Ostroh Bible❧Друга книга хронік, розділ 18

1

И бы́сть и҆ѻ҆сафа́тꙋ бога́тъство, и҆ сла́ва мно́га, и҆ поѧт̑ женꙋ в домꙋ̀ а҆ха́вли, и҆ племени сложенъ е҆сть а҆хавлю, и съниде же по лѣтех̑ к немꙋ съвръше́не въ самарїю, и҆ е҆го прише́ствїю, ѹ҆бѝ а҆ха́въ ѻ҆́вны, и҆ волы̀ мно́ги, томꙋ и҆ людемъ и҆же прїидо́ша с ни́мъ, помоли́ же сѧ томꙋ, да взы́идетъ въ рамо́ѳъ галади́т꙽скїи·

2

Реч̑҇ же а҆ха́въ цр҃ь і҆и҆л҃евъ, къ и҆ѻ҆сафа́тꙋ цр҃ю іѹ́динꙋ, прїидѝ съ мно́ю въ рамо́ѳъ галаа҆ди́т꙽скїи·

3

к немꙋ то́и ѿвѣща̀, ꙗ҆́ко а҆́зъ и҆ ты̀, ꙗ҆́ко лю́дїе твоѝ та́ко и҆ лю́дїе моѝ, с тобо́ю же бꙋдемъ въ бра́ни·

4

И҆ реч̑҇ и҆ѻ҆сафа́тъ цр҃ю і҆и҆л҃евꙋ, совѣща́исѧ молю̀ т̂ѧ, пред̑стоѧ́щимъ словесе́м꙽ г҃ꙋ, и҆ събра б̂о цр҃ь і҆и҆л҃евъ прро̑҇ковъ, у҃, мꙋже́и, и҆ рече къ ни́мъ, а҆́ще въ рамо́ѳъ галаад̑скїи къ бра́ни пои҆тѝ и҆мамы, и҆ли поко́итисѧ, и҆ тїи рѣша, в꙽зы́иди, и҆ преда́сть б҃ъ въ рꙋ́кꙋ цр҃евꙋ·

5

Рече же иѻ҆сафатъ ни л̂и нѣсть т̂ꙋ прро̑҇ка гн҃ѧ, е҆ще да ѿ того па́ки въпро́симъ, и҆ рече цр҃ь і҆и҆л҃евъ къ и҆ѻ҆сафа́тꙋ, е҆сть мꙋжъ е҆ді́нъ и҆́м꙽же мо́жетъ въпроси́ти г҃а, н̂о а҆́зъ ненави́жꙋ е҆го, и҆же не прорица́етъ мнѣ̀ бл҃га, н̂о ѕло̀ въ всѐ вре́мѧ е҆го, сїи михе́ѧ сн҃ъ и҆е́мла·

6

Реч̑҇ же и҆ѻ҆сафа́тъ не гл҃и цр҃ю тѣ́мъ ѻ҆бы́чаемъ·

7

И҆ възва̀ цр҃ь і҆и҆л҃евъ е҆ді́ного ѿ е҆внꙋ́хъ, и҆ рече е҆мꙋ, зови в꙽бо́рзѣ михе́ю сн҃а и҆е́мла, па́ки цр҃ь і҆и҆л҃евъ, и҆ ѻ҆сафа́тъ цр҃ь і҆ѹ́динъ, ѻ҆́ба сѣдѧ́хꙋ на прс̑҇тлѣ, ко́ждо и҆ ѻ҆блече́ни красото́ю цр҃ьскою, сѣдѧ́хꙋ же на простра́н꙽ствѣ близ̑ вра́тъ самарїиских̑, вс̂и же прро̑҇цы прро̑҇чествова́хꙋ пред̑ ни́ми, седекїа б̂о сн҃ъ хана́на, сътвори е҆мꙋ ро́га желѣ́зна, и҆ рече·

