Ostroh Bible❧Друга книга хронік, розділ 20

1

По си́х же прїидо́ша сн҃ове моа́вли, и҆ сн҃ове а҆м꙽мо́ни, и҆ с ни́ми ѿ а҆м꙽мони́тъ, къ и҆ѻ҆сафа́тꙋ на ѻ҆полче́нїе, прїидо́ша же по слы̀ и҆ сказа́ша и҆ѻ҆сафа́тꙋ гл҃ющи. и҆де́тъ проти́вꙋ тебѐ вели́ко мно́жество ѿ тх̑ѣ мѣстъ и҆же замо́рїѧ сꙋть и҆ ѿ сѵрїѧ. и҆ с̂е състо́ѧтсѧ въ а҆сан꙽ѳама́рѣ и҆же е҆сть и҆е҆н꙽га́д꙽ди. и҆ѻ҆сафа́тъ же стра́хомъ ѹ҆страше́нъ, всего себѐ въдасть къ моле́нїю г҃а. и҆ проповѣда по́стъ въ все́и і҆ѹ҆де́и·

2

И҆ собра́нъ же е҆сть і҆ѹ́да къ моле́нїю г҃а. н̂о и҆ вс̂и ѿ посадовъ свои҆хъ прїидо́ша къ ѹ҆моле́нїю е҆го·

3

Є҆гда́ же ста́ше и҆ѻ҆сафа́тъ въ среди наро́да і҆ѹ́ды въ і҆ерс̑҇лі́мѣ в домꙋ̀ гн҃и предъ дворо́мъ скѷнїи, и҆ рече·

4

Ги҃ бж҃е ѿц҃ъ нашихъ, не ты̀ л̂и е҆си б҃ъ на нб҃си го́рѣ. и҆ властвꙋ́еши всѣми црс̑҇твы ꙗ҆зы́къ. и҆ в рꙋкꙋ твою е҆сть крѣпость и҆ си́ла. никто́же тебѣ мо́жетъ сꙋпроти́витисѧ, ни л̂и ты̀ е҆си б҃ъ нашъ и҆скорени́выи вс̂ѧ живꙋщаѧ в землѝ се́и, предъ людмѝ твои́ми і҆и҆л҃емъ·

5

И҆ да́лъ е҆си е҆ѧ̀ сѣмени а҆вра́млю възлю́бленомꙋ твое҆мꙋ въ вѣки. и҆ всели́ша же сѧ на не́и, и҆ ѹ҆строи́ша в не́и ст҃ительство и҆́мени твое҆мꙋ гл҃ющи·

6

А҆ще нападꙋтъ на́ ны ѕла́ѧ. мечь и҆ сꙋд꙽ и҆ гꙋби́тельство и҆ гла́дъ, ста́немъ предъ до́момъ симъ пред̑ тобо́ю, ꙗ҆́ко възва́но е҆сть и҆́мѧ твое в домꙋ̀ сем̑ и҆ възопїемъ к тебѣ̀. ѿ ско́рбеи нашихъ, и҆ ѹ҆слы́ши и҆ сп҃си насъ·

7

И҆ нн҃ѣ ѹ҆бо се сн҃ове а҆м꙽мони, и҆ моавли, и҆ гора̀ сеи́ръ, сквозе нѧ́же не и҆зво́лилъ е҆си і҆и҆л҃ю да проидꙋтъ, когда и҆схожа́хꙋ ѿ е҆гѷпта, н̂о ѹ҆клони́шасѧ ѿ ни́хъ, и҆ не ѹ҆би́ша их̑ и҆ с̂е сїи ѿ сꙋпроти́въ дѣлаю҆тъ, и҆ насилꙋ́ютсѧ и҆згони́ти насъ ѿ ѻ҆дръжа́нїѧ нашего е҆же преда́лъ е҆си намъ бж҃е нашъ·

8

Сего ради не сꙋди́ши и҆хъ, въ насъ б̂о нѣсть толи́ка крѣпость, да мо́жемъ семꙋ̀ мно́жествꙋ съпроти́вити. е҆же нападѐ на́ ны, н̂о и҆ не вѣмы чт̂о съдѣла́ти, и҆́мамы и҆мъ, н̂о ѻ҆́чи наши ѹ҆правлѧ́емъ к тебѣ̀, и҆ вс̂ѧ і҆ѹ҆де́а стоѧ́ше пред̑ гм҃ъ, и҆ ча́да и҆хъ, и҆ же́ны и҆хъ·

