Ostroh BibleДруга книга Самуїлова (Друга книга царів), розділ 24
Шрифт:
Запис:
1
И приложѝ гнѣ́въ г҃ь, раз꙽горѣтисѧ въ і҆и҆л҃и. и҆ подви́же в ни́хъ дв҃да гл҃ѧ. шед̑ и҆ сочтѝ і҆и҆л҃ѧ і҆ѹ́дꙋ·
2
И҆ реч̑҇ дв҃дъ къ і҆ѻ҆а́вꙋ, кнѧѕю старѣишемꙋ и҆же с ни́мъ. и҆дѝ нн҃ѣ въ всѧ̀ колѣ́на і҆и҆л҃ева і҆ и҆ѹ́дина. ѿ да́на да́же и҆ до верса́вїѧ. и҆ сочтѝ лю́ди. и҆ да ѹ҆вѣмъ число̀ люде́мъ·
3
И҆ рече і҆ѻ҆а́въ къ цр҃ю да приложи́тъ г҃ь б҃ъ тво́и къ люде́мъ твои҆́мъ. ꙗ҆́коже сѧ и҆́мъ стори́цею сꙋгꙋ́бъ ѹ҆мно́жити. и҆ ѻ́чи господи́на мое҆го цр҃ѧ ви́дѣти, и҆ господи́нъ мо́и цр҃ь почт̂о помышлѧ́етъ ѻ҆ словесѝ сем̑·
4
И҆ ѹ҆крѣпѝ сло́во цр҃ь къ і҆ѻ҆а́вꙋ, и҆ къ кнѧѕе́мъ си́лным̑. і҆ и҆зы́де і҆ѻ҆а́въ, и҆ кнѧ́ѕи крѣ́пости пред̑ цр҃ѧ, сочестѝ лю́ди і҆и҆л҃евы·
5
И҆ преидо́ша і҆ѻ҆рдан̑҇, и҆ внидо́ша въ а҆рои́ръ, съ ѻ҆де́снꙋю гра́да, и҆же посре́дѣ дебрѝ га́дїи, и҆ е҆лїезе́ръ·
6
И҆ прїидо́ша в галаа́дꙋ, и҆ въ землю ѳавасо́нъ. и҆ въ ѳо́нъ. и҆ въ да́сꙋ. и҆ внидо́ста въ данида́нъ. и҆ ѻ҆бидо́ста до сидо́на·
7
И҆ пото́мъ прїидо́ста въ маѱар̑҇ ти́рꙋ, и҆ въ всѧ̀ гра́ды гевꙋ́ины. и҆ въ хананеи́ны. і҆ и҆до́ста на ю҆́гъ і҆ѹ́ды, и҆ въ вирса́вїю·
8
И҆ ѻ҆быидо́ста вс̂ю зе́млю, и҆ прїидо́ста въ і҆ерс̑҇ли́мъ. сконча́вше і҃ ю, мс̑҇цъ, и҆ к҃ ма дн҃їи·
9
И҆ да́ст꙽ і҆ѻ҆а́въ число̀ сочте́ныхъ людїи цр҃ю. и҆ бѣ̀ і҆и҆л҃ѧ числомъ. и҃. со́тъ ты́сѧщъ мꙋжъ си́лныхъ держа́щихъ ѻ҆рꙋжїе. и҆ мꙋжъ і҆ѹ́динъ. пѧть со́тъ ты́сѧщъ мꙋжъ боре́цъ·
10
І҆ ѹ҆боꙗ҆́сѧ срд̑це двд҃во. по числꙋ людїи и҆ рече дв҃дъ къ г҃ꙋ съгрѣши́хъ ѕѣ́ло сътвори́хъ гл҃ъ се́и·
11
И҆ н҃нѣ г҃и ѿи҆мѝ ѕло́бꙋ раба̀ свое҆го ꙗ҆ко ѻ҆сꙋетѣх꙽ ѕѣло·
12
И҆ въста̀ дв҃дъ заѹ́тра и҆ сло́во гн҃е бы́сть къ гаа́дꙋ про̑҇ркꙋ въ снѣ гл҃ѧ·
13
Ше́дъ гл҃и къ дв҃дꙋ та́ко гл҃етъ г҃ь. тро́е а҆зъ рекꙋ̀ тебѣ і҆ и҆збере́ши е҆ді́но ѿ и́хъ. и҆ сътворю̀ т̂и·
14
И҆ вни́де га́дъ къ дв҃дꙋ і҆ и҆сповѣ́да е҆мꙋ гл҃ѧ. и҆зберѐ са́мъ себѐ бы́ти чт̂о хо́щеши. прїидꙋтъ г҃, лѣта гла́дъ на́ землю твою и҆л̂и г҃, мс̑҇цы бѣ́гати пред̑ врагѝ твои́ми и҆ бꙋдꙋтъ гонѧ́ще т̂ѧ и҆л̂и г҃, дн҃и сме́рти въ землѝ твое́и бы́ти. нн҃ѣ ѹ҆́бо разꙋмѣ́и и҆ ви́ждь чт̂о ѿвѣща́ю посла́вшемꙋ м̂ѧ·