8

Сїѧ реч̑҇ г҃ь, тѣми попере́ши сѷрїю, до́ндеже съкрꙋшиши е҆ѧ, вс̂и же прро̑҇цы та́коже прорица́хꙋ, и҆ гл҃ахꙋ, взы́иди въ рамо́ѳъ галаа́дъ и҆ преспѣва́еши, и҆ преда́стъ и҆хъ въ рꙋ́кꙋ цр҃евꙋ, посо́лъ же и҆де къ званїю михе́ѧ, рече е҆мꙋ, с̂е словеса̀ всѣхъ прро̑҇къ е҆ді́нѣми ѹ҆сты бл҃га цр҃еви възвѣща́ютъ. прошꙋ ѹ҆бо и҆ тебѐ да сло́во твое ѿ е҆го не ѹ҆далитсѧ. гл҃и же бл҃га е҆мꙋ, и҆ ѿвѣща михе́ѧ. живе́тъ г҃ь и҆же чт̂о е҆лико рече́тъ мнѣ б҃ъ мо́и с̂е гл҃ю. прїиде б̂о къ цр҃ю. е҆мꙋже цр҃ь рече, михе́ѧ. и҆ти л̂и и҆́мамъ въ рамо́ѳъ галаа́дъ къ бране́нїю, и҆ли поко́ити·

9

К немꙋже то́и ѿвѣща̀, и҆зы́идете вс̂ѧ бо преспѣва́нїѧ прїидꙋтъ т̂и, и҆ предадꙋтсѧ врагѝ в рꙋ́ки ва́ша. реч̑҇ же цр҃ь е҆мꙋ па́ки.

10

Множи́цею тебе заклина́ю ѧ҆̀. да мнѣ не гл҃еши то́кмо, чт̂о и҆́стинно е҆сть въ и҆мѧ гн҃е. и҆ то́и рече. ви́дѣхъ ве́сь і҆и҆л҃ь расточе́нъ въ гора́хъ ꙗ҆́ко ѻ҆́вца без꙽ па́стырѧ·

11

И҆ рече г҃ь, не и҆́мꙋть сїи господи́на, да ѻ҆брати́тсѧ е҆ді́нъ ко́ждо в до́мъ свои в꙽ ми́рѣ·

12

И҆ рече цр҃ь і҆и҆л҃евъ къ и҆ѻ҆сафа́тꙋ. ни л̂и рѣхъ тебѣ ꙗ҆́ко не прорицает̑ се́и мнѣ̀ ничтоже бл҃га, н̂о ѕл̂о. и҆ рече михе́ѧ, не та́ко слы́шите ѹ҆бо сло́во гн҃е. ви́дѣхъ г҃а сѣдѧ́ща на прс̑҇тлѣ е҆го, и҆ вс̂и во́и нбс̑҇ныѧ пред̑стоѧ́щи е҆мꙋ ѻ҆деснꙋю и҆ ѻ҆шꙋ́юю·

13

И҆ рече г҃ь кт̂о прельсти́тъ а҆ха́ва цр҃ѧ і҆и҆л҃ева, да взы́идетъ и҆ паде́тъ въ рамо́тѣ галаад̑скомъ. и҆ гл҃аше е҆ді́нъ та́ко, і҆ и́нъ реч̑҇ та́ко. и҆зы́иде дх҃ъ и҆ ста̀ пред̑ гм҃ъ и҆ рече. аз̑ прельщꙋ̀ е҆го, е҆мꙋже г҃ь в꙽ чемъ рече прельсти́ши. и҆ то́и ѿвѣща̀. ѿи҆дꙋ и҆ бꙋ́дꙋ дх҃ъ л꙽жи́въ въ ѹ҆ста̀ всм̑ѣ прро̑҇комъ е҆го·

14

Рече же г҃ь прельсти́ши л̂и и҆ премо́жеши л̂и, и҆зы́иди и҆ сътворѝ та́ко·

15

И҆ нн҃ѣ ѹ҆бо с̂е г҃ь дадѐ дх҃ъ л꙽жи́въ въ ѹ҆ста̀ всѣмъ про̑҇рком꙽ твои́мъ си́мъ. и҆ г҃ь гл҃алъ е҆сть ѻ҆ тебѣ̀ ѕло̀. и҆ пристꙋпи́ же седекїѧ сн҃ъ ханаа́на. и҆ ѹ҆да́ри михе́ю в лани́тꙋ. и҆ рече е҆мꙋ кои́мъ пꙋтем̑ про́иде дх҃ъ гн҃ь ѿ мене е҆же гл҃ати тебѣ·

