Ostroh Bible❧Друга книга хронік, розділ 26

1

Взѧ́ша же вс̂и лю́дїе і҆ѹ́дини сн҃а е҆го ѻ҆зїю, ѻ҆́нже бѣ̀ лѣтъ, ѕ҃і. и҆ поста́виша е҆го цр҃ѧ въ мѣ́сто а҆масїѧ ѿц҃а е҆го, то́и созда̀ е҆лаѳ̑҇. и҆ се́и възвратѝ е҆го вла́сти і҆ѹ́динѣ по ѹ҆спе́нїи цр҃ѧ съ ѿц҃ы е҆го, ѕ҃і ти лѣтъ бы́сть і҆ѻ҆зїѧ, е҆гда̀ црс̑҇твова́ти нача̀. и҆ н҃в, лѣтѣ црс̑҇твова̀ въ і҆ерс̑҇ли́мѣ·

2

І҆ и́мѧ мт҃ри е҆го, и҆е҆хилїѧ, ѿ і҆ерс̑҇ли́ма, сътворѝ что бысть прѧ́мо въ ѻ҆́чїю гн҃и. по всѧ и҆же сътворѝ а҆масїѧ ѿц҃ъ е҆го. и҆ бѣ възыска́ѧ г҃а въ дн҃и заха́рїѧ разꙋмѣю́щаго въ стра́сѣ гн҃и, и҆ въ дн҃и е҆го възыска̀ г҃а, и҆спра́ви е҆го въ всх̑ѣ г҃ь. и҆зы́иде и҆ ѻ҆полчи́сѧ проти́вꙋ и҆ноплеме́нникомъ и҆ разорѝ стѣнꙋ̀ ге́ѳскꙋ. и҆ стѣнꙋ̀ и҆а҆вни́въ и҆ стѣнꙋ̀ а҆зо́та·

3

И҆ създа́ же гра́дъ въ а҆зо́тѣ и҆ въ и҆ноплеме́нницех̑, и҆ помо́же е҆мꙋ б҃ъ проти́вꙋ и҆ноплеме́нникомъ и҆ проти́вꙋ а҆ра́вомъ, и҆же ѻ҆бита́хꙋ въ скала́хъ, и҆ проти́вꙋ мине́ѻ҆мъ, и҆ да́ша мине́и да́нь ѻ҆зїе҆ви. и҆ прослы̀ и҆́мѧ е҆го да́же до вхо́да е҆гѷпет꙽скаго, поне́же ѹ҆крѣпи́сѧ до высоты̀, създа́ же ѻ҆зїѧ столпы̀ въ і҆ерс̑҇лі́мѣ и҆ над̑ вра́ты ѹ҆́гла. и҆ над̑ враты до́лними. и҆ про́чїи в то́и стѣнѣ̀ страны̀ ѹ҆крѣпѝ и҆хъ и҆ ѹ҆стро́и столпы̀ въ пꙋсты́ни. і҆ и҆скопа̀ кла́дези мно́ги.

4

Того ра́ди ꙗ҆́же и҆мѧ́ше мно́ги скоты̀, толико в꙽ поле́хъ ꙗ҆́кож̑ и҆ въ пꙋсты́ни·

5

Виногра́ды же и҆мѣ̀ и҆ виногра́дники на горах̑ и҆ въ карми́лѣ, бѣ̀ б̂о чл҃къ полетѧжа́тельствꙋ вдан̑҇. бы́сть же ѻ҆зї́и си́ла творѧ́щїѧ бра́нь, и҆же и҆схожд̑ахꙋ къ ѻ҆полъченїю на́ брань. и҆ въходѧ́щи по чинꙋ̀ въ число̀·

6

И҆ б̂ѣ число̀ и҆хъ под̑ рꙋкꙋ і҆и́лѧ пи́сарѧ и҆ маа҆сїѧ сꙋдїи, и҆ под̑д̑ рꙋкꙋ а҆нанї́и. и҆же бѣ̀ ѿ вое҆во́дъ цр҃евых̑. все́ же число̀ нача́лником꙽ по ѻ҆би́телем̑ свои҆мъ мꙋже́и крѣпкихъ на́ брань ҂в҃, х҃·

