Ostroh Bible❧Друга книга Самуїлова (Друга книга царів), розділ 5

1

И прїидо́ша вс̂и племе́на і҆и҆л҃еви къ дв҃дꙋ въ хевро́нъ и҆ гл҃аша е҆мꙋ. с̂е кости твоѧ̀ и҆ пло́ть твоа̀ м̂ы е҆смы·

2

И҆ вчера̀ и҆ ѻ҆но́мъ дн҃и. саѹ́лꙋ сꙋщꙋ цр҃ю над̑ на́ми. т̂ы бы́сть въводѧ́и і҆ и҆зводѧ́и і҆и҆л҃ѧ. и҆ рече г҃ь к тебѣ. т̂ы да пасе́ши людѝ моѧ̀ і҆и҆л҃ѧ, и҆ т̂ы да бꙋ́деши во́ждем̑ людем̑ мои́мъ і҆и҆л҃ю. и҆ прїидо́ша вс̂и ста́р꙽цы і҆и҆л҃еви къ цр҃ю въ хевро́нъ. и҆ положи и҆́мъ цр҃ь дв҃дъ завѣт꙽, въ хевро́нѣ пред̑ гм҃ъ, и҆ пома́заша дв҃да на црс̑҇тво над̑ всѣмъ і҆и҆л҃емъ·

3

Бѣ двд̑ъ л҃ ти, лѣтъ, в нѧже црс̑҇твовати е҆мꙋ. и҆ црс̑҇твова, м҃, лѣтъ·

4

И҆ над̑ і҆ѹ́дою. црс̑҇твова̀ в хевро́нѣ, з҃ лт̑ѣ, и҆ мс̑҇цеи, ѕ҃. црс̑҇твова въ і҆ерс̑҇ли́мѣ, л҃г, лѣта, над̑ і҆и҆л҃емъ і҆ и҆ѹ҆де́ею·

5

И҆ ѿи́де дв҃дъ и҆ вс̂и мꙋ́жи и҆же с ни́мъ въ і҆ерс̑҇ли́мъ къ е҆вѷсѣѻ́мъ, живꙋщим̑ тогда̀ на землѝ то́й. и҆ рѣша дв҃дꙋ не въходѝ сѣмо е҆щѐ. ꙗ҆́ко въста́ша хро́мїѝ и҆ слѣпїѝ гл҃ще, ꙗ҆́ко не вни́дет̑ дв҃дъ сѣмо·

6

И҆ прїѧ̀ дв҃дъ вс̂ѧ страны̀ сїѻ́нѧ. с̂е е҆сть град̑ двд̑въ·

7

И҆ реч̑҇ дв҃дъ въ дн҃ь то́й всѧ́къ да ѹ҆бивает̑ е҆вѷсѣ́ина мечем̑. слѣпы́ѧ и҆ хро́мыѧ и҆ ненави́дѧщихъ дш҃а двд҃вы. сего̀ ради рѣша слѣпїѝ и҆ хро́мїѝ не вни́дт̑ꙋ въ до́мъ гн҃ь·

8

И҆ сѣде дв҃дъ въ странѣ̀, и҆ наречесѧ сїи́ град̑ двд҃въ. и҆ създа̀ е҆го гра̑ въѻ҆́коло. и҆ домъ сво́и ѿ кра́ѧ. і҆ и҆дѧ́ше дв҃дъ, и҆ды́и и҆ велича́емъ, и҆ г҃ь вседръжи́тель с ним̑·

9

И҆ древа ке́рдова, и҆ древодѣ́лѧ. и҆ ка́менїю дѣла́телѧ и҆ воздаша дом̑ двд̑ꙋ·

10

И҆ посла̀ хирам̑ цр҃ь ти́рскїи послы̀ к꙽ двд̑ꙋ и разꙋмѣ дв҃дъ, ꙗ҆́ко ѹ҆готови и҆̀ г҃ь на црс̑҇тво въ і҆и҆л҃и. ꙗ҆́ко взѧт̑сѧ цр҃ьство е҆го людїи е҆го ра́ди і҆и҆лѧ·

