Ostroh Bible❧Друга книга хронік, розділ 29

1

Іе҆зекїѧ е҆гда црс̑҇твова́ти нача̀, к҃е, лѣтъ бы́сть, и҆ к҃ѳ, лѣтъ црс̑҇твова̀ въ і҆ерс̑҇ли́мѣ. и҆́мѧ мт҃ри е҆го а҆вїѧ дщѝ заха́рїи. сътвори́ же ѹ҆го́дно пред̑ гм҃ъ, по всѧ̀ и҆же творѧ́ше дв҃дъ ѿц҃ъ е҆го. и҆ бы́сть е҆гда ста̀ на црс̑҇твѣ е҆го, въ мс̑҇ць прь́выи, ѿвръзе две́ри до́мꙋ гн҃ѧ. и҆ ѻ҆бновѝ и҆хъ и҆ въведѐ сщ҃ен꙽ники и҆ левѷты. и҆ събра̀ и҆хъ на площа́ди въсто́чнѣи. и҆ рече къ ни́мъ. ѹ҆слы́шите м̂ѧ левѷти и҆ ѻ҆ст҃итесѧ нн҃ѣ и҆ ѻ҆чи́стите до́мъ г҃а б҃а ѿц҃ь на́шихъ. і҆ и҆знеси́те вс̂ю нечистотꙋ̀ ѿ ст҃ительства·

2

Ꙗ҆́ко съгрѣши́ша̑ ѿц҃ы на́ши, и҆ сътвори́ша лꙋка́во предъ гм҃ъ бм҃ъ на́шимъ. и҆ ѻ҆ста́виша е҆го, и҆ ѿврати́ша лицѐ своѐ ѿ жили́ща г҃а б҃а на́шего. и҆ възда́ша̑ хребет̑, и҆ затвори́ша вра́та хра́мꙋ, и҆ погаси́ша свѣти́лники. и҆ ѳимиа́ма же не вож꙽го́ша, и҆ всесъж꙽же́нїѧ не принесо́ша ст҃омꙋ б҃ꙋ і҆и҆л҃евꙋ·

3

Соподвиго́ша же гнѣвъ гн҃ь на і҆ѹ҆де́ю и҆ на і҆ерс̑҇ли́мъ, и҆ преда́сть и҆хъ в꙽ подвиже́нїе и҆ погꙋбле́нїе, и҆ на звизда́нїе. ꙗ҆́ко вы̀ ви́дите ѻ҆чи́ма ва́шими, и҆ с̂е падо́ша ѿт̑ц҃ы на́ши мечемъ, и҆ сн҃ове на́ши и҆ дще́ри на́ши и҆ сꙋпрꙋги наши плѣне́ни ве́дени сꙋть въ зе́млю не свою̀, и҆ нн҃ѣ ѹ҆бо сꙋть в не́и·

4

И҆ нн҃ѣ ѹ҆бо положи́те на срд̑ца ва́ша да поста́вите завѣт꙽ съ гм҃ъ бм҃ъ і҆и҆л҃евымъ. и҆ ѿвратит̑ ѿ на́съ гнѣвъ ꙗ҆́рости свое́ѧ·

5

И҆ н҃нѣ не лиша́итесѧ ꙗ҆́ко вас̑҇ и҆збра̀ г҃ь да стои҆тѐ пред ним̑, и҆ слꙋж́ите е҆мꙋ и҆ бы́ти е҆мꙋ слꙋжа́ще и҆ кадѧ́ще·

6

И҆ въста́ша левѷти мааѳ̑҇ сн҃ъ а҆масїев̑҇ і҆ и҆ѻ҆и́ль сн҃ъ заха́рїев̑҇ ѿ сн҃овъ каа́дъдовых̑ и҆ ѿ сн҃овъ мерарїи́ных̑. кис̑҇ сн҃ъ а҆вдїев꙽, і҆ а҆за́рїа сн҃ъ и҆лае҆и́левъ. и҆ ѿ сн҃ов꙽ же герсо́на. и҆ѻ҆дад̑ сн҃ъ земна̀. и҆ ѻ҆а҆дамъ, сїи сн҃ы и҆ѻ҆а҆ха́и, ѿ сн҃овъ е҆лисафа́мъ. сама́ри. і҆ и҆и́ль·

