Ostroh Bible❧Друга книга хронік, розділ 7

1

И е҆гда̀ съвръшѝ соло́монъ молѧ́щисѧ. и҆ ѻ́гнь сни́де с нб҃си, и҆ пожрѐ вс̂есъж꙽же́нїе, и҆ жр́ътвꙋ, и҆ сла́ва гн҃ѧ и҆спо́лни до́мъ. и҆ не можа́хꙋ сщ҃енницы внїитѝ въ цр҃ков꙽ гн҃ю, въ вре́мѧ ѻ҆́но·

2

Того ра́ди ꙗ҆́же и҆спо́лни сла́ва гн҃ѧ цр҃ковь, и҆ вс̂и сн҃ове і҆и҆л҃еви видѧ́хꙋ сходѧ́щъ ѻ҆́гнь и҆ сла́вꙋ гн҃ю на до́мъ·

3

И҆ падо́ша ни́цы на́ землю на помо́стъ просте́ртъ ка́менїемъ, поклони́шасѧ и҆ похвали́ша г҃а ꙗ҆́ко бл҃гъ ꙗ҆́ко въ вѣки млс̑҇ть е҆го·

4

Цр҃ь же и҆ вс̂и лю́дїе пожро́ша жрътвꙋ пред̑ гм҃ъ. и҆ пожрѐ цр҃ь соло́монъ жрътвы, воло́въ·

5

҂к҃, и҆ ҂в҃. ѻ҆́венъ тꙋчных̑, ҂р҃ и҆ ҂к҃, и пресщ҃а весь до́мъ бж҃їи цр҃ь и вс̂и лю́дїе. сщ҃енницы же стоѧхꙋ въ чи́нх̑ѣ своих̑ и҆ левѷты въ а҆рга́ны поѧ́хꙋ пѣсни гн҃ѧ. и҆же сътворѝ дв҃дъ цр҃ь ко похвале́нїю г҃а. ꙗ҆ко бл҃гъ ꙗ҆́ко въ вѣки млс̑҇ть е҆го. пѣсни двд҃вы пою́ще чиньми свои́ми. па́ки сщ҃енницы поѧ́хꙋ трꙋба́ми, предъ ни́ми же весь і҆и҆л҃ь стоѧ́ше, ѻ҆ст҃и же соло́монъ среднее двора̀ пред̑ цр҃ьковью гн҃ею. принесѐ б̂о т̂ꙋ вс̂есож꙽женїѧ и҆ тꙋ́ки, и҆ вс̂есъж꙽же́нїѧ ми́рныѧ. ꙗ҆́ко ѻ҆лта́рь мѣдѧнъ и҆же сътворѝ соло́монъ не можа́ше прїѧ́ти вс̂есъж꙽же́нїѧ и҆ жрътвы, и҆ тꙋ́ковъ ми́рныхъ·

6

И҆ сътворѝ соло́мон̑҇ праздник̑҇ въ времѧ ѻ́но, з҃ дн҃їи, и҆ весь і҆и҆л҃ь с ни́мъ. собра́нїѧ вели́ка ѕѣло ѿ и҆схо́да е҆м꙽ма́ѳъ даже до пото́ка е҆гѷпет꙽ска. сътвори́ же въ дн҃ь, и҃. въскликнове́нїе, того ради чт̂о пресщ҃а ѻ҆лта́рь, сътворѝ пра́здникъ з҃, дн҃їи. и҆ въ дн҃ь, к҃г, мс̑҇ца. з҃. ѿпꙋстѝ лю́ди къ жили́щемъ свои҆м꙽ веселѧ́щисѧ и҆ радꙋ́ющисѧ. на бл҃го. чт̂о сътворѝ г҃ь дв҃дꙋ и҆ соло́монꙋ і҆и҆л҃ю, лю́демъ свои҆мъ·

