Ostroh BibleДруга книга Самуїлова (Друга книга царів), розділ 6
Шрифт:
Запис:
1
И събра дв҃дъ е҆щѐ всѧкꙋю ю҆́ношꙋ ѿ і҆и҆л҃ѧ, ꙗ҆́ко з҃, сотъ ты́сѧщъ·
2
И҆ въставъ і҆ и́де дв҃дъ, и҆ вс̂и лю́дїе и҆же с ни́мъ. и҆ ѿ кнѧ́ѕь і҆ѹ́дин̑҇, на въсхо̑ хол꙽мны́и. ꙗ҆́ко възнестѝ ѿтꙋдꙋ кїѻ́тъ бж҃їи. а҆ в немъ же на нарица́етсѧ и҆́мѧ г҃а си́лнаго, сѣдащаго на херꙋви́мѣ·
3
И҆ възѧ́ша кїѻ́тъ гн҃ь. на ко́лѣхъ но́выхъ, и҆ ѿвезоша и҆̀ ѿ домꙋ̀ а҆минода́влѧ с хол̑҇мꙋ. ѻ҆зїѧ же и҆ бра́тъ е҆го сн҃ове а҆минода́вли. везѧ́хꙋ ко́ла съ кїѻ́том꙽ гн҃им꙽ и҆ братїа е҆го и҆дѧ́хꙋ пред̑ киѻ҆́том꙽ бж҃їим̑·
4
И҆ дв҃дъ и҆ сн҃ове і҆и҆л҃еви и҆дѧ́хꙋ пред̑ гм҃ъ и҆гра́юще въ ѻ҆рга́ны ѹ҆строе́ных̑ въ крѣ́пости и пѣнїих̑ и҆ въ гꙋ́слех̑, и҆ въ свири́лех̑ и҆ в꙽ тим̑панх̑ѣ и҆ въ кѵм̑валх̑ѣ·
5
И҆ прїидо́ша до а҆лоно́на нахо́рска. и҆ прострѐ ѻ҆зі́ѧ рꙋкꙋ свою̀ на кїѻт̑ бж҃їи придръжа́ти. и҆ ꙗ҆́тъ за́нь, ꙗ҆́ко превраща́ше е҆го те́лецъ·
6
И҆ разгнѣ́васѧ гнѣвомъ г҃ь на ѻ҆зїю. и҆ поразѝ и҆̀ т̂ꙋ г҃ь, и҆ ѹ́мре т̂ꙋ ѿ кїѻ́та гн҃ѧ предъ гм҃ъ·
7
И҆ въспечалова̀ дв҃дъ, понеж̑ порази г҃ь пораженїемъ ѻ҆зі́ю. и҆ нарече́сѧ мѣсто т̂о пораже́нїе і҆ѻ҆зі́ино и҆ до сего дн҃е·
8
И҆ ѹ҆боѧ́сѧ г҃а дв҃дъ въ дн҃ь то́й, гл҃ѧ како сни́детъ къ мнѣ̀ кїѻ́тъ гн҃ь. и҆ не хотѧ́ше двд̑ъ да бꙋ́детъ ѹ҆ него̀ кїѻ́тъ завѣта бж҃їа въ́ градѣ двд҃вѣ, н̂о затворї и҆̀ дв҃дъ въ домꙋ̀ а҆ведарїи́нѣ ге́ѳ꙽ѳе·
9
И҆ ста̀ кїѻ́тъ гн҃ь въ домꙋ аведа́ра ге́ѳ꙽ѳе, мс̑҇ць, пѧ́ть. и҆ блс̑҇ви г҃ь вес̑҇ домъ а҆ведарїи́нъ и҆ вс̂ѧ е҆го·
10
И҆ възвѣсти́ша цр҃ю дв҃дꙋ гл҃юще. блс̑҇ви г҃ь до́мъ а҆ведарїи́нъ, и҆ вс̂ѧ е҆го кїѻ́та ради гн҃ѧ. і҆ и҆дѐ дв҃дъ и҆ взѧ̀ кїѻт̑ бж҃їи, и҆з до́мꙋ а҆ведарїи́на. и҆ во́ гра̑ двд҃въ въселѝ и҆̀·
11
И҆ бѣша с ни́мъ несꙋще кїѻ́тъ гн҃ь, сед̑мь по́лкъ наро́да. и҆ жрътва те́лцем̑ и҆ а҆гнѧ́том̑·
12
И҆ дв҃дъ бїѧ́ше въ ѻ҆рга́ны ѹ҆строе́ны пред̑ гм҃ъ, и҆ ѻ҆болче́нъ бы́сть дв҃дъ въ ѻ҆деждꙋ бѣлꙋ, и҆ дв҃дъ и҆ весь дом̑ і҆и҆л҃евъ. несѧхꙋ кїѻ́тъ гн҃ь. съ во́племъ и҆ съ гласомъ трꙋ́бнымъ.