7

И҆ ѿ сн҃овъ же а҆са́фовыхъ. заха́рїѧ, и҆ маѳ꙽ѳа́нїѧ. и҆ е҆ще ѿ сн҃овъ а҆мъма́нь і҆и́ль, и҆ семе́и. н̂о и҆ ѿ сн҃овъ и҆диѳꙋмль. самаѳїѧ, и҆ ѻ҆зїи́ль·

8

Събра́ша же бра́тїю свою̀, и҆ ѻ҆ст҃ишасѧ, и҆ внидо́ша̑ по за́повѣди цр҃евѣ и҆ по повеле́нїю гн҃ю да ѻ҆чи́стѧт̑ дом̑ бж҃їи сщ҃ен꙽ницыж̑ внидо́ша внꙋтрь цр҃кви гн҃ѧ да ѻ҆чи́стѧт̑ ю҆̀ и҆ снесо́ша всю̀ нечистость ю҆́же внꙋтрї до́мꙋ гн҃ѧ наи҆до́ша, и҆ въ дворѣ̀ до́мꙋ гн҃ѧ. е҆же взѧ́ша левѷти и҆знесо́ша к пото́кꙋ ке́дрьскꙋ во́нъ, и҆ нача́ша же въ а҃ дн҃ь мс̑҇ца но́ваго а҃ го ѻ҆чища́ти. и҆ въ дн҃ь и҃ того́ж꙽ мс̑҇ца внидо́ша въ притво́ръ до́мꙋ цр҃кви гн҃ѧ, ѻ҆чи́стиша же цр҃ковь гн҃ю въ дн҃ь и҃, и҆ въ дн҃ь ѕ҃і, мс̑҇ца того́же и҆же нача́ша съврьши́ша. и҆ внидо́ша внꙋтрь къ і҆е҆зекїи цр҃ю и҆ реко́ша к немꙋ ѻ҆чи́стихомъ весь до́мъ бж҃їи и҆ ѻ҆лта́рь вс̂есъж꙽же́нїѧ и҆ сосꙋды е҆го и҆ стол̑҇ предложе́нїѧ съ всѣмѝ съсꙋды е҆го и҆ вс̂ѧ сосꙋды цр҃кви ꙗ҆же ѻ҆сквернѝ цр҃ь а҆ха́зъ въ црс̑҇тво своѐ въ ѿстꙋпле́нїи свое́мъ·

