Ostroh Bible❧Друга книга хронік, розділ 6

1

Тогда соло́монъ рече, г҃ь ѻ҆беща́лъ е҆сть да ѻ҆бита́етъ въ м꙽глѣ̀, а҆́з꙽ же създа́хъ до́мъ и҆́мени е҆го ст҃омꙋ, да ѻ҆бита́етъ т̂ꙋ въ вѣки·

2

И҆ ѻ҆братѝ цр҃ь лицѐ своѐ и҆ блс̑҇ви вс̂е мно́жество і҆и҆л҃ѧ, пред̑ста̀ и҆ реч̑҇, блс̑҇венъ г҃ь б҃ъ і҆и҆л҃евъ, и҆же гл҃алъ е҆сть ѹ҆сты̀ свои́ми къ дв҃дꙋ ѿц҃ꙋ мое҆мꙋ, и҆ в рꙋ́кꙋ е҆го съвершѝ гл҃ющи, ѿ дн҃е во́ньже и҆зведо́хъ лю́ди моѧ̀ ѿ землѧ̀ егѷпет̑скїѧ, не и҆збра́хъ гра́да. ѿ всѣ́хъ колѣнъ і҆и҆л҃евыхъ, да съзи́ждетсѧ в не́мъ до́мъ и҆́мени мое҆мꙋ т̂ꙋ, ниже и҆збра́хъ никото́раго и҆но́го мꙋж́а бы́ти кнѧ́ѕь в лю́дехъ мои҆хъ і҆и҆л҃ѧ, но и҆збра́хъ і҆ерс̑҇ли́мъ да бꙋдетъ и҆́мѧ мое в не́мъ·

3

І҆ и҆збра́х же дв҃да бы́ти над̑ людмѝ мои́ми і҆и҆л҃емъ, е҆гдаже во́лѧ бы́сть дв҃да ѿц҃а мое҆го, да съзи́ждетъ до́мъ и҆́мени г҃а б҃а і҆и҆л҃ева. рече г҃ь к немꙋ, и҆же сїѧ бы́сть во́лѧ твоѧ̀ да съзи́ждеши до́мъ и҆́мени моемꙋ, добро̀ б̂о сътвори́лъ е҆си, таковꙋ̀ и҆мѣти во́лю, но не ты̀ съзи́ждеши мн̂ѣ до́мъ, н̂о сн҃ъ твои и҆же и҆зы́иде ѿ чре́слъ твои҆хъ, то́й съзи́ждетъ до́мъ и҆́мени мое҆мꙋ·

4

съверши б̂о г҃ь сло́во своѐ и҆же гл҃а, и҆ аз̑ въста́хъ в꙽ мѣ́сто дв҃да ѿц҃а мое҆го, и҆ сѣ́хъ на прс̑҇тлѣ е҆го ꙗ҆́коже гл҃алъ ес̑҇, г҃ь, и҆ създа́хъ до́мъ и҆́мени г҃а б҃а і҆и҆л҃ева, и҆ поста́вихъ в꙽ не́мъ кїѻ́тъ в꙽ не́м꙽же е҆сть завѣтъ гн҃ь, и҆же завѣща̀ съ сн҃ы і҆и҆л҃евыми, и҆ ста̀ прд̑е ѻ҆́лтаремъ гн҃имъ. ѿ сꙋпроти́вꙋ в꙽сего мно́жества і҆и҆л҃ѧ. и҆ прострѐ рꙋ́цѣ своѝ·

5

Сътвори б̂о соло́монъ стоа́ло мѣдѧно, и҆ поста́ви е҆го посреди двора̀ ст҃аго, и҆мѣ́ющи, е҃, лакот̑ дол꙽готꙋ. и҆ е҃ ширинꙋ̀, и҆ г҃, лакти въ высотꙋ̀. и҆ ста̀ на не́мъ преклонѝ колѣ́нѣ проти́вꙋ в꙽сего мно́жества і҆и҆л҃ѧ·