13
И҆ бы́сть кїѻ́тꙋ приноси́мꙋ къ градꙋ двд̑вꙋ. и҆ мельхо́ла дщѝ саѹ́лова призира́ше ѻ҆ко́нцем̑. и҆ ви́дѣ цр҃ѧ дв҃да ска́чꙋща и҆гра́юще пред̑ кїѻ́том̑ гн҃емъ и҆ ѹ҆ничижѝ и҆̀ въ срд̑цы своем̑·
14
И҆ внесо́ша кїѻ́тъ гн҃ь, и҆ поста́виша е҆го на мѣ́стѣ е҆го. посредѣ пола́ты ю҆́же създа̀ дв҃дъ. и҆ възнесѐ двд҃ъ жрътвꙋ пред̑ г҃а, и҆ ми́рнаѧ·
15
И҆ съверши двд҃ъ възносѧ́и вс̂ѧсъж꙽женїѧ и҆ ми́рнаѧ. и҆ блс̑҇ви лю́ди ѻ҆ и́мени гн҃и си́л꙽наго·
16
И҆ раздѣли́въ вс̂ѧ лю́ди и҆ на всю̀ си́лꙋ і҆и҆л҃евꙋ. ѿ да́на даже и҆ до вирса́вїѧ, и҆ ѿ мꙋжъ даже и҆ до же́нъ комꙋждо по ѹ҆крꙋхъ хлѣба. и҆ сковрад̑ныѝ млины̀ и҆ зелїа, ѿ кро́ш꙽вници, і҆ и҆до́ша вс̂и лю́дїе ко́жд̑о в домы̀ своа·
17
И҆ възврати́сѧ дв҃дъ блс̑҇вити до́мꙋ свое҆го. і҆ и҆зы́де мельхо́ла дщ̂и саѹ҆́лова на срѣте́нїе дв҃дꙋ. и҆ блс̑҇ви е҆го и҆ реч̑҇ чт̂о просла́висѧ днс̑҇ь цр҃ю і҆и҃левъ. ꙗ҆́коже ѿкры́сѧ днс̑҇ь пред̑ ѻ҆чи́ма ра́бъ свои҆хъ. ꙗ҆́коже ѿкрыва́етсѧ, ѿкрыва́ешисѧ и҆гра́ющимъ·
18
И҆ рече двд̑ъ къ мельхолѣ. а҆́зъ пред̑ гм҃ъ и҆гра́хъ. и҆ блс̑҇венъ г҃ь, и҆же и҆збра̀ м̂ѧ пач̑҇ ѿц҃а твое҆го. и҆ паче всего до́мꙋ е҆го. ꙗ҆́ко и҆ поста́ви м̂ѧ властели́на над̑ людмѝ е҆го і҆и҆л҃емъ, сего ради и҆гра́ю и҆ плѧшꙋ̀ пред̑ гм҃ъ·
19
И҆ ѿкры́юсѧ е҆ще си́це. и҆ бꙋдꙋ неподо́бенъ пред̑ ѻ҆чи́ма твои́ма и҆ съ ю҆нота́ми с нимиже рече м̂и не провитисѧ·
20
И҆ ѹ҆ мельхо́лы дщ̂и саѹ́ли не бы́сть дѣтища до дн҃е смр҃ти еѧ̀·
Джерела
