Ostroh BibleДруга книга хронік, розділ 19
Шрифт:
Запис:
1
Възврати́ же сѧ и҆ѻ҆сафа́тъ цр҃ь і҆ѹ́динъ въ до́мъ сво́и ми́рно въ і҆ерс̑҇лимъ. е҆гоже срѣтѐ е҆вꙋ̀ сн҃ъ а҆на́нїи. ви́дѧщаго и҆ рече к немꙋ. нечести́вꙋ л̂и дае́ши по́мощь. и҆л̂и ненави́димаго ѿ г҃а дрꙋжбꙋ съклада́е҆ши·
2
И҆ рече е҆мꙋ і҆ѹ́е, сего ра́ди не бы́сть на́ тѧ гнѣвъ гн҃ь. ꙗ҆ко и҆́на бл҃га дѣла ѻ҆брѣте́на сꙋть в꙽ тебѣ̀. занѐ ѿѧ́лъ е҆си кꙋми́ры ѿ зем̑лѧ̀ і҆ѹ́дины·
3
І҆ и҆спра́вилъ е҆си срд̑це твоѐ възыска́ти г҃а б҃а ѿц҃ъ твои҆х꙽·
4
И҆ всели́сѧ ѹ́бо и҆ѻ҆сафат̑ въ і҆ерс̑҇лі́мѣ. па́ки же и҆зыиде к лю́демъ ѿ вирсавїи даже до горы̀ е҆фрѣмлѧ. и҆ възвратѝ и҆хъ къ г҃ꙋ б҃ꙋ ѿц҃ъ свои҆хъ·
5
И҆ поста́ви же сꙋдїѝ земли въ всѣхъ гра́дѣхъ і҆ѹ́диныхъ запа́систыхъ по кое҆мꙋждо мѣстꙋ. и҆ повелѣ сꙋдїам̑ ви́дите рече чт̂о творитѐ. не б̂о чл҃ческїи сътвори́те сꙋдъ, н̂о гн҃ь. и҆ чт̂о е҆ли́ка же сꙋ́дите, въ ва́съ преи҆збꙋдетъ·
6
И҆ да бꙋ́детъ стра́хъ гн҃ь с ва́ми при́сно. и҆ съ любле́нїемъ всѧ твори́те·
7
Нѣсть б̂о пред̑ гм҃ъ бм҃ъ нашимъ безако́нїе. ниже дивле́нїѧ лицꙋ̀. ни прїѧ́ти м꙽зды̀·
8
Въ і҆ерс̑҇ли́мѣ же поста́ви и҆ѻ҆сафа́тъ левѷты и҆ сщ҃енницы, и҆ нача́лники ѻ҆би́телемъ ѿ і҆и҆л҃ѧ. да сꙋдъ и҆ ве́щ꙽ гн҃ю сꙋ́дѧтъ жи́телемъ въ і҆ерс̑҇лі́мѣ повелѣ же и҆мъ гл҃ющи. та́ко дѣлаи҆те въ стра́сѣ гн҃и, и҆ вѣрнѣ, и҆ срд̑цемъ съвръше́нымъ·
9
Всѧ́кꙋю вещь и҆же прїидетъ к ва́мъ бра́тїи ва́шихъ. и҆же ѻ҆бита́ютъ въ́ градѣхъ и҆хъ. промежꙋ кро́вїю кро́вь гдѣ̀ коли́же въпроше́нїе бꙋдетъ ѿ зако́на ѿ за́повѣди. ѿ чи́новъ ѿ ѻ҆правда́нїи покажи́те и҆мъ да не съгрѣша́ютъ гв҃и. и҆ не прїидетъ ꙗ҆́рость на ва́съ и҆ на бра́тїю ва́шꙋ. та́ко б̂о дѣ́лающе не съгрѣшитѐ. а҆марїѧ́ же сщ҃енникъ а҆рхїе҆ре́и ва́ш꙽. сїи же къ б҃ꙋ пред̑стоѧ́ти пред̑ста́нет̑·
10
И҆ па́ки завадїѧ сн҃ъ и҆зма́ель. и҆же е҆сть во́жъ въ домꙋ̀ і҆ѹ́динѣ, и҆же къ цр҃евꙋ чи́нꙋ пред̑стои́тъ. и҆ кни́жники левѷты пред̑ ва́ми, ѹ҆крѣпи́тесѧ и҆ дѣла́ите любѧ́щи, и҆ бꙋдетъ г҃ь с ва́ми въ бл҃гихъ·
Джерела
