Ostroh BibleДруга книга хронік, розділ 3
Шрифт:
Запис:
1
Нача̀ соло́монъ соѕида́ти домъ гн҃ь въ і҆ерс̑҇ли́мѣ, на горѣ̀ морїѧ. и҆дѣже ꙗ҆́ви́сѧ г҃ь дв҃дꙋ ѿц҃ꙋ е҆го, въ мѣстѣ. и҆же ѹ҆гото́ва дв҃дъ на̀ гꙋмнѣ ѻ҆рна́на е҆ѹ҆се́ѧ. нача́ же соѕида́ти мс̑҇ца в꙽тора́го, лѣта четверта́го црс̑҇тва свое҆го. и҆ сїѧ сꙋть ѻ҆снова́нїѧ и҆же поста́ви соло́монъ, да ѕи́ждетъ домъ бж҃їи·
2
дол꙽готꙋ̀ лако́тъ въ мѣрꙋ прьвꙋю, ѯ҃. въ широтꙋ̀ лако́тъ, к҃. и҆ притво́ръ пред̑ челомъ, и҆же дръжа́шесѧ в꙽ должинꙋ по мѣ́ри ширины̀ домꙋ лакотъ, к҃. па́ки высота̀, р҃к, лакотъ б̂ѣ. и҆ позлати е҆ѧ̀ внꙋтръ зла́томъ чистѣ́ишимъ до́мъ же бо́лшїи сплотѝ дска́ми ке́дровыми, и҆ позлатѝ зла́томъ чи́стымъ. и҆зваѧ же на нем꙽ подо́бїѧ фи́ников̑҇. и҆ ꙗ҆ко мрежицы промежъ себѐ сплета́ющисѧ·
3
И҆ ѹ҆красѝ хра́мъ ка́менїемъ драгим̑ сла́вно. и҆ позлатѝ зла́том̑ и҆же ѿ фарони́ма. и҆ стѣ́ны е҆го, и҆ вра́та, и҆ ѻ́кна, и҆ две́ри, и҆ вы́рѣза херꙋви́мы на стѣнах̑. сътвори́ же и҆ домъ ст҃ыхъ ст҃аѧ. дол꙽жинꙋ е҆го по ширинѣ до́мꙋ лакот̑, к҃. ширынꙋ̀ та́коже, к҃, лако́тъ. и҆ дъскъ зла́тыхъ сплелъ е́й ꙗ҆́ко тала́нтъ, х҃, и҆ гво́зди сътвори зла́ты, ра́вно ва́гою. та́ко да е҆динъ гво́здь си́кль пѧтидесѧ́ти вѣ́сѧт̑сѧ. го́рницы же сплелъ зла́томъ, и҆ сътвори па́ки в до́мꙋ ст҃ых̑ ст҃аѧ. херꙋви́ма дв̂а дѣ́ло дре́ва негнїюща. и сплете и҆хъ зла́томъ, и҆ кри́лѣ херꙋви́момъ, и҆ долгота̀, к҃ лакотъ. и҆ е҆ді́но крило̀ и́мать, лакотъ, е҃. приты́чꙋщисѧ стѣна́мъ до́мꙋ·
4
И҆ дрꙋго́е крыло̀ и҆мѣю́щи, е҃, лакот̑, прикаса́ющисѧ дрꙋго́мꙋ херꙋви́мꙋ кры́ла. кры́лѣ же ѻ́бѣю херꙋви́мꙋ сею̀ просте́рти бѧхꙋ, по локотъ к҃, тїи же стоѧ́хꙋ воздвиже́нѣ на но́ѕѣ и҆хъ, и҆ лица и҆хъ бѧхꙋ ѻ҆браще́ни къ да́лнемꙋ до́мꙋ·
5
сътвори́ же запо́нꙋ ѿ синетъ и҆ багрѧницы, чръвленицы, и҆ вис꙽со́на. и҆ сотка̀ на не́и подо́бїѧ херꙋви́момъ. пред̑ две́рми па́ки цр҃кви дв̂а столпа̀ сътворѝ, и҆же л҃е, лако́тъ и҆мѣа́хꙋ высотꙋ̀. па́ки главы̀ и҆хъ, е҃, лако́тъ·
6
И҆ е́ще ꙗ҆́ко мре́жи въ ст҃аѧ ст҃ыхъ, и҆ нало́жи и҆хъ главы̀ стол꙽по́мъ. и҆ ши́покъ сътворѝ, р҃, и́хже на мре́жи наложи́лъ. тїи же столпы̀ поста́ви пред̑ лицемъ цр҃кви. е҆ді́наго ѻ҆деснꙋ́ю а҆ дрꙋгаго ѻ҆шꙋ́юю. то́йже ѻ҆деснꙋ́ю б̂ѣ. прозва̀ и́мѧ е҆го и҆справле́нїе. і҆ и́же ѻ҆ лѣвꙋ́ю прозва̀ и҆мѧ е҆го крѣ́пость·
Джерела
