Ostroh Bible❧Друга книга Самуїлова (Друга книга царів), розділ 15

1

И бы́сть по си́хъ, и҆ сътворѝ себѣ̀ а҆весоломъ колесни́ць и҆ ѻ҆рꙋжїе и҆ конѧ̀ събра, и҆ н҃ мꙋжъ текꙋщихъ пред̑ ним̑·

2

И҆ ѹ҆ранѝ а҆весало́мъ и҆ ста̀ на нача́лнѣмъ пꙋтѝ вра́тъ и҆ бы́сть всѧ́къ мꙋж́ъ, ѻ҆ не́мже бы́сть прѧ̀ прїиде пред̑ цр҃ѧ на сꙋ́дъ. и҆ възопѝ к немꙋ̀ а҆весоло́мъ. и҆ рече е҆мꙋ ѿ кое҆го гра́да т̂ы е҆си. и҆ рече е҆мꙋ мꙋ́жъ, ѿ е҆ді́наго колѣ́на і҆и҆л҃ева а҆́зъ ра́бъ тво́и·

3

И҆ рече к немꙋ̀ а҆весоло́мъ, с̂е словеса̀ твоѧ бл҃га и҆ добра̀. и҆ послꙋшаѧй и҆хъ нѣ́сть т̂и ѿ цр҃ѧ·

4

И҆ реч̑҇ а҆весоло́мъ, кто̀ м̂ѧ поста́витъ сꙋдїю̀ въ землѝ над̑ і҆и҆л҃емъ, и҆же къ мнѣ̀ прїидетъ всѧ́къ мꙋ́жъ і҆и҃лев̑҇, и҆мѣѧ́и прю̀ и҆л̂и сꙋдъ. т̂о и҆ ѻ҆правда́ю ѧ҆̀.

5

И҆ бысть е҆гда̀ приближи́тисѧ е҆мꙋ мꙋжъ на поклоне́нїе, и҆ простеръ рꙋкꙋ свою̀ прїѧ́тъ и҆̀, и҆ цѣлова и҆̀·

6

И҆ сътворѝ та́ко а҆весоло́мъ по всемꙋ̀ гл҃ꙋ семꙋ̀ всемꙋ̀ і҆и҆л҃ю, приходѧ́щим̑ на сд̑ꙋ къ цр҃ю, и҆ присвойстве́ны сътворѝ срд̑ца сн҃овъ і҆и҆л҃евъ·

7

И҆ бысть ѿ конца̀, м҃ лѣтъ, и҆ рече а҆весоло́м꙽ къ ѿц҃ꙋ свое҆мꙋ и҆дꙋ̀ нн҃ѣ, і҆ и҆спо́лню мл҃твы моѧ̀, и҆ми́же моли́хсѧ г҃ꙋ въ хевро́нѣ·

8

И҆ми́же мл҃твами моли́сѧ ра́бъ тво́и сы́и въ гев꙽сꙋ́рѣ сѷристемъ гл҃ѧ, аще възвраща́ѧ възврати́тъ м̂ѧ г҃ь въ і҆ерс̑҇ли́мъ и҆ послꙋжꙋ г҃ꙋ·

9

И҆ рече е҆мꙋ цр҃ь и҆дѝ с ми́ром̑, и҆ въста́въ і҆ и́де в꙽ хевро́нъ·

10

И҆ посла̀ а҆весоло́мъ послы̀ въ всѧ́ко колѣ́но і҆и҆л҃ево гл҃ѧ, е҆гда̀ ѹ҆слы́шите трꙋбы рова́ны, т̂о р꙽цѣте ꙗ҆́ко ѹ҆́же цр҃ьствꙋетъ а҆весоло́мъ въ хевро́нѣ·

11

І҆ и҆до́ша съ а҆весоло́момъ, с҃, мꙋжъ нарочи́тых̑ ѿ і҆ерс̑҇ли́ма, і҆ и҆дѧ́хꙋ въ простра́нъстви свое҆мъ, и҆ не разꙋмѣва́хꙋ всѧ́кого гл҃а·

12

И҆ посла̀ а҆весоло́мъ, и҆ призва̀ а҆хитофе́ла галамонѣ́искаго совѣтника двд҃ва·

13

ѿ гра́да е҆мꙋ свое҆го голо́мы, внегда̀ жрътвы своѝ жрѧ́ше, и҆ бы́сть смѧте́нїе крѣ́пко, бѧ́ше б̂о мно́жество людїи, и҆дꙋщихъ съ а҆весоло́момъ·

14

И҆ прїиде нѣ́кто възвѣща́ѧ дв҃дꙋ и҆ гл҃ѧ, ѹ҆́же бы́сть срд̑це всѣ́хъ мꙋ́жїи і҆и҆л҃евь, съ а҆весоло́мом̑ сн҃омъ твоим̑·