9

И҆ с̂е ѹ҆гото́вана сꙋть и҆ ѻ҆чище́на вс̂ѧ пред̑ ѻ҆лтаре́мъ гн҃имъ·

10

И҆ въста́в же ѕѣло ра́но і҆е҆зекїѧ цр҃ь и҆ събра̀ всѧ̀ нача́лники гра́да и҆ възы́иде в до́мъ гн҃ь. и҆ принесѐ ю҆́нець. з҃, и҆ ѻ́венъ, з҃, а҆́гнец̑҇ з҃, и҆ козе́лъ ѿ ко́зъ за грѣхѝ, за цр҃ѧ, за сщ҃енїе, и҆ за і҆и҆л҃ѧ. рече же сщ҃ен꙽никомъ сн҃омъ а҆аро́ним꙽, и҆ да възы́идꙋтъ на ѻ҆лта́рь гн҃ь жренїѧ те́лча, ѹ҆би́ша б̂о ю҆́нець и҆ взѧ́ша кро́вь сщ҃енницы. и҆злїѧ́ша т̂ꙋ на ѻ҆лта́рь, и҆ ѹ҆би́ша е҆щѐ ѻ҆́вен̑҇ и҆ кро́́вь на ѻ҆лта́рь възлїѧ́хꙋ. и҆ пожроша а҆́гнець и҆ възлїѧ́ша на ѻ҆лта́рь кро́вь и҆ приведо́ша козе́лъ за грѣхи пред̑ цр҃ѧ и҆ цр҃кви, възложи́ша же рꙋки своа на них̑, и҆ пожро́́ша их̑ сщ҃еницы и҆ покропи́ша кро́вїю их̑ пред̑ ѻ҆лтарем̑ и҆ ѻ҆чи́стиша за грѣхѝ всего̀ і҆и҆л҃ѧ. занѐ за всего і҆и҆л҃ѧ повелѣ̀ цр҃ь всесож̑же́нїе за грѣхѝ пожре́ти. поста́ви же левѷты в домꙋ гн҃и, съ ким̑ва́лы, и ѱалты́рми, и҆ гꙋсльмѝ по за́повѣди двд̑а цр҃ѧ и га́да ви́дѧщаг̑҇ и҆ наѳа́на про̑҇рка съ цр҃ем̑. ꙗ҆́ко гн҃е повелѣнїе быс̑҇ рꙋка́ма про̑҇ркъ е҆го. ста́ша же левѷти держа́щи ѻ҆гра́ны двд҃вы, и҆ сщ҃енницы трꙋбы. и҆ повелѣ і҆е҆зекїа да принесꙋтъ всесож꙽же́нїѧ на ѻ҆лта́рь и҆ е҆гда же приноша́хꙋсѧ всесъж꙽же́нїѧ нача́ша хвалы̀ пѣти гв҃и. и҆ звꙋча́ти трꙋба́ми, и҆ в ро́зныѧ ѻ҆рга́ны и҆же дв҃дъ цр҃ь і҆и҆л҃евъ ѹ҆гото́ва. и҆ пѣвцы̀ и҆ тїи и҆же держа́хꙋ трꙋбы бѣша ѹ҆ строе́нїи свое҆мъ пою҆ще, до́ндеже съвръши́шасѧ всесъж꙽же́нїѧ. е҆гда́ же сконъча́но бы́сть приноше́нїе, прекло́н꙽сѧ цр҃ь и҆ вси и҆же бѧ́хꙋ с ни́мъ. и҆ поклони́шасѧ гв҃и. повелѣ же і҆е҆зекїѧ цр҃ь и҆ кн҃ѕи левѷтьстїи да въсхва́лѧтъ г҃а словесы̀ двд҃выми і҆ и҆а҆сафа про̑҇рка и҆же хвали́ша г҃а въ весе́лїи и҆ падоша и поклони́шасѧ гв҃и·

11

І҆е҆зекїѧ же па́ки сїѧ приложѝ, и҆ рече и҆спо́лните нн҃ѣ рꙋки ва́ша г҃ꙋ, и҆ приведи́те и҆ приноси́те жрътвы и҆ хвалы̀ в домꙋ гн҃и. и҆ принесѐ всѐ мно́жество жрътвы и҆ хвалы въ до́мъ гн҃ь. и҆ всѧк꙽ и҆же бл҃говолѝ срд̑цемъ всесъж꙽же́нїѧ и҆ бы́сть число̀ всесъж꙽же́нїи ꙗ҆́же принесѐ събра́нїе ю҆́нець, о҃, ѻ҆́венъ р҃, а҆́гнець, и҃ со́тъ. всѧ̀ сїѧ гв҃и и҆ ѻ҆ ѻ҆чище́нїи те́лцовъ, х҃. и҆ ѻ́вец꙽ ҂г҃·

12

Но сщ҃енницы ѹ҆бо не мно́ѕи бѧ́хꙋ, и не можа́хꙋ ѻ҆дира́ти ко́жъ всесож̑же́нїѧ гдѣ̀ и҆ левѷти и҆ бра́тїа и҆хъ помого́ша и҆мъ, дондеже и҆спо́лнисѧ дѣло. и҆ дон꙽деже ѻ҆ст҃ишасѧ жръцы̀.

13

Левѷти б̂о легча́ишимъ чи́номъ ѻ҆ст҃ишасѧ не́же сщ҃енницы занѐ бы́ша всесъжъже́нїѧ мно́га тꙋка съвръшенїа сп҃сенїѧ, и҆ жрътвы вс̂есъж꙽же́нїѧ·

14

И҆ съврьше́на ес̑҇ слꙋжба до́мꙋ гн҃ѧ, възвесели́ же сѧ і҆е҆зекїѧ и҆ вс̂и лю́дїе. и҆ того ра́ди е҆же слꙋже́нїе гн҃е бы́сть и҆спо́лнено. внеза́пꙋ б̂о сътвори́ти бы́ти и҆ ѹ҆го́дно бы́сть·