Ostroh BibleДруга книга хронік, розділ 16
Шрифт:
Запис:
1
И въ лѣто, л҃ и҃ е, цр҃ьства е҆го, взы́иде вааса цр҃ь і҆и҆л҃евъ, въ і҆ѹ҆де́ю, и҆ стѣнꙋ̀ ѻ҆бъѧ́ше ра́мꙋ, да ни е҆ді́нъ въ бо́ѧзни можа́ше и҆зыитѝ, и҆ внїитѝ въ црс̑҇тво а҆́с꙽сино и҆ възѧ́тъ же а҆́с꙽са сребро̀ и҆ зла́то ѿ сокро́вищъ до́мꙋ гн҃ѧ, и҆ ѿ сокро́вищъ цр҃ьскихъ·
2
И҆ посла̀ къ невеа҆давꙋ цр҃ю сѷрьскꙋ, и҆же ѻ҆бита́ше въ дама́сцѣ гл҃ющи, прїими ми́ръ промежи менѐ и҆ тебѐ, и҆ межѝ ѿц҃емъ моим̑, и҆ ѿц҃емъ твои҆мъ, и҆мѣша съглаше́нїе, того ра́ди посла́хъ тебѣ сребро̀ и҆ зла́то, прїиди да разбїемъ ѿ менѐ ваа҆́сомъ цр҃ѧ і҆и҆л҃ева, и҆ ѿи́дет̑ ѿ менѐ, и҆ слы́ша сн҃ъ а҆де́ровъ цр҃ѧ а҆́с꙽сꙋ, и҆ посла̀ нача́лники во́емъ своим̑, къ гра́домъ і҆и҆л҃евымъ, и҆ порази́ша а҆гино́на, и҆ да́на, и҆ а҆велмаи҆нъ, и҆ всѝ поса́ды неѳали́мли стѣна́та, и҆же е҆гда̀ слы́ша ваа́са цр҃ь і҆и҆л҃евъ ѻ҆ста́ви съзида́ти рама́ю и҆ ѻ҆ста́ви дѣ́ло своѐ·
3
А҆́сса же цр҃ь прїѧ́ть вс̂ю і҆ѹ҆де́ю, и҆ взѧ́ша ка́менїе ѿ ра́ма и҆ лѣ́съ и҆же на съзида́нїе ѹ҆гото́ва а҆́с꙽са·
4
Създа́ же в ни́хъ гаве́ѧ, и҆ ма́сфꙋ, и҆ въ вре́мѧ ѻ́но прїиде а҆на́нїѧ прро̑҇къ, къ а҆́с꙽сѣ цр҃ю і҆ѹ́динꙋ·
5
И҆ рече е҆мꙋ е҆же и҆мѣ́лъ е҆си ѹ҆пова́нїе ко цр҃ю сѷрскꙋ, а҆ не къ г҃ꙋ б҃ꙋ твое҆мꙋ·
6
Того ра́ди ѹ҆шлѝ цр҃ѧ си́рьскаго во́и ѿ рꙋ́кꙋ твое́ю·
7
Не е҆фиѻ́пи ли, и҆ ливїи бѧ́хꙋ тебѣ̀ въ си́лꙋ мно́гꙋ и҆ въ др́ъзость. колесни́цъ и҆ ко́нникъ. и҆ мно́жество ѕѣ́ло·
8
И҆ вънегда̀ къ г҃ꙋ вѣ́ровалъ е҆си, и҆ преда̀ и҆хъ въ рꙋкꙋ твою̀. ѻ҆́чи б̂о гн҃и съзира́ющи вс̂ю зе́млю. и҆ въздаю́тъ крѣ́пость тѣ́мъ, и҆же срд̑цемъ съвръше́номъ вѣ́рꙋютъ во́нь. бꙋе́ б̂о сътвори́лъ е҆си, и҆ сего ра́ди т̂о е҆щѐ настоѧ́щаго вре́мени на́ тѧ бра́нь въста́нетъ·
9
Разгнѣ́ва же сѧ а҆́с꙽са на ви́дѧщаго. повелѣ̀ е҆го в꙽сади́ти во стражи́лницꙋ. ѕѣ́ло бо сего ра́ди прогнѣ́васѧ и҆ ѹ҆бѝ ѿ людїи во вре́мѧ т̂о мно́гих̑. дѣла же а҆́с꙽сы пр́ьваѧ и҆ послѣ́днѧа, пи́сана сꙋть въ кни́ѕѣ цр҃еи і҆ѹ́диных̑ і҆и҆л҃ѧ·
10
Разболѣ́ же сѧ а҆́сса въ лѣто, л҃ѳ. црс̑҇тва свое҆го. бо́лѣзнїю ѕелнѣ́ишею на́ ноги, и҆ ни в не́мощи свое́и, възыска̀ г҃а, н̂о вра́чевъ·
11
И҆ ѹ҆спе же съ ѿц҃ы свои҆ми, и҆ ѹ́мре лѣта, м҃а го, црс̑҇тва е҆го. и҆ погребо́ша е҆го въ гро́бѣ е҆го. и҆же и҆скопа̀ въ́ градѣ двд҃вѣ. положиша же е҆го на посте́лѣ и҆ напол̑҇ниша а҆рама́ты, и҆ ро́ды ми́ра ѹ҆ха́н꙽наго, и҆ сътвори́ша е҆мꙋ погребъ вели́къ ѕѣ́ло·
Джерела
