Ostroh Bible❧Друга книга хронік, розділ 28

1

Два́десѧти и҆ е҃ тѝ лѣтъ б̂ѣ а҆ха́зъ е҆гда црс̑҇твовати нача̀. и҆ ѕ҃і лт̑ѣ црс̑҇твова̀ въ і҆ерс̑҇ли́мѣ. не сътворѝ пра́во пред̑ гм҃ъ, ꙗ҆́ко дв҃дъ ѿц҃ъ е҆го. н̂о ходѝ въ пꙋтѝ цр҃еи і҆и҆л҃евыхъ. н̂о и҆ ѻ҆́бразы и҆зваѧ́ны сътвори, і҆ и́доломъ и҆хъ пожрѐ. въ землѝ е҆до́мли, и҆ проведѐ сн҃овъ свои҆хъ сквозѣ ѻ҆́гнь по ме́рзостѧ́хъ ꙗ҆зы́къ и҆хже ѹ҆бѝ г҃ь въ прише́ствїи сн҃овъ і҆и҆л҃евъ. ѻ҆сщ҃а же ѳимїа́мъ и҆ съжига́ше на высо́ких̑ и҆ на хол̑҇мѣх꙽·

2

И҆ под̑ всѧ́кимъ дре́вомъ ли́ствѧным̑. и҆ преда́сть же е҆го г҃ь б҃ъ е҆го в рꙋкꙋ цр҃ѧ сѷрска. и҆же поразѝ е҆го, вели́к же плѣнъ взѧ̀ ѿ е҆го црс̑҇тва. и҆ приведѐ в дама́скъ, и҆ въ рꙋки цр҃ѧ і҆и҆л҃ева преда̀ е҆го, и҆ пораже́нъ ꙗ҆́звою вели́кою, и҆ плени́ша е҆го. и҆ ѹ҆би́ же факе́е сн҃ъ ромелїе́въ цр҃ь і҆и҆л҃евъ ѿ і҆ѹ́ды, ҂р, въ дн҃ь е҆ді́нъ всѣхъ мꙋже́и бра́нниковъ. того ради и҆же ѻ҆ста́виша г҃а б҃а ѿц҃ъ свои҆хъ·

3

Того́ же вре́мени ѹ҆бѝ зе́хри мꙋжъ си́ленъ ѿ е҆фрема а҆масїю сн҃а цр҃ева и҆ е҆врика́ма вое҆во́дꙋ до́мꙋ е҆го, и҆ е҆лка́на же вто́раго ѿ цр҃ѧ·

4

Плени́ша же сн҃ове і҆и҆л҃еви ѿ братїи свои҆хъ ѻ҆смь со́тъ же́нъ, ѻ҆́трокъ и҆ дв҃ицъ. плѣнъ мно́гъ приведо́ша ѿ нихъ в самарїю, в꙽ то времѧ бѣ̀ т̂ꙋ про̑҇рк꙽ гн҃ь и҆́менемъ ѻ҆ди́дъ и҆же и҆зыиде въ срѣте́нїе во́емъ грѧдꙋщимъ въ самарїю, и҆ рече и҆мъ. с̂е гнѣвъ г҃а б҃а ѿц҃ъ на́ших꙽, проти́вꙋ і҆ѹ́ды, преда̀ и҆хъ в рꙋки ва́ша, и҆ ѹ҆би́сте и҆хъ немлс̑҇рдно. тако да до нбс̑҇и дости̂гнꙋ, ва́ше немрс̑҇дїе, и҆ нн҃ѣ сн҃ове і҆ѹ́дини і҆ерс̑҇лимовы хощетъ вамъ под̑ни́зити въ рабы̀ и рабы́нѧ не се́ ли а҆зъ е҆смь с ва́ми, свѣдѣтел̑҇ствова́ти г҃ꙋ б҃ꙋ ва́шемꙋ. н̂о слы́шите совѣтъ мо́и, и҆ ѿведи́те плѣне́ныхъ и҆хже и҆зведо́сте ѿ бра́тїѧ ва́шеѧ, ꙗ҆́ко вели́ка ꙗ҆́рость гн҃ѧ наста́нет̑ ва́мъ, и҆ въста́ша б̂о мꙋжи ѿ нача́лникъ сн҃овъ е҆фрѣмль а҆за́рїѧ сн҃ъ и҆ѻ҆н꙽на́нь. и҆ варахїѧ сн҃ъ васал꙽лимо́ѳ꙽, е҆зекїѧ сн҃ъ селлꙋмовъ, и҆ а҆масїѧ сн҃ъ е҆л꙽да́и, проти́вꙋ ты́мъ и҆же грѧдꙋтъ ѿ ѻ҆плъче́нїѧ, и҆ реко́ша и҆мъ не възведите зд̂ѣ плѣне́нїѧ къ ва́мъ занѐ съгрѣши́хомъ, г҃ꙋ. почт̂о в̂ы хо́щете приложи́ти къ грѣхомъ на́шимъ. и҆ ве́тхаѧ съвокꙋпи́ти безако́нїѧ наша, вели́къ б̂о грѣхъ нашъ и҆ гнѣвъ и҆ ѧ́рость гн҃ѧ на і҆и҆л҃ѧ. и҆ ѻ҆ста́виша же мꙋ́жи і҆и҆л҃евы и҆ бран̑҇ницы плѣнъ и҆ вс̂ѧ ꙗ҆́же в꙽зѧ́ша предъ нача́лники и҆ пред̑ всѣмъ мно́жестомъ и҆ ста́ша же мꙋжи и҆же назва́шасѧ въ и҆мѧ гн҃е·

