Ostroh BibleДруга книга Самуїлова (Друга книга царів), розділ 23
Шрифт:
Запис:
1
Сїѝ словеса̀ двд҃ва послд̑ѣнїи, вѣрен̑҇ дв҃дъ сн҃ъ і҆ес꙽сеѻв̑҇. и҆ вѣрен̑҇ мꙋ́жъ, е҆го̑ воставѝ х҃а ѿ б҃а і҆а́ковлѧ и҆ бл҃голѣпен̑҇ ѱалом̑никъ і҆и҆л҃евъ. и҆ дх҃ъ гн҃ь во мнѣ̀ гл҃а и҆ сло́во е҆го на ꙗ҆зы́цѣ моем̑·
2
Гл҃етъ б҃ъ і҆и҆л҃евъ мнѣ̀. гл҃а храни́тель і҆и҆л҃евъ прит̑чꙋ рекїи во чл҃цѣх꙽ ка́ко ѹ҆дръжи́те страх̑ бж҃їи ꙗ҆́ко во свѣтѣ бж҃їи заѹ҆́тра и҆ в꙽зы́де слн҃це ѹ҆́тро и҆ не поме́рчет̑ ѿ сїѧ́нїа. ꙗ҆́ко ѿ горы па́жит̑ныѧ ѿ землѧ̀. не та́ко б̂о дом̑ мо́и съ крѣ́постїю. завт̑ѣ б̂о вѣ́чныи положѝ м̂и, ѹ҆гото́ванъ во всѧ́ко вре́мѧ сохранен̑҇. ꙗ҆ко вс̂е сп҃се́нїе моѐ. и҆ вс̂е хотенїе моѐ ѻ҆ г҃ѣ·
3
Ꙗ҆́ко не и҆́мать прозѧ́бнꙋти безакон̑҇ныи. ꙗ҆́ко те́рнъ и҆зострен̑҇, и҆ вс̂и сїѝ. ꙗ҆́ко не въстргнт̑ꙋсѧ рꙋка́ми ни́же мж̑ꙋ трꙋ́дит̑сѧ в них̑. и҆ мно́жество желѣ́за и҆ древа ѿ ко́пїа ѻ҆гнем̑ пож̑гꙋтсѧ, и҆ попалѧт̑сѧ срамото́ю свое́ю·
4
Сїи и҆мена̀ си́лных̑ двд҃вых̑ і҆е҆восѳе́и хананеа́нин̑҇ кнѧз̑ третїи е҆сть. и҆ а҆динон꙽ неѻс̑҇, и҆ се́й ѻ҆бнажѝ ко́пїе своѐ, на и҃, сот̑ воин̑҇ и҆ побѣди въско́рѣ·
5
И҆ по нем̑ е҆лїа҆за́ръ сн҃ъ ѿц҃а бра́та е҆го въ трех̑ си́лных̑ се́и б̂ѣ съ дв҃дом꙽ в сира́не внегда̀ поноси́ти их̑ и҆ноплеме́нником̑. і҆ и҆ноплеме́нницы собра́шасѧ т̂ꙋ на́ брань. і҆ и҆зыидо́ша мꙋжи і҆и҆л҃ви противꙋ лицꙋ̀ и҆хъ·
6
И҆ то́и воста̀. и҆ бѝ и҆ноплемен̑҇ники, дон̑҇деже ѹ҆трꙋди́сѧ рꙋка̀ е҆го, и҆ прильпѐ рꙋка̀ е҆го к꙽ мечꙋ̀. и҆ сътворѝ г҃ь спс̑҇нїе вели́ко въ то́и дн҃ь. и҆же лю́дїе ѻ҆брати́шасѧ въ слд̑ѣ е҆го, то́кмо совлача́ти·
7
И҆ по нем̑ самаїѧ сн҃ъ а҆саи́на а҆рꙋке́искаго. і҆ и҆ноплемен̑҇ницы собра́шасѧ въ ѳирїю. и҆ бѣ т̂ꙋ ча́сть села̀ и҆сполнь лѧща. и҆ лю́дїе бѣжа́ша ѿ лица̀ и҆ноплеме́нникъ·
8
И҆ събраша́сѧ посре́дѣ ча́сти, и҆ брани́ша е҆го. і҆ и҆збѝ и҆ноплеме́никы. и҆ сътворѝ г҃ь сп҃се́нїе вели́ко въ то́й дн҃ь·
9
И҆ снидо́ша тр̂и ѿ триде́сѧт̑ кнѧзе́и, и҆ прїидо́ша въ жа́твꙋ. къ дв҃дꙋ въ верте́пъ ѿдала́м꙽скъ. и҆ чино́ве и҆ноплеме́нникъ, внидо́ша во ѹ҆доль раѳаи҆́ньскꙋю·
10
И҆ дв҃дъ тогда̀ б̂ѣ въ ѻ҆бдеръжа́нїи, и ста́н꙽ б̂ѣ и҆ноплеме́нническъ въ виѳлеѻ́мѣ·
11
