Ostroh Bible❧Друга книга хронік, розділ 32

1

И по словесе́хъ сих̑, и҆ и҆стин꙽нѣ се́и. прїи́де сенахерим̑ цр҃ь а҆сѷрїи́скїи и҆ вни́де въ і҆у҆де́ю ѻ҆б꙽стоѧ̀ гра́ды запа́систы хотѧ́щи възѧти и҆хъ·

2

Є҆гда́ же ви́дѣ і҆е҆зекїа и҆же прихо́дит̑ сенахери́мъ. проти́вꙋ лица̀ е҆го вое҆ва́ти на і҆ерс̑҇ли́мъ·

3

Начат̑ съ кнѧ́ѕи е҆го совѣтъ, и҆ мꙋж́и же крѣпча́ишими. да запира́ютъ главы̀ и҆сто́чникомъ и҆же бѣша вн̂ѣ гра́да·

4

И҆ быс̑҇ совѣтъ е҆го бл҃гъ. и҆ собра̀ мно́го мно́жество людїи. и҆ запроша вс̂и и҆сто́чницы вод̑ныѧ и҆ пото́къ и҆же лїашесѧ по́средѣ града гл҃ющи. да не прїидет̑ цр҃ь а҆сѷрїискїи ѻ҆брѧ́щетъ вод̑ мно́го и҆ ѹ҆крѣпит̑сѧ·

5

И҆ ѹ҆крѣпи́сѧ е҆зекїа, и҆ созда̀ вс̂ѧ стѣны и҆же бы́ша рассы́паны. и҆ столпы̀ на не́и, і҆ и҆зъ внꙋ̀ и҆́нꙋю стѣ́нꙋ·

6

Въздви́же же разрꙋшенаѧ въ́ градѣ двд҃вѣ. поправѝ и҆ сътворѝ ѻ҆рꙋжїѝ мно́го и҆ щи́тов̑҇·

7

И҆ постави же нача́лники бра́немъ над̑ лю́дми въ во́ю. и҆ созва̀ всѣхъ на пло́щадь до вра́тъ дебрѝ. и҆ гл҃алъ е҆сть въ срд̑ца их̑ гл҃ющи мꙋжественѣ дѣ́лаите и҆ ѹ҆крѣпи́тесѧ, не ѹ҆страша́итесѧ ни ѹ҆жаса́итесѧ ѿ лица̀ цр҃ѧ а҆сѷрїиска. и҆ всего̀ мно́жества ли́цъ и҆же сꙋть с ни́мъ·

8

Ꙗ҆́ко мно́го множа́е с на́ми сꙋть не́же с тѣмъ. с тѣмъ б̂о е҆сть мы́ш꙽ца пло́тьнаѧ. с на́ми же г҃ь б҃ъ на́шъ помо́щникъ на́шъ. и҆ ѻ҆полчи́тъ же сѧ за на́съ·

9

Ѹ҆крѣплени́ же сꙋть лю́ди словесы̀ і҆е҆зекїѧ цр҃ѧ і҆ѹ́дина·

10

И҆ посе́мъ посла̀ сенахери́мъ цр҃ь а҆сѷрїискїи рабы̀ своѧ̀ въ і҆ерс̑҇ли́мъ. и҆ самъ съ всѣмѝ во́и ѻ҆бъстоа́ше лахи́съ. и҆ посла̀ къ і҆е҆зекїѝ цр҃ю і҆ѹ́динꙋ, и҆ къ всѣмъ людем̑ и҆же бѣхꙋ въ і҆ерс̑҇лимѣ гл҃щи·

11

Сїѧ гл҃етъ сенахерим̑ цр҃ь а҆сѷрїскїи. въ чемъ в̂ы ѹ҆поваете сѣдѧ́ще въ ѻб̑҇стоа́нїи і҆ерс̑҇ли́мовѣ. не́ ли і҆е҆зекїѧ прельща́етъ васъ да преда́сть в̂ы въ смр҃ть, въ глад̑ и҆ жа́ждꙋ. ѹ҆крѣплѧ́ющи и҆же г҃ь б҃ъ ва́шъ и҆зба́вит̑ васъ ѿ рꙋкꙋ цр҃ѧ а҆сѷрїиска·