5

И҆ в꙽зе́млюще плѣне́ных̑ и҆ вс̂и и҆же на́зи бѧ́хꙋ ѻ҆блеко́ша ѿ коры́стеи, е҆гда́ же ѻ҆дѣѧ́хꙋ и҆хъ, и҆ ѻ҆бꙋша и҆ честь творѧхꙋ бра́шномъ и҆ пи́тїемъ, и҆ пома́заша же ради трꙋда, и҆ възда́ша и҆мъ под̑ѧ҆рем̑ники ко́ждо и҆же ходи́ти не мого́ша, и҆ бѣша сла́бы тѣломъ, възложи́ша и҆хъ на ско́тъ и҆ ѿведо́ша въ е҆рихо́нъ гра́дъ фини́ческїи къ бра́тїи и҆хъ. и҆ възврати́ша в꙽ самарїю. въ вре́мѧж̑ ѻ҆́но посла́лъ цр҃ь а҆ха́зъ къ цр҃ю а҆сѷрїискꙋ. просѧщи по́мощи е҆мꙋ, и҆ въ ѻ҆но́мъ смѧте́нїи съпроти́вишасѧ и҆дꙋме́ане, и҆ порази́ша мно́ги ѿ і҆ѹ́ды. и҆ взѧ́ша плѣнъ вели́к꙽, І҆ и҆ноплн꙽е́ницы приложи́шасѧ по гра́дом̑ пол꙽скимъ и҆ къ полꙋдни і҆ѹ҆де́и·

6

И҆ взѧ́ша ваѳсами́съ, и҆ ꙗ҆же в домꙋ̀ бж҃їи, и҆ ꙗ҆́же в домꙋ̀ црс̑҇комъ, и҆ кнѧѕе́и. и҆ да́ша цр҃ю а҆и҆ло́нъ. и҆ гадирон̑҇ и҆ сок꙽хо́хъ, и҆ вс̂ѧ ꙗ҆́же ѻ҆́крс̑҇тъ е҆го. и҆ гам꙽за́и съ под̑селе́нїи е҆го. и҆ ѳа́мнꙋ съ прилежа́щими поса́дами е҆го, и҆ всели́шасѧ т̂ꙋ, ꙗ҆ко смирѝ г҃ь і҆ѹ҆де́ю ра́ди а҆ха́за цр҃ѧ і҆ѹ́дина. того ради и҆же ѻ҆бнажи́сѧ е҆го по́мощи. и҆ въ ѹ҆ничиже́нїи и҆мѧ́ше г҃а·

7

И҆зведе же проти́вꙋ е҆мꙋ ѳеглаа҆таѳаласа́ра цр҃ѧ а҆сѷрїиска и҆же ѻ҆ѕлобѝ е҆го. и҆ преселѝ и҆же бѧ́хꙋ въ дама́сцѣ въ мадїа́мы. и҆ ѿ сѷрїи преселѝ въ дама́скъ пребыва́ти·

8

И҆ е҆ді́но сꙋпротивѧ́щи ѿпꙋстѝ. сего ра́ди взѧ̀ а҆ха́зъ сꙋщаѧ въ домꙋ̀ гн҃и и҆ в домꙋ̀ црс̑҇комъ и҆ ѹ҆ нача́лниковъ. и҆ дасть цр҃ю а҆сѷрїискꙋ, и҆ не бы́сть на помощ꙽ е҆мꙋ. н̂о на́ипаче къ печа́ли е҆го·

9

И҆ приложѝ ѿстꙋпи́ти ѿ г҃а, рече б̂о цр҃ь а҆ха́зъ възыщꙋ̀ бого́въ дама́сковыхъ бїю́щих̑ м̂ѧ, и҆ рече, бо́ѕи цр҃ѧ а҆сѵ́рїика пособлѧ́ютъ и҆м꙽, и҆ сим̑ пожрꙋ̀ и҆ а́зъ чт̂о, и҆ бꙋдꙋтъ м̂и въ по́мощъ сїи. н̂о сїи бы́ша къ паденїю е҆го и҆ всего̀ і҆и҆л҃ѧ·

10

И҆ вы́ставилъ а҆ха́зъ вс̂ѣ сосꙋды до́мꙋ бж҃їѧ. и҆ съкрꙋшѝ их̑ и҆ затверди́лъ вра́та до́мꙋ бж҃їѧ·

11

И҆ сътворѝ себѣ̀ тре́бники въ всѣхъ ѹ́глѣхъ і҆ерс̑҇ли́ма. и҆ въ всѣхъ гра́дѣхъ і҆ѹ́диныхъ. сътворѝ ѻ҆лтари на высо́кихъ на съж꙽же́нїе ѳемїа́ма, и҆ раз̑гнѣ́ва г҃а б҃а ѿц҃ь свои҆хъ·

12

И҆ про́чаѧ же словесъ е҆го и҆ всѣхъ дѣлъ е҆го пе́рвыхъ и҆ послѣд꙽нихъ. с̂е пи́сана сꙋть въ кни́ѕѣ црс̑҇твъ і҆ѹ́ды. і҆ и҆и҆л҃ѧ. и҆ ѹ҆спе́ же а҆ха́зъ съ ѿц҃ы свои́ми. и҆ погребо́ша е҆го въ́ градѣ двд҃вѣ, не бо̀ принесо́ша въ гро́бѣхъ цр҃еи і҆и҆л҃евыхъ. црс̑҇твова́ же и҆е҆зекїѧ сн҃ъ е҆го в него мѣ́сто·