Ostroh Bible❧Друга книга хронік, розділ 4

1

Сътвори́ же и҆ ѻ́лтарь мѣдѧн̑҇ к҃, лако́тъ въ долготꙋ̀, и҆ к҃, лако́тъ въ широтꙋ̀. и҆ і҃, лако́тъ въ высотꙋ̀, мо́ре паки мѣ́дѧно сълїѧ́но сътвори, і҃, лакотъ. ѿ гꙋ́бы до гꙋ́бы. крꙋ́гло по ѻ́крс̑҇тъ. и҆ е҃, лакот̑ и҆мѣю́ще въ высотꙋ̀, и҆ ве́рвица и҆же е҆сть и҆зъвнѣ̀, л҃, ла́ктеи, и҆же ѻ҆бъѧ́ше ѻ́крс̑҇тъ е҆го подо́бїе же воло́во бысть под̑ нимъ. и҆ і҃, лакотъ нѣ́котораго, и҆знꙋтръ рѣ́занїѧ. ѻ҆бъдръжа́щи ѹ҆мыва́лницꙋ. ꙗ҆ко ѻ҆ двх̑ѣ стра́нъ гꙋ́бы мо́рскїѧ ѻ҆бхожа́хꙋ. воло́ве же бѧ́хꙋ лїѧны. и҆ т̂о мо́ре, на в҃і хъ во́лѣхъ наставле́но б̂ѣ. и҆́хже тр̂и смотрѧ́хꙋ къ сѣ́верꙋ, і҆ и́нїи тр̂и къ за́падꙋ·

2

Паки трїе къ полꙋ́дню, и҆ тр̂и къ восто́кꙋ·

3

И҆мѣю҆ще мо́ре наставле́но. зад̑нѧѧ волом̑ бѧ́хꙋ внꙋтри под̑ мо́ремъ, и҆ толъстота̀ е҆го, и҆мѧше мѣ́рꙋ дла́нꙋю, и҆ гꙋ́ба е҆го б̂ѣ, ꙗ҆́ко гꙋ́ба потирꙋ и҆зваѧ́н꙽на ꙗ҆́ко ѿра́сли кри́на въмѣща́ющи же, ҂г҃, мѣръ, и҆ съвръшѝ·

4

Сътвори́ же ѻ҆мывалницъ, і҃, и҆ поста́ви, е҃, на де́снои. и҆ е҃, на́ лѣво. ѻ҆мыва́ютъ в ни́хъ вс̂ѧ, и҆же въ вс̂есъж꙽же́нїѧ приноси́ма бѧ́хꙋ. и҆ ѻ҆чища́ти, и҆ море да ѻ҆мы́ют̑сѧ сщ҃е́нницы в не́мъ. сътвори́ же и҆ подъсвѣщникъ зла́тыхъ. і҃. по разъсꙋже́нїю и҆хъ и҆ постави ѧ҆̀ въ цр҃кви. е҃, ѻ҆деснꙋ́ю. и҆ е҃, ѻ҆ лѣвꙋ́ю. и҆ сътворѝ столо́въ, і҃, и҆ поста́вї ѧ҆̀ въ цр҃кви. е҃, ѻ҆деснꙋ́ю. и҆ е҃, ѻ҆ лѣвꙋ́ю и҆ ѳїѧ́лъ же зла́тыхъ, сътворѝ, е҃. и҆ сътворѝ, па́ки дво́ръ сщ҃енником̑. и҆ дворъ вели́кїи, и҆ две́ри двора̀. и҆ ѻ҆ко́нца и҆хъ, помѣ́дена мѣ́дїю. па́ки мо́ре поста́ви ѿ десны́ѧ страны̀ проти́вꙋ восто́кꙋ къ полꙋ́дни·

5

Сътвори́ же хи́рам꙽, ѹ҆дицы мѧсныѧ и҆ кади́лныцы и҆ сковрадꙋ жрътвенꙋю, и҆ вс̂ѧ сосꙋды е҆го·

6

И҆ съвръши хирам̑ творити вс̂е дѣ́ло, и҆же нача твори́ти соло́монъ цр҃ь въ домꙋ̀ бж҃їи столпа̀ дв̂а. и҆ ꙗ҆́ко стро́ки солїѧ́ны дв̂ѣ на глава́хъ стол꙽по́въ, и҆ мре́жица дв̂ѣ и҆же покрыва́ти главы̀ над̑ строка́ми гла́вными. и҆ зво́нъковъ малы́хъ зла́тыхъ, у҃, въ двѣ мре́жи. и҆ ши́п꙽ковъ зла́тыхъ, у҃, по два чины на мре́жи е҆ді́нои, и҆же защи́щати дв̂ѣ стро́ки. и҆же над̑ глава́ми стол꙽повъ. и҆ под̑ставъки па́ки сътворѝ, и҆ коры́та мѣ́дѧны сътворѝ над̑ подъставками, и҆ море е҆ді́но. и҆ воло́въ, в҃і, под̑ море и҆ котлов̑҇, и҆ ѹ҆дицъ на мѧ́со·

7

И҆ вс̂ѧ сосꙋды их̑ ꙗ҆́же сътвори хирам̑, и҆ принесѐ соло́монꙋ въ до́мъ гн҃ь, ѿ мѣ́ди чистѣ́ишїѧ. въ стра́нѣ і҆ѻрда́на сли́лъ и҆хъ цр҃ь, въ гли́нѧни землѝ. въ домꙋ сокхо́ѳовѣ. и҆ саридаѳа́евѣ. и҆ сътворѝ соло́монъ вс̂ѧ сосꙋды, безъчислены ѕѣло. та́ко да не вѣстьсѧ тѧ́гость мѣ́ди·

8

Сътвори́ же соло́монъ вс̂ѧ сосꙋ́ды до́мꙋ бж҃їѧ, и҆ ѻ҆лта́рь зла́тъ, и҆ столы̀. и҆ на ни́хъ хлѣбы̀ пред̑ложе́нїѧ. и҆ под̑свѣщники же со свѣти́лники свои҆ми да свѣтѧтъ пред̑ ст҃аѧ ст҃ыхъ. по чинꙋ̀ ѿ зла́та чистѣ́иши. и҆ свѣтлѣнїѧ нѣ́которого и҆ свѣти́лники и҆хъ, и҆ фїѧ́лы, и҆ кади́лницы. и҆ клѣщицъ зла́тыхъ. вс̂е ѿ зла́та чистѣ́иша съдѣ́лана сꙋть. и҆ две́ри цр҃кви внꙋтренѣѧ, и҆же въ ст҃аѧ ст҃ыхъ. и҆ двери цр҃ков꙽ныѧ и҆з꙽ зла́та. и҆ съвръшено е҆сть вс̂е дѣло, и҆же сътворѝ соло́монъ въ домꙋ̀ гн҃и·