Ostroh Bible❧Друга книга хронік, розділ 21

1

И ѹ҆спе і҆ѻ҆сафат̑ съ ѿц҃ы свои҆ми, и҆ погребе́нъ е҆сть с ни́ми въ́ градѣ двд̑вѣ. црс̑҇твова же і҆ѻ҆ра́мъ сн҃ъ е҆го с него̀ мѣ́сто. и҆же и҆мѣ бра́тїю сн҃ы і҆ѻ҆сафа́товы ѿц҃а свое҆го, ѕ҃. а҆зарїю, і҆ и҆и́лѧ, и҆ заха́рїю, и҆ а҆за́рїю, и҆ ми́хаи҆лѧ, и҆ сафа́тїю·

2

Вс̂и сїи сн҃ве, і҆ѻ҆сафа́товы цр҃ѧ і҆ѹ́дина и҆ да́сть же и҆мъ ѿц҃ъ их̑ мно́ги да́ры, сребра̀ и҆ зла́та. и҆ ѻ҆рꙋжїѧ съ гра́ды запаси́стыми въ і҆ѹ҆деѝ. и҆ црс̑҇тво же предаде і҆ѻ҆ра́мꙋ, того̀ ради и҆же се́й бысть прьве́нецъ. и҆ воста́ же і҆ѻ҆рам̑ на црс̑҇тво е҆го. и҆ ѹ҆крѣпи́сѧ и҆збѝ всю̀ братїю свою̀ мече́мъ. и҆ нѣ́кои҆хъ ѿ нача́лникъ і҆ѹ́динъ·

3

Трѝдесѧт̑ и҆ дво́ю лѣтъ сыи і҆ѻ҆ра́мъ. е҆гда̀ нача̀ црс̑҇твова́ти. и҆ ѻ́смь лт̑ѣ црс̑҇твова въ і҆ерс̑҇ли́мѣ, и҆ ходи́ же въ пꙋте́хъ црс̑҇тва і҆и҆л҃ева, ꙗ҆́ко съдѣ́ла домъ а҆ха́вль. дщ̂и бо а҆ха́влѧ бысть жена̀ е҆го, и҆ сътворѝ ѕло́е пред̑ гм҃ъ, и҆ не хотѣ же г҃ь и҆скорени́ти до́мꙋ двд҃ва ра́ди завѣта и҆же завѣща̀ съ дв҃дом̑, и҆ ꙗ҆коже да да́сть е҆мꙋ свѣти́лникъ, и҆ сн҃омъ е҆го въ всѧ́ко вре́мѧ·

4

Въ дн҃ех̑ ѻ҆́нѣхъ ѿвръжесѧ е҆до́мъ не бы́ти под̑рꙋ́ченъ і҆ѹ́дѣ, и҆ поста́ви себѣ̀ цр҃ѧ, е҆гда же прои́де і҆ѻ҆ра́мъ съ нача́лники свои҆ми и҆ всимѝ ко́н꙽ники и҆же бѣхꙋ с ним̑, и҆ воста но́щїю и҆ пораѕѝ е҆до́мъ и҆же ѻ҆бы́иде ѻ҆́крс̑҇тъ е҆го·

5

И҆ нача́лникъ колесни́чныхъ е҆го, и҆ ѿбѣго́ша лю́дїе в꙽ селе́нїѧ и҆хъ, и҆ ѿвръжесѧ е҆до́мъ, да не бꙋдет̑ под̑ вла́стїю і҆ѹ́диною, даже до дн҃е сего̀·

6

Того б̂о вре́мени и҆ ло́вна ѿи҆дѐ да не бꙋдет꙽ под̑ рꙋкꙋ е҆го, занѐ ѻ҆ста́ви г҃а б҃а ѿц҃ь свои҆хъ. н̂о наи҆паче се́и҆ вы́шнѧа съдѣлалъ е҆сть въ́ градѣхъ і҆ѹ́диных̑·

7

и҆ блꙋди́ти сътворѝ ѻ҆битающих̑ въ і҆ерс̑҇лимѣ·

8

И҆ прельсти і҆ѹ́дꙋ, и҆ прїиде к немꙋ писа́нїе ѿ и҆лїѝ про̑҇рка гл҃ѧ. сїѧ рече г҃ь б҃ъ дв҃да ѿц҃а твое҆го. ꙗ҆́ко не ходи́лъ е҆си в пꙋтѝ і҆ѻ҆сафа́та ѿц҃а твое҆го, и҆ въ пꙋтехъ а҆́ссы цр҃ѧ і҆ѹ́дина. н̂о ходи́лъ е҆си въ пꙋтехъ цр҃еи і҆и҆л҃евыхъ. и҆ блꙋди́ти сътворилъ е҆си і҆ѹ́дꙋ. и҆ ѻ҆бита́ющихъ въ і҆ерс̑҇лимѣ, ꙗ҆́ко съблꙋ́ди до́мъ а҆ха́вовъ. и҆ бра́тїю твою̀ дом̑ ѿц҃а твое҆го, лꙋчши тебѐ поби́лъ е҆си·

9

Се г҃ь порази́тъ т̂ѧ ꙗ҆́звою вели́кою съ люд̑ми твои҆ми·

10

И҆ сн҃овъ твои҆хъ, и҆ же́нъ твои҆хъ. и вс̂ѧ ѹ҆крашенїѧ твоѧ̀. ты́ же и҆знемо́жеши строптивою бо́лезнїю чрева. до́ндеже и҆зыидꙋтъ внꙋтрънѧѧ твоѧ̀ ѿ дн҃їи до дн҃и, и҆ въздви́же г҃ь сꙋпроти́вꙋ на і҆ѻ҆ра́ма и҆ноплеме́нники и а҆ра́вовъ, и҆ мꙋ́рины, ѿ е҆фїѻ́пїѧ. и҆ възыидо́ша въ землю і҆ѹ́динꙋ и҆ премого́ша е҆ѧ̀, и҆стръго́ша же вс̂ѧ съкро́вища и҆же ѻ҆брѣто́ша въ домꙋ цр҃евѣ. найпаче же сн҃овъ е҆го, и҆ дще́ри е҆го и҆ жены е҆го·

11

И҆ не ѻ҆ста́сѧ е҆мꙋ сн҃ъ ток̑҇мо і҆ѻ҆хаз̑ меншїи сн҃овъ е҆го. и҆ над̑ всѣми си́ми пораѕѝ е҆го г҃ь. чре́ва бо́лезнїю неи҆сцѣ́лною. е҆гда же ѿ дн҃їи въ дн҃ь, и҆ е҆гда̀ прїиде час̑҇ дн҃їи. дв̂а дн҃и і҆ и҆зы́де чре́во е҆го съ бо́лезнїю, и҆ ѹ́мре въ раз꙽слабленїи лю́томъ·

12

И҆ не сътвори́ша е҆мꙋ лю́ди по ѻ҆бы́чаю сож꙽женїа слꙋжбы ꙗ҆ко творѧхꙋ большим̑ своим̑, и҆ л҃в, лѣтъ бысть е҆гда̀ црс̑҇твова́ти нача̀. и҆ и҃, лѣтъ црс̑҇твова̀ въ і҆ерс̑҇ли́мѣ. ходи же непра́во и҆ погребо́ша е҆го въ́ градѣ дв҃двѣ. ѻ҆баче не въ гро́бѣ црс̑҇комъ·