7

Совръши́ же соло́монъ до́мъ гн҃ь, и҆ до́мъ цр҃ѧ, і҆ и҆же въсхотѣ̀ въ срд̑ци свое҆мъ соло́монъ творити в꙽ домꙋ гн҃и, и҆ в꙽ домꙋ̀ свое҆мъ, преспѣва́ло е҆сть, ꙗ҆ви́ же сѧ г҃ь соло́монꙋ но́щїю, и҆ рече е҆мꙋ, слы́шахъ моле́нїе твое. і҆ и҆з꙽бра́хъ мѣсто т̂о мнѣ̀ в꙽ домꙋ̀ жрътвъ. а҆ще заключꙋ̀ нб҃о и҆ до́ждъ не и҆злѣе҆тъ, и҆ е҆ще пошлю̀, и҆ повелю̀ кобы́лицамъ пожрѣти зе́млю, и҆ а́ще пошлю̀ гꙋби́тельство на лю́ди моѧ. и҆ а́ще ѻ҆скръбле́ни бꙋдꙋтъ лю́ди моѝ, на ни́х же възва́но е҆сть и҆́мѧ мое. и҆ помолѧтсѧ, и҆ взы́щт̑ꙋ лица̀ мое҆го. и҆ ѻ҆братѧ́тсѧ ѿ пꙋтїи свои҆хъ строп꙽ти́выхъ. и҆ а́зъ ѹ҆слы́шꙋ ѿ нб҃се. и҆ млс̑҇тивъ бꙋдꙋ грѣхомъ и҆хъ і҆ и҆сцѣлю̀ зе́млю и҆хъ. и҆ нн҃ѣ ѻ҆́чи моѝ бꙋдꙋтъ ѿвръсты. и҆ ѹ́ши моѝ бꙋдꙋтъ послꙋшни къ моле́нїю мѣ́ста сего. и҆ нн҃ѣ и҆збра́х꙽ и҆ ѻ҆ст҃ихъ до́мъ се́и да бꙋдетъ и҆́мѧ мое т̂ꙋ въ вѣки, и҆ бꙋдꙋтъ ѻ҆́чи моѝ, и҆ срд̑це мое т̂ꙋ вс̂ѧ дн҃и, тыж̑ а҆ще хо́диши предо мно́ю ꙗ҆́ко ходѝ дв҃дъ ѿц҃ъ твой·

8

И҆ сътвори́ши по всемꙋ̀ ꙗ҆́же повелѣхъ тебѣ̀. и҆ повеле́нїѧ моѧ̀, и҆ сꙋды моѧ̀ съдръжи́ши·

9

И҆ въздви́гнꙋ прс̑҇тлъ цр҃ьства твое҆го, ꙗ҆́коже ѻ҆бѣща́хъсѧ дв҃дꙋ ѿц҃ꙋ твое҆мꙋ гл҃щи, не ѿи҆мет̑сѧ ѿ колѣна твое҆го мꙋжъ, и҆же не бꙋдет̑ нача́лник̑҇ на і҆и҆л҃и, а҆ще же сꙋпоста́ти бꙋдете и҆ ѻ҆ста́вите за́повѣди и҆ повелѣнїѧ моѧ и҆же пред̑ста́вихъ вам̑. и҆ ѿходѧ́ще слꙋж́ите бого́мъ чю́ждим̑ и҆ покло́нитесѧ и҆мъ, и҆стръгнꙋ̀ вас̑҇ ѿ землѧ̀ мое́ѧ кото́рꙋю да́хъ вам̑, и҆ до́мꙋ сего е҆гоже ѻ҆ст҃ихъ, ѿвръгꙋ ѿ лица̀ мое҆го. и҆ преда́мъ е҆го въ при́тчꙋ и҆ въ ѻ҆́бразъ всѣмъ лю́демъ. и҆ до́мъ се́и бꙋдетъ въ при́тчю всм̑ѣ приходѧ́щимъ. и҆ рекꙋтъ ѹ҆жаса́ю҆щесѧ, почто̀ сътворѝ г҃ь та́ко землѝ се́и, и҆ до́мꙋ семꙋ̀, ѿвѣща́ю҆тъ же·

10

И҆же ѻ҆ста́виша г҃а б҃а ѿц҃ъ свои҆хъ, и҆же и҆зведѐ и҆хъ ѿ землѧ̀ е҆гѷпет꙽скїѧ и҆ прїѧ́ша бо́ги чю́ждїи поклони́шасѧ и҆мъ, и҆ празнова́ша и҆мъ сего ра́ди прїидо́ша на них̑ вс̂ѧ сїѧ ѕла́ѧ·