9

Бѣ же и҆ѻ҆зїи́ль сн҃ъ заха́рїи҆нъ, сн҃овъ ване́ѧ, сн҃овъ е҆гїиль сн҃овъ маѳа́нїѧ левѷтина, ѿ сн҃овъ а҆са́фовъ, на не́мже бы́сть дх҃ъ гн҃ь въ среди наро́да и҆ рече, вънмите весь і҆ѹ́да, і҆ и҆же ѻ҆бита́ете въ і҆ерс̑҇ли́мѣ. и ты̀ цр҃ь і҆ѻ҆сафа́тъ·

10

Сїѧ рече г҃ь ва́мъ, не хо́щꙋ не бо́итесѧ ни ѹ҆жаса́итесѧ сего мно́жества наро́да. нѣсть б̂о ва́ше ѻ҆плъче́нїе н̂о бж҃їе. заѹ́тра и҆дѣте проти́вꙋ их̑, и҆сходѧ́щи б̂о сꙋть по щѣ́ли и҆́менем꙽ а҆ви́съ, и҆ ѻ҆брѧ́щете и҆хъ на вер꙽хъ пото́ка и҆же е҆сть противꙋ пꙋстыни і҆е҆рꙋи́ль. не б̂о бꙋдетъ ва́мъ и҆же вое҆ва́ти, н̂о то́кмо съ ѹ҆пова́нїемъ сто́ите, и҆ ѹ́зрите по́мощъ гн҃ю на ва́съ. і҆ѹ́да і҆ерс̑҇лі́мъ не боитесѧ ни ѹ҆жаса́итесѧ, заѹ́тра и҆зыитѝ проти́вꙋ и҆хъ, и҆ г҃ь с ва́ми·

11

И҆ѻ҆сафа́тъ ѹ҆бо і҆ѹ́да и҆ вс̂и ѻ҆бита́ющеи въ і҆ерс̑҇лі́мѣ падо́ша просте́рти на́ землю пред̑ гм҃ъ и҆ поклони́шасѧ гв҃и·

12

Па́ки левѷти ѿ сн҃овъ каа́ѳовъ въста́ша, и҆ ѿ сн҃овъ кор꙽ре́ѻвъ хвали́ти г҃а б҃а і҆и҆л҃ева гла́сомъ великомъ въ высотꙋ̀. и҆ ѹ́трѣ въста́ша ра́но і҆ и҆зыдо́ша въ пꙋсты́ню ѳекꙋ́е. и҆ вънегда и҆сходи́ти и҆мъ, ста́въ и҆ѻ҆сафа́тъ по́средѣ и҆хъ и҆ възопѝ и҆ реч̑҇. ѹ҆слы́шите м̂ѧ мꙋжи і҆ѹ́дины, и҆ всѝ ѻ҆бита́ющїи въ і҆ерс̑҇лі́мѣ. вѣрꙋите въ г҃а б҃а вашего, и҆ ѹ҆вѣри́тесѧ, вѣрꙋите про̑҇рком꙽ е҆го, и҆ вс̂ѧ прїидꙋтъ преспѣва́ющи, и҆ съвѣтова̀ съ людмѝ, и҆ поста́ви ѱал꙽мопѣвци, и҆ хвалѧ́щихъ и҆сповѣда́тисѧ и҆ хвали́ти, ст҃аѧ, вънегда̀ и҆зыити проти́вꙋ си́лы·

13

И҆ гл҃ахꙋ и҆сповѣда́итесѧ гв҃и ꙗ҆́ко бл҃гъ ꙗ҆́ко въ вѣки млс̑҇ть е҆го. е҆гда́ же нача́ша хвале́нїѧ і҆ и҆сповѣда́нїѧ, ѻ҆братѝ г҃ь вое҆ва́ти сн҃овомъ а҆м꙽мо́нимъ на моа́ва и҆ горꙋ̀ сїи́ръ. и҆зъшед̑шихъ да ѻ҆полча́ютсѧ проти́вꙋ і҆ѹ́ды, и҆ пораже́ни сꙋть. и҆же сн҃ове а҆м꙽мо́ни и҆ моа́вли въста́ша сꙋпроти́вꙋ ѻ҆бита́ющих̑ въ горѣ̀ сїи́ри, да побїют̑ и҆х꙽ и҆ съкрꙋшат̑, и҆ ꙗ҆́ко сконча́ша на ѻ҆бита́ющих̑ въ сїи́ре·

14

Па́ки ѻ҆браще́ни проме́жꙋ собо́ю и҆сѣчахꙋсѧ ранами·

15

І҆ѹ́да же прїиде на созира́нїе ѿ пꙋсты́ни, и҆ възрѣ̀ и҆ ви́дѣ мно́жество, и҆ с̂е вс̂и ме́ртвы па́дше на́ землю. ниже бы́ти кое҆го и҆же сме́рти мо́глъ ѹ҆и҆тѝ·

