Ostroh Bible❧Друга книга Самуїлова (Друга книга царів), розділ 18

1

И съглѧда̀ дв҃дъ всѣ́хъ людїи сꙋщихъ с ни́мъ. и҆ поста́ви в нихъ ты́сѧщники и҆ со́тники·

2

И҆ посла̀ дв҃дъ г҃ ю ча́сть людїи в рꙋцѣ і҆ѻ҆а́вли. и҆ г҃ ю ча́сть в рꙋцѣ а҆ве́сѣ сн҃ꙋ сарꙋ́инꙋ, и҆ бра́та и҆ѻ҆а́влѧ. и҆ г҃ ю ча́сть е҆ѳи́тꙋ, геѳе́ѻ҆вꙋ. и҆ рече дв҃дъ к лю́демъ. шед̑ше и҆зыидѣте и҆ а́зъ с ва́ми·

3

И҆ вс̂и лю́дїе рѣша не и҆зыидѝ ꙗ҆́ко а҆ще побѣ́гнем. не положа́тъ на на́съ срд̑це. и҆ а҆ще ѹ́мретъ по́лъ насъ не поло́жатъ на на́съ срд̑ца, и҆ гл҃аша е҆мꙋ ты б̂о е҆си въ на́съ, и҆ нн҃ѣ лꙋ́чше ꙗ҆́ко ѻ҆ста́неши въ́ градѣ на по́мощъ на́мъ·

4

И҆ рече и҆мъ цр҃ь е҆же ѹ҆го́дное пред̑ ва́ми сътворю̀, и ста̀ цр҃ь пред̑ вра́ты. и҆ вс̂и лю́дїе и҆схождахꙋ стори́цами, и҆ ты́сѧщами·

5

И заповѣ́да цр҃ь и҆ѻ҆а́вꙋ и҆ а҆ве́сѣ и҆ е҆ѳе́еви гл҃ѧ. пощади́те м̂и ѻ҆́трока мое҆го а҆весоло́ма. и҆ вс̂и лю́дїе слы́шаша за́повѣдь црс̑҇кꙋ е҆гда заповѣ́да всѣмъ кн҃ѕемъ а҆весоло́ма ра́ди·

6

І҆ и҆зыидо́ша вс̂и лю́дїе в дꙋбра́вꙋ, сꙋпротивъ і҆и҆л҃ю. и҆ быс̑҇ бра́нь в дꙋбра́вѣ е҆фре́мли·

7

И҆ падо́ша т̂ꙋ лю́ди і҆и҆л҃еви пред̑ ѻ҆́троки давы́довы. и҆ бы́сть съкрꙋше́нїе вели́ко в то́и дн҃ь. ꙗ҆́ко падо́ша т̂ꙋ ҂к҃, мꙋж́ъ·

8

И҆ бы́сть т̂ꙋ рас꙽сы́пана бра́нь по лицꙋ̀ все́го лꙋ́га. и҆ ѹ҆мно́жисѧ лꙋ́гъ на посѣче́нїе ѿ людїи. па́че не́же посѣче ме́чь в то́и дн҃ь·

9

И҆ побѣжа̀ а҆весоло́мъ пред̑ ѻ҆́троки давы́довы. всѣ́дъ на мща̀ свое. и҆ в꙽бѣже с ним̑ мща̀ в ча́щꙋ лꙋ́га вели́каго. и҆ ѻ҆би́тсѧ е҆мꙋ гла́вны вла́сы дꙋбѣ и҆ пови́се ме́ждꙋ нб҃омъ и҆ земле́ю. м꙽ща́ же под ни́мъ про́иде·

10

И҆ ви́дѣ и҆̀ мꙋжъ е҆ді́нъ. и҆ възвѣсти и҆ѻ҆а́вꙋ и҆ рече. с̂е ви́дѣхъ ви́сѧща а҆весоло́ма на́ дꙋбѣ·

11

И҆ рече и҆ѻ҆а́въ мꙋжеви възвѣсти́вшемꙋ е҆мꙋ. сего̀ л̂и е҆си ви́дѣлъ т̂о почто̀ нѣ́си е҆го ѹ҆би́лъ т̂ꙋ на землѝ, и҆ а́зъ да́лъ т̂и бы́хъ н҃ си́кль сребра̀ и҆ по́ѧсъ е҆ді́нъ·

