Ostroh Bible❧Друга книга хронік, розділ 34

1

Ѡсмъ лѣтъ бысть і҆ѻ҆сїѧ е҆гда̀ црс̑҇твова́ти нача̀, и҆ л҃а, лѣто црс̑҇твова въ і҆ерс̑҇лимѣ. и҆ сътвори́ же чт̂о быс̑҇ пра́во пред̑ гм҃ъ, и҆ ходѝ въ пꙋтех̑ дв҃да ѿц҃а свое҆го. и҆ не ѹ҆клони́сѧ н̂и на де́сно н̂и на́ лѣво·

2

Въ і҃ е лѣто црс̑҇тва свое҆го. и҆ сѐ бо е҆ще б̂ѣ ѻ҆́трок̑҇ нача̀ възыска́ти б҃а ѿц҃а свое҆го дв҃да. и҆ въ в҃і лѣто црс̑҇тва свое҆го нача̀ ѻ҆чища́ти і҆ѹ҆де́ю, і҆ерс̑҇лимъ. ѿ высо́ких̑ и҆ лѣ́совъ, і҆ и́доловъ і҆ и҆стꙋка́нных̑·

3

и҆ разори́ша же пред̑ ни́мъ ѻ҆лтарѧ̀ ваа҆лимлѧ і҆ и́долы иже наставле́ни бѧ́хꙋ съкрꙋше́ни сꙋть, и҆ посѣчѐ га́и, і҆ и҆стꙋка́нныѧ, и҆ сълїѧ́нныѧ. и҆ съкрꙋшѝ, і҆ и҆стнѝ, и҆ ростопѝ, и҆ поверже пред̑ лице́мъ гро́бовъ, жер꙽твъ и҆хъ, и҆ ко́сти жерцевъ и҆хъ съж꙽же на ѻ҆́лтарѣхъ их̑·

4

И҆ ѻ҆чисти і҆ѹ́дꙋ і҆ерс̑҇лимъ. и҆ въ градехъ манасїиных̑ и҆ е҆фрѣмлихъ и҆ симеѻ́нихъ да́же и҆ до неѳали́ма и҆ мѣ́ста и҆хъ, всѧ̀ и҆спрове́рже. и҆ ѻ҆лтарѝ размета̀, и҆ лѣсы̀ и҆стꙋка́н꙽ныѧ и҆стнѝ въ кꙋсїе. и҆ всѧ̀ же кꙋми́рницы высо́кїа и҆стнѝ ѿ всеа̀ землѧ̀ і҆и҆л҃евы. и҆ възврати́сѧ въ і҆ерс̑҇лимъ·

5

Въ и҃і, лѣто црс̑҇тва свое҆го. ѻ҆чище́на землѧ̀ и҆ цр҃ковь гн҃ѧ. посла же сам̑фа́на сн҃а е҆селїева, и҆ а҆меа҆сїю нача́лника гра́да. і҆ и҆ѻ҆а́са сн҃а и҆ѻ҆ха́зова памѧтопи́сца, да въздвигнꙋтъ до́мъ г҃а б҃а свое҆го, и҆же прїидо́ша къ хелкїи сщ҃енникꙋ вели́комꙋ прїѧ́ти ѿ него сре́бреники и҆же принесе́ни бѣша до́мꙋ гн҃ю, их̑же събра́ша левѷти и҆ две́рницы ѿ манасїѧ и҆ ѿ е҆фрѣма и҆ нача́лниковъ и҆ всх̑ѣ про́чихъ і҆и҆зра́илѧ. и҆ ѿ всеѧ̀ і҆ѹ҆де́а и҆ венїами́на, и҆ ѻ҆бита́ющих̑ въ і҆ерс̑҇лимѣ и҆ да́ша в рꙋцѣ и҆хъ и҆же пред̑нїи бѧ́хꙋ дѣ́лателїе в домꙋ гн҃и. да въздви́гнꙋтъ цр҃ковь. и҆же и҆ не крѣ́пкаѧ да ѹ҆правлѧ́ютъ. и҆ тїи да́ша ѧ҆̀ ѹ҆модѣ́лникомъ і҆ и҆звѣ́стникомъ да кꙋпѧтъ ка́менїе четвероѹ҆го́лное, и҆ на дре́ва на раз꙽сѣ́лныѧ съзида́нїѧ, и҆ на покры́тїе до́момъ и҆же разориша цр҃и і҆ѹ́дини. и҆же вѣрнѣ́ишїе мꙋж́и всѧ̀ сътвори́ша·