И҆ вожажда̀ дв҃дъ, и҆ рече кт̂о мѧ и҆́мать напои́ти ѿ воды̀ рова, и҆же въ виѳлеѻ҆́мѣ при вратѣхъ. ста́нъ же б̂ѣ тогда̀ и҆ноплеменическъ въ виѳлеѻ́ме, и҆ разгна́ша си́лнїи трі́е, ѻ҆пол̑҇че́нїе и҆ноплеме́нникъ, и҆ почерпъша воды̀ ѿ рова виѳлеѻм̑скаго е҆́же ѹ҆ врат̑, и҆ възе́мше прїидо́ша къ дв҃дꙋ, и҆ не хотѧ́ше пи́ти е҆ѧ̀, и҆ помоли́сѧ г҃ꙋ·
12
И рече млс̑҇ть м̂и г҃ь сътворѝ сїю, кро́вь ли с̂е мꙋж́ъ шед̑ших̑ въ дш҃а и҆́хъ пи́ти и҆́мамъ а҆́зъ, и҆ не хотѧ́ше пи́ти е҆ѧ̀, с̂и сотвори́ша три си́лнїи мꙋж́и·
13
И҆ а҆ве́са бра́тъ і҆ѻ҆а́вль сн҃а сарꙋ́ина, се́й б̂ѣ кнѧ́ѕь над̑ третїею ча́стїю, сі́и же въздви́же ѻ҆рꙋжїе своѐ на т҃, мꙋж́ъ ѹ҆ꙗ҆зви́ти, и҆ томꙋ̀ и҆́мѧ е҆сть въ тре́хъ·
14
И҆ ѿ трїи тѣхъ сла́вныи, и҆ бысть имъ вла́стельство, и҆ но до трїех̑ си́хъ до три́жды не до́иде·
15
И҆ ванѣѧ́ сн҃ъ и҆ѿдаев̑҇, мж̑ꙋ то́й мно́г꙽ въ дѣлех̑ ѿ каваса́илѧ, и҆ то́й побѝ дв̂а сн҃а а҆рїи́лѧ моа́в꙽скаго и҆ то́й сни́де и҆ побѝ льва̀ по́средѣ рова в꙽ дн҃ь снѣжен̑҇·
16
И҆ то́й побѝ мꙋжа е҆гѷптѧнина мꙋж́а кра́сна в꙽ рꙋ́кꙋ же е҆гѷп꙽тѧнина б̂ѣ ко́пїе ꙗ҆́ко сто́лпъ, и҆ сни́де к не́мꙋ с па́лицею, і҆ и҆сторже ко́пїе и҆з рꙋ́кꙋ е҆гѷптѧнина, и҆ ѹ҆бѝ и҆ ѻ҆рꙋжїемъ е҆го·
17
Сїѧ сътворѝ ваи҆е҆а́съ сн҃ъ і҆ѻ҆да́евъ, и҆ томꙋ̀ и҆́мѧ въ трех̑ си́лныхъ·
18
И҆ бы́сть над̑ ѻ҆ны̀, л҃, сла́вныхъ, н̂о къ тре́мъ не прїиде, и҆ постави дв҃дъ над̑ стра́жꙋ послꙋ́шати е҆го·
19
І҆ и҆мена̀ си́лных̑ дв҃да цр҃ѧ, а҆саи́ль братъ і҆ѻ҆а́вль, сїи въ тре́хъ десѧтихъ е҆леа҆на́нъ сн҃ъ ѿц҃а бра́та свое҆го ѿ виѳлеѻ́ма·
20
Семо́въ а҆родїи́нъ, хели́съ ѿ е҆лодоѳ꙽ньсїки·
21
І҆и́ра сн҃ъ ѿ киса, а҆ѳекоитьскаго, а҆вїезеръ а҆наѳоѳ꙽скїи, савꙋхе́и и҆же ѿ а҆соѳи́ты, е҆лоѻ҆нъ а҆лони́тьскїи. мове́и и҆же ѿ и҆ѳае҆тоѳи́ты·
22
Є҆́ли сн҃ъ ваа́нь, и҆же ѿ нетофа́ѳитъ. е҆́ѳ꙽ѳи, сн҃ъ а҆рива́нъ ѿ гаваѻ҆́ны сн҃ов̑҇ венїа́минъ·
23
Ваи҆еа́съ, фараѳонит̑скїи ѹ҆́рїи, ѿ налалиге́ѧ·
24
А҆рїил̑҇, сн҃ъ а҆варꙋ́ѳовъ. а҆заѻ́ръ, варсамит̑скїи·
25
Є҆лїа́са, сн҃ъ лавонит̑скїи. васе́и, гони́тъ скїи. і҆ѻ҆а҆ѳа́нъ·
26
Сн҃ъ сама́на а҆рори́тьскаго. а҆хїа́нъ сн҃ъ а҆ретаи́нъ. а҆раѳꙋ́ръскаго·
27
Є҆лифала́ѳъ, сн҃ъ маа҆хїа́вль·
28
Є҆лїа́въ, сн҃ъ а҆хитофе́ль гелоѻ҆́нит̑скаго. а҆са́рѣи, карми́льскїи. тꙋѹ҆ре́мъ, сн҃ъ а҆́свы·
29
И҆га́ла, сн҃ъ и҆а҆фан̑҇. и҆ ваа́н꙽ сн҃ъ, а҆гарїинъ. е҆́лих̑ а҆мани́тъскїи·
30
Хелорѣ́и вироѳїискїи носѧ́и ѻ҆рꙋжїе і҆ѻ҆а́вле, сн҃а сарꙋи҆на·
31
И҆ра́съ е҆ѳ꙽ѳе́ръскїи. гари́въ е҆ферѣ́искїи. и҆ ѹ́рїѧ, ѿ геѳе́искїи·
32
и҆ всѣхъ, л҃, и҆ сед̑мъ·
Джерела