16

І҆ и҆зы́иде и҆ѻ҆сафа́тъ и҆ вс̂и лю́ди с ни́мъ къ и҆знѧ́тїю и҆ съвлаче́нїю ме́ртвыхъ·

17

ѻ҆брѣто́ша же скота̀ мно́го и҆ ѻ҆дежа, и҆ коры́сти, и҆ съсꙋды предража́иша, и҆ въсхити́ша въ нихъ·

18

И҆ бы́ша събира́юще коры́сти, по трѝ дн҃и, ꙗ҆́ко многи бѧ́хꙋ. дн҃ѧ же четве́ртаго собра́хꙋсѧ въ ѹ́доль блс̑҇венїѧ. и҆б̂о тꙋ̀ блс̑҇виша г҃а·

19

Сего ра́ди прозва́ша мѣсто т̂о ѹ́доль блс̑҇венїа, даже до сего дн҃е, ѻ҆братишасѧ вс̂и мꙋжи і҆ѹ́дины, въ і҆ерс̑҇ли́мъ. и҆ѻ҆сафа́тъ во́жъ и҆хъ съ весе́лїемъ вели́кимъ·

20

Того ради чт̂о да́сть им̑ г҃ь ра́дость ѿ вра́гъ и҆х꙽ и҆ внидо́ша же въ і҆ерс̑҇ли́мъ съ ѱалтырѧми и҆ гꙋсльми и҆ трꙋба́ми въ до́мъ гн҃ь. и҆ бы́сть стра́хъ гн҃ь на вс̂ѧ црс̑҇тва зе́м꙽скаѧ, е҆гда слы́шати им̑ ꙗ҆́ко ѻ҆полъчи́сѧ г҃ь сꙋпроти́вꙋ враго́в꙽ і҆и҆л҃евыхъ·

21

Ѹ҆поко́и же сѧ црс̑҇тво и҆ѻ҆сафатово. и҆ възда́сть е҆мꙋ г҃ь ми́ръ по ѻ҆́крс̑҇тъ. и҆ црс̑҇твова̀ и҆ѻ҆сафат̑ на і҆ѹ҆де́и сы́и. л҃е лѣтъ, е҆гда̀ цр҃ьство прїѧ̀·

22

И҆ к҃е, лт̑ѣ, црс̑҇твова̀ въ і҆ерс̑҇ли́мѣ·

23

І҆ и́мѧ ма́тери е҆го а҆зꙋ́ва дщ̂и сал꙽лїи́на. и҆ хожда́ше въ пꙋти ѿц҃а свое҆го а҆́с꙽сы·

24

И҆ не ѹ҆клони́сѧ ѿ него творѧ́ше и҆же ѹ҆го́дна бѧ́хꙋ пред̑ гм҃ъ. ѻ҆ба́че вы́шнѧѧ не и҆зѧ́лъ, и҆ е҆ще лю́дїе не ѹ҆пра́виша срд̑ца свое҆го къ г҃ꙋ б҃ꙋ ѿц҃ъ свои҆хъ. и҆ про́чаѧ же дѣѧ́нїѧ и҆ѻ҆сафатова прь́ваѧ и҆ послѣднѧѧ, с̂е пи́сана сꙋть въ словесех̑ і҆ѹ́ѧ сн҃а а҆нанїи́на, и҆же написа̀ кни́гꙋ цр҃еи і҆и҆л҃евъ·

25

И҆ посемъ нача̀ прїѧтельство и҆ѻ҆сафа́тъ, цр҃ь і҆ѹ́динъ. съ ѻ҆хозїею цр҃емъ і҆и҆л҃евым̑. и҆ ѻ҆нъ безаконова̀. сего ра́ди, е҆же сътворѝ ѿи҆тѝ къ немꙋ, да сътворѧ́тъ кораблѝ и҆же и҆дꙋтъ въ ѳарси́съ. и҆ сътвори́шаж̑ во́иско морско́е въ а҆зїѻ́нъ гаверъ·

26

Про̑҇рчествова́ же е҆лїезе́ръ сн҃ъ додїа́ ѿ мареси́са на и҆ѻ҆сафа́та гл҃ющи, и҆же и҆мѣлъ е҆си любо́вь съ ѻ҆хозїею поразѝ г҃ь лю́ди твоѧ̀. и҆ съкрꙋшѝ кораблѧ̀ твоѧ̀. и҆ не можа́ше пои҆тѝ въ ѳарси́съ·