Ostroh Bible❧Друга книга хронік, розділ 33

1

Двадесѧ́ти лѣтъ б̂ѣ манасїѧ е҆гда̀ црс̑҇твова́ти нача̀ и҆ н҃е, лѣтъ, црс̑҇твова̀ въ і҆ерс̑҇лимѣ. сътвори́ же лꙋка́вое пред̑ гм҃ъ по поноше́нїю ꙗ҆зы́къ и҆́хже и҆спрове́рже г҃ь пред̑ сн҃ы і҆ил҃евы·

2

И҆ ѻ҆брати́сѧ и҆ воздви́же вы́шнѧа их̑же раскопал̑҇ б̂ѣ е҆зекїа ѿц҃ъ е҆го. състро́и же ѻ҆лтарѝ ваа҆ли́мꙋ. и҆ сътворѝ лѣ́сы. и҆ поклони́сѧ в꙽семꙋ̀ мно́жествꙋ нб҃си. и҆ почтѝ и҆хъ. и҆ създа же ѻ҆лтари в домꙋ̀ гн҃и. ѻ҆ них̑ же гл҃а г҃ь·

3

Въ і҆ерс̑҇лимѣ бꙋ́детъ и҆́мѧ моѐ въ вѣ́ки. и҆ създа же жръто́вники всѣмъ во́емъ нбс̑҇нымъ въ двою̀ дво́рѣхъ до́мꙋ гн҃ѧ. проити же сътворѝ сн҃овомъ свои҆мъ по ѻ҆гню̀ въ ѹ҆до́ли вененони, и҆ вража́ше со жре́бїи. послѣ́доваше гада́нїемъ, и҆ проклѧ́тымъ вол꙽фова́нїем̑ ѕѣ́ло слꙋжа́ше, и҆мѣ́аше съ собо́ю вол̑҇фы и҆ ѻ҆баа́н꙽ники·

4

Мно́га же лꙋка́ва дѣ́ла е҆сть сътворил̑҇ пред̑ гм҃ъ да прогнѣ́ваетъ е҆го. и҆стꙋка́н꙽на же и҆ сълїа́на ѻ҆́бразы поста́ви в домꙋ̀ гн҃и·

5

ѻ҆ не́мже гл҃алъ е҆сть г҃ь къ дв҃дꙋ и҆ къ соло́монꙋ сн҃ꙋ е҆го гл҃ющи·

6

Въ домꙋ̀ се́мъ и҆ въ і҆ерс̑҇лимѣ е҆го́же и҆збра́хъ ѿ всѣхъ колѣ́нъ і҆и҆л҃евых̑.

7

Положꙋ̀ и҆́мѧ моѐ въ вѣ́ки·

8

И҆ не приложꙋ̀ подви́гнꙋти но́гꙋ і҆и҆л҃евꙋ ѿ землѧ̀ ю҆же преда́хъ ѿц҃емъ и҆хъ·

9

То́кмо а҆́ще съхранѧ́тъ сътвори́ти и҆же повелѣ́хъ им̑, по всемꙋ̀ зако́нꙋ и҆ чи́нꙋ и҆ сꙋд꙽ба́мъ и҆же заповѣ́дахъ рꙋко́ю моѷсїа·

10

И҆ прельсти манасїа і҆ѹ҆де́ю и҆ живꙋщихъ въ і҆ерс̑҇лимѣ да сътво́рѧтъ лꙋкавое над̑ всѣми ꙗ҆зы́ки. и҆́хже и҆спрове́рже г҃ь ѿ лица̀ сн҃овъ і҆и҆л҃евъ·

11

И҆ гл҃алъ же е҆сть г҃ь на манасїѧ, и҆ на лю́ди е҆го. и҆ внѧ́ти не въсхотѣша. того ра́ди наведе на них̑ нача́лники во́и цр҃ѧ а҆сѷрїиска·

12

И҆же ꙗ҆́ша манасїѧ и҆ свѧза́ша чѣп꙽ми и҆ ѻ҆ко́вы но́жными, и҆ ведо́ша въ вавѷло́нъ. и҆ ꙗ҆́ко ѹ҆нꙋженъ бы́сть. помоли́сѧ г҃ꙋ б҃ꙋ свое҆мꙋ, и҆ сътворѝ покаа́нїе ѕѣ́ло пред̑ лицемъ б҃а ѿц҃ь своих̑. и҆ помоли́сѧ къ немꙋ·