16

Рече же михе́ѧ. т̂ы то̀ ѹ҆́зриши въ дн҃ь ѻ́нъ. когда̀ входѧ́щъ бꙋ́деши къ ло́жницѣ. ѿ ложница да ѹ҆кры́ешисѧ. повелѣ́ же цр҃ь і҆и҆л҃евъ гл҃ющи възми́те михе́ю и҆ веди́те е҆го къ и҆м꙽ми́рꙋ нача́лникꙋ гра́да. и҆ къ и҆а́сꙋ кн҃ѕю сн҃ꙋ цр҃евꙋ. и҆ гл҃ите сїѧ гл҃етъ цр҃ь. поста́вите того в꙽ темни́цꙋ. и҆ дади́те е҆мꙋ хлѣ́ба ма́ло, и҆ воды̀ по ѻ҆скꙋ́дꙋ до́ндеже ѻ҆бращꙋсѧ в꙽ ми́рѣ рече же михе́ѧ. а҆́ще ѻ҆брати́шисѧ въ ми́рѣ. нѣ́сть г҃ь гл҃алъ мнѣ̀, и҆ рече·

17

Слы́шите вс̂и лю́дїе. того ради в꙽зыиде цр҃ь і҆и҆л҃евъ, и҆ ѻ҆сафат̑ цр҃ь і҆ѹ́динъ въ рамо́ѳ꙽, и҆ галаа́дъ·

18

Рече же цр҃ь і҆и҆л҃евъ къ и҆ѻ҆сафа́тꙋ. пременѝ на́ мѧ ри́зы твоѧ̀. и҆ та́ко къ ѻ҆полче́нїю и҆дꙋ̀. ты же ѻ҆блеци́сѧ в ри́зы моѧ̀. премени же цр҃ь і҆и҆л҃евъ ри́зы и҆́де къ бра́ни·

19

Цр҃ь же си́рьскїи повелѣ̀ вожем̑ ко́н꙽никъ своих̑ гл҃ющи. не ѻ҆полча́итесѧ проти́вꙋ ме́ншаго, и҆ли проти́вꙋ бо́льшаго. то́кмо проти́вꙋ само́го цр҃ѧ і҆и҆л҃ева. и҆ бы́сть е҆гда ви́дѣша нача́лницы ко́н꙽ником̑ и҆ѻ҆сафа́та, гл҃аша цр҃ь і҆и҆л҃евъ ес̑҇ се́и. и҆ ѻбыидо́ша е҆го вою́юще. і҆ѻ҆сафат̑ же възопѝ къ г҃ꙋ. и҆ г҃ь послꙋша е҆го и҆ ѻ҆брати и҆хъ ѿ него. и҆ бы́сть е҆гда б̂о ви́дѣша вое҆во́ды ко́нникъ ꙗ҆́ко не бы́сть цр҃ь і҆и҆л҃евъ. ѻ҆ста́виша е҆го. слꙋчи́ же сѧ да е҆ді́нъ ѿ людїи стрѣлцꙋ не вѣдꙋщи и҆спꙋстѝ и҆ поразѝ црѧ і҆и҆л҃ева промежꙋ въздыха́нїѧ, и҆ пан꙽цы́рѧ и҆ ѻ́нъ под̑ча́шемꙋ свое҆мꙋ рече. ѻ҆братѝ рꙋ́кꙋ твою̀ і҆ и҆зведѝ м̂ѧ ѿ бра́ни ꙗ҆́ко пораже́нъ е҆смь. и҆ сконча́но е҆сть ѻ҆полченїе в꙽ дн҃ь то́и, и҆ цр҃ь і҆ил҃евъ б̂ѣ стоѧ̀ в꙽ колесни́цы свое́и. проти́вꙋ сирїѻм̑ даж̑ до́ вечера и҆ ѹм̑ре заходѧщꙋ слн҃цꙋ·