15

И҆ рече дв҃дъ всм̑ѣ ѻ҆́троком̑ своим̑ сꙋщим̑ въ і҆ерс̑҇ли́мѣ, въста́нѣте и҆ бѣжим̑ ꙗ҆́ко нѣ́сть на́мъ сп҃се́нїѧ ѿ лица̀ а҆весоло́млѧ, и҆ ѹ҆скори́те да и҆́демъ, да не заста́въ на́съ и҆збїетъ н̂ы, и҆ възы́щетъ на на́съ зло́бы, и҆збїет̑ гра̑ мечемъ·

16

И҆ рѣша ѻ҆́троцы къ цр҃ю, вс̂е е҆ли́ко заповѣ́да г҃ь на́мъ и҆ цр҃ь на́шъ, с̂е м̂ы ѻ҆́троцы твоѝ·

17

І҆ и҆зы́де цр҃ь и҆ ве́сь до́мъ е҆го нога́ми свои́ми, и҆ ѻ҆ста́ви цр҃ь, і҃, же́нъ под̑ло́жнинць храни́ти дом̑·

18

І҆ и҆зы́де цр҃ь и҆ вс̂и ѻ҆́троцы е҆го пѣши, и҆ ста́ша ѿ домꙋ дале́че·

19

И҆ вс̂и ѻ҆́троцы е҆го стрегꙋще и҆дѧ́хꙋ, и҆ вс̂и ѿража́ющїи и҆ вс̂и ѹ҆тѣша́ющїи и҆дѧ́хꙋ с ним̑ и҆ вс̂и геѳѣ́и, х҃, мꙋж꙽ шед̑ше пѣши ѿ геѳа пред̑и҆дѧхꙋ пред̑ лицем̑ цр҃евым̑·

20

И҆ реч̑҇ цр҃ь къ е҆ѳи е҆ѳѣ́инꙋ, почто т̂ы и́деши с на́ми, възврати́сѧ и҆ бꙋ́деши съ цр҃емъ ꙗ҆́ко чꙋжъ е҆си т̂ы, и҆ ꙗ҆́ко пришелъ е҆си т̂ы ѿ свое́ѧ землѧ̀ вче́ра, и҆ днс̑҇ь л̂и и҆схо́диши с на́ми·

21

И҆ а́з꙽ б̂о и҆дꙋ̀ а҆́може и҆дꙋ̀ и҆ т̂ы възврати́сѧ і҆ и҆дѝ, и҆ възврати бра́тїю свою съ собо́ю, и҆ да г҃ь сътворит̑ с тобо́ю млс̑҇ть і҆ и́стиннꙋ·

22

И҆ ѿвѣща̀ е҆́ѳи къ цр҃ю, и҆ рече, жи́въ г҃ь, и҆ жи́въ господи́нъ мо́и цр҃ь, ꙗ҆́ко в не́мже бꙋ́дет̑ господин̑҇ мо́и цр҃ь, лю́бо въ смр҃ти, лю́бо въ жи́зни, т̂ꙋ и҆ а́зъ е҆смь ра́бъ тво́и с тобо́ю·

23

И҆ рече цр҃ь къ е҆́ѳи, грѧ́ди и҆ прїидѝ со мно́ю, и҆ прїиде е҆́ѳи геѳеин̑҇ и҆ цр҃ь и҆ вс̂и ѻ҆́троцы е҆го с ни́мъ и҆ ве́сь народ̑ и҆́же с ни́мъ·

24

Вс̂ѧ же землѧ̀ пла́кашасѧ гла́сомъ вели́кимъ, и҆ вс̂и лю́дїе и҆дꙋщїѝ, пре́иде цр҃ь чрес̑҇ пото́къ ке́дрьскыи, и҆ вс̂и лю́дїе пред̑ лицемъ цр҃евымъ, и҆дѧ́хꙋ пꙋтем꙽ пꙋсты́ннымъ·

25

И҆ с̂е по немъ по́иде садо́къ і҆е҆ре́и, и҆ вс̂и левѷти с ни́м꙽, носѧ́ще кїѻ́тъ завѣта гн҃ѧ ѿ жева́ры, и҆ поста́виша кїѻ́тъ бж҃їи. и҆ а҆вїа҆ѳа́ръ възы́дет̑ и҆ ста̀ дон꙽деже пред̑ста́ша лю́ди и҆дꙋщи и҆з гра́да·