15
И҆ рече дв҃дъ къ га́дꙋ. тѣ́сно м̂и ѿвсю́дꙋ е҆сть тро́е с̂е. да в꙽падꙋ̀ въ рꙋ́цѣ гн҃и. ꙗ҆́ко мно́ги сꙋть щедроты̀ е҆го ѕѣ́ло. в рꙋцѣ же чл҃чи да не впадꙋ̀. і҆ и҆збра̀ себѣ̀ дв҃дъ са́мъ сме́рть. и҆ дн҃їе жа́твенїи пшени́цы·
16
И҆ дас̑҇ г҃ь сме́рть въ і҆и҆л҃и. ѿ ѹ́тра до ча́са ѻ҆бѣ́днего и҆ нача́сѧ ꙗ҆́зва бы́ти въ лю́дехъ. и҆ ѹ҆мро́ша ѿ людїи гн҃ихъ ѿ дана и҆ до верса́вїѧ, ҂о҃, мꙋжъ·
17
И҆ прострѐ а҆гг҃лъ бж҃їи рꙋкꙋ свою въ і҆ерс̑҇ли́мъ расточи́ти ѧ҆̀, и҆ не преклонѝ г҃ь на ѕло́бꙋ. и҆ рече а҆́гг҃лꙋ расточа́ющемꙋ лю́ди. довлѣ́етъ т̂и нн҃ѣ ѿи҆мѝ рꙋкꙋ твою. и҆ а́гг҃лъ гн҃ь б̂ѣ стоѧ̀ пред̑ гꙋмно́мъ ѻ҆рнѣѧ́ і҆е҆ѷсѣ́ева·
18
И҆ рече дв҃дъ къ г҃ꙋ внегда̀ ви́дѣ а҆́гг҃ла бию́ща лю́ди. и҆ рече а́зъ е҆смь съгрѣши́выи. а҆́зъ е҆смь па́стырь ѕл̂о сътвори́выи. а҆ сїѧ ѻ҆́вца чт̂о сотвори́ша. бꙋ́ди нн҃ѣ рꙋка̀ твоѧ на мн̂ѣ, и҆ на до́мъ ѿц҃а мое҆го·
19
И҆ прїиде гад̑ къ двдꙋ въ дн҃ь то́и. и҆ рече е҆мꙋ възыиди. и҆ поста́ви б҃ꙋ ѻ҆лта́рь въ гꙋмнѣ̀ ѻ҆рнѣѧ́ і҆е҆ѷсѣ́ина·
20
И҆ възы́иде дв҃дъ по гл҃ꙋ га́да про̑҇рка. и҆мъже ѻ҆́бразом̑ заповѣ́да е҆мꙋ г҃ь·
21
И҆ прекло́нсѧ ѻ҆рнїи и҆ ви́дѣ цр҃ѧ и҆ ѻ́троки е҆го въсходѧ́ща вы́ше е҆го. і҆ и҆зы́иде ѻ҆́рна. и҆ поклони́сѧ цр҃ю пад̑ на лицы̀ свое҆мъ на землѝ·
22
И҆ рече ѻ҆́рна. что̀ с̂е ꙗ҆́ко прїиде господи́нъ мои цр҃ь къ рабꙋ̀ свое҆мꙋ. и҆ рече е҆мꙋ дв҃дъ кꙋпи́ти ѹ҆ тебѐ гꙋмно̀ прїидо́хъ. въ созда́нїе ѻ҆лтарѧ̀ бж҃їѧ. да и҆ преста́нетъ ꙗ҆́зва ѿ людїи·
23
И҆ рече ѻ҆́рна къ дв҃дꙋ. да прїиметъ и възнесе́тъ господи́нъ мои цр҃ь. г҃ꙋ б҃ꙋ бл҃гое пред̑ ѻ҆чи́ма свои́ма. с̂е воло́ве въ всѧ̀съжига́емаѧ. и҆ колеса̀ и҆ сосꙋ́ди. волов̑҇ на дрова̀·
24
Вс̂ѧ да́сть ѻ҆́рна цр҃ю. и҆ рече ѻ҆́рна къ цр҃ю, г҃ь б҃ъ твои да блс̑҇витъ тѧ·
25
И҆ рече цр҃ь въ премѣне́нїи възнесꙋ̀ г҃ꙋ б҃ꙋ мое҆мꙋ. и҆ не вознесꙋ̀ вс̂есожига́емыхъ тꙋнѐ·
26
И кꙋпѝ дв҃дъ гꙋмно̀ и҆ волы̀. за н҃, си́кль сребра̀, и҆ сози́жде дв҃дъ ѻ҆лтар̑҇ б҃ꙋ на гꙋмнѣ̀. и҆ възнесѐ вс̂ѧсожига́е҆маѧ. и҆ ми́рнаѧ. и҆ послꙋш́а г҃ь землѧ̀, и҆ ѿѧ́тъ ꙗ҆́звꙋ ѿ і҆и҆л҃ѧ·
27
Коне́цъ в҃ кни́гъ црс̑҇твъ, и҆́мать в себѣ, глв̑҇а, к҃д·
Джерела