11

И поꙗ҆́тъ дв҃дъ е҆щѐ же́ны. и҆ под̑ло́жницы ѿ і҆ерс̑҇ли́ма по прише́ствїи е҆го ѿ хевро́на. и҆ бы́ша е҆мꙋ сн҃ове и҆ дще́ри·

12

И҆ сїѧ и҆мена̀ поро́ждшимсѧ е҆мꙋ въ і҆ерс̑҇ли́мѣ. самꙋсъ, и҆ съвавїи, и҆ наѳа́нъ, и҆ соло́монъ·

13

И҆ е҆веа́ръ, и҆ е҆лисꙋ́е, и҆ е҆нафи́къ, и҆ е҆фі́е·

14

І҆ н̂елиса́ма. и҆ е҆лида́е, и҆ е҆лъфала́ѳъ, и҆ сама́е, и҆ е҆сива́ѳъ, и҆ наѳа́нъ, и҆ галомаа́нъ, и҆ е҆ваа́ръ, ѳеиѳꙋс е́лъфалаѳ̑҇ и҆ наге́ѳъ. и҆ нафе́къ, и҆ѻ҆наѳа́нъ, воа҆лима́ѳъ, е҆лифаа́ѳъ·

15

И҆ слы́шаша и҆ноплеме́нницы, ꙗ҆ко пома́засѧ дв҃дъ на црс̑҇тво въ і҆ерс̑҇ли́мѣ. и҆ взыдо́ша и҆ноплеме́нницы и҆щꙋще дв҃да·

16

и҆ слы́шавъ дв҃дъ и҆́де въ страны̀·

17

И҆́ноплеме́нницы же пришед̑ше, и҆ ста́ша̑ въ ѹ҆до́лїи тита́ньстїи·

18

И҆ въпросѝ дв҃дъ г҃а гл҃ѧ. а҆́ще възы́идꙋ къ и҆ноплеме́нникомъ, предасѝ л̂и ѧ҆̀ въ рꙋцѣ моѝ·

19

И҆ рече г҃ь възы́ди. ꙗ҆́ко предаѧ҆̀ преда́мъ и҆ноплеме́ники въ рꙋцѣ твоѝ·

20

И҆ прїиде дв҃дъ с вы́шнѧа страны̀. и҆ побѝ и҆ноплеме́нники т̂ꙋ. и҆ рече дв҃дъ и҆с꙽сѣчѐ г҃ь врагы̀ моѧ̀ и҆ноплеме́нники предо мно́ю. ꙗ҆́коже пресѣка́етъ во́дꙋ. сего̀ ра́ди наречесѧ и҆́мѧ мѣ́стꙋ томꙋ̀ свы́ше сѣкїи·

21

И҆ ѻ҆ста́виша и҆ноплеме́нницы богы̀ своѧ. и҆ взѧтъ ѧ҆̀ дв҃дъ и҆ мꙋжи е҆го. и҆ реч̑҇ съжещѝ ѧ҆̀ во ѻ҆гнѝ·

22

И҆ приложи́ша па́ки прїити и҆ноплеме́нницы. и҆ сташа па́ки на ѹ҆до́лїи тита́ньстѣи·

23

И҆ въпросѝ дв҃дъ г҃а а҆́ще възы́идꙋ къ и҆ноплеме́нникомъ и҆ предаси л̂и и҆́хъ въ рꙋцѣ моѝ, и҆ реч̑҇ е҆мꙋ г҃ь, не въходѝ на срѣтенїе им̑, н̂о ѹ҆клони́сѧ ѿ нихъ, и҆ пождѝ ма́ло бли́зꙋ ѹ҆до́лїи пла́ча·

24

И҆ бꙋ́детъ е҆гда ѹ҆слы́шиши глс̑҇а трꙋса лꙋж́наг̑҇ тогда̀ сни́деши к ни́мъ. ꙗ҆ко тогда̀ и҆зы́детъ г҃ь пред̑ тобо́ю, сѣщи на́ брани и҆ноплеме́нники·

25

И҆ сътворѝ дв҃дъ ꙗ҆́коже заповѣ́да е҆мꙋ г҃ь. і҆ и҆з꙽бѝ и҆ноплемен̑҇ники ѿ гаваѻ́на, даже и҆ до землѝ гази́ры·