6

И҆ дла́ни на́ нб҃о въздви́гъ, и҆ рече·

7

Ги҃ б҃е і҆и҆л҃евъ, нѣ́сть подо́бенъ тебѣ б҃ъ на́ нб҃си, и҆ на землѝ, съхранѝ чи́нъ и҆ млс̑҇ть съ рабы̀ твои́ми. и҆же хо́дѧтъ пред̑ тобо́ю всѣмъ срд̑цемъ свои҆мъ. и҆же пода́лъ е҆си рабꙋ̀ твое҆мꙋ дв҃дꙋ, ѿц҃ꙋ мое҆мꙋ. е҆ли́каже гл҃а к немꙋ гл҃ѧ. и҆ гл҃а ѹ҆сты̀ твои҆ми. дѣ́ломъ съверши́лъ е҆си, ꙗ҆́ко и҆ настоѧ́щее вре́мѧ·

8

И҆ нн҃ѣ ѹ҆бо г҃и б҃е і҆и҆л҃евъ, и҆спо́лни рабꙋ̀ твое҆мꙋ а҆ ѿц҃ꙋ мое҆мꙋ дв҃дꙋ. е҆ли́каже ре́клъ е҆си к немꙋ гл҃ющи, и҆ гл҃алъ е҆си ѹ҆сты̀ твои҆ми, і҆ и҆спо́лни ѹ҆сты̀ твои҆ми. ꙗ҆́ко въ дн҃ь сїи гл҃ѧ. не ѻ҆скꙋдѣ́етъ ѿ тебѐ мж̑ꙋ предо мно́ю сѣдѧ́и на прс̑҇толѣ двд҃вѣ. то́кмо а҆́ще съхранѧ́тъ сн҃ове твоѝ пꙋтѝ моѧ̀. ходи́ти въ зако́нѣ мое҆мъ, ꙗ҆́ко и҆ т̂ы ходи́лъ е҆си предо мно́ю, и҆ нн҃ѣ г҃и б҃е і҆и҆л҃евъ ѹ҆крѣпи́сѧ сло́во твое е҆же гл҃ал̑҇ е҆си рабꙋ̀ твое҆мꙋ дв҃дꙋ·

9

Ꙗ҆́ко а҆́ще и҆́стин꙽нѣ б҃ъ ѻ҆бита́етъ съ чл҃ки на землѝ. а҆ще нб҃о и҆ нб҃о нб҃си не довлѣют̑ т̂и. ко́лько на́ипаче до́мъ се́и е҆го́же създа́хъ, н̂о то́кмо възрѝ на моле́нїе раба̀ твое҆го, и҆ мл҃тви. г҃и б҃е мои, и҆же ѹ҆слы́шати мл҃твы моа̀. ꙗ҆́же и҆злїа ра́бъ твой пред̑ тобо́ю днс̑҇е. да ѿверзе́ши ѻ҆́чи твои на до́мъ то́и дн҃ь и҆ но́щь. на мѣ́стѣ се́мъ, на кото́ромъ ѻ҆беща́л꙽сѧ е҆си. да призове́тсѧ и҆мѧ твоѐ. и҆ ѹ҆слы́шиши моли́твꙋ е҆ю́же ра́бъ твой мо́литсѧ в нем̑, и҆ ѹ҆слы́ши проше́нїе раба̀ твое҆го и҆ людїи твои҆хъ і҆и҆л҃ѧ. и҆же а҆́ще помо́лѧтсѧ на мѣ́стѣ то́мъ, и҆ т̂ы ѹ҆слы́ши ѿ жили́ща твое҆го и҆же е҆сть ѿ нб҃съ. и҆ ѹ҆слыши, и҆ млс̑҇тивъ бꙋди. а҆́ще съгрѣши́тъ мꙋж́ъ къ и҆́скренемꙋ свое҆мꙋ, и҆ прїиметъ клѧ́твꙋ е҆го ра́ди, и҆же клѧти е҆го и҆ прїидет̑ и҆ проклине́тъ пред̑ ѻ҆́лтаремъ в домꙋ̀ то́мъ, и҆ т̂ы ѹ҆слы́ши ѿ нб҃си. и҆ сътворѝ сꙋ́дъ рабо́мъ твои҆мъ. и҆же възда́ти безако́н꙽номꙋ грѣ́хъ е҆го на главꙋ̀ е҆го, и҆́стин̑҇нꙋю. и҆ м꙽сти́ши пра́веднаго. възда́ющи кое҆мꙋждо по пра́вдѣ е҆го а҆́ще ѻ҆долѣ́нъ бꙋ́детъ лю́дїе твоѝ і҆и҆л҃ь ѿ вра́гъ. а҆́ще съгрѣша́тъ тебѣ̀. и҆ ѻ҆брати́в꙽шесѧ съдѣла́ютъ покаѧ́нїе. и҆ въпро́сѧтъ и҆́мени твое҆го, и҆ бꙋ́дꙋтъ ѹ҆моли́ти тебѐ на мѣ́стѣ то́мъ. и҆ т̂ы ѹ҆слы́ши съ нб҃съ, и҆ млс̑҇тивъ бꙋди грѣхо́мъ людїи твои҆хъ і҆и҆л҃ѧ. і҆ и҆зведи и҆хъ въ зе́млю ю҆́же да́лъ е҆си им̑, и҆ ѿц҃емъ и҆хъ. а҆́ще заключи́ши нб҃о до́жда не и҆злѣти грѣ́хъ ра́ди людїи твои҆хъ. и҆ ѹ҆мо́лѧтъ тебѐ въ мѣстѣ то́мъ. и҆сповѣда́ютсѧ и҆́мени твое҆мꙋ, и҆ ѻ҆братѧ́тсѧ ѿ грѣ́хъ свои҆хъ, е҆гда̀ и҆хъ смири́ши·

