹ҆бо в̂ы гл҃ете да сопроти́витисѧ мо́жете црс̑҇твꙋ гн҃ю и҆же въздержи́тъ по сн҃овохъ двд҃вых̑ и҆́мате же вели́ко людїи мно́жество и҆ те́лца зла́тыѧ и҆хже сътворѝ вам̑ і҆еровоам̑ въ богѝ. и҆ не не и҆звергосте л̂и сщ҃ен꙽никовъ гн҃ихъ сн҃овъ а҆аро́нь и҆ левѷтов꙽, и҆ сътвори́сте себѣ̀ жръцы̀ ѿ людїи всеѧ̀ землѧ̀. и҆ды́и прїидетъ, и҆ напо́лнитъ рꙋкꙋ свою ѿ те́лцовъ, з҃, и҆ ѻ́внѣхъ, з҃ хъ и҆ сътвори́сѧ въ жръца̀ не сꙋщемꙋ богꙋ. на́шъ же г҃ь б҃ъ е҆сть е҆гоже не ѻ҆ста́вихомъ, сщ҃ен꙽ницы же е҆го слꙋжатъ г҃ꙋ ѿ сн҃овъ а҆а҆ро́нь. и҆ левѷти сꙋть в чи́нѣхъ свои҆хъ жрꙋще г҃ꙋ, вс̂есъж꙽же́нїѧ, ѹ́тро и҆ предъ ве́черомъ, и҆ ѳимїа́мъ сложе́нїѧ по вс̂ѧ дн҃и приносѧтъ г҃ꙋ, и҆ пред̑лага́ю҆тсѧ хлѣбы на столѣ̀ чистѣ́ишем̑. е҆сть же под на́ми под̑свѣщникъ зла́тыи, и҆ свѣти́лники е҆го да вжегт̑ꙋсѧ всегда̀ къ ве́черꙋ. мы̀ б̂о храни́мъ повелѣ́нїѧ г҃а б҃а ѿц҃ъ нашихъ, е҆гоже вы̀ ѻ҆ста́висте. того ра́ди въ во́нѣ на́шеи б҃ъ е҆сть. и҆ сщ҃ен꙽ницы е҆го възвꙋча́тъ трꙋба́ми и҆ въз꙽шꙋмѧ́тъ проти́вꙋ ва́мъ. сн҃ове і҆и҆л҃вы не хо́щете брани́ти проти́вꙋ г҃ꙋ б҃ꙋ ѿц҃ъ ва́шихъ, и҆же нѣсть ва́мъ подо́бно. сїѧ томꙋ̀ гл҃щꙋ, і҆е҆ровоа́мъ възвратѝ под̑са́дꙋ прїитѝ е́й. вза́дъ на ни́хъ. и҆ бы́сть ѿ сꙋпроти́вꙋ і҆ѹ́ды са́мъ. и҆ под̑са́да съза́ди·

5

И҆ възврати́шасѧ і҆ѹ҆де́и, и҆ сѐ ви́дѣша бра́нь. ѿ сꙋпроти́въ и҆ съзад̑и̑ и҆ възопи́ша къ г҃ꙋ. и҆ сщ҃ен꙽ницы трꙋба́ми пѣти нача́ша. вси́ же мꙋжи і҆ѹ́дины възгласи́ша. и҆ с̂е тѣмъ въпїю́щимъ·

6

И҆ ѹ҆страшѝ б҃ъ і҆е҆рово̀а́ма. і҆и҆л҃ѧ. и҆же стоѧ́хꙋ ѿ сꙋпроти́вꙋ а҆вїѧ́ і҆и҆ѹ́ды. бѣжа́шеж̑ сн҃ове і҆и҆л҃еви ѿ і҆ѹ́ды. и҆ преда́сть и҆хъ б҃ъ в рꙋкꙋ и҆хъ. и҆ поразѝ ѹ҆бо и҆хъ а҆вїѧ и҆ лю́ди е҆го ꙗ҆́звою вели́кою и҆ падо́ша ра́нени ѿ і҆и҆л҃ѧ, е҃ со́тъ мꙋже́и крѣпких̑·

7

И҆ смири́ша же сѧ сн҃ове и҆л҃еви въ вре́мѧ т̂о·

8

И҆ велмѝ ѹ҆крѣпи́шасѧ сн҃ове і҆ѹ́дины·

9

Того ради и҆же ѹ҆пова́ша на г҃а б҃а ѿц҃ъ свои҆хъ·

10

Погна́ша же а҆вїѧ въ слд̑ѣ і҆е҆ровоа́ма, и҆ взѧ̀ гра́ды е҆го. и҆ виѳе́ль, и҆ ѻ́крс̑҇тныѧ се́ла е҆го, и҆ гесана́и съ се́лами е҆го, і҆ е҆вро́нъ и҆ се́ла е҆го.

11

И҆ не мо́же сꙋпроти́витисѧ і҆е҆ровоа́м꙽ въ вс̂ѧ дн҃и а҆вїѧ, е҆ю́же поразѝ и҆ ѹ́мре. а҆вїѧ же ѹ҆крѣпи́сѧ, и҆ поѧ́т꙽ жен̑҇, д҃і. и҆ родѝ, к҃в, сн҃овъ. и҆ ѯ҃ и҆ в҃ дще́ри. прочаа же словеса̀ а҆вїа и҆ дѣѧ́нїѧ е҆го, и҆ словеса̀ е҆го. пи́сана сꙋть ши́рши в꙽ кни́ѕѣ а҆́д꙽до про̑҇рка·