12

И҆ рече мꙋж́ъ и҆ѻ҆а́вꙋ. а҆ще т̂ы вложи́ши в рꙋ́цѣ моѝ. ҂а҃ си́кль сребра̀. т̂о не възложꙋ̀ рꙋкѝ мое́ѧ на сн҃а цр҃ева, слы́шахомъ б̂о ꙗ҆́ко заповѣ́да цр҃ь въ ѹ́ши тебѣ̀ и҆ а҆ве́сѣ, и҆ е҆ѳїе́ви гл҃ѧ. съблюдѣте м̂и ѻ҆троча́те а҆весоло́ма·

13

Не сътвори́те дш҃и е҆го непра́ведна. поне́же всѧ́ка ве́щь пред̑ цр҃емъ не ѹ҆таи́тсѧ. а҆ т̂ы стои́ши сꙋпроти́въ е҆мꙋ·

14

И҆ рече и҆ѻ҆а́въ с̂е аз̑ начнꙋ̀. а҆ не пребꙋдꙋ пред̑ тобо́ю. и҆ възе́мъ и҆ѻ҆а́въ і҃ стрѣ́лъ в рꙋ́цѣ своѝ. и҆ вонзѐ ѧ҆̀ въ срд̑це а҆весоло́мꙋ. сꙋщꙋ е҆мꙋ е҆ще жи́вꙋ на́ дꙋбѣ·

15

І҆ ѻ҆б꙽стꙋпи́ша, і҃ ѻ҆́трокъ носѧ́щїѝ ѻ҆рꙋжїе и҆ѻ҆а́вле, и҆ ѹ҆би́ша а҆весоло́ма и҆ ѹ҆мори́ша и҆̀·

16

И҆ въстрꙋбѝ и҆ѻ҆а́въ трꙋбо́ю. и҆ възврати́шасѧ лю́дїе не гна́ти въ слѣ́дъ і҆и҆л҃ѧ, ꙗ҆́ко запретѝ и҆ѻ҆а́въ лю́демъ·

17

И҆ взе́мъ и҆ѻ҆а́въ а҆весоло́ма. въве́рже и҆̀ въ про́пас̑҇ вели́кꙋ, и҆ скла̀ над̑ нимъ кꙋ́пꙋ ка́менїѧ вели́кꙋ, и҆ всѝ і҆и҆л҃ьтѧ́не бѣжа́ша на се́ла своѧ̀·

18

А҆весоло́м же прежде жив̑҇ сы́и поста́вилъ б̂ѣ сто́лпъ себѣ̀, въ ѹ҆до́лїи црс̑҇тѣй в не́иже поги́бе. рече б̂о нѣсть м̂и сн҃а на па́мѧть, и҆́мени мое҆го. и҆ нарече сто́лпъ и҆́менемъ свои҆мъ. и҆ нарече е҆го рꙋко́ю а҆весоло́млею е҆сть и҆ до дне́шнѧго дн҃е·

19

И҆ а҆хима́съ сн҃ъ садо́ковъ рече къ и҆ѻ҆а́вꙋ. текꙋ л̂и и҆ възвѣщꙋ цр҃ю ꙗ҆́ко сꙋдѝ са́мъ г҃ь ѿ рꙋкѝ вра́гъ е҆го.

20

И҆ рече и҆ѻ҆а́въ не добро̀ мꙋж́ꙋ възвѣсти́ти дне́сь. н̂о възвѣсти́ши въ дн҃ь дрꙋгїи. а҆ въ дне́шнїи дн҃ь не добро̀ възвѣще́нїе. поне́же сн҃ъ цр҃въ ѹ҆ме́рлъ е҆сть·

21

И҆ рече и҆ѻ҆а́въ хꙋсїи шед̑ повѣ́жъ цр҃ю е҆ли́ко ви́дѣ. и҆ покло́ньсѧ хꙋсїи и҆ѻ҆а́вꙋ і҆ и́де·

22

И҆ приложѝ и҆ е҆щѐ а҆хи́ма сн҃ъ садо́ковъ рещѝ къ и҆ѻ҆а́вꙋ. т̂о чт̂о стою̀, н̂о да и҆ а́зъ текꙋ̀ въ слѣ́дъ хꙋсїѧ́. и҆ реч̑҇ и҆ѻ҆а́въ почто̀ т̂ы хо́щеши тещѝ сн҃е мой. грѧдѝ н̂о нѣ́сть добро̀ възвѣще́нїе нивъчто́же, хо́щеши ты̀ и҆тѝ·

23

И҆ рече а҆хи́ма т̂о что̀ м̂и бꙋдетъ а҆ще текꙋ̀, и҆ рече е҆мꙋ и҆ѻ҆а́в꙽ тецы̀. и҆ теча́ше а҆хи́ма пꙋте́мъ про́стымъ. і҆ и҆зминꙋ̀ хꙋсїю·

24

И дв҃дъ седѣ посредѣ двою вра́тъ. і҆ и҆дѧ́ше стра́жъ, в пола́тꙋ две́рїю къ стенѣ̀, и҆ въздви́гъ ѻ҆́чи своѝ ви́дѣ и҆ с̂е мꙋжъ текїи е҆ді́нъ пред̑ ним̑.