10

И҆ т̂ы ѹ҆слы́ши съ нб҃се г҃и, и҆ млс̑҇тивъ бꙋ́ди грѣхо́мъ ра́бъ твои҆хъ, и҆ лю́демъ твои҆мъ і҆и҆л҃ю. и҆ наѹ҆чи и҆хъ пꙋтѝ бл҃гꙋ по немꙋже в꙽нїидꙋтъ·

11

И҆ да́и до́ждъ землѝ ю҆́же да́лъ е҆си лю́демъ твои҆мъ на въздержа́нїе·

12

Гла́дъ а҆́ще въсходѧ́щъ бꙋдетъ на́ землю, и҆ гꙋби́тельства и҆ ржа̀ и҆ гꙋсе́ница и҆ кобы́лицы, и҆ прꙋ́зи, и҆ а́ще вразъ ѻ҆скорбѧ и҆хъ, вра́та ѻ҆бъстоѧ́щи гра́дꙋ, и҆ всѧ́кꙋ ꙗ҆́звꙋ и҆ бо́лѣзнь ѿста́ви, и҆ всѧ́ка мл҃тва, и҆ всѧ́ко моле́нїе, а҆́ще бꙋ́детъ кое҆мꙋж́до чл҃кꙋ, и҆ всѣ́мъ лю́демъ твои҆мъ і҆и҆л҃ю да бꙋ́детъ ѹ҆моле́нїе, позна́ю҆щемꙋ ꙗ҆́звы и҆ грѣхъ свой, и҆ прострѐ рꙋ́цѣ свои в꙽ домꙋ се́мъ·

13

И҆ т̂ы ѹ҆слы́ши съ нб҃се высотѝ готоваго жили́ща твое҆го, и҆ ѻ҆чи́сти, и҆ възда́и е҆ді́номꙋ ко́ждо по пꙋте́мъ е҆го, ꙗ҆́же вѣ́си по срд̑цы е҆го, ты б̂о е҆ді́нъ вѣ́си срд̑ца сн҃овъ чл҃ческихъ, да боѧ́тсѧ ходи́ти въ пꙋте́хъ твои҆хъ, вс̂ѧ дн҃и в нѧ́же живꙋтъ на лицы̀ землѧ̀ ю҆́же да́лъ е҆си ѿц҃емъ на́шимъ, и҆ всѧ́къ чю́ждїи и҆же нѣ́сть ѿ людїи твои҆хъ і҆и҆л҃ѧ, и҆ а́ще прїидетъ ѿ землѧ̀ дал꙽нѣ́иша ра́ди и҆́мени твое҆го вели́каго и҆ ра́ди рꙋкѝ твое҆ѧ̀ си́л꙽ныѧ и҆ мы́ш꙽ца твое҆ѧ высо́кїѧ, и҆ прїидет̑ и҆ помо́литсѧ на мѣ́стѣ се́мъ·