6

Бѧ́хꙋ же пред̑ста́тели дѣ́лателемъ ге́ѳъ, и҆ а҆вдїѧ левѷтинъ ѿ сн҃овъ мера́ри, и҆ заха́рїѧ, и҆ мосол̑҇ла́мъ ѿ сн҃овъ каа́ѳъ и҆же прилежа́хꙋ дѣ́лꙋ. и҆ вс̂и левѷти, і҆ и́же знахꙋ въ а҆рга́ны пѣти. над̑ тѣми и҆же по ро́знымъ ѻ҆бы́чае҆мъ бремена̀ ноша́хꙋ. и҆ над̑ творѧ́щими дѣ́ло дѣла́нїѧ·

7

И҆ ѿ левѷтъ бѣша писари и҆ сꙋдїи и҆ две́рницы, е҆гда̀ и҆зноша́ти и҆мъ сре́бреники и҆же принесе́ни бѣша въ цр҃ковь гн҃ю·

8

И҆ ѻ҆брѣтѐ хел̑҇кїа сщ҃енникъ, книгꙋ зако́на гн҃ѧ. и҆же дана̀ бы́сть под̑ рꙋ́кꙋ моѷсїѧ·

9

И҆ ѿвѣща̀ хел꙽кїѧ и҆ рече къ сафа́нꙋ писарꙋ. книгꙋ зако́на ѻ҆брѣто́хъ въ домꙋ̀ гн҃и и҆ дадѐ сафа́нꙋ. ѻ҆́нъ же несѐ ю҆̀ къ цр҃ю. и҆ звѣща̀ е҆мꙋ гл҃ющи. всѧ̀ и҆же да́лъ е҆си в рꙋ́кꙋ рабо́мъ твоим̑ с̂е съверша́ютсѧ. сребро̀ чт̂о наидо́хомъ в домꙋ̀ гн҃и сълїѧ́хом꙽. да́но же е҆сть дѣ́лателемъ ѹ҆модѣ́лнымъ, и҆ ро́знаѧ дѣ́ла кꙋ́ющимъ·

10

И҆ възвѣстѝ сафа́нъ пи́саръ сло́во гл҃ѧ, даде́ м̂и хел꙽кїа сщ҃ен꙽никъ сїю кни́гꙋ. и҆же сафа́нъ съ цр҃емъ настоѧ́щее почита́ше·

11

И҆ слы́ша цр҃ь словеса̀ зако́на и҆ растерза̀ ри́зы своѧ̀·

12

И҆ повелѣ̀ цр҃ь хел꙽кїеви, и҆ а҆хика́мꙋ сн҃ꙋ и҆ѻ҆сафа́новꙋ. и҆ а҆вдо́нꙋ сн҃ꙋ михе́евꙋ, и҆ сафа́нꙋ пи́сарꙋ, и҆ а҆са́їю рабꙋ̀ цр҃евꙋ гл҃ющи. и҆дѣте и҆ моли́тесѧ г҃ꙋ за мѧ̀, и҆ за про́чихъ і҆и҆л҃ѧ і҆ и҆ѹ́дꙋ, за всѧ̀ словеса̀ книги сеѧ̀ и҆же ѻ҆брѣте́на е҆сть. вели́къ б̂о гнѣ́въ раз̑горѣ́сѧ на нас̑҇. того ра́ди и҆же не съхрани́ша ѿц҃ы на́ши слове́съ гн҃ихъ, да сътво́рѧтъ всѧ̀ и҆же пи́сана сꙋть в то́мъ ѻ҆брѣте́нїи·

13

І҆ и́де хел꙽кїѧ, и҆ тїи и҆же вкꙋ́пѣ ѿ цр҃ѧ послани бѧ́хꙋ къ ѻ҆л꙽да́нѣ прро̑҇чицы женѣ̀ сел꙽лꙋ́мовѣ, сн҃овъ ѳекꙋе́выхъ сн҃ꙋ е҆серїевꙋ стра́жеи ри́зных꙽. хранѧ́щеи за́повѣди. и҆же ѻ҆биташе въ і҆ерс̑҇лимѣ въ маса́нѣ и҆ гл҃али сꙋть е́и по семꙋ̀·