12

Не се л̂и се́й е҆сть і҆езекїѧ и҆же разорѝ вы́шънѧѧ ѻ҆лта́ри е҆го. и҆ повелѣ і҆ѹ́дѣ і҆ и҆ерс̑҇лимꙋ гл҃ющи. пред̑ ѻ҆лта́ремъ сим̑ покланѧ́итесѧ. и҆ в немъ сожига́ите ѳемїа́мъ·

13

Ни лѝ в̂ы не вѣ́сте чт̂о а҆́зъ сътвори́хъ и҆ ѿц҃ы моѝ всѣмъ зем꙽скымъ людемъ. и҆ не премого́ша̑ вс̂и бо́ѕи ꙗ҆зы́ковъ и҆зба́вити странꙋ̀ свою̀ ѿ рꙋкꙋ мое́́ю. кт̂о е҆сть ѿ въсѣхъ бо́говъ ꙗ҆зы́къ си́хъ. и҆хже и҆скорениша ѿц҃ы моѝ. не мо́глъ н̂и е҆ді́нъ и҆зба́вити лю́ди своѧ̀ ѿ рꙋ́кꙋ мое́ю. да ꙗ҆ко мо́жетъ па́ки б҃ъ ваш̑҇ и҆зба́вити васъ ѿ рꙋкѝ мое́ѧ. и҆ нн҃ѣ васъ да не прельсти́тъ і҆е҆зекїѧ да не ѹ҆пова́ти вас̑҇ сътворит̑ посемꙋ̀, и҆ не вѣ́рꙋите е҆мꙋ·

14

А҆́ще б̂о ни е҆ді́нъ мо́глъ б҃ъ всѣхъ стра́нъ и҆зба́вити лю́ди своѧ̀ ѿ рꙋкꙋ мое́ю, и҆ ѿ рꙋ́кꙋ ѿц҃ъ мои҆хъ. н̂и б̂о б҃ъ ва́шъ възъмо́жет꙽ и҆зба́вити вас̑҇ ѿ рꙋкѝ мое́ѧ. н̂о і҆ и́на мно́га гл҃али сꙋть рабѝ е҆го проти́вꙋ г҃а б҃а, и҆ проти́вꙋ і҆е҆зекїѧ раба̀ е҆го. и҆ посла́нїѧ же писа̀ поношаѧ г҃а б҃а і҆и҆л҃ева. и҆ гл҃алъ е҆сть на́нь рекїи·

15

Ꙗ҆́ко бо́ѕи ꙗ҆зы́къ прочїихъ не мого́ша и҆зба́вити людїи свои҆хъ ѿ рꙋ́кꙋ мое́ю. та́ко и҆ б҃ъ і҆е҆зекїинъ и҆зба́вити не мо́жетъ людїи е҆го ѿ рꙋкѝ мое҆ѧ·

16

И҆ на́ипаче възопѝ во́племъ вели́кимъ ꙗ҆зы́комъ і҆ѹ҆де́иским̑ проти́вꙋ людїи, и҆же сѣдѧ́хꙋ на стѣнах̑ і҆ерс̑҇ли́ма да ѹ҆страшит̑ и҆хъ и҆ во́зметъ гра́дъ·

17

И҆ гл҃алъ же е҆сть проти́вꙋ б҃а і҆и҆л҃ева. ꙗ҆́ко сꙋпроти́вꙋ бого́въ людїи зе́мъскихъ, дѣ́ла рꙋкъ чл҃ческих̑·

18

И҆ моли́ша же сѧ сего̀ ра́ди поношенїѧ, і҆е҆зекїѧ цр҃ь і҆ и҆саїѧ сн҃ъ а҆м꙽мосовъ про̑҇ркъ. и҆ възопи́ша да́же до нб҃си·

19

И҆ посла̀ г҃ь а҆гг҃ла свое҆го. и҆же поразѝ всѣхъ мꙋже́и хра́брыхъ и҆ бра́нниковъ. и҆ нача́лники во́емъ, въ по́лцехъ цр҃ѧ а҆сѷрїиска. и҆ възвратѝ лице е҆го с поноше́нїемъ на́ землю свою̀·

20

Є҆гда же въшелъ е҆сть в до́мъ б҃а свое҆го. сн҃ове и҆же и҆зошлѝ бѣша ѿ чре́ва е҆го погꙋби́ша е҆го мечем̑. сп҃се же б҃ъ і҆е҆зекїю и҆ ѻ҆бита́ющихъ і҆ерс̑҇ли́мꙋ ѿ рꙋ́кꙋ сенахерима цр҃ѧ а҆сѷрїиска и҆ ѿ рꙋ́кꙋ всх̑ѣ, и҆ пода́сть и҆мъ поко́и по ѻ҆́крс̑҇тъ·