14

И҆ т̂ы ѹ҆слы́ши ѿ нб҃се ѿ гото́ваго жилища твое҆го, и҆ сътвори́ши по в꙽семꙋ̀ и҆же възове́тъ т̂ѧ пꙋт꙽никъ да ѹ҆вѣ́дѧтъ вс̂и лю́дїе землѝ и҆́мѧ твое·

15

И҆ боѧ́тсѧ тебѐ ꙗ҆́ко лю́дїе твои і҆и҆л҃ь, и позна́ютъ ꙗ҆́ко и҆мѧ твое възва́но е҆сть на до́мъ се́и, е҆го́же създахъ·

16

А҆́ще же и҆сходѧ́щъ бꙋ́детъ полкъ твои къ брани противꙋ сꙋпоста́тъ свои҆хъ, по пꙋтѝ и҆́мже по́слеши их̑, и҆ помо́лѧтсѧ тебѣ по пꙋтѝ гра́да сего е҆го́же и҆збра́лъ е҆си, и҆ до́мъ е҆го́же създа́хъ и҆́мени твое҆мꙋ, да ѹ҆слы́шиши ѿ нб҃се мл҃твы и҆хъ и҆ моле́нїе и҆хъ, и҆ сътвориши ѻ҆правле́нїе и҆хъ занѐ съгрѣша́тъ тебѣ, ниже б̂о е҆сть чл҃къ и҆же не съгрѣшитъ, и҆ гнѣвенъ бꙋ́деши и҆мъ, и҆ предасѝ и҆хъ враго́мъ и҆хъ, и҆ плѣнѧтъ и҆хъ, плѣнѧ́ющїи, въ зе́млю вра́гъ въ зе́млю дальнюю и҆ли бли́зъ, и҆ ѻ҆братѧ́тъ срд̑це своѐ въ зе́млю и҆хъ, на не́иже плене́ни бы́ша, и҆ та́мо ѻ҆братѧ́тсѧ, сътво́рѧтъ покаа́нїе, и҆ помо́лѧтсѧ тебѣ̀ на землѝ плѣне́нїѧ и҆хъ гл҃юще съгрѣшихомъ, безако́нїе сътвори́хомъ, непра́вдꙋ съдѣла́хомъ, ѻ҆братѧ́тсѧ к тебѣ̀ всѣ́мъ срд̑цемъ свои҆мъ, и҆ всею̀ дш҃ею свое҆ю. въ землѝ плѣн꙽шихъ и҆хъ, и҆де́же плѣни́ша и҆хъ. и҆ помо́лѧтсѧ тебѣ̀ проти́въ пꙋтѝ землѧ̀ свое҆ѧ, ю҆же да́лъ е҆си ѿц҃емъ и҆хъ·

17

И҆ гра́довъ их̑же и҆збра́лъ е҆си. и҆ до́мꙋ е҆го́же създа́хъ и҆́мени твое҆мꙋ·

18

да ѹ҆слы́шиши ѿ нб҃се ѿ гото́ваго жили́ща твое҆го мл҃твꙋ и҆хъ, и҆ моле́нїе их̑·

19

И҆ сътворѝ сꙋ́дъ, и҆ млс̑҇тививъ бꙋ́ди лю́демъ твои҆мъ, съгрѣш꙽шимъ т̂и·

20

И҆ нн҃ѣ г҃и да бꙋ́дꙋтъ ѿврз̑ъсты ѻ҆́чи твои и҆ ѹ́ши твоѝ внѧ́ты бꙋдт̑ꙋ къ моле́нїю, и҆же сътвори́тсѧ на мѣ́стѣ се́мъ·

21

И҆ нн҃ѣ ѹ҆бо въста́ни г҃и б҃е въ поко́и твой. т̂ы и҆ кїѻ́т꙽ крѣ́пости твое҆ѧ. и҆ сщ҃ен꙽ницы твои г҃и б҃е ѻ҆блекꙋтсѧ въ спс̑҇нїе, и҆ прпд̑бнїи твоѝ възвеселѧ́тсѧ въ бл҃гихъ. г҃и б҃е мои не ѿврати́ши лица̀ х҃а твое҆го. помѧнѝ щедроты̀ двд̑а раба твое҆го·