26

И҆ рече цр҃ь къ садо́кꙋ. възвратѝ киѻ҆тъ бж҃їи въ́ град̑, и҆ да ста́нетъ на мѣ́стѣ свое҆мъ. а҆́ще ѻ҆брѣтох̑ бл҃годать пред̑ ѻ҆чи́ма гн҃има, и҆ въз꙽врати́тъ м̂ѧ и҆ пока́жетъ м̂и е҆го и҆ лѣпотꙋ̀ свою̀·

27

И҆ а́ще та́ко речетъ не въсхотѣ́хъ тебѐ. с̂е а҆́зъ е҆смь сътвори́тъ м̂и по бл҃гомꙋ пред̑ ѻ҆чи́ма свои́ма·

28

И҆ рече цр҃ь садо́кꙋ і҆е҆ре́ю. с̂е ты възврати́шисѧ въ́ град̑ с ми́ром̑ и҆ а҆хима́съ сн҃ъ тво́и, і҆ѻ҆а҆наѳа́нъ сн҃ъ а҆виа҆ѳа́ровъ, и҆ дв̂а сн҃а ва́ша с ва́ми·

29

Видѣте же ꙗ҆́ко а҆́зъ вселю́сѧ въ раѻ́тъ пꙋсты́нныи. до́ндеже прїидетъ м̂и вѣ́сть ѿ вас̑҇, сказа́ѧй м̂и ѻ҆ всемъ·

30

И҆ възвратѝ садо́къ и҆ а҆виа҆ѳа́ръ кїѻ́тъ бж҃їи въ і҆ерс̑҇ли́мъ, и҆ поставиша и҆̀ т̂ꙋ, и҆ дв҃дъ въсходѧ́ше въсходом̑ на́ горꙋ е҆леѻ́ньскꙋю. и҆ пла́касѧ покры́вше главꙋ̀ свою, і҆ и҆дѧ́ше бо́сыма нога́ма. и҆ вс̂и лю́дїе и҆же с ни́мъ покрове́нныма глава́ма въсходѧ́ще въсхо́дом̑ пла́кахꙋсѧ·

31

И҆ възвѣсти́ша дв҃дꙋ гл҃юще. а҆хитофе́ль съ смѧтенїемъ съ а҆весоло́момъ, и҆ съ мꙋжи и҆же бѣша с ни́мъ шлѝ. и҆ реч̑҇ цр҃ь да раздрꙋши́тъ совт̑ѣ а҆хитофе́левъ г҃ь б҃ъ мо́и·

32

И҆ б̂ѣ давыдъ грѧды́и къ ро́са, и҆дѣже поклонисѧ б҃ꙋ т̂ꙋ. и҆ с̂е на срѣте́нїе е҆мꙋ и҆зы́де хꙋсїи ста́рецъ. растерѕа́въ ри́зы своѧ̀, и҆ посы́пав꙽ главꙋ̀ свою̀·

33

И҆ реч̑҇ е҆мꙋ дв҃дъ. а҆́ще мине́ши со мно́ю и бꙋдеши м̂и на ѹ҆тѣ́хꙋ·

34

И҆ а́ще во́ град̑ възврати́шисѧ, и҆ речеши а҆весоло́мꙋ. минꙋша бра́тїа твоѧ̀, и҆ цр҃ь за мно́ю минꙋ̀ ѿц҃ъ тво́и, и҆ нн҃ѣ рабѝ твоѝ е҆смы̀ цр҃ю. пощади м̂ѧ жи́ва бы́ти ра́бъ е҆смь бы́лъ ѿц҃а твоег̑҇ тогда̀. и҆ нн҃ѣ а҆́зъ е҆смь тво́и ра́бъ разрꙋши́ши м̂и совт̑ѣ а҆хитоѳе́лов̑҇·

35

И҆ с̂е с тобо́ю та́мо садо́къ и҆ а҆вїа҆ѳа́ръ і҆ере́и. и҆ бꙋдетъ всѧ́къ гл҃ъ, и҆ ꙗ҆́кож̑ слы́шиши и҆зъ ѹ҆стъ цр҃ьскъ, и҆ ска́жеши садо́кꙋ и҆ а҆вїа҆ѳарꙋ і҆е҆ре́е҆ма.

36

И҆ та́мо с ни́ма дв̂а сн҃а е́ю, а҆михас̑҇ сн҃ъ садо́ков̑҇·

37

и҆ѻ҆а҆наѳан̑҇ сн҃ъ а҆вїа҆ѳаровъ. пꙋстите в рꙋкахъ е́ю къ мнѣ всѧ́къ гл҃ъ, и҆же а҆́ще ѹ҆слы́шите·

38

И҆ вни́де хꙋсїи старыи подрꙋгъ двд̑въ въ́ градъ, а҆весоло́мъ тогда̀ вхожда́ше въ і҆ерс̑҇ли́мъ, и҆ а҆хитоѳель с ним̑·