21

И҆ мно́ѕи приноша́хꙋ жрътвы г҃ꙋ въ і҆ерс̑҇лимѣ, и҆ дары і҆езекїи цр҃ю і҆ѹ́динꙋ и҆же възвышенъ е҆сть по си́хъ предъ всѣми ꙗ҆зы́ки·

22

И҆ потомъ по́ дн҃ех꙽ тѣх꙽ и҆знемо́же і҆е҆зекїа даже смр҃ти и҆ помоли́сѧ г҃ꙋ. и҆ ѹ҆слы́ша же и҆ дасть е҆мꙋ зна́менїе, и҆ не по добродѣтели, и҆же даде е҆мꙋ·

23

Възда́сть і҆е҆зекїи, и҆ въздви́жено е҆сть срд̑це е҆го. и҆ сотворе́нъ бысть проти́вꙋ е҆го гнѣ́въ и҆ проти́вꙋ і҆ѹ́ды і҆ и҆ерс̑҇лима. и҆ смире́нъ бысть по си́хъ·

24

Того ради е҆же възвыше́но бысть срд̑це е҆го. тако ѻ́нъ ꙗ҆́ко и҆ живꙋщеѝ въ і҆ерс̑҇лі́мѣ. не прїиде на них̑ ꙗ҆́рость гн҃ѧ во дн҃и і҆е҆зекїины·

25

И҆ бысть же і҆е҆зекїеви бога́тъство и҆ сла́ва мно́га ѕѣло. и҆ сокро́вища себѣ̀ мно́ги собра̀ сребра̀ и҆ зла́та. и҆ ка́менїѧ чс̑҇тнаго, и҆ а҆рома́ты, и҆ ѻ҆рꙋжїа храни́лницы. и҆ всѣхъ разныхъ сосꙋдовъ вели́къ чи́нъ. и҆ житници жит̑ пшени́цы и҆ вина̀ и҆ е҆ле́ѧ. и҆ ꙗ҆сли всм̑ѣ скотом꙽, и҆ ста́н꙽ же ста́домъ и҆ загра́ды ѻ́вцам̑. и҆ поса́довъ, ѕ҃, созда̀·

26

И҆мѧ́ше б̂о ста́да ѻ҆ве́цъ и҆ скотовъ безчи́слена·

27

Того ради чт̂о да́сть е҆мꙋ г҃ь и҆ собра́нїѧ мно́го ѕѣло. то́й е҆сть і҆е҆зекїѧ, и҆же завре вы́шнїи клю́чъ вод̑ныи сїѻ́на·

28

И҆ ѻ҆брати и҆хъ съ до́лꙋ к꙽ полꙋ́дню града двд҃ва. въ всѣхъ дѣлехъ свои҆хъ сътворѝ преспѣва́ѧ и҆же въсхотѣ̀·

29

И҆ се́й въ посла́нїи кнѧѕе́и вавѷлон꙽скихъ, и҆же посла́ни бѧ́хꙋ к не́мꙋ да вопросѧт̑ е҆го ѻ҆ чюдесѝ и҆же слꙋчи́сѧ на землѝ·

30

И҆ ѻ҆ста́ви е҆го г҃ь да и҆скꙋси́тъ е҆го ви́дѣти и҆же бѣша въ срд̑ци е҆го·

31

И҆ про́чаѧ же словесъ і҆е҆зекїа и҆ щедроты е҆го и҆ пи́сана сꙋть въ видѣнїѝ і҆саїѧ проро́ка сн҃а а҆м꙽мосова. и҆ въ кни́ѕѣ цр҃ьствъ і҆ѹ́ды і҆ и҆и҃лѧ·

32

И҆ ѹ҆спе же і҆е҆зекїѧ съ ѿц҃ы свои҆ми, и҆ погребо́ша е҆го над̑ гро́бы сн҃овъ двд҃выхъ. и҆ сла́вꙋ и҆ честь даша е҆мꙋ въ смр҃ти е҆го ве́сь і҆ѹ́да. и҆ вс̂и и҆же ѻ҆бита́хꙋ въ і҆ерс̑҇лимѣ. и҆ црс̑҇твова же манасїѧ сн҃ъ е҆го в него̀ мѣсто·