25

И҆ възопѝ стра́ж꙽ и҆ сказа̀ цр҃еви. и҆ реч̑҇ цр҃ь а҆́ще е҆ді́нъ е҆сть бꙋ́детъ възвѣщенїе въ ѹ҆стх̑ѣ е҆го. і҆ и҆дѧ̂ше и҆ды́и и приближа́ѧсѧ·

26

И҆ ви́дѣ стра́жъ мꙋжа дрꙋга́го текꙋща. и҆ възопѝ къ две́ремъ и҆ ре́че. с̂е мꙋ́жъ дрꙋгы́и текїи е҆ді́нъ. и҆ ре́че цр҃ь и҆ то́й е҆сть възвѣща́ѧ·

27

И҆ рече стра́жъ, а҆́зъ ви́дѣхъ тече́нїе пр́ьваго. ꙗ҆́ко тече́нїе а҆хима́са сн҃а садо́кова. и҆ реч̑҇ цр҃ь, мꙋ́жъ бл҃гъ с̂е совѣща́етъ бл҃гыню приходѧ́щꙋю·

28

И҆ възопѝ а҆хима́съ реч̑҇ къ цр҃ю ми́ръ т̂и. и҆ поклони́сѧ цр҃ю пред̑ лицемъ е҆го до землѧ̀. и҆ рече блс̑҇вен̑҇ г҃ь б҃ъ тво́и, и҆же затворѝ мꙋ́жа въздви́жꙋща рꙋки и҆хъ на господи́на свое҆го цр҃ѧ·

29

И҆ рече цр҃ь ми́ръ ѻ҆́трочищꙋ мое҆мꙋ а҆весоло́мꙋ, а҆́ще жи́въ е҆сть. и҆ рече а҆химасъ ви́дѣхъ мно́жество вели́ко веселѧ́щесѧ. внегда̀ ѿпꙋща́ше м̂ѧ и҆ѻ҆а́въ ра́бъ цр҃евъ раба̀ твое҆го, и҆́ного же не разꙋмѣ́хъ ничт̂оже·

30

И҆ рече цр҃ь възвратисѧ и҆ ста́ни зд̂ѣ. и҆ шед̑ съза́дꙋ ста̀, и҆ с̂е хꙋсїи въ слд̑ѣ е҆го прїиде, и҆ реч̑҇ цр҃ю възвѣща́етсѧ господи́нꙋ мое҆мꙋ цр҃ю ꙗ҆́ко сꙋди г҃ь днс̑҇е ѿ рꙋки всх̑ѣ въста́ющих̑ на́ тѧ·

31

И҆ реч̑҇ цр҃ь к хꙋсїѝ мир̑҇ л̂и ѻ҆тро́чищꙋ мое҆мꙋ а҆весоло́мꙋ а҆́ще жив̑҇ е҆сть и҆ рече хꙋсі́и, да бꙋдет̑ ꙗ҆́ко ѻ҆́трочищ꙽, вра́ѕи господи́на мое҆го цр҃ѧ и҆ вс̂и е҆ли́ко их̑ въста́ша на́нь зло́бою·

32

И҆ смѧтесѧ цр҃ь, и҆ взы́де на полатꙋ двор꙽скꙋю и҆ плакасѧ го́рко по а҆весоло́мѣ, и҆ тако реч̑҇ в꙽ плачѝ своем̑ сн҃ꙋ мо́и а҆весоло́ме. сн҃ꙋ мо́и сн҃ꙋ мо́и а҆весоло́ме. кт̂о м̂и дас̑҇ смр҃ть в꙽ тебѐ мѣ́сто, да бых̑ а҆́зъ въ тебѐ мѣ́сто, а҆весоломе сн҃ꙋ мо́и сн҃ꙋ мо́и сн҃ꙋ мо́и а҆весоло́ме·