13

И҆ ѹ҆слы́ша мл҃твꙋ е҆го, и҆ во́пль е҆го. и въз꙽врати е҆го въ і҆ерс̑҇лимъ на црс̑҇тво е҆го. и҆ позна̀ манасїа ꙗ҆́ко г҃ь се́и е҆сть б҃ъ. и҆ посем̑ же създа̀ стѣнꙋ вн̂ѣ гра́да двд҃ва ѿ лива́на къ восто́кꙋ въ пото́цѣ, ѿ в꙽хоже́нїѧ вра́тъ ри́бныхъ. и҆ възд̑ви́же т̂о ѕѣ́ло·

14

И҆ поста́ви нача́лники во́емъ въ всѣхъ гра́дехъ і҆ѹ́диныхъ стѣна́тыхъ. і҆ и҆ ѿꙗ҆́тъ бо́ги чю́джи і҆ и́долы ѿ до́мꙋ гн҃ѧ. и҆ вс̂ѧ ѻ҆лтарѧ̀ и҆́хже сътворѝ въ горѣ̀ до́мꙋ гн҃ѧ въ і҆ерс̑҇ли́мѣ, і҆ и҆згна̀ вс̂ѧ во́нъ и҆с поса́довъ·

15

И҆ па́ки въздви́гъ ѻ҆́лтарь гн҃ь. и҆ пожрѐ на то́мъ жр́ътвы и҆ ми́рнаѧ и҆ хвалꙋ̀. и҆ заповѣ́да і҆ѹ́дѣ да слꙋжатъ г҃ꙋ б҃ꙋ і҆и҆л҃евꙋ. ѻ҆ба́че же е҆щѐ лю́дїе жрѧ́хꙋ на высо́кихъ сꙋ́етъномꙋ бо́гꙋ свое҆мꙋ. и҆ про́чаѧ же дѣѧ́нїа манасїина и҆ моли́тва е҆го и҆же къ б҃ꙋ. и҆ словеса̀ ви́дѧщихъ ꙗ҆́же гл҃ахꙋ к немꙋ во и҆мѧ г҃а б҃а і҆и҆л҃ева·

16

Сѐ въ словесе́хъ моли́твы е҆го, и҆ ꙗ҆́ко ѹ҆слы́ша е҆го и҆ всѧ̀ грѣхѝ. и҆ ѹ҆ничиже́нїе. и҆ мѣ́ста в нихъ же съзида̀ высо́каѧ, и҆ сътвори лѣ́сы, и҆ ѻ҆́бразы, і҆ и҆зваѧ́н꙽ны, и҆ пре́же не́же сътвори́ покаѧ́нїе. пи́сана сꙋть въ словесе́хъ ви́дѧщихъ·

17

Ѹ҆спе́ же манасїѧ съ ѿц҃ы свои҆ми. и҆ погребо́ша е҆го въ са́дѣ въ домꙋ̀ е҆го·

18

И҆ цр҃ьствова же в него мѣ́сто сн҃ъ е҆го а҆монъ к҃в, лѣтѣ бы́сть а҆мо́нъ е҆гда̀ црс̑҇твова́ти нача́. и҆ в҃, лѣта црс̑҇твова въ і҆ерс̑҇лимѣ. и҆ сътвори́ же лꙋка́вое пред̑ гм҃ъ ꙗ҆́ко творѧ́ше манасїѧ ѿц҃ъ е҆го, и҆ всѣ́мъ и҆́доломъ и҆же манасїа б̂ѣ сътвори́лъ·

19

Пожрѐ а҆мо́нъ и҆ слꙋжи и҆мъ, и҆ не смири́сѧ пред̑ гм҃ъ ꙗ҆́ко смири́сѧ манасїѧ ѿц҃ъ е҆го занѐ и҆ мно́жае и҆ бол̑҇ши съгрѣши·

20

Є҆гда же и҆ съпротиви́шасѧ проти́вꙋ е҆го рабѝ е҆го. ѹ҆би́ша е҆го в домꙋ̀ е҆го·

21

И҆ па́ки лю́дїе землѝ ѹ҆би́ша тѣхъ и҆же а҆мо́на порази́ша. и҆ поста́виша лю́дїе землѧ̀ цр҃ѧ і҆ѻ҆сїа сн҃а е҆го в него мѣ́сто·