Ostroh Bible❧Друга книга хронік, розділ 27

1

Два́десѧ́ть и҆ пѧтѝ лѣтъ бы́сть и҆ѻ҆а҆ѳа́мъ е҆гда̀ црс̑҇твова́ти нача̀, и҆ ѕ҃і, лѣтъ црс̑҇твова̀ въ і҆ерс̑҇ли́мѣ и҆́мѧ мт҃ри е҆го и҆е҆рꙋса дщѝ садо́кова, и҆ сътвори́ же чт̂о право е҆сть пред̑ гм҃ъ по всѧ и҆же сътворѝ и҆ѻ҆зїѧ ѿц҃ъ е҆го. ра́звѣ чт̂о не вни́де въ цр҃ковь гн҃ю. и҆ е҆щѐ лю́дїе съгрѣша́хꙋ. то́и създа̀ вра́та до́мꙋ гн҃ю высо́ка, и҆ въ стѣнѣ е҆го положѝ ѻ҆рꙋжїѧ. и҆ гра́ды же създа̀ на горахъ і҆ѹ́диныхъ, и҆ на лѣсехъ дворы̀ и҆ столпы̀·

2

И҆ тои ѻ҆полчи́сѧ противꙋ цр҃ѧ сн҃овъ а҆ммо́нь. и҆ ѻ҆долѣ̀ е҆го. и҆ дава́хꙋ е҆мꙋ сн҃ове а҆м꙽мо́ни на е҆дїно лѣто по р҃ тала́нтъ сребра̀. и҆ ҂і҃. коры̀ мѣры пшени́цы, и҆ толико же мѣръ ꙗ҆чме́нѧ сїѧ е҆мꙋ приноша́ше цр҃ь сн҃овъ а҆м꙽мо́нь на лѣто, въ а҃ е лѣто, и҆ в҃ е, и҆ г҃ е·

3

И҆ ѹ҆крѣплен̑҇ же е҆сть и҆ѻ҆а҆ѳа́мъ, того ра́ди чт̂о ѹ҆правлѧ́ше пꙋтѝ своѧ пред̑ гм҃ъ бм҃ъ свои҆мъ. и҆ про́чаѧ же словеса̀ и҆ѻ҆а҆наѳа́на и҆ всѣхъ ѻ҆полче́нїи е҆го и҆ дѣла пи́сана сꙋть въ кни́ѕѣ цр҃ь і҆ѹ́диных̑ і҆и҆л҃евыхъ, к҃е, лѣтъ бысть, е҆гда̀ црс̑҇твова́ти нача̀, и҆ ѕ҃і, лт̑ѣ црс̑҇твова̀ въ і҆ерс̑҇ли́мѣ, ѹ҆спе́ же и҆ѻ҆а҆ѳа́мъ съ ѿц҃ы свои́ми. и҆ погребо́ша е҆го въ́ градѣ двд҃вѣ. и҆ црс̑҇твова̀ а҆ха́зъ сн҃ъ е҆го в него мѣсто·