7

И҆ под ни́ми всѣхъ во́и ҂т҃. ҂з҃. и҆ е҃ со́тъ·

8

Сїи творѧ́хꙋ бра́нь въ си́ле крѣ́пцѣ. ѿ цр҃ѧ противꙋ сꙋпоста́тъ вое҆ва́хꙋ. ѹ҆гото́ва же и҆мъ ѻ҆зїѧ все́и си́ле, щиты, и҆ копїѧ, и҆ шле́мы и҆ бро́нѧ, лꙋки же и҆ пра́щи на мета́нїе ка́менїѧ, и҆ сътворѝ въ і҆ерс̑҇ли́мѣ разли́чныѧ ви́ды хꙋдо́жества ѹ҆хꙋдожестве́нны. е҆же бы́ти въ столпѣхъ, и҆ въ ѹ҆́глх̑ѣ стѣна́мъ да ме́щꙋтъ стрѣлы, и҆ ка́менїѧ велїѧ. и҆ слы́шано бы́сть хꙋдо́жество е҆го до дале́че. занѐ ѹ҆диви́сѧ помага́ти е҆мꙋ г҃ь до́ндеже ѹ҆крѣпи́сѧ, и҆ е҆гда ѹ҆крѣпи́сѧ възъдвижесѧ срд̑це е҆го, на погꙋбле́нїе е҆го и҆ ѻ҆би́дѣ г҃а б҃а свое҆го, и҆ вни́де въ цр҃ковь гн҃ю покади́ти хотѧ̀ надъ ѻ҆лтарем̑ ѳимїа́ма·

9

И҆ вни́де по нем̑ заха́рїѧ сщ҃енник꙽, и҆ с ним̑ сщ҃енницы гн҃и, п҃, мꙋжеи крѣпча́ишихъ. сꙋпроти́вишасѧ цр҃еви и҆ѻ҆зїеви и҆ реко́ша е҆мꙋ, нѣсть твои чи́нъ і҆ѻ҆зїе да кади́ши ѳїмїа́момъ гв҃и, н̂о сщ҃енникомъ т̂о е҆сть сн҃овомъ а҆аро́нимъ и҆же ѻ҆сщ҃ени сꙋть к томꙋ̀ ѻ҆бы́чаю слꙋже́нїѧ да ка́дѧтъ. и҆зыидѝ ѿ сщ҃енъства ꙗ҆́ко ѿстꙋпи́лъ е҆си ѿ г҃а. и҆же не вмѣни́тсѧ тебѣ въ славꙋ т̂о ѿ г҃аб҃а. прогнѣ́ва же сѧ і҆ѻ҆зїѧ, и҆ держа́щи в рꙋкꙋ е҆го кади́ло да кадитъ въ хра́мѣ, и҆ вънегда раз̑ꙗ҆ри́сѧ ѻ́нъ на жръцы гн҃ѧ до́мꙋ. и҆ а́бїе в꙽зошла̀ проказа на чело̀ е҆го. пред̑ сщ҃енники в домꙋ̀ гн҃и, на ѻ҆лтарѝ ѳемїа́нномъ. и҆ е҆гда́ же ѹ҆зрѣ е҆го заха́рїѧ а҆рхїе҆ре́и. и҆ вс̂и про́чїи сщ҃ен꙽ницы ви́дѣша и҆ сѐ прокаже́нъ на челѣ̀ е҆го·

10

И҆згна́ша е҆го ѿтꙋдꙋ, н̂о и҆ то́и ѹ҆бо т꙽ща́сѧ и҆зыитѝ. ꙗ҆́ко ѻ҆бличѝ е҆го г҃ь·

11

Бы́сть же ѻ҆зїѧ цр҃ь прокаженъ да́же до дн҃е смр҃ти е҆го и҆ ѻ҆бита́ше в домꙋ̀ ѿлꙋче́нѣ по́лнъ прокаже́нїѧ в че́мъ и҆згна́нъ бы́сть ѿ до́мꙋ гн҃ѧ·

12

І҆ и҆ѻ҆а҆ѳа́мъ сн҃ъ е҆го держа̀ црс̑҇тво е҆го сꙋдѧ̀ лю́ди зем̑стїи и҆ про́чаѧ же словеса̀ ѻ҆зїи пе́рвыѧ и҆ послд̑ѣнѧа, напи́саны ѹ҆ і҆са́їа сн҃а а҆мо́сова про̑҇рка. ѹ҆спе́ же и҆ѻ҆зїѧ съ ѿц҃ы свои҆ми, и҆ не погребо́ша е҆го въ по́лѣ црс̑҇кихъ гробо́въ, того ра́ди и҆же бы́сть прокаженъ. и҆ црс̑҇твоваж̑ и҆ѻ҆а҆ѳа́мъ сн҃ъ е҆го в него̀ мѣсто·