Ostroh Bible❧Друга книга хронік, розділ 2

1

Повелѣ же соло́монъ соѕида́ти до́мъ и҆́мени гн҃ю. и҆ полатꙋ себѣ̀. и҆ собра̀ цр҃ь соло́монъ. ҂о҃, мꙋже́и носѧ́щих̑ бремена. и҆ ҂п҃, и҆же сѣкт̑ꙋ камень въ горах̑. предъставле́ных̑ же до и҆хъ, ҂г҃, и҆ х҃·

2

Посла же соло́мон̑҇ къ хира́мꙋ цр҃ю тѷрьскꙋ гл҃ѧ·

3

Ꙗ҆́ко сътвори́лъ е҆си съ дв҃домъ, ѿц҃емъ мои҆мъ, и҆ посла́лъ е҆си е҆мꙋ дре́ва ке́дрова да соѕи́ждетъ себѣ̀ до́мъ. в не́мже б̂ы е҆мꙋ ѻ҆бита́ти. и҆ с̂е а́зъ сн҃ъ е҆го. соѕида́ю до́мъ и́мени г҃а б҃а мое҆го, да ѻ҆сщ҃аю е҆го е҆мꙋ, къ покаже́нїю ѳемїама пред̑ нимъ, и҆ кади́ти и҆ а҆рома́ты. и҆ къ предъложе́нїю хлѣ́ба вѣчномꙋ. и҆ къ всѐсож꙽же́нїю ѹ҆́тро и҆ къ ве́черꙋ, и҆ въ сꙋбо́ты и҆ но́выхъ лꙋнъ. и҆ пра́зниковъ г҃а б҃а на́шего въ вѣ́ки и҆же повелѣна сꙋть і҆и҆л҃еви. и҆ до́мъ и҆же соѕида́ю вели́къ е҆сть. вели́къ б̂о е҆сть б҃ъ нашъ над̑ въсѣми бо́ги·

4

И҆ кт̂о возмо́жетъ да соѕи́ждетъ е҆мꙋ досто́инъ домъ. а́ще б̂о нб҃о и҆ нб҃о нб҃си прїѧ́ти не мо́гꙋтъ сла́вы е҆го. кт̂о ли а́зъ е҆смъ да могꙋ̀ созъда́ти е҆мꙋ домъ. н̂о то́лко да сож꙽жетсѧ ѳимїамъ предъ ни́мъ. нн҃ѣ ѹ҆бо пошлѝ мн̂ѣ мꙋ́жа ѹ҆чена, и҆же вѣсть дѣ́ла твори́ти, въ зла́тѣ, и҆ сребрѣ̀, и҆ мѣ́ди, и҆ желѣзѣ, и҆ порфи́ре и҆ въ чръвле́нїи, и҆ си́нетою. і҆ и҆же зна́етъ рѣ́зати рѣзь. съ тѣми ѹ́модѣ́лники коих̑ со мно́ю имѣю, и҆ въ і҆ѹ҆де́и, и҆ въ і҆ерс̑҇ли́мѣ. и҆хъже ѹ҆гото́ва дв҃дъ ѿц҃ъ мой·

5

Но и҆ дре́ва ке́дрова пошлѝ м̂и, и҆ пе́вгова, и҆ смере́кова, ѿ лива́на. вѣмъ б̂о и҆же рабѝ твоѝ, ѹ҆мѣ́ютъ сѣщ́и дре́ва ѿ лива́на·

6

И҆ бꙋдꙋтъ рабѝ моѝ со рабы̀ твои́ми да ѹ҆гото́ваютъ мн̂ѣ дре́ва мно́га·

7

домъ б̂о е҆гоже жела́ю съѕидати вели́къ е҆сть ѕѣ́ло, и пресла́вленъ. и҆ с̂е дѣ́лателемъ и҆же сѣкꙋтъ дре́ва дам̑ в пи́щꙋ, п꙽шени́цы коры мѣ́ры. ҂к҃. і е҆ле́ѧ са́ты мѣ́ры, ҂к҃·

8

Рече же хира́мъ цр҃ь тѷрьскїи, по гра́мотам̑ и҆́хже посла соло́монꙋ, гл҃ѧ. ꙗ҆́ко възлюбѝ б҃ъ лю́ди своѧ̀. того ради тебѣ црс̑҇твова̀ти сътворѝ над̑ ни́ми и҆ придалъ гл҃ющи. блс̑҇венъ г҃ь б҃ъ і҆и҆л҃евъ. и҆же сътворѝ нб҃о и҆ землю и҆же дасть дв҃дꙋ цр҃ю сн҃а премꙋдра. и ѹ҆че́на, и҆ ѹ́мна, и҆ разꙋмна. да соѕи́ждетъ домъ г҃ꙋ и҆ пола́тꙋ себѣ̀·

9

И҆ нн҃ѣ послах̑ ѹ҆бо тебѣ̀ мꙋжа мꙋдра и҆ свѣ́дꙋща ра́зꙋмъ хира́ма раба̀ мое҆го. сн҃а жены̀ ѿ дще́рїи да́новыхъ, е҆мꙋже ѿц҃ъ бы́сть тѷръ, и҆же вѣсть дѣ́лати въ зла́тѣ, и҆ сребрѣ̀, мѣ́ди и҆ желѣзѣ. и҆ мрамо́рѣ, и҆ дре́вѣ, и҆ вытыка́ти въ порфи́рѣ, и҆ вис꙽со́нѣ, и҆ въ чръвлени́ци. рѣ́зати всѧкꙋю рѣ́зь. и҆ вы́разꙋмѣти всѧ́ко разꙋмѣнїе. е҆ли́коже въдаси е҆мꙋ, съ рꙋкодѣ́лники твои́ми, и҆ съ ѹ́модѣ́лники господи́на мое҆го, дв҃да ѿц҃а твое҆го·

10

И нн҃ѣ ѹ҆бо п꙽шеницꙋ и҆ ꙗ҆чме́нь, і҆ е҆леи, и҆ вино̀. ꙗ҆́же ѻ҆беща́лъ е҆сѝ господи́не мой, пошлѝ рабо́мъ твои҆мъ. мы́ же сѣчем̑ древа ѿ лива́на на всѧ́кꙋ потребꙋ твою. и҆ по́слем̑ тїи плоты по мо́рю въ ѻ҆пїю, твое же бꙋдетъ приводи та въ і҆ерс̑҇ли́мъ·

11

И҆ собра̀ соло́монъ всѣхъ мꙋже́и прише́льцовъ, и҆же бѣхꙋ въ землѝ і҆и҆л҃евѣ. по сочте́нїю ꙗ҆́же почита́лъ дв҃дъ ѿц҃ъ е҆го и҆ ѻ҆брѣте́ни сꙋть, рн҃г, ты́сѧщи, и҆ х҃. сътвори́ же ѿ и҆хъ, ҂о҃. и҆же рамены бре́мѧ но́сѧтъ. и҆ ҂п҃, и҆же ка́менїе ѿ го́ръ сѣкꙋща. ҂г҃, и҆ х҃, пред̑ста́тели дѣ́ломъ люд꙽скимъ·