14

И҆ та̀ ѿвѣща̀ и҆мъ. сїѧ рече г҃ь б҃ъ і҆и҆л҃евъ. гл҃ите мꙋж́ꙋ и҆же посла̀ вас̑҇ къ мнѣ̀. сїѧ рече г҃ь с̂е а҆́зъ наведꙋ̀ ѕла́ѧ на мѣсто с̂е, и҆ на ѻ҆бита́ющих̑ е҆го. всѧ же проклѧ́тїѧ и҆же пи́сана сꙋть въ кни́ѕѣ то́и, ю҆́же что́ша пред̑ цр҃емъ і҆ѹ́динымъ занѐ ѻ҆ста́виша м̂ѧ. и҆ кадѧ́хꙋ бого́мъ чю́ждимъ. да м̂ѧ къ ꙗ҆́рости призовꙋтъ, въ всѣ́хъ дѣлех̑ рꙋ́кꙋ свою̀. того ра́ди разгорѣ́сѧ гнв̑҇ѣ мо́и на мѣ́сто т̂о и҆ не ѹ҆га́ситсѧ·

15

И҆ къ цр҃ю же і҆ѹ́динꙋ и҆же посла̀ ва́съ ко г҃ꙋ помоли́тисѧ та́ко гл҃ите е҆мꙋ. сїѧ рече г҃ь б҃ъ і҆и҆л҃евъ. ꙗ҆́ко слы́шалъ е҆си словеса̀. и҆ сꙋмнѣ́сѧ срд̑це твоѐ и҆ смири́л꙽сѧ е҆си предо мно́ю над̑ тѣми и҆же рече́нна сꙋть проти́вꙋ мѣста сего, и҆ ѻ҆бита́ющимъ і҆ерс̑҇лимꙋ. посрами́ же сѧ лица̀ мое҆го и҆ растерза́лъ е҆си ри́зы твоѧ̀ и҆ пла́калъ е҆си предо мно́ю. а҆́з꙽ же ѹ҆слы́шахъ т̂ѧ реч̑҇ г҃ь. с̂е приложꙋ̀ т̂ѧ къ ѿц҃емъ твои҆мъ, и҆ приложи́шисѧ въ гро́бѣ твое҆мъ въ мирѣ. и҆ не ѹ́зрѧтъ ѻ҆́чи твоѝ всѧ́кого ѕла̀ и҆же а҆́зъ наведꙋ̀ на мѣ́сто сѐ, и҆ на ѻ҆бита́ющихъ е҆го·

16

Възвѣсти́ша ѹ҆бо цр҃ю всѧ и҆же гл҃а. и҆ посла̀ цр҃ь и҆ съзва всѣ́хъ бо́лше род̑ныхъ і҆ѹ́диныхъ і҆ерс̑҇лима. и҆ в꙽зы́иде въ дом̑ гн҃ь. и҆ вси мꙋ́жи і҆ѹ́дины и҆ живꙋщеи въ і҆ерс̑҇лимѣ. и҆ сщ҃енницы и҆ левѷты, и҆ ве́сь по́лкъ ѿ ме́ншихъ да́же до бо́льшихъ. и҆́м꙽же слы́шащимъ в домꙋ̀ гн҃и. чтѐ цр҃ь вс̂ѧ словеса̀ ѻ҆брѣт꙽шаѧ҆сѧ въ домꙋ̀ гн҃и стоѧ́щи ѹ҆ прс̑҇тла свое҆го. и҆ завѣща̀ завѣтъ пред̑ гм҃ъ да хо́дѧтъ по немъ, и҆ да съхранѧют̑ повеле́нїѧ е҆го и҆ свѣдѣ́нїѧ е҆го и҆ ѻ҆правда́нїѧ е҆го всѣ́мъ срд̑цемъ свои́мъ, и҆ всею̀ дш҃ею свое҆ю. твори́ти же и҆же пи́сана сꙋть ꙗ҆́ко словеса̀ ѻ҆брт̑ѣшїисѧ въ кни́зѣ се́и·

17

Заклѧ́ть же на том̑ всх̑ѣ и҆же ѻ҆брѣте́ни бѧ́хꙋ въ і҆ерс̑҇лимѣ и҆ венїами́нѣ. и҆ сътвори́ша ѻ҆бита́юще въ і҆ерс̑҇лимѣ по чинꙋ̀ г҃а б҃а ѿц҃ъ свои҆хъ. ѿꙗ҆́тъ б̂о і҆ѻ҆сїа всѧ̀ поноше́нїѧ ѿ всеѧ̀ землѝ сн҃овъ і҆и҆л҃евъ. и҆ сътворѝ всѣхъ и҆же ѻ҆ста́вшїи бѧ́хꙋ въ і҆и҆л҃и слꙋжи́ти г҃ꙋ б҃ꙋ свое҆мꙋ всѧ̀ дн҃и живота̀ е҆го, и҆ не ѿидо́ша ѿ г҃а б҃а ѿц҃ъ свои҆хъ·